Bitutshishi bia dikasa dimpe bidi mua kukukuba anyi?

KABULUNGE ka lumuenu kela mu tshibombi tshia mulume muena Brezile. Lufualanga lua tshiamu lututshishi lua dikasa dimpe lua muena manaya a mubidi wa bena Amerike. Nkuruse wa Brigitte Munsantu mukudika ku bulalu bua bena nzubu bena Irlande. Miliyo ya bantu badi batumika ne bintu bia mushindu’eu bu bitutshishi bia dikasa dimpe peshi manga.a Badi bitabuja se: kuikala ne bintu ebi kudi mua kubepula ku njiwu ne kubatutshisha dikasa dimpe.

Tuanji kuangata ditunga dia Brezile, bu tshilejilu. Bilondeshile tshibejibeji tshia Veja, bena Brezile bavule badi bangata “tupesa tua mabue a patupu ne mushinga mukole tudibo bapesha bukole bua kukoka dikasa dimpe ne makokeshi a mubidi ne a mu lungenyi kudi eu udi ne mabue aa.” Bu mudibo batshine makole masokome, bamue mu ditunga adi badi bateka tshimanyinu tshia ntendelelu peshi mifundu ku tshimana tshia nzubu wabo. Bakuabo badi nansha bangata Bible bu tshijimba tshinsantu; badi bamuteka pa mesa, mubuulula dîba dionso pa Musambu wa 91.

Mu Sud-Afrique badi bangata muti, peshi buanga bua bankambua, kabiyi anu bua bukole buabu bua luondapo, apo kabidi ne bua kudikuba ku dikasa dibi. Masama, lufu, ne ntatu ya makuta, ne dipanga kunangibua kudi mukaji anyi mulume, bidi misangu mivule bifumina ku bishoto biela kudi baluishi peshi ku dipanga kutuuyisha mutshima wa bankambua bafue kale. Muti udi pa tshibidilu upeteka kudi nganga-buka wa ku musoko, udi ulamba manga ne mabeji a mitshi, peshi tutupa tua mubidi wa nyama. Bidi bimpe kutabalela bua se: muti kawena ne mushinga anu kudi bena musoko; ngenzelu eu mmumuangalake mu bimenga bia ku Sud-Afrique. Bena kantu ku bianza ne bena mukanda badi munkatshi mua aba badi beyemene muti.

Dikebakeba dia dikasa dimpe didi kabidi dimuangalake mu matunga a ku Mputu. Mukanda wa Makebulula mu bunkambua mamanyisha Emyr Estyn Evans (angl.) udi utumanyisha se: “Mbikole bua kumona parwase anyi tshimenga ku Irlande mudi kamuyi tshiamu tshia tshikono tshia kabalu tshisuika kulu anyi pamutu pa biibi bia nzubu ya bantu anyi tubuaya.” Mu ditunga edi mudi kabidi mumuangalake nkuruse mienza ne bisosa idibo bakudika ku malalu ne ku biibi bua kukoka dikasa dimpe. Babandidi badi bamba ne: pamutupamutu, bena Irlande bavule badi bangata mianda ya kabukulu ya mushindu’eu ne mushinga mukese. Kadi, amu bakese ke badi kabayi menemene bayangata ne mushinga.

Mu dikebakeba dia dikubibua

Ntshinyi tshidi tshikebesha bitabataba bia mushindu’eu? Mbimueneke se: bidi ne mudimu wa kukumbaja dikengedibua dinene didi nadi bantu bua kudikuba. Bushuwa, mbantu bungi munyi badi badiumvua bakubibue mu nzubu yabo, mu njila badi kabidi batambe kuikala ne buowa nangananga butuku? Kusakidila ku ebi, kudi ntatu ya kudisha ne kuvuadika bana. Bushuwa, tudi mu matuku adi Bible ubikila ne: “bikondo bikole.” (2 Timote 3:1) Nenku, kabiena bikemesha pa kumona se: bantu badi ne dijinga dikole dia dikubibua.

Ebi bidi mua kumueneka nangananga mu matunga mudi bantu bapaka manga a mishindu mishilangane ne mudi majimbu mavulangane. Ditshina dia spiritu idibo bamba ne: nya bafue anyi dia kuedibua mulawu kudi muluishi ke bidi mua kukebesha didikuba ne buanga anyi ne tshijimba. Nansha bia munyi, tshibungu tshia The World Book Encyclopedia tshidi tshiamba ne: “Bantu bavule badi ne buowa budi bubatekesha. Bitabataba bidi bibambuluisha bua kutshimuna buowa bua mushindu’eu pa kubapetesha dikubibua. Bidi bitabijija bantu se: nebapete tshidibo bakeba ne nebepuke njiwu.”

Bukole bua bijimba mbua dishima

Nenku, pa buloba bujima, bantu badi bavuala, bambula, ne baleja bijimba, talizman, ne manga, bia mishindu mishilangane. Kadi, mbia meji bua kuitabuja se: buanga bupaka kudi muntu budi mua kufila dikubibua dilelela anyi? Bintu bivule bidibo bapaka nabi manga bidi bipanyishibua kudi bangenda. Ebi kabiena bijula mpata bua kuitabuja se: tshintu tshienza mu ditanda tshidi mua kuikala ne bukole bua majimbu anyi? Nansha misenga misambakaja kudi mpaka-manga kayena tshikuabo tshintu anu bintu bitudi bamanye buonso​—miji, bisosa, ne bikuabo. Mmunyi mudi bintu ebi mua kuikala ne bukole bua majimbu? Kulekela abi, kudiku bijadiki bia se: aba badi ne bijimba badi bashala ne muoyo kupita bakuabo​—peshi badi ne disanka—​kupita aba badi kabayi nabi? Aba badi bapaka bintu bia majimbu bia mushindu’eu kabatu buobo bine bapona mu masama ne lufu anyi?

Pamutu pa kupetesha bantu dikubibua dilelela ne bukokeshi bua malu a mu nsombelu yabo, disadila bijimba ne manga bidi bipumbisha bantu bua kukeba mua kujikija ntatu yabo ne dibakankamija bua kukeba dikasa dimpe bu mushindu wa kujikika ntatu yonso. Kueyemena bukole bua bijimba kudi kabidi mua kupetesha muntu dikubibua didi kadiyi dilelela. Muntu uvua mukokeshibue ku bunuavi bua maluvu udi mua kujadika ne: lungenyi luende ne makanda ende mmatekete, kadi bidikijaye mua kuendesha mashinyi, udi mua kukeba njiwu buende yeye muine peshi bua bakuabo. Muntu udi uteka ditekemena diende mu bukole bua tshijimba udi mua kudienzela bibi. Bu mudiye mutekemene dikubibua padi kadiyi dilelela, udi mua kuenza malu a njiwu peshi kuangata mapangadika kaayi a meji.

Ditabuja dia bukole bua bijimba didi dijula mikuabo ntatu minene idi misokome ku mesu kua miliyo ya bantu badi nabi. Ntatu eyi idi munyi, ne kudi mushindu wa kuyepuka anyi? Tshiena-bualu tshidi tshilonda netshiandamune ku nkonko eyi.

[Mêyi adi kuinshi]