DIUMVUIJA DIA MVESE YA MU BIBLE

Genese 1:26—“Tuenze muntu mu tshimfuanyi tshietu”

“Pashishe Nzambi wakamba ne: ‘Tuenze muntu mu tshimfuanyi tshietu, mufuanangane netu; bakokeshe mishipa ya mu mâyi ne bifukibua bidi bibuuka muulu ne bimuna ne buloba bujima ne nyama yonso idi idikoka idi yenda pa buloba.’”—Genese 1:26, Nkudiumuinu wa bulongolodi bupiabupia.

“[Nzambi] kuamba ne: ‘Tufuke muntu mufuanangane netu, bua ikale mfumu wa minyinyi ya mu mayi, nyunyi ya mulu, bimuna, bilandadi ne bintu bionsu bidi pa buloba.’”—Genese 1:26, Mukanda wa Mvidi Mukulu (Mishonyi).

Diumvuija dia Genese 1:26

Bantu mbafukibue mu tshimfuanyi tshia Nzambi, mmumue ne: badi mua kupeta ngikadilu ya buena ya Nzambi bu mudi dinanga, luse ne buakane. Ke bualu kayi bantu badi mua kuidikija bumuntu bua Nzambi.

“Nzambi wakamba ne: ‘Tuenze muntu mu tshimfuanyi tshietu.’” Kumpala kua Yehowa Nzambia kufuka muntu anyi tshintu kayi tshionso, wakanji kufuka muanjelu wa bukole wakalua kubikidibua ne: Yezu. Ku diambuluisha dia Yezu, “bintu bikuabu bionso biakafukibua mu diulu ne pa buloba.” (Kolosayi 1:16) Yezu udi ne bumuntu bua buena bua Yehowa, tuamba ne: “udi tshimfuanyi tshia Nzambi udi kayi umueneka.” (Kolosayi 1:15) Ke bualu kayi Nzambi wakamuambila ne: “Tuenze muntu mu tshimfuanyi tshietu.”

“Bakokeshe . . . bimuna ne buloba bujima.” Nyama yoyi ki mmifukibue mu tshimfuanyi tshia Nzambi to. Kabavua bayifuke bua kuikala ne ngikadilu ya buena ya bantu bu mudi dinanga. Kayena nansha ne kondo ka muoyo to. Nansha nanku, Yehowa udi utabelela nyama. Ke bualu kayi wakamba ne: muntu udi ne bua ‘kuyikokesha,’ mbuena kuamba ne: “ikale mfumu” (Mukanda wa Mvidi Mukulu Katolike) anyi ‘kuyitabalela.’ (La Bible. Parole de Vie) Ke bualu kayi, Yehowa mmupeshe bantu mudimu wa kutabelela nyama. (Misambu 8:6-8; Nsumuinu 12:10) Mmusue bua bantu balame buloba ne bidipu bimpe.

Malu adi Genese 1:26 wakuila

Nshapita ibidi ya kumpala ya Genese idi ilonda muyuki wa difuka buloba ne bionso bidipu. Tshifukibua tshionso tshia Yehowa ntshia pa buatshi, kadi muntu ke tshifukibua tshidi tshikemesha bikole. Pakajikijaye kufuka, “wakatangila bintu bionso bivuaye muenze, ne monayi! bivua bimpe be.”—Genese 1:31.

Tangila kafilme kîpi aka, bua kumanya malu a bungi a muyuki wa bufuki.

Ngumvuilu mubi wa Genese 1:26

Ngumvuilu mubi: Bantu balume nkayabu ke badi bafukibue ne mushindu wa kuidikija ngikadilu ya Nzambi.

Bulelela: Muaku “muntu” udi mu nkudimuinu ya bungi ya Bible ya mu Anglais udi mua kufikisha mubadi ku diela meji ne: badi bakula bua bantu balume nkayabu. Kadi muaku wa mu tshiena Ebelu eu udi utangila bantu bonso, balume ne bakaji. Bantu balume ne bantu bakaji badi mua kuidikija bonso ngikadilu ya Nzambi. Badi bonso mua kuanyishibua kudi Nzambi ne kupeta muoyo wa tshiendelele.—Yone 3:16.

Ngumvuilu mubi: Nzambi udi ne mubidi wa buena wetu.

Bulelela: “Nzambi udi Nyuma” mbuena kuamba ne: katuena mua kumulenga anyi kumumona to. (Yone 4:24) Nansha mutu Bible wakula bua mpala, bianza, muoyo ne bitupa bikuabu bia mubidi bia Nzambi, bidi bileja mudi Nzambi mua kumvua anu muntu.—Ekesode 15:6; 1 Petelo 3:12.

Ngumvuilu mubi: Genese 1:26 udi ujadika ne: Yezu ke Nzambi.

Bulelela: Nzambi ne Yezu mbadie malanda makole anu mutu tatu ne muanende, kadi kabena muntu umue to. (Yone 14:28) Bua kumanya malu makuabu, tangila filme wa Yezu Kristo nNzambi anyi? anyi bala tshiena-bualu tshia “Pourquoi Jésus est-il appelé le Fils de Dieu?”

Tangila filme muîpi eu bua kumona kadiosha ka mukanda wa Genese.

a Yehowa ke dîna disunguluke dia Nzambi didi mu Bible. (Misambu 83:18) Bala tshiena-bualu tshia “Yehowa nnganyi?”