Dimuangalaja dia butoke pa dikalaku dia Kristo

“Palua Muana wa muntu mu butumbi buende, . . . neatapulule bantu bamue munkatshi mua bakuabu.”​—MATAYI 25:31, 32.

1. Mmunyi mudi bamfumu ba bukua-buena-nkristo bumvuija miaku ya mu Matayi 24:3?

MATUKU asatu kumpala kua lufu lua Yezu, banayi ba ku balongi bende bakasemena kudiye ne kumuebeja ne disuminyina ne: “Utuambile dîba diakumbana malu aa, ne tshimanyinu tshia dilua diebe [pa·rou·siʹa, mu tshiena-Greke], ne tshia nshikidilu wa bulongolodi ebu tshidi tshinyi?” Kukadi siekele mivule, bamfumu ba bukua-bitendelelu ne bafundi ba bukua-buena-nkristo badi bumvuija miaku eyi miambila Yezu mu Matayi 24:3 (Bible wa King James Version) bu adi asua kuamba ne: neamueneke tshiakabidi mu mubidi, ne bukua-bantu buonso nebamumone. Nunku, badi balongesha se: dipingana dia Kristo nedimueneke patoke kudi bantu buonso ne nedikale dia mikukuku. Ke tshidibo babikila ne: ndilua dia Kristo dia tshiakabidi. Kadi, malu aa adibo babambakaja mmalelela anyi?

2, 3. (a) Ndisunguluja kayi didi volime 2 wa mukanda wa Etudes des Ecritures ufila pankatshi pa miaku “dilua” ne “dikalaku”? (b) Tshisamba tshia Yehowa tshiakafika ku disunguluja tshinyi pa bidi bitangila diumvuija dia pa·rou·siʹa wa Kristo?

² Mu 1889, bela manyi ba Yehowa, bu batuadi ba butoke mu siekele wa 19, bakavua bamane kupeshibua ngumvuilu mujalame pa tshilumbu tshia dipingana dia Kristo. Mu volime 2 wa mukanda wa Etudes des Ecritures, dibeji dia 164 ne dia 166, Charles T. Russell, mulombodi wa kumpala wa Watch Tower Bible and Tract Society, wakafunda ne: “Parousia . . . mmuaku udi umvuija dikalaku, ne kawena ne bua kukudimunyibua nansha kakese ne: dilua, mudibo babikudimune mu Bible yetu idi bavule batumika nayi pa tshibidilu . . . Bible wa ‘Emphatic Diaglott,’ nkudimuinu muakanyine wa Tshiovo Tshipiatshipia, udi ukudimuna muaku parousia bu mudibi ne: dikalaku . . . , kadi ki ndilua nansha bualu mbienz’amu bu ukadi pa kufika, kadi ndikalaku, kunyima kua difika diende. [Yezu] wakamba ne: ‘Anu muvuabi mu matuku a Nowa, ke muikalabi kabidi mu matuku a parousia [dikalaku] dia Muana wa muntu.’ Utabalele se: apa, difuanyikija kadiena pankatshi pa dilua dia Nowa ne dilua dia Mukalenge wetu nansha . . . Kadi, didi pankatshi pa tshikondo tshia dikalaku dia Nowa munkatshi mua bantu ‘kumpala kua mvula wa kabutu’ ne tshikondo tshia dikalaku dia Kristo mu bukua-bantu, pafikaye tshiakabidi, ‘kumpala kua kapia’​—mbuena kuamba se: kumpala kua ndululu mipite bukole ya dituku dia Mukalenge [Yehowa] yatuisha tshikondo etshi [tshia dikalaku dia Kristo] ku tshibungubungu.”​—Matayi 24:37.

