Tuikale ne mmuenenu muimpe mu tshieledi tshia lungenyi—nshikidilu ukadi pabuipi
“Kadi, nshikidilu wa bintu bionso wasemenyi pabuipi. Nunku, nuikale ne mmuenenu muimpe mu tshieledi tshia lungenyi, ne nuikale batabale mu mmuenenu wa masambila.”—1 PETELO 4:7.
1. (a) Mmunyi muakadishima mfumu kampanda wa malu a Nzambi ne balongi bende? (b) Bu muakapanga amue matekemena kukumbana, nnkonko kayi idi mua kuedibua?
DILOLO edi, mu dîba dia disambila dia nkomenu, ndi mupete dibikila dia kudi Nzambi. Mmungambile ne: bantu 116 000 nebikale ne bua kubanda mu diulu ne nkita ya bantu 3 700 000 neyunzuluke.” Ke muakumvuija mfumu wa Bukenji bua Matuku Atshilualua, dia muladilu wa dituku dia 28 Octobre 1992, mêyi mamba bilondeshile milayi ya tshitendelelu etshi. Kadi, patufikile mu dia 29 Octobre, muntu nansha umue kavua mubande mu diulu ne lukita nansha lumue kaluakunzuluka. Pamutu pa kuambuibua mu diulu, bena Corée aba bavua bitabuja se: Dilumbuluisha dia ku nshikidilu diafiki, bakamona dituku dia 29 Octobre dituadija amu bu makuabu wonso. Ku musangu ne ku musangu, nshikidilu wa bulongolodi ebu udi umanyishibua se: neenzeke dituku kampanda peshi kansanga, pinapo kakuyi tshidi tshienzeka nansha tshimue; kadi aba badi bamanyisha muanda eu kabena bateketa mu maboko. Ntshinyi tshidi bena nkristo ne bua kuenza? Badi ne bua kulekela kuitaba se: nshikidilu udi usemena ne lukasa luonso anyi?
2. Nnganyi wakambila bapostolo bua dituku dia dilumbuluisha mu matuku atshivuavua, ne muanda eu uvua wenzekela mu nsombelu kayi?
2 Bua kuandamuna, tuanjayi kuvuluka tshiakenzeka dimue dituku pavua Yezu ne balongi bende bayukila pa nkayabu. Kuineku, mu distrike dia Kezareya wa Filipoi, ku Nord-Est wa mbuu wa Ngalileya, ne kunyima kuende mukuna mutumbuke wa Hermon, bakamumvua wamba kayi udia mukana ne: nebamushipe. (Matayi 16:21) Kadi, mêyi makuabu a dikema akavua pa kulonda. Kunyima kua yeye mumane kubumvuija se: bua kuikalabo balongi bende badi ne bua kutungunuka ne kuikala ne nsombelu wa didipangisha amue masanka, Yezu udi ubambila ne: “Muana wa muntu udi ne bua kulua mu butumbi bua Tatu’ende, ne banjelo bende, ne dîba adi neafute muntu yonso bilondeshile bienzedi biende.” (Matayi 16:27) Yezu uvua wakula bua dilua dia mu matuku atshivua kumpala. Kadi, musangu eu neikale Mulumbuluishi. Neasangane bantu benda bamulonda ne lulamatu peshi kabayi bamulonda, muntu ne muntu nealumbuluishibue bilondeshile muanda eu. Dilumbuluisha dia Yezu nedishindamene pa bienzedi bia bantu, nansha bikale ne bintu bia mu bulongolodi ebu bungi kayi. Eu mmuanda uvua balongi kabayi ne bua kupua muoyo nansha kakese. (Matayi 16:25, 26) Kabidi, Yezu Kristo yeye muine ke uvua muambile balongi bende bua kuindila dituku dia dilua diende mu butumbi, ne dilumbuluisha.
