Tuenzayi dimanyisha dia patoke bua dîna dia Yehowa
“Tufilefile kudi Nzambi mulambu wa kumusamuna nawu, mbuena-kuamba ne: mamuma a mishiku idi yenza dimanyisha dia patoke bua dîna diende.”—EBELU 13:15, NW.
1. Ntshinyi tshiakamba muprofete Hoshea bua kudimuija bena Izalele nende?
HOSHEA muprofete wa Yehowa uvua ne mukenji wa lupandu bua bena Izalele nende. Mu siekele wa muanda-mukulu K.B.B., wakabela bantu ba mu tshikondo tshiende bena mutu mukole bua kunyingalala. Wakabambila ne: “Nuye ne mei makane, hinganai kudi Yehowa. Numuambile ne, ‘Utûmushile mibi yonso, witabushe malu adi makane, bua tuetu tufile mishiku yetu kûdi bu milambu ya ngombe.’” (Hoshea 14:2) Mu dilomba bantu bua kufila kudi Yehowa ‘mishiku yabu bu milambu ya ngombe,’ mulayi wa Hoshea uvua ukankamija bena Izalele bua kunyingalala ne kudifila ne muoyo mulenga bu milambu bua kutumbisha Nzambi.
2. Mmulambu wa mushindu kayi uvua mupostolo Paulo mukankamije bena nkristo bua kufila?
2 Lelu’eu, Bantemu ba Yehowa badi bafila [bu milambu] ‘ngombe ya mishiku yabu.’ Badi kabidi bangata ne mushinga mubelu wa mupostolo Paulo udi utêla mêyi aa adi mu mulayi wa Hoshea pakafundaye ne: “Ku butuangaji bua [Yezu Kristo] tufilefile kudi Nzambi mulambu wa kumusamuna nawu, mbuena-kuamba ne: mamuma a mishiku idi yenza dimanyisha dia patoke bua dîna diende.” (Ebelu 13:15, NW) Nenku, basadidi ba Nzambi badi ne disanka divule dia kusamuna Yehowa bu mudi mu mudimu wabu wa bumanyishi bua Bukalenge.—Matayi 24:14.
3. Mmunyi mutudi mua kulambula Yehowa “mulambu wa disamuna,” ne midimu ya banganyi ituakonkonona mpindieu?
3 Kuenza bumanyishi bua patoke bua dîna dia Yehowa ndisanka dia mudimu didi kadiyi dikumbanyine bantu bapange bupuangane. Ndisanka kayipu ditudi nadi bua kumanyisha bakuabo malu adi atangila Nzambi wetu, pa kufila kudi Yehowa “mulambu wa disamuna,” “tuana tua ngombe tua mishiku yetu”! Bua dikankamijibua dietu mu dimanyisha patoke lumu luimpe lua Bukalenge lelu’eu, lekela tuanji kukonkonona malu adi Bible utumanyisha pa baprofete ba Nzambi ne bakuabo basadidi ba Yehowa. Ku nsombelu wabu, tudi mua kulonga bivule biatuambuluisha bua kuikala ne disanka mu mudimu wetu wa buambi.—Lomo 15:4, NW.
Mudimu wa baprofete
4, 5. (a) Mmu miakulu yakafundabu Bible ku ntuadijilu, ndiumvuija kayi dia nshindamenu didi nadi miaku yakakudimunabu “muprofete”? (b) Ntshinyi tshidi tshileja ne: baprofete bavua ne mudimu munene mu ndongoluelu wa Nzambi?
4 Baprofete ba Yehowa bavua ne disanka dia mudimu dia kumanyisha patoke mukenji wende. Muaku wa tshiena-Ebelu bua “muprofete” (na·viʼʹ) udi ne ntuadijilu udi kayi mua kujadikibua menemene, kadi ditumika nawu mu Bible didi dileja se: baprofete balelela bavua ba-tshikuma-mbila ba Yehowa, bantu ba Nzambi bavua ne mikenji mienzeja ku spiritu wende. Muaku wa tshiena-Greke udibo bakudimune “muprofete” (pro·pheʹtes) udi umvuija ku muaku ne ku muaku “muakudi ne dîyi dikole,” bua kumanyisha tshintu kampanda “ku mêsu” anyi “kumpala” kua muntu kansanga. Muprofete mmuntu udi umanyisha mikenji idi ifumina kudi Nzambi. Misangu mivule, kadi ki mpa tshibidilu to, baprofete balelela ba Nzambi bavua bamanyisha malu avua ne bua kulua.