³ Nunku, tshisamba tshia Yehowa tshia mu siekele wa 19 tshivua tshijingulule biakane se: pa·rou·siʹa wa Kristo kakumueneka patoke, ku mesu kua bantu nansha. Bavua kabidi bajingulule ne: ndekelu wa bikondo bia bantu ba bisamba bia bende neakumbane mu [muvu wa] automne wa 1914. Bu muvua butoke bua mu nyuma buenda buvula, bakajingulula pashishe se: Yezu Kristo uvua mubanjija mu diulu bu Mukalenge wa Bukalenge mu tshine tshidimu tshia 1914.​—Nsumuinu 4:18; Danyele 7:13, 14; Luka 21:24; Buakabuluibua 11:15.

“Dikalaku dia Mukalenge wetu”

4. “Dikalaku dia Mukalenge wetu Yezu Kristo” didi difunkuna tshinyi?

⁴ Nunku, mu tshikondo tshietu, miaku eyi ya mu Bible: “dikalaku dia Mukalenge wetu Yezu Kristo,” idi yumvuija tshinyi? (1 Tesalonike 5:23) Mushikuluji kampanda wa mianda ya mu Bible udi umvuija ne: “dikalaku,” pa·rou·siʹa, “wakalua muaku muanyishibue kudi bavule bua kufunkuna dikumbula dia muntu kampanda wa muanzu munene, nangananga bu mudi mukalenge peshi amperere mu rejon kansanga.” Pa nanku, muaku eu udi ufunkuna dikalaku bu mukalenge dia Mukalenge Yezu Kristo, kubangila mu 1914, tshidimu tshia dibanjijibua diende mu diulu, too ne kunyima kua tshine tshidimu atshi. Nunku, Mukalenge Yezu Kristo udiku mushindu ukena-umueka bua ‘kukokesha munkatshi mua baluishi bende’; udi ukokesha pa kukumbaja midimu mimomekela bua dikumbana dia dîyi-dituma edi dia buprofete. (Musambu wa 110:2) Kukadi bidimu bitue ku 79, bantu pa buloba badi ku buenzeji bua malu adi ajadika dikalaku dikena-dimueneka dia Kristo bu Mukalenge.

5. Mmianda kayi idi yenzeka mu pa·rou·siʹa yakonkonyibua mu biena-bualu bisatu bia dilonga dia tshibejibeji etshi?

⁵ Ku diambuluisha dia mulongolongo eu wa biena-bualu bisatu, netukonkonone bijadiki bia dikema bia malu makumbaja kudi Bukalenge bua Kristo mu tshikondo etshi. Tshia kumpala, netuanji kuakula bua milayi mivule ya mu Bible idi imanyisha mianda ikadi mienzeke peshi idi yenda yenzeka. Pashishe, netuakule bua mudimu munene mukumbaja kudi kasumbu ka mupika wa lulamatu ne wa budimu, udi Yezu utumika nende mu tshikondo etshi tshia dikalaku diende bu Mukalenge. (Matayi 24:45-47) Bua kujikija, netukonkonone muanda udi utangila nshikidilu wa dikema, mbuena kuamba ne: tshikondo tshia “dikenga dinene.” Dîba adi ke dialua Yezu bu Mukumbaji wa malumbuluisha a Yehowa bua kubutula bantu babi ne kusungila bakane. (Matayi 24:21, 29-31) Pa bidi bitangila tshikondo etshi tshia kabutu, mupostolo Paulo mmufunde ne: “Kadi, nuenu badi batata mu dikenga, nenupete diikisha pamue netu tshikondo tshia disokolodibua dia Mukalenge Yezu biangatshile mu diulu ne banjelo bende ba bukole, mu kapia kadi kalakuka, pavuijaye didisombuela pa bantu badi kabayi bamanye Nzambi ne pa aba badi kabayi batumikila lumu luimpe ludi lutangila Mukalenge wetu Yezu.”​—2 Tesalonike 1:7, 8.