3. Mmunyi muakaleja Yezu ne: nealue bushuwa?
3 Bualu budi Yezu umanyisha pashishe budi buleja se: nealue bushuwa. Ne dishindika dijima, udi wamba ne: “Bulelela ndi nnuambila ne: ku aba badi bimane apa, bamue kabakufua diambedi kabayi banji kumona Muana wa muntu ulua mu bukalenge buende.” (Matayi 16:28) Mêyi aa akakumbana kunyima kua matuku asambombo. Tshikena-kumona tshia dikema tshia diandamuka dia mpala wa Yezu tshidi tshikuatshisha balongi bende ba pa muoyo buowa. Badi bamona bushuwa mpala wa Yezu ukenka bu dîba, ne bilamba biende bitoka zezeze ne bibalakana. Diandamuka edi divua tshimuenekelu tshia butumbi ne Bukalenge bia Kristo. Ndishindika kayipu dikole dia milayi idi itangila Bukalenge! Ndisakibua kayipu diuwule tente ne bukole bua balongi bua kuikalabo ne mmuenenu muimpe mu tshieledi tshia lungenyi!—2 Petelo 1:16-19.
Bua tshinyi mbia mushinga bua kuikala ne mmuenenu muimpe mu tshieledi tshia lungenyi
4. Pa bidi bitangila dilua diende, bua tshinyi bena nkristo badi ne bua kuikala batabale mu nyuma?
4 Tshidimu tshijima katshianji kukumbana, tudi tusangana Yezu musombe pa mukuna wa Olive, musangu eu kabidi, wenda uyukila ku luseke ne balongi bende. Padiye utangila tshimenga tshia Yeruzaleme, Yezu udi umvuija muanda wikala tshimanyinu tshia dikalaku diende mu matuku atshivuavua, pashishe udi ufila didimuija edi: “Nunku, nushale batabale, bualu kanuena bamanye dituku didi Mukalenge wenu ulua.” Balongi bende badi ne bua kutungunuka ne kuikala batabale, bualu tshikondo tshia dilua diende ki ntshimanyike. Badi ne bua kuikala badilongolole mu dindila diabo edi.—Matayi 24:42.
5. Mmunyi mutudi mua kufuanyikija dikengedibua dia kuikala batabale?
5 Pa bidi bitangila mushindu wenzeka dilua diende, Mukalenge mmufuanangane ne muibi. Ke padiye usakidila ne: “Kadi, numanye ne: bu mfumu wa nzubu mudianjile kumanya dîba divua muibi ne bua kulua, uvua mua kushala mutabale ne kavua mua kulekela babumbula nzubu wende nansha.” (Matayi 24:43) Muibi katu umanyisha mfumu wa nzubu dîba didiye ulua kuiba nansha; tshingoma tshiende tshinene tshidi kujikila. Pa nanku, mfumu wa nzubu udi ne bua kuikala mutabale dîba dionso. Kadi, ditabala dikole dia muena nkristo wa lulamatu ki ndiashila pa ditshina dia njiwu nansha. Apo, didi difuma ku dindila dikole dia dilua dia Kristo mu butumbi buende bua kutuadija Mileniume wa ditalala.
6. Bua tshinyi tudi ne bua kuikala ne mmuenenu muimpe mu tshieledi tshia lungenyi?
6 Nansha tuetu mua kutabala mushindu kayi, katuena mua kutshinka nansha kakese dituku dilelela didi Yezu ne bua kulua. Yezu wakamba ne: “Pa nanku, nuenu penu nuikale bamane kudilongolola, bualu Muana wa muntu udi ulua pa dîba dinudi kanuyi bamanye.” (Matayi 24:44) Ke bualu kayi bidi bikengedibua bua tuetu kuikala ne mmuenenu muimpe mu tshieledi tshia lungenyi. Bikala muena nkristo mua kusakibua ku diela meji se: Kristo kakulua dimue dituku, pamu’apa dituku adi, ke dituku menemene dia dilua diende. Bushuwa, ku kale, bena nkristo ba lulamatu, ba ngenyi milenga bakateta ne muoyo umue mua kumanyisha dîba divua nshikidilu ne bua kulua. Kadi, mêyi a Yezu adi alonda aa akamueneka malelela ku musangu ne ku musangu: “Pa bidi bitangila dituku adi ne dîba adi, muntu nansha umue ki mmubimanye, nansha banjelo ba mu mawulu peshi Muana wa muntu, kadi, amu Tatu nkayende.”—Matayi 24:36.
