Angatayi bu tshitembelu baprofete ba Nzambi
“Bana betu, pa bidi bitangila dinanukila malu mabi ne dileja lutulu, angatayi bu tshitembelu, baprofete bakakula mu dîna dia Yehowa.”—YAKOBO 5:10, NW.
1. Ntshinyi tshidi tshiambuluisha basadidi ba Yehowa bua kuikala ne disanka nansha padibo bakengeshibua?
BASADIDI ba Yehowa badi bakenka ne disanka nansha mudi dibungama ne dipanga ditekemena bitampakane pa buloba bujima mu matuku aa a ku nshikidilu. Bidi nanku, bualu mbamanye se: badi basankisha Nzambi. Bantemu ba Yehowa batu kabidi bananukila dikengeshibua ne buluishi mu mudimu wabo wa buambi bualu mbamanye se: badi benda bakengeshibua bua buakane. Yezu Kristo wakambila bamulondi bende ne: “Bakakengeshibua bua buakane buabo badi ne disanka, bua bukelenge bua mu diulu budi buabo. Hanuhendabo ne hanukengeshabo ne hanushiminyinabo mashimi onso, bua bualu buanyi, nenuikale ne disanka. Nusanke, nuikale ne disanka dingi, bualu bua difutu dienu didi mu diulu ndinene, bakakengesha baprofete nunku bakadi kumpala kuenu.” (Matayo 5:10-12) Bushuwa, dîba kayi dionso didi basadidi ba Nzambi bakamangana ne mateta a ditabuja, badi bangata muanda eu bu disanka.—Yakobo 1:2, 3.
2. Bilondeshile Yakobo 5:10, ntshinyi tshidi mua kutuambuluisha bua kuleja lutulu?
2 Mulongi Yakobo wakafunda ne: “Bana betu, pa bidi bitangila dinanukila malu mabi ne dileja lutulu, angatayi bu tshitembelu, baprofete bakakula mu dîna dia Yehowa.” (Yakobo 5:10, NW) W. F. Arndt ne F. W. Gingrich bakumvuija muaku wa tshiena-Greke udibo bakudimune “tshitembelu” (hy·poʹdeig·ma) bu “tshilejilu, tshidikijilu, tshitembelu, mu mushindu muimpe bu tshintu tshidi tshisaka anyi tshidi ne bua kusaka muntu ku ditshidikija.” Anu bu mudibi bilejibue mu Yone 13:15, “ebi mbipite ne tshilejilu patupu. Ntshidikijilu tshisunguluke.” (Theological Dictionary of the New Testament) Nenku, basadidi ba Yehowa ba lelu’eu badi ne bua kuangata ne kanemu baprofete bende ba lulamatu bu tshitembelu bua ‘kunanukila bubi’ ne ‘kuleja lutulu.’ Ntshinyi tshikuabo tshitudi mua kusunguluja patudi tukonkonona nsombelu yabo? Ne mmunyi mudi ebi mua kutuambuluisha mu mudimu wetu wa buambi?
Bakananukila malu mabi
3, 4. Mmunyi muakandamuna muprofete Amosa ku buluishi bua Amaziya?
3 Baprofete ba Yehowa bavua misangu mivule bananukila malu mabi anyi bapeta makenga makole. Tshilejilu, mu siekele wa tshitema K.B.B., muakuidi mutendeledi wa kana ka ngombe, Amaziya wakaluisha bikole bitambe muprofete Amosa. Amaziya ne dishima dionso wakamba ne: Amosa wakayila Yeroboame II mu tshifufu pa kudianjila kumanyisha se: mukalenge uvua ne bua kufua ku muele wa mvita ne bena Izalele bavua ne bua kuya mu bupika. Ne kapetu kuonso, Amaziya wakambila Amosa ne: “O mumonyi wa bilota we, ndaku, lubilu too ne mu ditunga dia Yuda, ne kuaka udie mampa, ne kuineku udi mua kufila milayi. Kadi kufidi kabidi milayi ku Betele to, bualu nsanktiwere wa mukalenge ne nzubu wende wa bukalenge.” Kayi uteketa mu maboko bua diyobola edi, Amosa wakandamuna ne: “Tshivua muprofete to, anyi tshivua muana wa muprofete to; kadi mvua mulami wa bimuna ne kabidi mukami wa tumuma tua mitshi ya mfigi ya sikomore. Ne Yehowa wakangangata ndonda bisumbu bia mikoko, ne Yehowa wakangambila ne: ‘Ndaku, ufila milayi kudi tshisamba tshianyi tshia Izalele.’”—Amosa 7:10-15, NW.
