Utshidi muvuluke anyi?

Uvuaku mubale ne ntema nimero ya ndekelu ya Tshibumba tshia Nsentedi anyi? Pikalabi nanku, tangila neudi mukumbane mua kuandamuna ku nkonko idi ilonda eyi:

▫ Ndiambuluisha kayi ditudi mua kutuadila babedi ne bakulakaje bena mu tshisumbu lelu’eu?

Mu tshisumbu tshia bena nkristo tshia mu siekele wa kumpala, bavua ne liste wa bakamba bavua bakengela diambuluisha ne bintu bia ku mubidi. (1 Timote 5:9, 10) Bia muomumue lelu’eu, bakulu badi mua kuenza liste wa babedi ne bakulakaje badi bakengela ditabalela dia pa buadi. Ki mbakulu nkayabu badi ne bua kuela tshiidia mu muanda eu to. Muena mu tshisumbu yonso udi ne bua kutabalela bua kuenza tshiende tshitupa mu dikumbaja majinga bu nunku. (1 Timote 5:4-8)​—15/8, mabeji 28, 29.

▫ Tudi mua kuitaba muyuki wa mu Bible wa diminyibua dia Yona kudi mushipa munene anyi?

Eyowa, bualu kashalo peshi rekin munene mutoke udi mua kumina muntu. Kabidi, Yezu yeye nkayende wakashindika bulelela bua muyuki wa Yona. (Matayi 12:39, 40)​—15/8, dibeji 32.

▫ Nnjiwu kayi idi ifuma ku ditumika ne bijimba ne bitutshishi bia dikasa dimpe?

Ditumika ne bintu ebi didi dipumbisha bantu mua kuakama ntatu yabo bua kuyijikija ne meji ne dibakankamija bua kuindila lupandu ku dikasa dimpe. Bidi bipesha kabidi eu udi utumika nabi mmuenenu wa dishima wa kuikala mukubibue. Kupita apu, eu udi uteka ditekemena diende mu bukole bua bijimba ne bitutshishi bia dikasa dimpe udi ufila muoyo wende mu bianza bia bademon bakena bamueneka.​—1/9, dibeji 4.

▫ Tela malu anayi adi mua kukolesha bisuikidi bia dibaka.

Ke dijinga dia kuteleja, didiakaja bua kulomba dilekelela, kuikala ne makokeshi makumbane bua kuukutshisha dijinga dia kunangibua, ne disua dia kulejangana dîba dionso dinanga dilelela. (1 Kolinto 13:4-8; Efeso 5:33; Yakobo 1:19)​—1/9, dibeji 20.

▫ Tela umue wa ku mishindu idi Yehowa utumika nayi bua kupetesha aba badi mu mateta dinanukila.

Yehowa udi wenza nunku ku diambuluisha dia bilejilu bia dinanukila bidi bifunda mu Dîyi diende, Bible. (Lomo 15:4) Patudi tueleelapu meji, bilejilu ebi bidi bitukankamija bua kunanukila, kadi, ku lukuabu luseke, bidi bitulongesha malu mavule pa mushindu wa kunanukila.​—15/9, mabeji 11-12.

▫ Ditshina dia Nzambi ntshinyi?

Ditshina dia Nzambi didi diumvuija dilamata Yehowa didi ditusaka ku dienza malu adi amulengelela, nansha tusanganyibua mu mateta, tuenza nunku bualu tudi bamunange biangatshile mu buondoke bua mutshima wetu.​—15/9, dibeji 15.

▫ Tudi ne bua kuikala ne mmuenenu kayi pa dilekelelangana bilema dia Nzambi?

Katuena ne bua kuangata dilekelelangana bilema dia Nzambi ne mushinga mukese nansha. Tudi ne bua kulonda tshilejilu tshia Paulo ne kuleja dianyisha dietu pa kuluangana ne butekete buetu. (1 Kolinto 9:27) Pa kuenza nunku netuleje se: nansha bituapetangana ne ntatu, tudi ne dijinga dilelela dia kuenza malu adi makane.​—1/10, dibeji 23.

▫ Bua tshinyi mbikumbanyine bua Paulo kutela muoyo-mule bu bualu bua kumpala mu liste wa bitupa bia dinanga?

Bakamba ne: malanda masheme kaena mua kuikala pankatshi pa bena nkristo padiku kakuyi muoyo mule, mbuena kuamba ne: makole a kulengulula ne lutulu bibi bidi bakuabu batuenzela. Bidi nanku, bualu tuetu buonso tudi bapange bupuangane, kabidi bilema bietu bidi bibueja bakuabu mu mateta. Pa nanku, muoyo mule udi ne muaba bua dinanga kuikaladi munkatshi mua bena nkristo.​—15/10, dibeji 21.

▫ Bena nkristo ba kumpala bavua batumika ne dîna dia Nzambi anyi?

Mbimueneke se: bidi nanku. Yezu wakalongesha balongi bende bua kusambila Nzambi ne: “Dîna diebe ditumbishibue.” (Matayi 6:9) Kabidi, ku ndekelu kua mudimu wende pa buloba, yeye muine wakasambila Tatuende udi mu diulu ne: “Ngaleji patoke dîna diebe kudi bantu bawakumpesha munkatshi mua bena bulongolodi ebu.” (Yone 17:6) Ku lukuabu luseke, mifundu ya kumpala ya nkudimuinu wa Septante ivua ne dîna dia Nzambi munda muayi mu maleta a tshiena-Ebelu anayi peshi Tétragramme.​—1/11, dibeji 30.

▫ Mbilejelu kayi bia mu Bible bidi bileja se: ngandamuinu wetu kunyima kua dienza tshilema udi mua kututuadila bipeta bimpe anyi bibi?

Mukalenge Shaula wakadileja mpudi-matshi, wakavudija bilema biende, ne ndekelu wa bionso, biakamutuadila lufu, eku mubule dianyishibua kudi Yehowa. (1 Samuele 15:17-29) Ku luende luseke, nansha muvuaye muenze bilema ne mpekatu, Davidi wakanyingalala, kuanyisha mibelu ne kushala muena lulamatu kudi Yehowa. Bilejilu ebi bia mu Bible bidi bileja ne: bituitaba bilema bietu, netuikale mua kushala mu malanda masheme ne Nzambi ne kulama ditekemena dia kupeta muoyo wa kashidi. (Musambu wa 32:1-5)​—15/11, mabeji 29-30.

▫ Mmunyi mudi Yehowa utuadila tshisamba tshiende diambuluisha padibo mu dikenga bua bipupu bia ku bintu bifuka peshi biledi bikuabu bia makenga a tshimpitshimpi?

Yehowa kêna utuma diambuluisha pa kutuuyisha mu tshishima makole a bintu bifuka peshi pa kuenza muanda kampanda wa dikema, kadi udi utumika ne bukole bukuabu budi bantu kabayi batambe kumanya​—dinanga. Eyowa, Yehowa mmunange tshisamba tshiende, ne mmubueje munkatshi mua basadidi bende dinanga dikole, didibo balejangana bamue ne bakuabu, ke didiye utumika nadi bua kubakumbajila malu adi amueneka bu bishima. (1 Yone 4:10-12, 21)​—1/12, dibeji 10.