7. Bua kuikala balongi ba Kristo, tudi ne bua kuikala ne nsombelu kayi?
7 Tudi ne bua kufika ku nkomenu kayi? Ng’eu wa se: bua kuikala balongi ba Kristo, tudi ne bua kulama dîba dionso lungenyi lua se: nshikidilu wa bulongolodi ebu bubi ukadi pabuipi menemene.
8. Mu matuku a ntuadijilu wa buena nkristo, ntshinyi tshivua tshisunguluja bena nkristo?
8 Mmuenenu wa mushindu’eu ng’utu nende bena nkristo matuku wonso, anu mudi bashikuluji ba mianda ya kale ne bashikuluji ba mianda ya mu Bible babitabuja. Tshilejilu, bafundi ba Nouveau Testament du traducteur (angl.), muinshi mua muaku “Dituku” ku ndekelu mu mumvuija a miaku mikole peshi ya kale, mbafunde ne: “Bena nkristo ba mu tshikondo tshia D[ipungila] D[ipiadipia] bavua bindile Dituku (mbuena kuamba ne: dîba kampanda) divua bulongolodi ebu ne malu abu wonso mabi ne manyanguke ne bua kubutudibua ne dikala Yezu ne bua kupingana pa buloba bua kulumbuluisha bantu buonso, kubanjija bulongolodi bupiabupia bua ditalala ne kutuadija bukokeshi buende pa bukua-bantu buonso bu Mukalenge.” Encyclopédie britannique udi pende ujadika ne: “Dimuangalaka dia dikema dia buena-nkristo pa buloba bujima ndifumine nangananga ku dindila dia tshikondo tshia nshikidilu, tuambe ne: dindila dia dipingana dia Kristo dikadi pabuipi menemene. Bua muena nkristo, kuindila tshikondo tshia nshikidilu kakutu kumvuija kujinga patupu mu lulengu ne mutshima kulukulu dilua dia Bukalenge bua Nzambi nansha.”
Diumvuija dia mmuenenu muimpe mu tshieledi tshia lungenyi
9. Nansha muvuaye kayi mujingulule malu wonso pa bidi bitangila mudimu wa Masiya, ndishindika kayi divu’amu Petelo mulame?
9 Bidimu bitue ku 30 kunyima kua diyukila dia bulunda pankatshi pa Yezu ne balongi bende ba pa muoyo, mupostolo Petelo kavua mupungile bua kuindila dilua dia nshikidilu to. Nansha muvua ku ntuadijilu, yeye muine ne balongi nende bikale ne ntupakanyi pa mudimu wa Masiya, Petelo uvua mulame dishindika dia se: dinanga ne bukole bia Yehowa bivua bishindika dikumbana dia ditekemena diabo. (Luka 19:11; 24:21; Bienzedi 1:6; 2 Petelo 3:9, 10) Pa kuamba ne: “Nshikidilu wa bintu bionso ukadi pabuipi,” Petelo udi umanyisha lungenyi ludi lusanganyibua mu Mifundu yonso ya tshiena-Greke ya bena nkristo. Pashishe, udi udimuija bena nkristo nende ne: “Nunku, nuikale ne mmuenenu muimpe mu tshieledi tshia lungenyi, ne nuikale batabale mu mmuenenu wa masambila.”—1 Petelo 4:7.
10. (a) Kuikala ne mmuenenu muimpe mu tshieledi tshia lungenyi kudi kumvuija tshinyi? (b) Bua kuangata malu wonso bilondeshile diumvuangana didi pankatshi pawu ne disua dia Nzambi, bidi bikengela tshinyi?