Tshimanyinu

6. Ntshimanyinu kayi tshidi ne malu mavule tshidibo basulakaje mu nshapita wa 24 ne wa 25 ya Matayi?

⁶ Kukadi siekele 19, batuadi aba ba butoke, balongi ba Yezu, bakamulomba tshimanyinu kampanda, mbuena kuamba ne: bijadiki bia dikalaku diende mu matuku avua ne bua kulua, tshikondo tshivuaye ne bua kupeshibua bukokeshi bua Bukalenge. Mu diandamuna diende didi difunda mu Matayi nshapita wa 24 ne wa 25, udi ufila tshimanyinu tshidi ne malu mavule, adi buonso buawu enda akumbana dîba ditudi edi pa buloba bujima. Dikumbana dia tshimanyinu etshi ntshijadiki tshisunguluke tshia tshikondo tshia dikenga ne mateta makole. Yezu wakafila didimuija edi: “Nudimuke bua muntu nansha umue kanupambuishi; bualu bavule nebalue pa kutumika ne dîna dianyi, bamba ne: ‘Meme ndi Kristo,’ ne nebapambuishe ba bungi. Nenumvue bakula bua mvita ne bua manunganyi a mvita; nudimuke bua kanukuatshiki buowa. Bualu malu aa adi ne bua kuanji kuenzeka, kadi, nshikidilu ki mmuanji kufika.”​—Matayi 24:4-6.

7. Mmalu kayi a tshimanyinu atudi bamone akumbana biangatshile ku 1914?

⁷ Yezu uvua kabidi mumanyishe se: nekuikale mvita itu kayiyi mianji kubudika katshia too ne ku tshikondo atshi pa buloba bujima. Mu dikumbana dia mulayi eu, ndululu ibidi mmipeshibue dîna dia Mvita ya Kumpala ya buloba bujima, yakenzeka biangatshile mu 1914 too ne mu 1918, Mibidi biangatshile mu 1939 too ne mu 1945. Kabidi, Yezu uvua muambe ne: nekuikale biyole bia nzala ne bikumina mu muaba ne mu mukuabu. Bena nkristo balelela nebakengeshibue bikole. Mu diumvuangana ne mulayi eu, Bantemu ba Yehowa, batuadi ba butoke ba mu tshikondo tshietu etshi, badi bakengeshibua kukadi bidimu makumi muanda-mukulu, eku benda bamanyisha lumu luimpe lua Bukalenge bua Nzambi “pa buloba bujima, bu tshimanyishilu bua matunga wonso.” (Matayi 24:7-14) Mukanda kayi wonso wa Annuaire des Témoins de Jéhovah ùdì upatuka ùdi ujadika se: bitupa ebi bia tshimanyinu bidi bienda bikumbana.

8, 9. (a) Dikalaku dia Yezu bu Mukalenge ntshikondo tshia mushindu kayi? (b) Mulayi wa Yezu ùdì wakula bua ba-Kristo ba dishima ùdi umanyisha tshinyi pa bidi bitangila muaba uvuaye ne bua kusanganyibua ne mushindu uvua dikalaku diende ne bua kuenzeka?

⁸ Bu mudi bukokeshi bua Yezu butuangane pa buloba bujima, ntendelelu mulelela mmumuangalake mu kontina yonso. Dikalaku (pa·rou·siʹa) dia Kristo bu Mukalenge ntshikondo tshia dikontolola buloba bujima. (1 Petelo 2:12) Kadi, kudiku tshimamuende-wa-bukalenge, peshi muaba udi bantu mua kupuila bua kuya kudi Yezu anyi? Yezu wakandamuna ku lukonko elu pa kumanyisha ne: mu dindila dia dikalaku diende, ba-Kristo ne baprofete ba mashimi nebapatuke. Wakafila didimuija edi: “Bianuambilabo ne: ‘Tangilayi, ke yeye [Kristo] eu mu tshipela,’ kanupatuki; ‘tangilayi, udi mu bibambalu bia munda,’ kanuitabi nansha. Bualu, anu bu mudi mupenyi upatuka kudi dîba dipatukila ne ukenka too ne ku rejon ya kudidi dibuelela, ke muikala dikalaku [pa·rou·siʹa] dia Muana wa muntu.”​—Matayi 24:24, 26, 27.

