Udiku ne bua kutambushibua anyi?

MUNKATSHI mua bidimu bisatu biashadi ebi, bantu batue ku muliyo mujima bakatambushibua kudi Bantemu ba Yehowa. Ebi bidi bileja mwayene wa bantu 824 ku dituku, peshi bantu 4 mu minute 7. Bidi’anu nkuelekeja kua tshisumi tshia malu a Nzambi tshilejilebo mu siekele wa 15 ne 16 anyi?

Tòo, bantu aba ki mbatambuisha ku bukole, kabavua bafikishibue ku dikudimuna mitshima mabumbu mabumbu, peshi ki mbandamune ku dibikila dia mulongeshi kampanda uvua wela mbila ne mpampakenu nansha. Bakatambushibua bualu Yezu Kristo, Mfumu ne Mulombodi wa bena nkristo, wakatuma dîyi bua kuenza nunku. Mbele biidia bia mu nyuma bionso ne balonde mushindu wa kulongeshibua bijadika kudi Yezu ne bitumikila kudi bapostolo bavuaye musungule ne mulongeshe yeye muine.

Kunyima kua dibiishibua diende ku lufu ne kumpala kua dibanda diende mu diulu, Yezu wakatumina balongi bende mêyi aa a ndekelu: “Nunku, ndayi ne nuvuije bantu ba mu matunga wonso balongi, nubatambuishe mu dîna dia Tatu, dia Muana ne dia spiritu munsantu, nubalongeshe mua kutumikila mêyi wonso anakunutumina. Monayi, ndi nenu matuku wonso too ne ku nshikidilu wa bulongolodi bua malu.” (Matayi 28:19, 20) Biangatshile ku tshikondo atshi, anu batismo wa mâyi ke uvua muanyishibue kudi Nzambi.

Mu diumvuangana ne miaku eyi, Bible udi utuambila se: balongi ba kumpala ba Kristo bakalua “bantemu bende mu Yeruzaleme, mu Yudeya mujima ne mu Samariya too ne mu bitupa bia kulekule bia buloba.” (Bienzedi 1:8) Anu muvua Yezu mubimanyishe, mudimu wabu wa dimanyisha lumu luimpe ne dilongesha bantu uvua ne bua kufikisha ku batismo wa bena kuitabuja bavua ne bua kulua pabo balongi bende.

Bua musangu wa kumpala, Mifundu idi yakula bua batismo wa mushindu’eu dituku dia Pentekoste wa tshidimu tshia 33 B.B., ku Yeruzaleme. Dituku adi, mupostolo Petelo “wakimana kulu pamue ne bakuabo dikumi ne umue” ne kuambila musumba uvua mudikungije bualu bua Yezu Masiya. Muyuki udi utuambila ne: muyuki wende ‘wakasompola mitshima yabo,’ ne bakebeja tshivuabo ne bua kuenza. Petelo kubambila ne: “Nyingalalayi, ne yonso wa kunudi atambushibue mu dîna dia Yezu Kristo bua dilekelela dia mpekatu yenu.” Bu tshipeta, “aba bakanyisha dîyi diende ne muoyo umue bakatambushibua ne, dituku adi, anyima pabuipi ne binunu bisatu yakasakidibua.” (Bienzedi 2:14-41) Miyuki idi ilonda idi ishindika se: bangabanga ne kutambushibua, balongi bakanji kuteleja mukenji udi utangila Kristo, bakitabuja lumu luimpe ne bakanyingalala.​—Bienzedi 8:12, 13, 34-38; 10:34-48; 16:30-34; 18:5, 8; 19:1-5.

Mmushindu kayi?

Bushuwa, balongi aba bapiabapia bavua ne bua kutambushibua, kadi, mmushindu kayi? Mpa kubamiamina (mâyi pambidi), mpa kubela (mâyi pa mitu), peshi mpa kubiina (bajima mu mâyi)? Muyuki wa mu Bible udi uleja tshinyi? Bu mudi Yezu mutushile tshilejilu ‘bua tuetu kulonda makasa ende bu mudibio,’ yeye muine wakatambushibua mushindu kayi?​—1 Petelo 2:21.