10 Kuikala ne “mmuenenu muimpe mu tshieledi tshia lungenyi” kakuena kumvuija kuikala ne lungenyi lutue bilondeshile dimanya dia bena mu bulongolodi ebu to. Yehowa udi wamba ne: “Nenjimije menemene meji a bena meji ne lungenyi lua bantu bena mukanda nenduimanshe menemene kule.” (1 Kolinto 1:19) Muaku udi Petelo mutumike nawu udi mua kumvuija “kuikala muena mmuenenu wa pankatshikatshi mu tshieledi tshia lungenyi.” Mmuenenu eu wa pankatshikatshi wa mu nyuma mmusuikakaja ku ntendelelu wetu. Nunku, bu mutudi ne mmuenenu wa pankatshikatshi mu tshieledi tshia lungenyi, tudi tuangata malu bilondeshile diumvuangana diawu ne disua dia Yehowa; tudi tusunguluja malu adi ne mushinga ne malu a patupu. (Matayi 6:33, 34) Bu mukadi nshikidilu pabuipi menemene, katuena tudifila mu nsombelu wa disalu; katuena kabidi tupanga kutabalela mianda ya tshikondo etshi tshitudi ne diumvuija diayi nansha. (Fuanyikija ne Matayi 24:37-39.) Kadi, tudi balombodibue kudi dibenga kunekesha ne mmuenenu wa pankatshikatshi mu ngelelu wetu wa meji, dikokela bukole budi butusaka ku dijinga tshintu kampanda, ne bienzedi bietu, ne bionso ebi, diambedi bilondeshile mmuenenu wa Nzambi (“batabale mu mmuenenu wa masambila”) ne pashishe, pa kutabalela muntu netu (“bikale ne dinanga diondoke bamue bua bakuabu”).—1 Petelo 4:7, 8.
11. (a) Kuikala “muvuijibue mupiamupia mu bukole budi buinyika tshieledi [tshietu] tshia lungenyi” kudi kumvuija tshinyi? (b) Mmunyi mudi bukole bupiabupia bua tshieledi tshia lungenyi butuambuluisha bua kuangata mapangadika mempe?
11 Bua kuikala ne mmuenenu muimpe mu tshieledi tshia lungenyi, tudi ne bua kuikala “bavuijibue bapiabapia mu bukole budi buinyika tshieledi [tshietu] tshia lungenyi.” (Efeso 4:23) Bua tshinyi kuvuijibua bapiabapia? Bualu, bu mutudi bapiane bumuntu bukena-bupuangane ne bu mutudi banyunguluka kudi bintu bia mpekatu, tshieledi tshietu tshia lungenyi ntshikokesha kudi bukole kampanda budi buluisha ngikadilu wa mu nyuma. Bukole ebu budi busaka ngenyi yetu ne bukole buetu budi butusaka ku dijinga dinekesha dia bintu bia ku mubidi ne ku buiminyi. Pa nanku, padi muntu kampanda ulua muena nkristo, udi dijinga ne bukole bupiabupia, peshi mmuenenu mukokeshi wa mikuabu yonso, budi ne bua kuikala busaka ngenyi mu njila muimpe—njila wa mu nyuma—ku didima mmuenenu wa didipangisha amue masanka. Nunku, biamueneka dikengedibua dia kuenza disungula, tshilejilu: mu mianda ya malonga, ya mudimu wa ku mubidi, dibidija mubidi, dijikija dia lutetuku, mvuadilu ne bikuabu, tshiidia tshia kumpala tshielaye netshikale tshia kukonkonona muanda, ki mbilondeshile mmuenenu wa ku mubidi ne wa buiminyi, kadi, wa mu nyuma. Mmuenenu eu mupiamupia neamuambuluishe bua kuangata mapangadika ne mmuenenu muimpe mu tshieledi tshia lungenyi, eku mumanye se: nshikidilu ukadi pabuipi.