⁹ Kupita muntu kayi yonso pa buloba, Yezu, “Muana wa muntu,” uvua mumanye muaba uvuaye ne bua kusanganyibua pavua tshikondo tshia dikalaku diende ne bua kutuadija. Kavua ne bua kusanganyibua apa, peshi kuaka, anyi mu muaba mukuabu wa pa buawu pa buloba nansha. Kavua ne bua kumueneka mu muaba kampanda mupengame, “mu tshipela” bua se: aba bakeba Masiya baye kumutangila mu musokoko bamfumu ba mbulamatadi wa ditunga kabayi bamanye nansha, ne balongi bende bamone mua kudibidija ku bulombodi buende ne kulongolola ditonkola dia mbulamatadi, diashisha kumuambuluisha bua kulua Mfumu Masiya wa bukua-bantu. Kabidi, kakusokoma mu “bibambalu bia munda,” muikal’amu ba-muabi mua kumanya muaba udiye, ne kakuyi udi mua kubamona, kuenzabo tshifufu ne kuangata mapangadika mu musokoko ne bena diende bua kutonkola mbulamatadi ya bena bulongolodi ebu ne kudiela yeye muine manyi bu Masiya mulaya. Tòo!

10. Mmunyi muvua mipenyi ya butoke bua bulelela bua mu Bible mipatuke pa buloba bujima?

¹⁰ Apo, bualu nansha bumue budi butangila dilua dia Yezu bu Mukalenge, ku ntuadijilu wa dikalaku diende mu Bukalenge, kabuvua ne bua kushala busokoka. Anu muvua Yezu mubimanyishe, mipenyi ya bulelela bua mu Bible idi itungunuka ne kupatuka pa buloba bujima, kumbukila ku rejon ya ku Est too ne ya ku Ouest. Bushuwa, batuadi ba butoke ba mu tshikondo tshietu etshi, mbuena kuamba ne: Bantemu ba Yehowa, badi badileja bikale “butoke bua matunga, bua lupandu [lua kudi Yehowa] lumueneke too ne ku mfudilu kua buloba.”​—Yeshayi 49:6.

Mudimu wa banjelo

11. (a) Mmushindu kayi udibo batumika ne biluilu bia banjelo bua kumuangalaja butoke bua Bukalenge? (b) Ndîba kayi ne mmu tshisumbu kayi muakasangishibua bena mu kasumbu ka blé?

¹¹ Mvese mikuabu idi yakula bua dikalaku dia Yezu idi imuleja mutua munyima kudi biluilu bia banjelo peshi ‘utuma’ biluilu ebi. (Matayi 16:27; 24:31) Mu tshimfuanyi tshia blé ne tshisosa tshibi, Yezu uvua mumanyishe ne: “budimi, mbukua-bantu . . . Bia kunowa, nnshikidilu wa bulongolodi bua malu, ne banowi, mbanjelo.” Kadi, abi kabiena biumvuija se: mu tshikondo tshia dikalaku diende, pavuaye ne bua kupeshibua bukokeshi bua Bukalenge ne muvuadika butumbi, neatumike amu ne banjelo bamanyishi ba mukenji bua kukumbaja midimu pa buloba nansha. Bituadijile mu 1919, ku bulombodi bua Yezu, banjelo bakatuadija kutapulula bena kasumbu ka blé, bela manyi balela ku spiritu bavua pa buloba, ne bavua bamuangalaja kudi ndululu ya Mvita ya Kumpala ya buloba bujima, e kubalongolola bua kukumbaja mudimu mukuabu mu dîna dia Mukalenge. (Matayi 13:38-43) Mu bidimu bia 1920, binunu ne binunu bia bantu bakuabu bakaditeka ku luseke lua Bukalenge bua Nzambi bumana kujadika ne bakedibua manyi a spiritu wa Nzambi. Bakasakidila bela manyi aba ku kasumbu ka bashadile bakavua kuoko. Buonso tshiapamue badi benza kasumbu ka mupika wa lulamatu ne wa budimu mu tshikondo tshietu etshi.

