Tudi bafike ku dikala ne muoyo mushindu kayi?

‘Kudi Nzambi nkudi mpokolo wa muoyo.’ (Misambu 36:9) Udi witaba bualu ebu anyi? Bantu bakuabu batu bela meji ne: muoyo wa bionso bidiku mmudivuile ku mpukampuka, kabatu bawufuke to. Biobi nanku, tuetu bonso tudi bafike ku dikala ne muoyo ku mpukampuka. Kadi bikalabi ne: Yehowa Nzambi ke uvua mufuke muoyo, bidi bimueneka bushuwa ne: muoyo wetu udi ne tshivuabu bawufukile.a Mona tshidi Bible wamba bua kudi muoyo mufumine ne malu mimpe adi atusaka bua kuitaba tshidiye wamba atshi.

1. Diulu ne buloba ne bionso bidimu biakatuadija mushindu kayi?

Bible udi wamba ne: “Ku tshibangidilu Nzambi wakafuka diulu ne buloba.” (Genese 1:1) Bena mamanya a bia panu ba bungi badi bitaba ne: diulu ne buloba ne bionso bidimu bidi ne ntuadijilu. Mmunyi muvua Nzambi mubifuke? Wakangata nyuma wende muimpe (‘bukole buende buenzeji’) bua kufuka bintu bionso bidi mu tshibuashibuashi, bu mudi mitoto, bikata bia mitoto, ne mabulunge.​—Genese 1:2.

2. Bua tshinyi Nzambi uvua mufuke buloba?

Yehowa ‘kavua mufuke buloba anu bua tshianana to, kadi uvua mubuenze bua bantu basombelapu.’ (Yeshaya 45:18) Yehowa wakenza dibulunge dietu dia buloba edi bua dikale muaba muimpe wa bantu kusombela bua kashidi. (Balayi Yeshaya 40:28; 42:5.) Bena mamanya a bia panu badi bamba ne: buloba mmuaba wa pa buawu. Anu pa buloba ke muaba umuepele udi bantu mua kusomba ne muoyo.

3. Ntshinyi tshidi tshivuija bantu bashilangane ne nyama?

Yehowa mumane kufuka buloba, wakafuka kabidi bintu bidi ne muoyo pa buloba. Wakanji kufuka bikunyibua ne nyama. Pashishe, yeye ‘kubanga kufuka muntu mu tshimfuanyi tshiende.’ (Balayi Genese 1:27.) Ntshinyi tshidi tshivuija bantu bashilangane ne nyama? Bu mudi Nzambi mutufuke mu tshimfuanyi tshiende, tudi mua kumufuana mu ngikadilu, bu mudi dinanga ne buakane. Mmutufuke kabidi ne bukokeshi bua kulonga miakulu, kuanyisha bimfuanyi, ne kunanga misambu. Kabidi tudi bashilangane ne nyama bualu tuetu tudi mua kutendelela Mufuki wetu.

BUELA MU BUONDOKE

Mona malu adi aleja ne: muoyo bavua bawufuke ne mudi malu adi Bible ulonda bua bufuki umvuika makumbane bua kuitaba. Neumone kabidi tshidi ngikadilu idi nayi bantu itulongesha bua Nzambi.

4. Bionso bidi ne muoyo mbifukibue

Batu batumbisha bantu bua bintu bidibu benze bidikija bintu bia mu bufuki. Mpindieu udi mukumbane kuangata butumbi bua bionso bia mu bufuki bidibu batentule abi nnganyi? Tangilayi FILME, pashishe nuandamune lukonko elu.

FILME: Kuitabuja Nzambi (2:43)

• Mbinganyi bidi bantu benze bidibu batentule mu bufuki?

Nzubu yonso eu mbamuenzele plan ne bamuibake kudi muntu. Kadi udi mufuke bintu bionso bidiku ebi mubienze nnganyi? Balayi Ebelu 3:4, pashishe nuandamune nkonko eyi:

• Mbintu kayi bidi Nzambi mufuke bidi bikukemesha?