Bible udi uleja ne: Yezu wakatambushibua mu Yordane, musulu munene wa nanku nanku. Kunyima kua ditambushibua diende, “wakapatuka mu mâyi.” (Mako 1:10; Matayi 3:13, 16) Nunku, bushuwa bavua biine Yezu mu mâyi a musulu wa Yordane. Uvua mutambushibue kudi Yone, uvua mu dikeba diende dia muaba mukumbanyine wa kutambuisha, e kusungula muaba kampanda mu lupongo lua Yordane, pabuipi ne Salime, “bualu kuineku kuvua mâyi a bungi.” (Yone 3:23) Miaku ya mutungu muena Ethiopie idi ileja se: kuinyibua mujima mu mâyi ke mushindu menemene uvua balongi ba Yezu batambuisha bantu. Pa kuandamuna ku dilongesha dia Filipe, wakatua tshikemu ne: “Ke mâyi aa, ntshinyi tshidi tshimpumbisha bua kutambushibua?” Pashishe, tudi tumona bua se: “bakapueka buonso babidi mu mâyi” ne kunyima, “bakapatuka mu mâyi.”​—Bienzedi 8:36-39.

Bilondeshile miyuki ya kale, bena nkristo bavua batambuishangana pabo pa kuina mu mâyi anyi? Eyowa. Bidi mene bisankisha pa kumanya bua se: mu amue matunga, mutshidi musanganyibua majiba manene mibaka bua kuina batambudi. Mu tshikandakanda tshia Ministry, tudi mua kubala ne: “Bijadiki bia bintu bia kale biangula mu buloba bidi bishindika kakuyi mpata se: diinyibua mu mâyi ke mushindu wa pa tshibidilu mutumika nawu bua kutambuisha mu siekele dikumi too ne dikumi ne inayi ya kumpala.” Tshidi tshisakidila ne: “Miyuki ya batismo wa bena nkristo idi mua kulondibua ku diambuluisha dia bibuwa bia nzubu ya kaly ya bena nkristo ba kumpala, ne kabidi ku diambuluisha dia nzubu ya kale masambila itshidi yambuluisha too ne ku lelu’eu. Mazola menzela mu miaba miondoke ivuabo batumika nayi bu nkita ne mu nzubu ya masambila, bimfuanyi bienza ne tupese tua mabue peshi tua bintu bikuabu tuibakila panshi pa nzubu, ku bimana ne ku bisasa, mpingu misonga pa kuondola mabaya peshi biamu ne mazola a mu mikanda ya kale mifunda ku bianza ya Tshiovo Tshipiatshipia bidi bifila mumvuija a pa mutu ku miyuki eyi. . . . Ebi bidi bidiambika pa mutu pa bumanyishi busangana mu mifundu ya balombodi ba Ekleziya (Pères de l’Eglise), bumanyishi budi bujadika ne: kuinyibua mu mâyi kuvua bushuwa mushindu wa pa tshibidilu wa ditambuisha mu Ekleziya wa kale.”

Tshibungu tshia New Catholic Encyclopedia tshidi tshianyisha ne: “Mbimueneke patoke se: mu Ekleziya wa kale, batismo uvua wenzeka pa kuina bantu mu mâyi.” Nunku, kabiena bikemesha pa kusangana mu bikandakanda biena-bualu bu mudi: “Bena katolike badi bafumina ku batismo wa dinyibua mu mâyi” (tshikandakanda tshia The Edmonton Journal, tshipatula mu dia 24 Septembre 1983 ku Canada), “Disekelela dia batismo wa dinyibua mu mâyi kudi bena katolike” (St. Louis Post-Dispatch, dia 7 Avril 1985), “Bena katolike bavule badi basungula batismo wa kuinyibua mu mâyi” (The New York Times, dia 25 Mars 1989), ne “Badi basanka bua kupingana tshiakabidi ku batismo wa kuinyibua mu mâyi” (The Houston Chronicle, dia 24 Août 1991).

Mbua tshipatshila kayi?

Bua tshinyi Yezu uvua mulombe balongi bende bua kutambushibua? Bushuwa, ntshimanyishilu tshikumbanyine tshia dilambula bumuntu buabu ne muoyo umue kudi Nzambi. “Lumu luimpe” luvua ne bua kumanyishibua pa buloba bujima, ne balongi bavua ne bua kupatukila mu “bantu ba mu matunga wonso.” (Matayi 24:14; 28:19) Ebi bidi biumvuija se: Nzambi kavua kabidi ne bua kutumika amu ne ditunga dia bena Yuda nkayadi, divua dia ne bantu bakavua baditshipe kudiye katshia ku tshileledi. Corneille ne bena dîku diende bavua bantu ba kumpalaba bisamba bia bende, peshi bantu kabayi bena Yuda ku tshileledi, bakitaba bulelela budi butangila Yezu ne kutambushibua.