12. Banjelo bakafila diambuluisha ku dikezula dia mushindu kayi, ne ebi biakapatula bipeta kayi bua buloba?

¹² Tshilejilu tshikuabu tshia mudimu wa banjelo mu tshikondo tshia dikalaku dia Yezu kunyima kua dibanjijibua diende mu 1914 ntshifunda mu Buakabuluibua 12:7-9: “Mikaele ne banjelo bende bakaluangana ne dragon, ne dragon ne bende banjelo bakaluangana, kadi, yeye kakatamba bukole, ne kakutshivua kabidi muaba wabu mu diulu. Nenku, dragon munene wakimanshibua, nyoka wa ku tshibangidilu, eu udi ubikidibua ne: Diabolo ne Satana, eu udi upambuisha buonso ba pa buloba; wakimanshibua pa buloba, ne banjelo bende bakimanshibua nende popamue.” Nunku, bu muakakezudibua mawulu, nkushadile anu bua kukezula menemene buloba, budi ne bua kukokeshibua kudi Bukalenge bua kutumbisha dîna dia Yehowa. Mu tshidimu etshi tshia 1993, dimanyisha edi dia kudi Nzambi ditshidi anu ne bukole buadi: “Diakabi kudi buloba . . . bualu Diabolo wapueki kunudi, muikale ne tshiji tshikole, mumanye ne: udi ne tshikondo tshipidile.”​—Buakabuluibua 12:12.

Dibiishibua dia kuya mu diulu

13, 14. (a) Ntshinyi tshidi Mifundu ileja tshivua tshituadije kukumbana biangatshile mu 1918? (b) Ntshinyi tshidi Paulo ne Yone basokolola pa bidi bitangila bashadile bela manyi mu tshikondo tshietu etshi?

¹³ Kudi muanda mukuabu wa dikema udi wenzeka mu tshikondo tshia dikalaku dia Kristo: ntuadijilu wa dibiishibua dia kuya mu diulu. Mupostolo Paulo wakamanyisha ne: bena nkristo bela manyi bavua balale tulu mu lukita katshia kukadi lupolo lule ke bikala ba kumpala ku dibiishibua ku lufu ne kuikala ne muoyo pamue ne Kristo mu bisombedi bia mu diulu. Mu kupita kua bidimu, bijadiki bikadi bifidibue bua kuleja se: mbimueneke ne: muanda eu wakatuadija kukumbana biangatshile mu 1918. Paulo udi ufunda ne: “Mu Kristo buonso nebapingajibue ku muoyo. Kadi, muntu yonso mu mulongo wende, Kristo mamuma a diambedi, pashishe, aba badi ba Kristo mu tshikondo tshia dikalaku diende [pa·rou·siʹa].” (1 Kolinto 15:22, 23) Dibiishibua ku lufu dia bela manyi mu tshikondo tshia dikalaku dia Kristo ndijadikibue mu 1 Tesalonike 4:15-17: “Monayi tshitudi tunuambila ku dîyi dia Yehowa: tuetu ba muoyo, badi bashale ne muoyo too ne ku dikalaku [pa·rou·siʹa] dia Mukalenge, katuakudianjila ne kupita aba bakalala [mu lufu] kumpala nansha kakese . . . Aba bakafua mu buobumue ne Kristo nebabiishibue diambedi. Pashishe, tuetu ba muoyo batshidi bashale ne muoyo, netuambuibue nabo tshiapamue mu matutu bua kusambakena ne Mukalenge mu kapepa; ne nunku, netuikale ne Mukalenge kashidi.” Nunku, nekuikale bela manyi ba Kristo 144 000 bikala mua kupeshibua difutu edi dia dikema.​—Buakabuluibua 14:1.