5 Pa bidi bitangila mudimu munene wa baprofete mu ndongoluelu wa Nzambi, tshibungu tshia Cyclopædia tshia M’Clintock ne Strong tshidi tshiamba ne: “Imue misangu didimuija dia kudibo divua dilombibua . . . Kadi ku musangu ne ku musangu bavua badiumvua munda muabo basakibue bua kumanyisha bantu nansha didimuija diabu kadiyi dilombibue, ne kabavua batshina bua kuakula ne dîyi dikole ne bukitu buonso ne dipangadika dikole miaba ivua dikalaku diabu, pamu’apa dijudija tshiji ne buôwa.” (Volime VIII, dibeji dia 640) Tuangate bimue bilejilu bia malu akafikisha diakamue baprofete ku dikala ne bukitu bua mushindu’eu.
Ngumvuilu ne kabingila
6, 7. Ntshinyi tshiakapesha Yehowa muprofete wende Yehezekele bua kudia, ne ebi bivua ne buenzeji kayi kudiye?
6 Kumpala kua dibutudibua dia Yeruzaleme mu 607 K.B.B., Yehowa wakamanyisha bena Yuda bavua ku bupika ku Babilone ku butuangaji bua muprofete wende Yehezekele. Yehowa wakamuambila ne: “Muana wa muntu, diaku malu audi umona munemu; diaku mukanda eu muvungulule, hashishe, ya wambile ba mu tshisamba tshia Bena Isalele dî.” Yehezekele wakatumikila. Wakamba ne: “Nunku nakabulula mukana muanyi ne yeye wakandisha mukanda. Wakangambila ne, Muana wa muntu, diaku mukanda eu undi nkuha, ûhatshishe munda muebe tente. Nunku nakaudia; ne wakadi mutue nsense bu buitshi mukana muanyi.”—Yehezekele 3:1-3.
7 Mibidi yetu idi ikoka bidiishi mu biakudia bitudi tudia, ne bidiishi ebi bidi bilua tshitupa tshia mubidi wetu. Bia muomumue, ‘mukanda muvungulule’ wakadia Yehezekele—mukenji wa Yehowa uvua muprofete ne bua kumanyisha—uvua ne bua kudibuejakaja mu mubidi muende, kuikalawu ne buenzeji pa mpampakenu yende. Mêyi a Nzambi avua ne buenzeji bunene munda mua Yehezekele, nenku kuamanyisha patoke kuvua muanda wa disanka kudiye. Biwikala Ntemu wa Yehowa, utuku usanka bua kuenza dimanyisha dia patoke bua mukenji wa Nzambi anyi?
8, 9. Ntshinyi tshiakasaka Amosa bua kumanyisha mulayi?
8 Tukonkonone malu adi atangila muprofete Amosa. Uvuaku mu siekele wa tshitema K.B.B. ne uvua umue wa ku baprofete ba kumpala ba bena Ebelu wakafunda umue wa ku mikanda ya mu Bible wakavua pashishe kupeshibua dîna diende. Anu bu Yehezekele, Amosa uvua mumanyishi wa dilambu wa mêyi a Yehowa. Bualu tshiambilu “ebi ke bidi Yehowa muambe” mbatshiambulule misangu 11 mu mukanda wakapeshabu dîna diende! (Amosa 1:3, 6, 9, 11, 13; 2:1, 4, 6, 11; 3:12; 5:3, 4, 16; 7:17) Amosa wakumvua dikengedibua dia kumanyisha mêyi a Nzambi patoke.
9 Bu muvuaye muprofete wa Nzambi, Amosa wakandamuna diakamue ku mêyi a Nzambi pa kuenza bualu kampanda. Ku butuangaji bua Amosa, Nzambi wakamba ne: “Nyama wa ntambue udi mukungule; nganyi udi kayi utshina? Yehowa Nzambi udi wamba dî diandi; muprofete kai udi kayi udiambila bantu?” (Amosa 3:8) Bushuwa, muprofete uvua mudiumvue mutambe kusakibua bua kumanyisha mukenji wa Yehowa.
