Bamanyishi ba Bukalenge badi balonda

“Nukandamene Diabolo, ne yeye neanunyeme”

MU SIEKLE wa kumpala, tshisumbu kampanda tshia bena “malu a majimbu” badifile mu Efeso bakandamuna ku mukenji wa bena nkristo pa kuosha patoke mikanda yabu ya majimbu. (Bienzedi 19:19, NW) Mushinga wayi yonso mubadika uvua wa mpalata 50 000. Bu Bible yeye wakula bua denyé, makuta a bijanja a bena Lomo, bu wowo makese avua mua kufika ku dolare 37 000!

Lelu’eu kudi ba bungi bavua mu tshikondo kampanda bikale ne mikanda idi yakula bua malu a majimbu, kadi bakaleja dipangadika dikole difuanangane ne dia bena Efeso ba kale. Tangila bualu bumona ku Canada budi bulonda ebu.

Kukadi kupite bidimu bitanu, umue wa ku Bantemu ba Yehowa uvua mu buambi bua ku nzubu ne ku nzubu pakamubuejabu ku bukole mu nzubu kampanda kudi mukaji kansanga uvua ne dîna ne: Nora. Mu bidimu bivule bia dikebulula mu malu a mu nyuma, Nora uvua mukongakaja nkama ne nkama ya mikanda ya ntendelelu ne ya majimbu, kadi uvua musue kumanya tshivua Bible wamba pa ditekemena didiku bua bafue. Ntemu [eu] wakamupesha trakte wa Nditekemena kayi didiku bua banangibue betu bakafua? Nkonko ya Nora yakandamunyibua, ne wakitaba abonema ya bibejibeji bia Tshibumba tshia Nsentedi ne Réveillez-vous!

Kunyima wakamuangala e kujimija dipetangana ne Bantemu ba Yehowa. Nansha nanku, wakatungunuka ne kupeta ku poste bibejibeji mu adrese wende mupiamupia. Wakalomba kabidi mikanda idi yumvuija Bible ivua bibejibeji bitela. Kunyima kua matuku bungi kampanda, umue wa ku Bantemu ba Yehowa wakalua ku tshiibi tshiende. Ukema pa kumona se: Ntemu uvua unyemena buludiludi mu Bible pavuaye wandamuna nkonko, Nora wakamuakidila bilenga ne wakamulomba bua kupingulukaye tshiakabidi bua kutungunukabo ne makuabo mayukidilangana.

Nansha nanku, biakakolela Ntemu bua kupetangana tshiakabidi ne Nora. Wakenza makumbula misangu ne misangu mu mêba a mu dituku mashilashilangane ne mu matuku a mu lumingu mashilashilangane, kadi kakapetangana nende to. Kadi, kunyima, dinanukila diende diakafutshibua, ne wakanowa bipeta bilenga. Dilonga dia Bible pa tshibidilu diakatuadija, divua dienzeka misangu ya bungi njila isatu ku lumingu bilondeshile dilombolola dia Nora. Bintu bivuaye ulonga biakamusaka bua kuyukila ne balunda ne bena dîku diende, ne biakapatula bipeta ebi: basatu ba ku buobo bakalomba dilonga dia Bible ne Bantemu ba Yehowa.

Mu dilonga diende, Nora wakafika ku dijingulula ne: kudi bitendelelu bivule bia dishima ne baprofete ba dishima, kadi njila anu umuepele ke udi ufikisha ku muoyo. Munkatshi mua bidimu bia bungi uvua wenda ukeba mandamuna ku nkonko yende mu bitendelelu bia dishima, kadi kunyima kua dilonga tshivua Bible wamba pa ba-demon, wakenza bu bena Efeso ba kale batela mu Bienzedi 19:19. Wakasukula tshilaminu tshiende tshia mikanda, e kuosha mikanda ya majimbu ne ya malongesha a bitendelelu bia dishima mipite pa tshinunu munkatshi mua matuku mavule. Mu mikanda yakoshibua, muvua tshibungu tshia mikanda inayi ya mushinga mupite pa dolare 800!

Mbimueneke patoke se: bu muvua ngenzelu ya Nora mibafiikishe munda, ba-demon bakamutatshisha munkatshi mua mbingu mitue ku ibidi. Nansha nanku, nyuma mibi eyi kayakamona mua kumuitabijija bua kubenga kutungunuka ne dilonga diende dia Bible ne dikuatakana diende ku bulongolodi bua Yehowa bua lelu’eu.

Mamonamona a mushindu’eu adi aleja bimpe bulelela bua mêyi adi mu Bible aa: “Nunku nukokele Nzambi; kadi nukandamene Diabolo ne yeye neanunyeme.”​—Yakobo 4:7, NW.