¹⁴ Anu mudi Paulo ubileja, bena mu bashadile bela manyi batshidi ne muoyo pa buloba lelu’eu, kabakudianjila kubuela mu Bukalenge kumpala kua bena nkristo aba ba lulamatu bela manyi, bafuile ditabuja ne balongi ba kumpala nansha. Kabidi, mupostolo Yone udi wamba bua bela manyi badi bafua mu tshikondo tshietu etshi ne: “Ba diakalenga mbafue badi bafua mu buobumue ne Mukalenge bituadije ku mpindieu. Spiritu udi wamba ne: Eyowa, biikishe bua midimu yabo, bualu, malu akenzabo adi abalonda,” mbuena kuamba ne: mu ngikadilu wabu wa babiishibue ku lufu. (Buakabuluibua 14:13) Ne Paulo pende udi wamba ne: “Monayi, ndi nnumanyisha bualu bunsantu busokoka: buonso buetu katuakulala mu lufu, kadi netukudimunyibue buonso buetu, mu katupa kakese, mu mupodi wa dîsu, pedibua mpungi wa ndekelu. Bualu nebele mpungi, ne bafue nebabiishibue kabatshiyi mua kunyanguka, ne tuetu, netukudimunyibue.” (1 Kolinto 15:51, 52) Ntshishima kayipu tshia dikema!

15, 16. (a) Ntshimfuanyi kayi tshivua Yezu mufile mu Luka 19:11-15, ne mbua kabingila kayi? (b) Mmunyi muakakumbana mulayi eu?

¹⁵ Dituku dikuabu pavuaye ulongesha musumba wa balongi bende pa bidi bitangila Bukalenge bua Nzambi, Yezu wakatumika ne tshimfuanyi kampanda bua kubambuluisha mua kuakaja ngenyi yabo. Tudi tubala mu muyuki ne: “Bavua batshinka se: Bukalenge bua Nzambi bukavua pa kudileja pa dîba adi mene. Nunku, wakamba ne: ‘Muntu kampanda mulela mu dîku dia buneme wakaya ku luendu ku ditunga dia kulekule bua kubanjijibua bu Mukalenge ne pashishe kualukila. Kubikilaye bapika bende dikumi, kubapesha mpalata dikumi ne kubambila ne: “Nuenduluke nayi too ne pangalukila.” . . . Ndekelu wa bionso pakapinganaye, yeye mumane kubanjijibua bu mukalenge, wakatuma dîyi bua kubikilabo bapika abu bavuaye mupeshe mfranga, bua bamumanyishe bivuabo bapatule bu makasa a mushinga mu diendulaka diabo.’”​—Luka 19:11-15.

¹⁶ Yezu ke “muntu” uvua uya mu diulu, “ditunga dia kulekule” kuvuaye ne bua kupeta bukalenge. Ne wakapeta Bukalenge ebu mu 1914. Kunyima kua lupolo lukese, Mukalenge Kristo wakakosa nsambu ne aba bavua badiamba mudibo balongi bende bua kumona mushindu uvuabo bakumbaje bipatshila bia Bukalenge bivuabo babapeshe. Anu bungi bukese bua bena lulamatu ke bakasungudibua bua kuedibua ka-lumbandi ka kudi mfumu’abo: “Wenji bimpe, mupika muimpe! Bu muudi mudileje muena lulamatu mu bikese, angata bukokeshi pa bimenga dikumi.” (Luka 19:17) Nunku, mu tshikondo etshi tshia dikalaku dia Kristo, mudimu muvule wa bumanyishi bua Bukalenge ne utshidi utungunuka uvua ne bua kukumbajibua, ne bavua ne bua kumanyisha malumbuluisha a Nzambi kudi bantu babi, ne bilondeshile bukokeshi buvuaye ne bua kupeshibua, “mupika muimpe” ke uvua ne bua kulombola mudimu eu.

Bumanyishi pa buloba bujima

17. Ndisanka kayi didi mu pa·rou·siʹa?

¹⁷ Ntshinyi tshikuabu tshivua ne bua kuenzeka mu tshikondo etshi tshia pa·rou·siʹa? Bivua ne bua kuikala tshikondo tshia disanka dinene mu mudimu wa dilongesha ne diambuluisha bantu bua kudilongolola bua kumona mua kupanduka ku dikenga dinene ditshilualua. Bena mu “musumba munene” badi belesha bashadile bela manyi maboko mu mudimu eu, badi balua “mikanda ya dianyishila.” (Buakabuluibua 7:9; 2 Kolinto 3:1-3) Paulo udi wakula bua disanka dia banowi padiye wamba ne: “Ditekemena dietu didi tshinyi, anyi disanka peshi tshifulu tshietu tshia kuditumbishila​—bushuwa, ki nnuenu bine anyi?​—kumpala kua Mukalenge wetu Yezu, mu tshikondo tshia dikalaku diende [pa·rou·siʹa] anyi?”​—1 Tesalonike 2:19.