4 Spiritu wa Yehowa wakapetesha Amosa bukole bua kufila milayi ne dikima dionso. Fuanyikijabi muakandamuna Amaziya pavua Amosa wamba ne: “Teleja mêyi a Yehowa, ‘Adi akuambila ne: “Kuena ne bua kufila milayi bua kupiisha Izalele to, ne kuena ne bua kupatula dîyi nansha dimue bua kupiisha nzubu wa Izake”? Nanku, aa mmêyi avua Yehowa muambe: “Mukajebe nealue mukaji wa masandi mu tshimenga. Ne bana bebe ba bakaji ne ba balume nebafue ku muele wa mvita. Ne buloba buebe nebabuabanye ku nshinga wa tshipiminu. Ne bua bidi bikutangila wewe muine, neufuile mu ditunga dia bukoya; ne bua Izalele, kakuyi ntupakanyi nebaye nende mu bupika kumbukila mu ditunga diende mene.”’” Mulayi eu wonso wakakumbana. (Amosa 7:16, 17, NW) Mmushindu kayipu wakatondabi Amaziya mutontolodi eu!
5. Ndiumvuangana kayi ditudi mua kupeta pankatshi pa nsombelu wa basadidi ba Yehowa ba lelu ne wa muprofete Amosa?
5 Ke mudibi bua nsombelu udi nende tshisamba tshia Yehowa lelu’eu. Tudi tunanukila malu mabi bualu tudi tumanyisha mikenji ya Nzambi, ne bantu bavule badi bapepeja mudimu wetu wa buambi. Bushuwa, bukenji buetu bua buambi ki mbufumine ku seminere ya teoloji to. Pamutu pa nanku, spiritu munsantu wa Yehowa udi utusaka bua kumanyisha lumu luimpe lua Bukalenge. Katuena nansha kakese ne bua kushintulula anyi kutekesha mukenji wa Nzambi. Pa nanku, anu bu Amosa, tudi tuumanyisha ne butumike buonso katuyi tutangila mandamuna a badi bauteleja.—2 Kolinto 2:15-17.
Bakaleja lutulu
6, 7. (a) Ntshinyi tshivua tshisunguluja milayi ya Yeshayi? (b) Mmunyi mudi basadidi ba Yehowa ba lelu benza malu anu bu Yeshayi?
6 Baprofete ba Nzambi bakaleja lutulu. Tshilejilu, lutulu luakalejibua kudi Yeshayi, wakasadila bu muprofete wa Yehowa mu siekele wa muanda-mukulu K.B.B. Nzambi wakamuambila ne: “Ya, wambile bantu aba ne, Unvuai! Unvuai! Kadi kanujinguludi! Monai! Monai! Kadi kanumanyi nansha! Vuisha mitshima ya bantu aba mitshima idi ne manyi, vuisha matshu abo mpudimatshu, ne buikila mesu abo, bua kabamonyi ne meso abo, kabunvu ne matshu abo, kabajinguludi malu ne mitshima yabo, kabakudimunyi mitshima yabo bua kusangashibua.” (Yeshaya 6:9, 10) Bushuwa, ke muakandamuna bantu. Kadi, malu aa akapuwisha Yeshayi anyi? Tòò. Kupita apu, wakamanyisha ne lutulu luonso ne disuminyina dijima mikenji ya Yehowa ya didimuija. Bilondeshile tshiena-Ebelu, mêyi a Nzambi adi matedibue apa adi mu diumvuangana ne lungenyi lua “ditungunuka dile,” dia mamanyisha a muprofete adi bantu bateleja “ku musangu ne ku musangu.”—Mukanda wa Gesenius’ Hebrew Grammar.
7 Lelu’eu, bantu badi bandamuna ku lumu luimpe anu bu muvua bantu bandamuna ku mêyi a Yehowa avuaye mupe Yeshayi. Kadi, anu bu muprofete eu wa lulamatu tudi tuambulula mukenji wa Bukalenge “ku musangu ne ku musangu.” Tudi tusuminyina mu dienza nunku ne lutulu luonso, bualu kuenza nunku ke disua dia Yehowa.