Pa kuinyibua mu mâyi, aba bavua batambushibua bavua baleja se: bavua bafue pa bidi bitangila nsombelu wabu wa kale, wa dienza bionso anu buabu nkayabu. Dipatuka mu mâyi ntshimanyinu tshia se: mpindieu, nebikale ne muoyo bua kuenza disua dia Nzambi ne kuteka dine edi pa muaba wa kumpala mu nsombelu wabu, anu bu muakenza Yezu. (Matayi 16:24) Kutambushibua “mu dîna dia Tatu ne dia Muana ne dia spiritu munsantu” kuvua kuleja se: bavua balonge ne bitabe bulelela budi butangila dionso dia ku mêna aa asatu ne bavua bajingulule tshidi muena dîna. (Matayi 28:19; fuanyikija ne Bienzedi 13:48.) Batismo uvu’anu tshidia tshia kumpala bua kufika ku ditumikila Nzambi ne ku dikolela disua diende.

Kakuena bualu nansha bumu’epele mu Mifundu budi bukankamija lungenyi lua pa malu a Nzambi lutambe kumuangalaka lua se: batismo nnsakramento, difesto dia malu a Nzambi didi dipetesha mushinga​—dianyishibua, bunsantu peshi disanka dia mu nyuma—​kudi eu udi mutambushibue. Tshilejilu, tuvua mua kubala mu mukanda wa papa Eugène 4 utuvua batele mu tshiena-bualu tshishale, pa bidi bitangila batismo ne: “Nsakramento eu udi ne buenzeji bua kulekelela mpekatu yonso, wa ntuadijilu ne ya matuku aa, pamue ne dinyokibua dionso didi difuma ku mpekatu. Nunku, aba badi batambushibue, ki mbenzejibue bua kudiakaja ku mpekatu yabu ya kale nansha; ne biafuabo kumpala kua kuenzabo mpekatu, badi babuela diakamue mu bukalenge bua mu diulu ne badi mua kumona Nzambi.”

Pabi, nansha muvuaye “kayi muenze mpekatu,” Yezu wakatambushibua. (1 Petelo 2:22) Kabidi, bilondeshile Mifundu, muntu udi mua kupeta dilekelela dia mpekatu yende anu ku diambuluisha dia mulambu wa tshia-bupikudi wa Yezu Kristo. Ananias wakasengelela Saul wa ku Tarse ne: “Juka, utambushibue ne udisukule ku mpekatu yebe pa kubila dîna dia [Yezu].” (Bienzedi 22:12-16) Eyowa, lupandu ludi lupetshibua anu ku mashi mapongolola a Yezu ne pa “kubila dîna diende” ne ditabuja.​—Ebelu 9:22; 1 Yone 1:7.

Kadi, netuambe tshinyi bua miaku ya Petelo idi mu 1 Petelo 3:21? Tudi tubalamu ne: “Tshidi tshikumbanangane nabu tshidi tshinupandisha kabidi mpindieu, mbuena kuamba ne: batismo, ki diumushibua dia bukoya bua mubidi, kadi, ndilomba dienza kudi Nzambi bua kondo ka muoyo kempe, ku dibiishibua ku lufu dia Yezu Kristo.” Petelo uvua ufuanyikija batismo ne nsombelu wa Nowa, yeye wakapanduka ku mâyi a mvula wa kabutu. (Mvese wa 20) Pa kuleja ditabuja diende dijima kudi Nzambi, Nowa wakiba mazuwa bua kukuba dîku diende. (Ebelu 11:7) Bia muomumue, pa kuenza midimu ya ditabuja kudi Yehowa Nzambi ne mu ndongoluelu wende bua lupandu, Yezu Kristo, bantu badi mua kupandishibua ku bulongolodi ebu bubi. Badi kabidi ne bua kuenza malu bilondeshile ditabuja edi. Muntu udi wenza dilomba kudi Nzambi bua kondo ka muoyo kempe pa kunyingalala bua mpekatu yende, pa kuela nyima ku njila wende mubi, pa kuditshipa ne muoyo umue kudi Yehowa Nzambi mu disambila. Kadi, mpekatu idi ilekedibua ne lupandu ludi mua kupetshibua ku diambuluisha dia mulambo wa Yezu ne ku dibiishibua diende ku lufu diakamupetesha mushindu wa kufila mushinga wa mulambo eu kudi Nzambi mu diulu.​—1 Petelo 3:22.