• Mbia meji bua kuitaba ne: diulu ne buloba ne bionso bidimu bavua babifuke anyi? Bua tshinyi?

Udi mumanye anyi?

Udi mua kupeta biena-bualu ne filme bidi bipetangana ne tshiena-bualu etshi mu site wa jw.org mu tshitupa tshia “Mbidienzekele anyi mbifuka?” ne tshia “Tshidibu bamba bua ntuadijilu wa muoyo.”

“Bulelela, nzubu yonso mmuibaka kudi muntu kampanda, kadi uvua muibake bintu bionso nNzambi”

5. Tshidi Bible wamba bua bufuki ntshilelela

FILME: Katupa ka filme wa Diulu, buloba, ne bionso bidimu bavua babifuke anyi? (3:51)

• Bible udi ulongesha ne: buloba ne bintu bionso bidi ne muoyo pa buloba bavua babifuke mu matuku asambombo a mêba 24 anyi?

• Buebe wewe, mbikumbane bua kuitaba tshidi Bible wamba bua bufuki anyi? Bua tshinyi?

Balayi Genese 1:1, pashishe nuandamune lukonko elu:

• Bena mamanya a bia panu badi bamba ne: diulu ne buloba ne bionso bidimu bidi ne ntuadijilu. Tshidibu bamba atshi tshidi tshipetangana ne tshiudi ufuma ku dibala mu Bible mushindu kayi?

Bamue batu badiebeja ni Nzambi uvua mufuke anu kantu kakese ne mukalekele kandamuka bintu bionso bidiku ebi. Balayi Genese 1:21, 25, 27, pashishe nuandamune nkonko eyi:

• Bible udiku ulongesha ne: Nzambi uvua mufuke kantu kakese ne mukalekele kenda kandamuka mishipa, nyama, ne bantu anyi uvua mubifuke bionso bilondeshile “mishindu” ya muoyo wabi?b

6. Bantu mbifukibua bia Nzambi bia pa buabi

Tuetu bantu tudi bashilangane ne nyama ivua Yehowa mufuke. Balayi Genese 1:26, pashishe nuandamune lukonko elu:

• Bu mudi Nzambi mutufuke mu tshimfuanyi tshiende, mmushindu kayi udi tshipedi tshitudi natshi tshia kunangangana ne kumvuila bakuabu luse tshileja tshidiye?

TSHIA KUKUATA

Yehowa ke uvua mufuke diulu, buloba, ne bintu bionso bidi ne muoyo.

Diambulula

• Ntshinyi tshidi Bible ulongesha bua muakatuadija diulu, buloba, ne bionso bidimu?

• Nzambi uvua mulekele kantu kakese kandamuka bintu bikuabu bionso bidiku ebi anyi uvua mufuke bionso bidi ne muoyo?

• Ntshinyi tshidi tshivuija bantu bifukibua bia pa buabi?

BIA KUTANGILA KABIDI

Mona bintu bidi panu bidi bileja ne: kudi Mufuki.

“Ntshinyi tshidi bintu bidiku bitulongesha?” (Tabulukayi! 9/2006)

Mona mudi tatu mua kumvuija muanende tshidi Bible wamba bua bufuki.

‘Yehowa wakafuka bintu bionso’ (2:37)

Bua kumanya dilongesha dia bintu bidienzekele ni didi dipetangana ne tshidi Bible ulongesha.

“Nzambi uvua mufuke kantu kakese bua kuandamukaku bintu bionso bidi ne muoyo ebi anyi?” (Tshiena-bualu tshia mu jw.org)

Mifuba ya kale idibu bapete muinshi mua buloba ne malu maleja kudi bamanyi ba bia panu bidi bijadika ne: mbafuke muoyo anyi mmulue ku mpukampuka?

Nkonko 5 idi ijuka mu bualu bua kudi muoyo mufumine (broshire)