10. Mmunyi mutu basadidi ba Yehowa ba lelu’eu bandamuna padibu baluisha mudimu wabu wa buambi?
10 Mushindu wa muomumue ne nyama wa ntambue, Yehowa udi ukungula ne mikenji ya dilumbuluisha pa ndongoluelu wa bulongolodi ebu bubi. Anu bu Amosa, basadidi ba Yehowa ba lelu’eu mbadiumvue basakibue bua kumanyisha mêyi a Nzambi patoke. Nansha padibo babakanyina kudi baluishi, badi balonda tshilejilu tshia bapostolo Petelo ne Yone, bakamba ne bukole buonso ne: “Buetu tuetu, katuena mua kulekela kumanyisha malu atuvua bamone ne bumvue.” Bapostolo bakamba kabidi ne dishindika ne: “Tudi ne bua kutumikila Nzambi, bu mfumu, pamutu pa kutumikila bantu.” (Bienzedi 4:20; 5:29, NW) Nenku, netuambe tshinyi bua bidi bitutangila? Bidi bimpe bua kukonkonona mushindu utudi tudiumvua pa bidi bitangila kuenza dimanyisha dia patoke bua dîna dia Yehowa.
“Bidi bivulangana mu mutshima ke bidi bipatuka”
11. Ntshinyi tshidi ne bua kutusaka bua kunanukila mu dienza bumanyishi bua patoke bua dîna dia Yehowa?
11 Bushuwa, baprofete ba Yehowa bavua baleja dianyisha bua disanka diabu dia mudimu. Dileja dianyisha dia muomumue kudi Yehowa didi ne bua kutusaka ku dienza dimanyisha dia patoke bua dîna diende. Musambu wa 145:1, 2 udi wamba ne: “Nenkutumbishe, Nzambi wanyi, Mukelenge wanyi. Nenvudishile dina diebe disanka tô ne tshiendelele. Nenkuvudishile disanka ku dituku ku dituku, nentumbishe dina diebe tô ne tshiendelele.” Mmuenenu webe udiku mu diumvuangana ne miaku eyi anyi? Kulonga Bible pa tshibidilu kudi kutuambuluisha bua kuleja dianyisha diondoke bua bidi Nzambi mutuenzele, bidiye utuenzela ne bialuaye kutuenzela. Ne patudi tulonga Bible pamue mu dîku, katuenaku tumona se: Dîyi dia Nzambi didi ne bukole, ditusaka ku dinanga bua kuakula malu adi amutangila ne malongolola ende anyi? (Ebelu 4:12) Bua kuikala bapatudi ba bipeta bimpe mu dimanyisha patoke dîna dia Yehowa, tudi kabidi ne bua kutumika muetu muonso ne mikanda idi yumvuija Bible mitupetesha kudi Yehowa Nzambi ku butuangaji bua “mupika wa lulamatu ne wa budimu.”—Matayi 24:45-47, NW.
12. Mmunyi mudi bisangilu bia bena nkristo ne dieleela meji bituambuluisha bua kuenza bumanyishi bua patoke?
12 Bituajinga kusamuna Yehowa ne dianyisha dia mu mitshima, tudi ne bua kubuela pa tshibidilu mu bisangilu bia bena nkristo. Muena mu tshisamba tshia Yehowa yonso udi ne bua kutabalela mubelu wa mupostolo Paulo eu: “Tukenketanganayi umue ne mukuabo bua kusakangana ku dinanga ne ku midimu milenga, katuyi tupua muoyo didisangisha dietu bine, anu bu mutu tshibidilu tshia bakuabo, kadi tukankamijangana umue ne mukuabo, bu mutudi tumona dituku dienda disemena pabuipi.” (Ebelu 10:24, 25, NW) Utuku ubuela pa tshibidilu mu bisangilu bia bena nkristo anyi? Utuku misangu mivule umanyisha malelela a mu Mifundu, malu mamonamona malenga, ne ngumu idi ilenga ku muoyo ya dialabala dia [mudimu wa] teokrasi iwutu uteleja mu bisangilu bia bena tshisamba tshia Nzambi anyi? Biwikala welakana bua kumanyisha malu adi atangila Yehowa ne malongolola ende, disumbila tshikondo bua kueleela meji pa Dîyi diende bua ngenyi yende kubuelayi mu kandondo ka mutshima webe. (Musambu wa 77:12; 143:5) Eyowa, bisangilu bia bena nkristo ne dieleela meji pa tshibidilu pa Dîyi dia Nzambi nebikuambuluishe bua kuleja dianyisha bua disanka edi dia mudimu dia mpatshi dia kuenza bumanyishi bua patoke bua dîna dia Yehowa.