“Bakenza anu nunku”
8, 9. Mmu nsombelu kayi mudi muprofete Mozese muikale tshilejilu tshilenga?
8 Muprofete Mozese uvua muntu wa tshitembu mu dileja lutulu ne butumike. Wakasungula bua kuditeka ku luseke lua bena Izalele bavua bakuatshibue ku bupika, kadi uvua ne bua kuindila ne lutulu luonso tshikondo tshia dipikudibua diabo. Mu bidimu 40 bulubulu, wakasombela ku Madiana too ne pavuile Nzambi kutumika nende bua kupikula tshisamba tshia Izalele ku bupika. Pavua Mozese ne muanabu wa balume Aarona kumpala kua mfumu wa Ejipitu, ne butumike buonso bakamba ne bakenza bionso bivua Nzambi mubatumine dîyi. Bushuwa, “bakenza anu nunku.”—Ekesode 7:1-6; Ebelu 11:24-29.
9 Ne lutulu luonso, Mozese wakananukila ntatu munkatshi mua bidimu bionso 40 biakapitshisha Izalele mu tshipela. Wakalonda kabidi ne butumike buonso bulombodi mu diibaka tabernakle wa Izalele ne mu dienza bikuabo bintu bivuabo ne bua kutumika nabi mu ntendelelu wa Yehowa. Bualu muprofete wakatumikila menemene mêyi-maludiki, tudi tubala ne: “Mozese wakenza nunku bilondeshile bionso bivua Yehowa mumutumine dîyi. Wakenza anu nunku.” (Ekesode 40:16, NW) Mu dikumbaja mudimu wetu wa buambi mu didisangisha ne bulongolodi bua Yehowa, mbimpe tuanji kuvuluka butumike bua Mozese ne tutumikile mubelu wa mupostolo Paulo wa ‘kutumikila badi ku mutu kuetu.’—Ebelu 13:17, NW.
Bavua ne mmuenenu muimpe
10, 11. (a) Ntshinyi tshidi tshileja se: muprofete Hoshea uvua ne mmuenenu muimpe? (b) Mmunyi mutudi mua kulama mmuenenu muimpe patudi tuyukidilangana ne bantu mu teritware yetu?
10 Baprofete bavua ne bua kuikala ne mmuenenu muimpe pavuabo bamanyisha mikenji ya dilumbuluisha anyi milayi idi ileja dinanga divua nadi Nzambi kudi bena lulamatu bavua bamuangalake mu Izalele. Ke muvuabi bua Hoshea, uvua muprofete bidimu bu 59. Mu mushindu muimpe, wakatungunuka ne kumanyisha mikenji ya Yehowa ne kukomesha mukanda wende wa milayi ne mêyi aa: “Nnganyi udi ne meji bua kujingulula malu aa? Nnganyi udi mudimuke bua kumanya? Bualu njila ya Yehowa idi milulame, ne bakane ke bendelamu; kadi bashipi ba mikenji nebalendukemu.” (Hoshea 14:9, NW) Mu tshikondo tshionso tshidi Yehowa mutushila mpunga bua kufila bumanyishi, mbimpe tuikale ne mmuenenu muimpe ne tutungunuke ne kukeba aba balua kuitaba ne meji wonso bulenga bukena-butuakanyine bua Nzambi.
11 Bua ‘kukeba bena muoyo mulenga,’ tutungunuke ne kunanukila ne kutangila malu ne mmuenenu muimpe. (Matayo 10:11) Tshilejilu, bituikala katuyi bavuluke muaba utuvua bateke nsapi yetu, nanku’s netulondolole makasa etu ne kukeba pa miaba mishilashilangane ituvua [bapitshile]. Pamu’apa tudi mua kuyipeta kunyima kua bamane kuenza nunku misangu mivule. Bia muomumue, tununakile mu dikeba bantu badi bafuanangane ne mikoko. Ndisanka kayipu ditudi nadi padi bantu bandamuna bimpe ku lumu luimpe mu teritware mitumikatumika! Ne ndisanka kayipu ditudi nadi bu mudi Yehowa ubenesha mudimu wetu mu matunga muvua kale mikandu yela mikalu ku mudimu wetu wa buambi bua patoke!—Galatia 6:10.