Newenze tshinyi?

Utu utantshila Bantemu ba Yehowa kukadi matuku anyi? Imue misangu, ukadi muenze mashintuluka adi akengedibua mu nsombelu webe bua kutumikila mêyi-maludiki a mu Bible, kadi kuena muanji kuangata dipangadika dia kuditshipa kudi Nzambi ne kutambushibua. Pamu’apa udi musue kuenza disua dia Nzambi, kadi muikale utshina se: batismo neavue kukubambidika peshi kukusaka ku bukole. Ke bua tshinyi, bua lupolo lukese, udi musue kuanji kudilamuna ku bujitu ebu. Tshidimu tshiashadi etshi, bantu bapite pa miliyo 11,5 (peshi 11 500 000) bavua babuele mu difesto dia Didia dia Dilolo dia Mukalenge. Pabi, bungi bubandile bua aba bavua badifile mu mudimu wa dimanyisha lumu luimpe munkatshi mua tshidimu atshi buvua buvua bushadile ku bantu miliyo 4,5 (peshi 4 500 000). Ebi bidi biumvuija se: bantu pabuipi ne miliyo muanda-mutekete badi baleja mudibo bangata bulelela bua Nzambi ne mushinga kampanda, nansha mudibo kabayi banji kutambushibua bu Bantemu ba Yehowa. Bushuwa, ku bungi ebu, tudi tubala bana ne bantu bapiabapia badi bafuma ku disankidila mukenji. Kadi, bamue ba kudibo badi badifila pabo mu mudimu wa buambi ne ki mbanji kutambushibua nansha. Nunku, kudi bantu bavule badi bapete dimanya dilelela dia Bible, kadi kabayi banji kubabidila menemene mabenesha adi afuma ku ndongoluelu wa lupandu mutupesha kudi Nzambi pa kutambushibua.

Bumue bualu bua mushinga butudi ne bua kuvuluka budi se: kumanya kua bidi Nzambi utulomba bua kuenza ke kudi kututuadila majitu. “Nunku, bikala muntu mumanye mua kuenza tshidi tshiakane, kadi kayi utshienza, bidi mpekatu buende yeye,” ke mudi Yakobo 4:17 wamba. Yehezekele 33:7-9 udi uleja bua se: eu udi mumanye mêyi ne mamanyisha bia Nzambi udi ne bujitu bua kubitumikila. Nunku, tshidi ne mushinga ntshia kumanya bikalaye munange Nzambi ne muoyo umue ne bikalaye musue bushuwa bua kumulengelela. Muntu udi bushuwa ne dinanga dia mushindu’eu ne ujinga kudia malanda a pa buawu ne Yehowa Nzambi kêna ne bua kudikanda bua kumulambula muoyo wende mujima nansha. Batismo ntshimanyinu patupu tshia diditshipa kudi Yehowa. Ntshidia tshidi tshikengedibua kuela bua kupeta lupandu. Bena kuitabuja ba muoyo mulenga batu’anu batambushibua.​—Bienzedi 8:12.

Matekemena a mpatshi adi Nzambi mulamine bena lulamatu badi baditshipe kudiye mu bulongolodi bupiabupia butshilualua mmapite ne kule masanka a tshitupa tshîpi, nansha mikale a mushindu kayi, adi bulongolodi ebu bubi bua malu bumueneka bu budi bupeteshangana. Ditshina dia muntu didi ditushila muaba patudi tudipuekesha kuinshi kua mushinga tshianza tshia bukole tshia Nzambi. (1 Kolinto 10:22; 1 Petelo 5:6, 7) Bushuwa, tudi tshikondo tshia kudiebeja, anu muakebejabo Filipe kudi mutungu muena Ethiopie ne: “Ntshinyi tshidi tshimpumbisha bua kutambushibua?”

[Tshimfuanyi mu dibeji 7]

Anu bu mutungu muena Ethiopie, udiku pebe udiebeja se: “Ntshinyi tshidi tshimpumbisha bua kutambushibua anyi?”