13. Mmunyi mutudi ‘tupatula bidi bimpe’ bia mu mitshima yetu?
13 Ne mitshima miwule tente ne dianyisha bua Yehowa, tudi tupatula bintu bimpe. “Muntu muimpe udi upatula malu mimpe a tshiuma tshia mu mutshima wende,” ke muakamba Yezu, “kadi muntu mubi udi upatula bibi bia tshiuma tshiende tshibi; bualu bidi bivulangana mu mutshima ke bidi mukana mupatula.” (Luka 6:45, NW) Mmushindu kayi udi mua kuikala mulenga bua ‘kupatula bidi bimpe’ kupita kuenza bumanyishi bua patoke bua dîna dia Yehowa ne kumanyisha malu adi atangila malongolola ende kudi bena mutumba netu, balela betu—bushuwa, kudi buonso batudi tupetangana nabo?
Bipeta bia bumanyishi bua patoke
14. (a) Ntshinyi tshidi mumanyishi ne muteleji ba mukenji wa Bukalenge mua kumona? (b) Ntshinyi tshidi tshienda tshikumbanjibua ku butuangaji bua mudimu wa Bukalenge?
14 Baprofete ba Nzambi bavua bumvua disanka mu mudimu wabo, ne malu avuabo bamba bavua baababidila kudi babateleji babo. Pa kubifuanyikija, bumanyishi bua patoke bua mukenji wa Bukalenge budi bupetesha baumanyishi disanka dinene. (Bienzedi 20:35) Ne mmushindu kayipu udibi diambuluisha kudi bateleji bena dianyisha! Kuitaba lumu luimpe kudi kuambuluisha bantu bua kutshimuna disama dia mu lungenyi anyi kudi kupetesha mushindu wa kudijikija. Bena mu lufuila badi basanka bua ditekemena dia dibiishibua ku lufu. Banu ba bintu bia lulengu badi mua kuepuka nikotine, eroyine, ne bikuabo bintu bia lulengu. Bavule badi balengeja bibidilu biabu, ne buonso badi bitaba bulelela bua mu Bible badi bapeta budikadidi bua mu nyuma. (Yone 5:28, 29; 8:32) Dimanyisha Bukalenge bu ditekemena dimuepele bua bukua-bantu didi padi diambuluisha bua kudimuija bantu babi, eku difila kudi bena mutshima mululame diandamuna didi disankisha. Nenku bantu badi benda babulujibua “bua kabutu ka kashidi” anyi bua “muoyo wa kashidi” penzeka dilumbuluisha dia Nzambi pa bulongolodi ebu bubi. (Matayo 24:14; 25:31-46; Yehezekele 33:1-9; 1 Timote 2:3, 4) Mudimu wetu wa buambi mmudimu udi upandisha ukena kufuanyikija ne mukuabo, bumanyishi bua patoke butambe kualabala kupita muvuabi kumpala pa buloba bujima!
15. Ntshinyi tshidi mua kuenjibua bua kuambuluisha aba badi bamueneka bu bena muoyo mulenga mu teritware wetu wa bumanyishi?
15 Bu mutudi Bantemu ba Yehowa ba buena-lelu, tudi ne disanka dionso ne butumike buonso tusadila Tatuetu wa mu diulu. (Lomo 12:11) Pananku, tudi ne disanka bua kudilamina mêba a kudifila mu mudimu wa kumanyisha lumu luimpe patoke ne ku nzubu ne ku nzubu. (Bienzedi 5:42; 20:20, NW) Luapolo lua pa buloba bujima ludi luleja ne: kutshidi bamue bantu ba muoyo mulenga mu teritware yetu ya buambi. Bu mudi nsombelu ishintuluka pa buloba, bantu badi bafimpakajibue mu mishindu mishilangane. Babungi mbalue mu mushindu kauyi mutekemena, bena tshimuangi ne benyi mu matunga a bende. Pamu’apa bantu ba mushindu’eu badi mu teritware wetu. Bu biobi mua kuikala nanku, mbimpe tuenze tshionso tshitudi mua kuenza bua kubambuluisha mu nyuma bu mutudi tunanukila mu “mudimu munsantu wa lumu luimpe.” (Lomo 15:16, NW) Banga bena nkristo bakalonga mukuabo muakulu bua kumona mua kumanyisha lumu luimpe kudi bantu ba mushindu’eu.