Mpokolo ya dikankamijibua
12. Mmulayi kayi wa Yoele udi wenda ukumbana mu siekele wa 20 eu, ne mmunyi?
12 Mêyi a baprofete ba Yehowa adi mua kuikala ne dikankamija dinene kutudi mu mudimu wetu wa buambi. Tshilejilu, tukonkonone mulayi wa Yoele. Uvua ne mikenji ya dilumbuluisha ivuabo batumine bena Izalele batontolodi ne bakuabo bantu ba mu siekele wa tshitema K.B.B. Kadi, Yoele uvua pende muenzeja kudi spiritu wa Nzambi bua kufila mulayi eu: “Kunyima kua malu â nengitshikishile bantu bonso Nyuma wanyi; bana benu ba balume ne bana benu ba bakashi nebambe malu adi kâyi manze kulua, bakulumpe benu nebalote bilota, bansongalume benu nebamone bikena kumona. Nengitshikishile Nyuma wanyi kabidi ham’bidi ha bahika balume ne bahika bakashi mu matuku au.” (Yoele 2:28, 29) Malu aa akamueneka malelela kudi balondi ba Yezu kumbukila ku Pentecoste wa 33 B.B. too ne ku lelu’eu. Ne ndikumbana kayipu dinene dia mulayi eu ditudi tumona mu siekele eu wa 20! Lelu’eu, tudi ne “bafidi ba milayi” miliyo ne miliyo, anyi bamanyishi ba mukenji wa Yehowa—ba munkatshi muabo bapite pa 600 000 badi mu mudimu wa ku dîba ne ku dîba wa bumpanda-njila.
13, 14. Ntshinyi tshidi mua kuambuluisha bansonga bena nkristo bua kupeta disanka mu mudimu wa buambi?
13 Bamanyishi bavule ba Bukalenge badi bansonga. Kabitu dîba dionso bibateketele bua kuyukidilangana ne bakulumpe malu a mu Bible. Imue misangu batu bambila bansonga basadidi ba Yehowa ne: ‘Nudi nujimija dîba dienu patupu mu buambi,’ ne ‘nuvua ne bua kuikala ne mudimu mushilangane.’ Ne bukalanga buonso, Bantemu ba Yehowa basonga badi mua kuandamuna se: kabatu ne disanka dia kumona bantu badi ne nyanji ya nanku to. Nsongalume kampanda mumanyishi wa lumu luimpe wakamona ne bivua dikuatshisha divule bua kusakidila ne: “Ntu mbabidila diyukidilangana ne bakulumpe bu wewe, ne bitu binsankisha.” Bushuwa, kumanyisha lumu luimpe ki nkujimija dîba patupu to. Mioyo ya bantu mmisuikakajaku. Ku butuangaji bua Yoele, Nzambi wakamba ne: “Halua bualu ebu, muntu yonso watela dina dia Yehowa neasungidibue.”—Yoele 2:32.
14 Bana badi bafila baledi babo mu buambi bua Bukalenge badi bapeta diambuluisha dia kudi baledi bua kumanya mua kudifundila bipatshila biabu pa nkayabu. Ku kakese ku kakese, bansonga ba mushindu’eu badi balubuluka kumbukila ku dibala mvese too ne ku difika ku diumvuija ditekemena diabo didi dishindamene pa Bible ne kufila mikanda idi yumvuija Bible mikumbanyine kudi bantu badi basankidila bulelela. Bu mudibo badimuena dilubuluka diabo nkayabo ne dibenesha dia kudi Yehowa, bansonga bamanyishi ba Bukalenge badi bapeta disanka dinene mu dimanyisha lumu luimpe.—Musambu wa 110:3; 148:12, 13.
Tshisumi ne mmuenenu wa dindila
15. Mmunyi mudi tshilejilu tshia Yehezekele mua kutuambuluisha bua kusakisha tshisumi tshietu bua mudimu wa buambi bua Bukalenge?