12. Mmunyi mutudi mua kushala “bakole mu ditabuja”?
12 Bua kuikala ne mmuenenu muimpe mu tshieledi tshia lungenyi, bidi bikengela kuikala mukole mu nyuma. Mmunyi mutudi mua kushala “bakole mu ditabuja”? (Tito 2:2) Pa kudiisha tshieledi tshietu tshia lungenyi ne mishindu milenga ya biakudia. (Yelemiya 3:15) Tudi ne bua kudia ku musangu ne ku musangu bulelela budi busanganyibua mu Dîyi dia Nzambi; ku diambuluisha dia buenzeji bua spiritu munsantu, kulonga eku nekutuambuluishe bua kulama dikandamana dietu dia mu nyuma bua kubenga kutenkakajibua. Nunku, nansha bikale mu didilongela dia pa nkayetu, mu dipatuka mu mudimu wa budimi, mu dienza masambila, ne mu ditantshila bena nkristo netu, bidi bikengela kuenza bionso pa tshibidilu.
Mushindu udi mmuenenu muimpe mu tshieledi tshia lungenyi utukuba
13. Mmunyi mudi mmuenenu muimpe mu tshieledi tshia lungenyi utuepula bua kuenza tshilema kampanda, peshi muanda mubule meji?
13 Mmuenenu muimpe mu tshieledi tshia lungenyi udi mua kutuepula ku dienza tshilema kampanda, peshi muanda kansanga mubule meji udi mua kutupangisha muoyo wa kashidi. Mmushindu kayi udibi mua kuenzeka? Mupostolo Paulo udi wakula bua “mukenji wa tshieledi tshia lungenyi.” Bua aba badi bakole mu ditabuja, mukenji eu wa mu tshieledi tshia lungenyi mmulombola kudi tshintu kampanda mudiwu usankila, mbuena kuamba ne: “mukenji wa Nzambi.” Bushuwa, “mukenji wa mpekatu” udi uluisha mukenji wa mu tshieledi tshia lungenyi. Kadi, muena nkristo udi mua kutshimuna [mvita eyi] ne diambuluisha dia Nzambi.—Lomo 7:21-25.
14, 15. (a) Mmakole kayi abidi adi aluishangana bua kukokesha tshieledi tshia lungenyi? (b) Mmunyi mutudi mua kutshimuna mvita eyi mu tshieledi tshia lungenyi?
14 Paulo udi utungunuka pa kuleja dishilangana dia dikema didi, ku lumue luseke, pankatshi pa tshieledi tshia lungenyi tshikokesha kudi mubidi wa mpekatu, tshidi tshishindamene pa nsombelu wa didisankisha-nkaya, ne ku lukuabu luseke, tshieledi tshia lungenyi tshilombola kudi spiritu wa Nzambi, ne tshine etshi ntshishindamene pa nsombelu wa didipangisha amue masanka mu mudimu wa Yehowa. Mu Lomo 8:5-7, Paulo mmufunda ne: “Aba badi mu buobumue ne mubidi badi bajalamija bieledi biabu bia lungenyi pa bintu bia ku mubidi, kadi aba badi mu buobumue ne spiritu [badi babijalamija] pa bintu bia mu nyuma. Bualu, dijalamija tshieledi tshia lungenyi pa bintu bia mubidi didi diumvuija lufu, kadi dijalamija tshieledi tshia lungenyi pa bintu bia mu nyuma didi diumvuija muoyo wa ditalala; bualu, dijalamija tshieledi tshia lungenyi pa bintu bia ku mubidi didi diumvuija kuikala lukuna ne Nzambi, bualu kadiena dikokela mikenji ya Nzambi, ne kadiena mene mua kuwukokela nansha kakese.”
15 Mu mvese wa 11, Paulo udi umvuija pashishe mushindu udi tshieledi tshia lungenyi tshidi tshieleshangana diboko ne spiritu munsantu tshitshimuna mvita eyi: “Mpindieu, pikala spiritu wa eu wakabiisha Yezu ku bafue usanganyibua munda muenu, yeye wakabiisha Yezu Kristo ku bafue neavuije kabidi mibidi yenu miena-kufua mibidi idi ne muoyo ku spiritu wende udi munda muenu.”