16. Ntshinyi tshidi mua kutuambuluisha bua kunanukila mu dimanyisha dîna dia Yehowa?
16 Baprofete ba Nzambi bavule bavua ne midimu ya ntatu. Kabivua bipepele kudibo bua kumanyisha mikenji ya Nzambi kudi bantu bavua kabayi bena lumvu to. Bia muomumue, ki mmusadidi wonso mudilambule kudi Yehowa udi umona ne: mbipepele bua kuenza bumanyishi bua patoke bua dîna Diende to, nangananga mu teritware mudi bantu kabayi basankidila bulelela. Kadi, pa kuikala ne dieyemena dikole, didi difumina ku dilonga dia Dîyi dia Nzambi, kusangisha ku bukole budi Yehowa ufila, tudi mua kunanukila mu dimanyisha mukenji wa Bukalenge. (Filipoi 4:13; Buakabuluibua 14:6) Pa bualu ebu, ntshinyi tshikuabo tshitudi mua kulonga kudi baprofete ba Yehowa ne bakuabo basadidi bende ba mu bikondo bia kale?
Dienzejangana mu mudimu wa budimi
17. Mbimue bilejilu kayi bia dibabidila dienzejangana mudimu mu mudimu wa Nzambi bidi mu Mifundu?
17 Mu dikumbaja mudimu wende mumuomekela, Mozese muprofete wa Nzambi uvua upeta diambuluisha dia kudi tutuende, Aarona. Yehowa wakambila Mozese ne: “[Aarona] yeye neikale muakuidi webe kudi bantu; yeye neikale bu mukana muebe ne wewe newikale bu Nzambi kudiye.” (Ekesode 4:16) Tukonkonone kabidi malu a mu tshikondo tshia baprofete Eliya ne Elisha, pavua “bana ba baprofete” balubuluke. Bana aba bakamueneka bu tshisumbu tshia basadidi ba Nzambi bavua batumika mu buobumue, bushuwa, bavua ne disanka dia kuenzejangana mudimu umue ne mukuabo. (2 Bakalenge 2:3-5; 4:38; fuanyikija ne 1 Samuele 10:5, 10.) Bushuwa, Mozese, Aarona ne “bana ba baprofete” kabavua badifila mu dimanyisha lumu luimpe lua Bukalenge to. Kadi, didisangisha diabu divua ne diambuluisha dinene kudi yonso wa kudibo. Siekele mivule pashishe, Yezu wakatuma balongi 70 mu mudimu “babidi babidi,” ne bushuwa, bakababidila dienzejangana mudimu diakafidibua.—Luka 10:1-16; fuanyikija ne Bienzedi 17:10, 11; 20:20.
18. Mmunyi mudi dienzejangana mudimu dikale ne tshipatshila tshimpe lelu’eu?
18 Mu tshidimu tshia 1953, Bantemu ba Yehowa bakadibueja mu programme muvua bamanyishi ba Bukalenge batumika mu buobumue mu mudimu wa budimi. Bushuwa, ebi kabiakenjibua anu bua dieleshangana diboko patupu to. Programme eu wa dilongesha wakenjibua bua kuvuija basadidi ba Nzambi balongeshi ne bambi ba lumu luimpe badi batamba kupatula bipeta bimpe. Ne tshipatshila etshi mu lungenyi, bamanyishi ba Bukalenge bapiluke badi badifila mu buambi ne bapiabapia. Dibidija edi mu mudimu wa ku nzubu ne ku nzubu mbatambe kudibabidila ne ndiambuluishe tshisamba tshia Yehowa bua kulubulukatshi mu dienza bumanyishi bua patoke bua dîna diende. (1 Timote 4:16) Lelu’eu, dikubibua mmukuabo muanda udi ufikisha ku didimuija bena nkristo bua kupatukabu mu buambi “babidi babidi,” nangananga mu imue miaba.