15 Baprofete ba Nzambi bavua kabidi bantu ba tshitembu mu dileja tshisumi ne mmuenenu wa dindila—ngikadilu itudi tukengela mu mudimu wetu lelu’eu. Patuakalonga diambedi bulelela budi mu Dîyi dia Nzambi, bivua bimueneke se: tuvua ne tshisumi tshivua tshitusaka bua kuakula ne dikima dionso. Kadi bidimu bivule bikadi pamu’apa bipite katshia tualonga diambedi bulelela, ne tuvua pamu’apa mua kuikala bakumbule misangu mivule teritware wetu wa bumanyishi. Bantu anu bakese ke badi mpindieu bitaba mukenji wa Bukalenge. Malu aa adi akepesha tshisumi tshietu anyi? Bu biobi nanku, tuangate tshilejilu tshia muprofete Yehezekele udi dîna diende diumvuija ne: “Nzambi udi ufila bukole.” Nansha muakapetangana Yehezekele ne bena mu Izalele wa kale ba mutshima mupape, Nzambi wakamupesha bukole ne mu ngakuilu wa mu tshimfuanyi, wakapapija mpala wende kupita dibue. Nenku, Yehezekele uvua mua kuenza bumanyishi mu kupita kua bidimu bivulavulayi, nansha bantu buobo bateleje anyi kabayi bateleje. Tshilejilu tshiende tshidi tshileja ne: tuetu petu tudi mua kuenza bia muomumue, ne tshidi mua kutuambuluisha bua kusakisha tshisumi tshietu bua mudimu wa buambi.—Yehezekele 3:8, 9; 2 Timote 4:5.
16. Mmuenenu kayi wa Mika utudi ne bua kudima?
16 Mika wakatamba kumanyika bua lutulu luende, wakamanyisha milayi mu siekele wa muanda-mukulu K.B.B. “Kadi meme hanyi,” ke muakafundaye, “nentangishe mesu anyi kudi Yehowa; nengidile Nzambi wa luhandu luanyi; Nzambi wanyi neangunvuile.” (Mika 7:7) Ditekemena dia Mika divua ne miji yadi mu ditabuja diende dishindame. Anu bu muprofete Yeshayi, Mika uvua mumanye se: tshivua Yehowa muakaje uvua bushuwa ne bua kutshikumbaja. Tudi petu bamanye muanda eu. (Yeshayi 55:11) Nenku, mbimpe tudime mmuenenu wa dindila dikumbana dia malaya a Nzambi. Ne tumanyishe lumu luimpe ne tshisumi, nansha mu rejon mudi bantu baleja dijinga dikese dia kumanya bia bungi pa mukenji wa Bukalenge.—Tito 2:14; Yakobo 5:7-10.
Kuleja lutulu lelu’eu
17, 18. Mbilejilu kayi bia kale ne bia lelu bidi mua kutuambuluisha bua kuleja lutulu?
17 Bamue ba ku baprofete ba Yehowa bakananukila ne lutulu luonso mu midimu yabo mibuomekela mu bidimu bivule kadi kabakamona milayi yabo ikumbana to. Kadi, dinanukila diabo mu dileja lutulu, nansha muvuabo bakengeshibua misangu mivule didi dituambuluisha bua kujingulula se: tudi mua kukumbaja mudimu wetu. Tudi petu mua kubabidila tshilejilu tshia bela manyi ku ntuadijilu kua makumi a bidimu a siekele eu wa 20. Nansha muvua ditekemena diabo dia kuya mu diulu kadiyi dikumbana lukasa bu muvuabo batekemene, kabakashila ditekeshibua mu mikolo muaba bua dikepesha tshisumi tshiabu tshia kuenza disua dia Nzambi anu muvuaye mubasokoluelabi.
18 Mu kupita kua bidimu, bavule ba ku bena nkristo aba bakabanya pa tshibidilu Tshibumba tshia Nsentedi ne muenzejanganyi natshi wa mudimu, Réveillez-vous!, (tshivua kale tshibikidibua Age d’Or ne kunyima La Consolation). Bavua bafila ne tshisumi tshionso bibejibeji ebi kudi bantu mu misesu ne ku nzubu yabo mu mudimu utudi tubikila lelu’eu bu difila dia bibejibeji dia pa tshibidilu. Muanetu kampanda wa bakaji mukulakaje ukadi mumane kujikija lubilu luende pa buloba, katshivua kabidi umueneka kudi bapitshi ba njila bavua ne tshibidilu tshia kumumona mu bumanyishi buende bua mu musesu. Mbumanyishi kayipu buakafilaye mu bidimu biende bivule bia mudimu wa lulamatu, anu bu mudibi bilejibue mu mêyi a dianyisha a aba bavua bamumona mu buambi buende bua patoke! Bu muudi mumanyishi wa Bukalenge, utuku pa tshibidilu ufila Tshibumba tshia Nsentedi ne Réveillez-vous! mu bianza bia bantu bawutu upetangana nabu mu buambi buebe anyi?