16. Mmuenenu muimpe mu tshieledi tshia lungenyi udi utukuba ku buenzeji kayi bubi?
16 Nunku, bituikala ne mmuenenu muimpe mu tshieledi tshia lungenyi, katuakudingibua kudi buenzeji bubi bua mu bulongolodi ebu budi budisunguluja ku ngikadilu wa didisankisha dinekesha diashila pa masanka a mishindu yonso, bintu bia ku mubidi ne tshiendenda tshia masandi. Mmuenenu wetu muimpe wa tshieledi tshia lungenyi neatuambile bua “kunyema masandi” ne kupanduka ku bipeta biawu bia lufu. (1 Kolinto 6:18) Mmuenenu wetu muimpe neatusake kabidi ku diteka bipatshila bia Bukalenge pa muaba wa kumpala ne neakube bukole buetu bua dieleela meji patudi tutetshibua ne dipa dia mudimu kampanda wa ku mubidi wikala mua kutekesha malanda etu ne Yehowa.
17. Mmunyi muakaleja muanetu wa bakaji mpanda-njila mmuenenu muimpe mu tshieledi tshia lungenyi pa bidi bitangila majitu a mfranga avua pa makaya ende?
17 Tuangate tshilejilu tshia muanetu wa bakaji utshivua nsonga ne musombele mu ditunga kampanda dia luya dia Azi wa ku Sud-Est wakalama bipatshila bia Bukalenge pa muaba wa kumpala mu tshieledi tshiende tshia lungenyi. Uvua mudime dinanga dia mudimu wa ku dîba ne ku dîba. Mu ditunga edi, bantu bavule badi benza mudimu munkatshi mua matuku asambombo peshi muanda-mutekete ku lumingu. Yeye mumane kupeta diplome dia université, tatu’ende uvua kayi Ntemu wa Yehowa uvua mutekemene se: neapete mfranga mivule bua dîku dijima. Kadi, bu muvuaye ne dijinga dikole dia kuikala mpanda-njila, wakapeta mudimu wa mêba makese ne wakatuadija mudimu wa bumpanda-njila. Kadi, tatu’ende wakafika munda bikole ne kumufunyina bua kuimansha bintu biende mu njila. Bu muvuaye udifila mu manaya [a mfranga] uvua mupie mabanza manene, ne uvua mutekemene kudi muan’ende wa bakaji bua kuafuta. Anu bua mabanza a tatu, muanabo wa balume wa mukala uvua ulonga mu université kavua upeta mfranga ya kufuta malonga ende to. Nunku, nsongalume wakalaya muanabo wa bakaji ne: biamuambuluishaye, yeye ke watuadija kutabalela dîku papetaye mudimu. Mutshima wa muanetu wa bakaji uvua mupasula bipese bibidi pankatshi pa dinanga bua muanabo wa balume ne dinanga diende bua mudimu wa bumpanda-njila. Yeye mumane kukonkonona tshilumbu etshi biakane, wakangata dipangadika dia kutungunuka ne mudimu wende wa bumpanda-njila, eku wenda ukeba mudimu mukuabu mushilangane. Bu diandamuna ku masambila ende, wakapeta mudimu muimpe wakamupetesha mushindu wa kuambuluisha dîku diabo ne muanabo wa balume ne mfranga, kadi kutungunuka kabidi ne dinanga diende dia kumpala, mudimu wa bumpanda-njila.
Tukebe diambuluisha dia Yehowa bua kulama mmuenenu muimpe mu tshieledi tshia lungenyi
18. (a) Bua tshinyi bamue batu bateketa mu mitshima? (b) Mvese kayi ya mu Bible idi mua kusamba aba badi batekeshibue mu mitshima?