19. Ntshinyi tshidi ne bua kulamibua mu lungenyi pa bidi bitangila bipatshila bia muntu pa nkayende mu buambi?
19 Nansha paudi wenza mudimu ne bena kuitabuja nebe anyi uya nkayebe ku tshiibi kampanda, enza madikolela bua kukumbaja bimue bipatshila bia muntu pa nkayende. Bidi ne bua kuikala bia meji, biwudi mua kukumbaja. Udiku ukengela diambuluisha mu mushindu uudi mua kuakaja mbuelelu webe bilondeshile nsombelu bua kujula dijinga dia kumanya bia bungi kudi bantu badi mu teritware webe anyi? Pikalabi nanku, pamu’apa udi mua kufila mpanda-njila, mumanyishi wa Bukalenge wa ku dîba ne ku dîba, anyi mumanyishi udi mua kuikala nangananga mupatudi wa bipeta bimpe mu dienza mudimu ne mbuelelu mimpe. Muenzejanganyi nebe wa mudimu udi mua kuikala mukumbane bua kukuambuluisha mu didilongolola ne ditumika ne mbuelelu idi mu Mudimu wetu wa Bukalenge anyi mu mukanda wa Comment raisonner à partir des Ecritures. Mu mêba anudi nuenza pamue bumanyishi bua ku nzubu ne ku nzubu, teleja ne ntema yonso bidi muenzejanganyi nebe wa mudimu wamba. Pashishe, uteta dileja dia muomumue wewe nkayebe too pawapiluka mu dienza tshitupa etshi tshia mudimu.
20, 21. Ntshinyi tshidi mua kuvuija dienzejangana dimpe mu buambi diambuluisha dia pa buadi?
20 Newenze tshinyi biwikala ukengela diambuluisha bua kufika ku dienza makumbula mapiamapia adi apatula bipeta bimpe ne kutuadija malonga a Bible? Pamu’apa, ku butuangaji bua mulombodi wenu wa Dilonga dia Mukanda, ndongoluelu idi mua kuenjibua buebe wewe bua kutumika mu budimi ne mumanyishi wa Bukalenge udi muzanzamuke mu dituadija malonga a Bible. Kuikadi kampuwa panudi nuenza pamue makumbula mapiamapia to. Kupita apu, kunyima kua muenzejanganyi nebe wa mudimu mumane kukuleja mushindu udiye upita ne malu mu dimue dikumbula, udi mua kubabidila bua kuenza dileja dia muomumue pawenza dikumbula dipiadipia didi dilonda. Muenzejanganyi nebe wa mudimu neikalepu bua kukuambuluisha ne kukupesha mibelu kunyima.—Fuanyikija ne Galatia 6:6.
21 Dikuatshisha dia mushindu’eu diûle tente ne dinanga dia muenzejanganyi wa mudimu wa budimi didi mua kukuambuluisha bua kukumbaja bipatshila biebe mu buambi. Diambuluisha edi ne dianyisha diebe diondoke bua bulenga-bunangi bua Yehowa pa kukupetesha disanka edi dia mudimu nebikufikishe ku ditamba kupatula bipeta bimpe mu midimu yebe ya buambi bua Bukalenge. Ne utambe kunanga disanka diûdi nadi dia kubenesha Yehowa pa kuakula bimpe dîba dionso buende ne kuenza pa tshibidilu bumanyishi bua patoke bua dîna diende.—Musambu wa 145:1, 2, 9-13.
22. Nnkonko kayi yavua dilonga dietu dialonda kutuambuluisha bua kuandamuna?
22 Bu mutudi Bantemu ba Yehowa, tutu tuenza pa tshibidilu makumbula mu mudimu wetu wa buambi bua ku nzubu ne ku nzubu. Bavule badi bateleja lumu luimpe ne dianyisha diondoke. Kadi, bamue badi mua kudikanda bua kuteleja mukenji wa Bukalenge. Ntshinyi tshitudi ne bua kuenza mu nsombelu ya mushindu’eu? Mmunyi mutudi mua kunanukila mu mudimu udi Yehowa muomekele tshisamba tshiende? Mvese kayi ya mu Mifundu idi mua kutukuatshisha anyi kutuludika? Nkonko eyi neyandamunyibue mu tshiena-bualu tshidi tshilonda.
Udiku mukuate malu aa anyi?
◻ Ntshinyi tshiakamba Hoshea ne mupostolo Paulo bua milambu ya kufila kudi Nzambi?
◻ Ntshinyi tshiakasaka Yehezekele ne Amosa bua kufila milayi?
◻ Mmunyi mutudi ne bua kuangata mudimu wetu wa buambi bua Bukalenge?
◻ Mbipeta kayi bimpe bidi mua kufumina ku dienzejangana dia mudimu mu buambi?
[Bimfuanyi mu dibeji 13]
Dienzejangana mudimu ne tshipatshila didi mua kutuambuluisha bua kulubuluka mu buambi