Didia edi didi ne mushinga mukole buebe wewe anyi?

NGONDO tshibalubalu udi utokesha buloba bilenga bitambe. Balume 12 bavua basangile ku mesa mu tshibambalu tshia kulu mu nzubu ku Yeruzaleme wa ku kale. Bu muvua Mulongeshi wabu ubanjija difesto dia mushinga mukole, ba kudibo dikumi ne umue badi bateya ntema ya pa buayi ku miaku ya mushinga mukole idiye wamba. Muyuki kampanda udi ulonda ne:

“Yezu [Kristo] wakangata diampa, kunyima kua yeye mumane kuanyisha dianyisha, wakaditshibula, kudipeshaye balongi bende, e kuamba ne: ‘Angatayi, nudie. Etshi tshidi tshileja mubidi wanyi.’ Kabidi, wakangata dikopo ne, kunyima kua yeye mumane kuela tuasakidila, wakabapeshadi, e kuamba ne: ‘Nuayi buonso buenu; bualu etshi tshidi tshileja “mashi anyi a tshiovo,” adi ne bua kumuangalajibua bua ba bungi bua dijimija dia mpekato. Kadi, ndi nnuambila se: Tshiakunua kabidi mala aa a mvinyo too ne ku dituku dinaanua mapiamapia pamue nenu mu Bukalenge bua Tatuanyi.’ Ndekelu wa bionso, kunyima kua bamane kuimba misambo ya butumbi, bakaya ku mukuna wa Olive.”​—Matayi 26:26-30.

Muanda eu wakenzeka kunyima kua dibuela dia dîba mu dituku dia 14 dia ngondo wa bena Yuda wa Nisan mu tshidimu tshia 33 B.B. Yezu ne bapostolo bende bavua bafuma ku dienza difesto dia Pasaka bua kuvuluka dipikudibua dia bena Izalele ku bupika bua bena Ejipitu mu siekele wa 16 K.B.B. Kristo wakipata Yudase Iskariote, eu ukavua pa kumufila mu bianza bia baluishi. Biangatshile apo, anu Yezu ne bapostolo bende 11 balamatshi ba ku mikenji ke bakashala.

Didia edi dia dilolo kadivua dilunguluja dia Pasaka wa bena Yuda nansha. Divua tshintu kampanda tshipiatshipia tshiakavua kubikidibua pashishe ne: nDidia dia Dilolo dia Mukalenge. Bua difesto edi, Yezu wakatumina balongi bende dîyi edi: “Tungunukayi ne kuenza nunku bua kumvuluka.” (Luka 22:19, 20; 1 Kolinto 11:24-26) Bua tshinyi wakamba nenku? Ne mmushinga kayi udi nawu muanda eu wakapitakana kukadi siekele mivule buebe wewe?