19. Ndikankamija kayi didi Ebelu 6:10-12 utupetesha?
19 Tukonkonona kabidi, lutulu ne mudimu wa lulamatu wa bana betu ba balume badi basadila bu bena mu Kasumbu Kaludiki ka Bantemu ba Yehowa. Bavule ba kudibo badi mpindieu ne bidimu makumi muanda-mukulu ne bia mu njila anyi makumi tshitema ne bia mu njila, kadi batshidi anu bamanyishi ba Bukalenge badi bakumbaja ne tshisumi midimu yabo mibuomekela. (Ebelu 13:7) Netuambe tshinyi bua bakuabo bakulakaje badi ne ditekemena dia kuya mu diulu ne nansha bua bamue ba mu “mikuabo mikoko” badi ku kakese ku kakese benda bakulakaja? (Yone 10:16) Badi ne bua kuikala ne dishindika dia se: Nzambi ki mmupange buakane bua kubenga kuvuluka mudimu wabo ne dinanga didibo baleja bua dîna diende. Pamue ne bena kuitabuja nabu bansonga, Bantemu ba Yehowa bakulakaje badi bananukila mu dienza tshidibo mua kuenza, pa kuenza midimu ya ditabuja ne kuleja lutulu mu mudimu wa Nzambi. (Ebelu 6:10-12) Nenku, ku dibiishibua ku lufu, anu bu baprofete ba kale, anyi ku dipandishibua pafuminabo ku “dikenga dinene,” nebanowe difutu dimpe dia muoyo wa kashidi.—Matayi 24:21.
20. (a) Ntshinyi tshiudi mulongele ku “tshitembelu” tshia baprofete? (b) Mmunyi mudi kuikala ne lutulu bu baprofete mua kutuambuluisha?
20 Ntshitembelu kayi buimpepu tshidi baprofete ba Nzambi batushile! Bualu bakananukila nansha mu dikengeshibua, kuleja lutulu, ne kumuenesha mikuabo ngikadilu ya Nzambi, bavua ne disanka dia pa buadi dia kuakula mu dîna dia Yehowa. Bu mutudi Bantemu bende ba lelu, mbimpe tuikale bu buobo ne tuikale bapangadije anu bu muprofete Habakuka wakamba ne: “Nengimane ha tshibumba tshianyi tshia butentekedi, nengimane ha mutu ha tshibumba tshia masalayi; nenteleje bua kunvua tshidiye musue kungambila, ne meyi adiye musue kukudimuna bualu bua kudila kuanyi.” (Habakuka 2:1) Nanku, tuikale ne dipangadika dia muomumue mu dileja lutulu ne ditungunuka ne disanka dionso mu dienza bumanyishi bua patoke bua dîna ditambe bunene dia Mufuki wetu Munene, Yehowa!—Nehemiya 8:10; Lomo 10:10.
Udi mukuate ngenyi eyi anyi?
◻ Ntshilejilu kayi tshia bukitu tshivua muprofete Amosa mushiye?
◻ Mmu nsombelu kayi muvua muprofete Mozese muikale muntu wa tshitembu?
◻ Mmunyi mudi Bantemu ba Yehowa ba mu lelu mua kuenza malu bu Amosa ne Yeshayi?
◻ Ntshinyi tshidi ba-ministre bena nkristo mua kulongela ku nsombelu wa Hoshea ne Yoele?
◻ Mmunyi mutudi mua kubabidila bilejilu bia Yehezekele ne Mika?
[Tshimfuanyi mu dibeji 16]
Nansha muvua buluishi bua Amaziya buikale bua luonji, spiritu wa Yehowa wakapetesha Amosa bukole bua kufila milayi ne dikima dionso
[Tshimfuanyi mu dibeji 18]
Bela manyi ba lulamatu badi bashiya tshilejilu tshilenga pa kuleja lutulu mu mudimu wa Yehowa