Kudilama bakezuke ne kabayi ba kubandibua

18. (a) Ndisambila kayi dia Paulo didi mu diumvuangana ne pa·rou·siʹa? (b) Mmuenenu kayi utudi ne bua kuleja buonso buetu mu tshikondo etshi, ne mmushindu kayi?

¹⁸ Paulo wakasambila kabidi bua divuijibua bansantu dia aba bavua ne bua kuikala ne muoyo mu tshikondo etshi tshia dikalaku dia Kristo: “Nzambi wa ditalala yeye nkayende anuvuije bansantu. Ne tshieledi tshienu tshia lungenyi ne anyima wenu ne mubidi wenu kabiyi kalema mu bionso, bana betu, bilamibue mushindu ukena-kubamdibua mu tshikondo tshia dikalaku [pa·rou·siʹa] dia Mukalenge wetu Yezu Kristo.” (1 Tesalonike 5:23) Eyowa, lelu’eu, nansha tuetu bena mu bashadile bela manyi peshi bena mu mikoko mikuabu mivulavulayi, ngikadilu wa dieleshangana maboko udi utusuikakaja mu butumikidi bua mikenji bua tuetu kushala bakezuke ne katuyi pà kubandibua mu tshikondo etshi tshia dikema. Bia muomumue, tudi ne bua kuleja lutulu. Yakobo mmufunde ne: “Nunku, bana betu, nuikale ne lutulu too ne ku dikalaku [pa·rou·siʹa] dia Mukalenge. . . . Nukoleshe mitshima yenu, bualu dikalaku [pa·rou·siʹa] dia Mukalenge dikadi pabuipi.”​—Yakobo 5:7, 8.

19. Petelo uvua mutudimuije ku tshinyi pa bidi bitangila pa·rou·siʹa, ne ntshinyi tshitudi ne bua kuenza?

¹⁹ Mupostolo Petelo uvua pende ne bualu kampanda bua kutuambila, tuetu badi ne muoyo mu tshikondo etshi. Mmutudimuija se: nekupatuke baseki, badi bungi kabuyi kubala lelu’eu pa buloba bujima. Petelo udi wamba ne: “Diambedi nudi bamanye muanda eu ne: mu matuku a ku nshikidilu, baseki nebapatuke ne tuseku tuabu, benda bilondeshile nkuka yabo ne bamba ne: ‘Dikalaku diende [pa·rou·siʹa] diakalayabo didi kunyi? Bualu kubangila ku dituku diladile bankambua betu mu lufu, malu wonso adi’anu bu muvuawu menemene ku ntuadijilu wa bufuki.’” (2 Petelo 3:3, 4) Nansha mudiku baseki bavule mu tshikondo tshia dikalaku dia Kristo, tshisamba tshia Yehowa tshidi tshitungunuka ne kuikala butoke bua bukua-bantu, bua lupandu lua bavule.

Nkonko ya diambulula

◻ Pa bidi bitangila pa·rou·siʹa, mmunyi muvua tshisamba tshia Yehowa tshienda tshipeta ku kakese ku kakese butoke?

◻ Mmunyi mudi Matayi 24:4-8 wenda ukumbana?

◻ Ndiambuluisha kayi divua banjelo batuadile Kristo mubanjija?

◻ Ntshishima kayi tshia dikema tshidi tshimueneka tshienda pamue ne pa·rou·siʹa?

◻ Ndisanka kayi didi disunguluja tshikondo etshi, ne mbanganyi badi badilabula?