18 Bamue balongi ba Kristo batu pamu’apa bapeta ntatu bua kulama mmuenenu wabu muimpe mu tshieledi tshia lungenyi. Lutulu luabu ludi mua kukepela bualu bulongolodi ebu bua malu budi bunenga bikole mushindu uvuabo kabayi batekemene. Pa nanku, badi bateketa mu maboko. Pabi, mu mishindu yonso, nshikidilu nealue. Yehowa mmumane kubilaya. (Tito 1:2) Ne ndekelu wa bionso, Mparadizu udiye mulaye neashibue pa buloba. Yehowa mmufile dishindika dia bionso ebi. (Buakabuluibua 21:1-5) Pashibua bulongolodi bupiabupia, nebikale “mutshi wa muoyo” bua buonso bikala balame mmuenenu muimpe mu tshieledi tshia lungenyi.—Nsumuinu 13:12.
19. Mmunyi mutudi mua kulama mmuenenu muimpe mu tshieledi tshia lungenyi?
19 Mmunyi mutudi mua kulama mmuenenu muimpe mu tshieledi tshia lungenyi? Pa kukeba diambuluisha dia Yehowa. (Musambu wa 54:4) Tushalayi pabuipi nende menemene. Ndisanka kayipu ditudi nadi pa kumanya se: Yehowa udi ujinga bua tuikale badisuike nende mu malanda masheme! “Semenayi pabuipi ne Nzambi, ne yeye neasemene pabuipi nenu,” ke mudi mulongi Yakobo mufunde. (Yakobo 4:8) Paulo udi wamba ne: “Sankayi mu Mukalenge matuku wonso. Ndi ngamba tshiakabidi ne: sankayi! Ngikadilu wenu wa bena meji matue amanyike kudi bantu buonso! Mukalenge ukadi pabuipi. Kanusumpakanyi bua tshintu nansha tshimue, kadi, mu malu wonso, ku masambila ne misengelelu ne dianyisha, numanyishe Nzambi milombo yenu; ne ditalala dia Nzambi didi dipite lungenyi kayi luonso, nedilame mitshima yenu ne bieledi bienu bia lungenyi ku butuangaji bua Kristo Yezu.” (Filipoi 4:4-7) Nunku, padi majitu makukebela kudi bulongolodi ebu bua malu budi bubunga ne lufu amueneka mapite makanda ebe bukole bua kuambula, uwupuile Yehowa, ne yeye nkayende neakukoleshe.—Musambu wa 55:22.
20. Bilondeshile 1 Timote 4:10, tudi ne bua kutungunuka ne kuendela mu njila kayi?
20 Eyowa, nshikidilu ukadi pabuipi, nunku, tuikalayi ne mmuenenu muimpe mu tshieledi tshia lungenyi! Kukadi siekele 19, mubelu eu uvua muimpe; kadi lelu’eu, udi ne mushinga mukole menemene. Tutungunukayi ne kutumika ne mmuenenu wetu muimpe bua kusamuna Yehowa, yeye udi utulombola mu bukubi buonso bua kutubueja mu bulongolodi buende bupiabupia.—1 Timote 4:10.
Mmunyi muwandamuna?
◻ Mmuenenu muimpe mu tshieledi tshia lungenyi ntshinyi?
◻ Bua tshinyi bidi bia mushinga bua kuikala ne mmuenenu muimpe mu tshieledi tshia lungenyi?
◻ Mmunyi mutudi mua kuvuijibua bapiabapia mu bukole budi buinyika tshieledi tshietu tshia lungenyi?
◻ Mvita kayi itudi ne bua kutungunuka ne kuluangana mu bieledi bietu bia lungenyi?
◻ Mmunyi mutudi mua kulama mmuenenu muimpe mu tshieledi tshia lungenyi?
[Tshimfuanyi mu dibeji 15]
Kusemena kudi Nzambi mu masambila kudi kutuambuluisha bua kulama mmuenenu muimpe mu tshieledi tshia lungenyi
[Tshimfuanyi mu dibeji 17]
Bituikala ne mmuenenu muimpe mu tshieledi tshia lungenyi, katuakudingibua kudi buenzeji bubi bua mu bulongolodi ebu nansha