Bamanyishi ba Bukalenge badi balonda

Lumu luimpe lua Bukalenge nelumanyishibue

MUNKATSHI mua siekele mivule, muluishi wa Nzambi munene, Satana Diabolo, mmutumike ne budimu buonso ne mbulamatadi ya tshididi ne bitendelelu bia dishima mu madikolela ende bua kukanda dimuangalaka dia Buena-nkristo bulelela. Kadi ngenzelu eyi neipangile. Yezu wakandiajila kumanyisha ne: “lumu luimpe lua bukalenge nelumanyishibue [ki ne: “luvua pamu’apa mua kumanyishibua” anyi, “neluikale mua kumanyishibua”] pa buloba bujima budi bantu bâse bu tshimanyinu mu matunga wonso.”​—Matayi 24:14, NW.

Dipangila dia Satana didi dimueneka patoke mu Grèce. Mu ditunga edi Ekleziya Ortodokse wa bena Greke utu uteta bua kukandika Bantemu ba Yehowa bua kabamanyishi lumu luimpe lua Bukalenge. Kadi, anu bu mudibi bizangika kudi bualu buenzeke budi bulonda ebu, ndekelu wa bionso malelela a mu Bible adi afika kudi bantu bena mioyo miakane nansha kuoku kuikala buluishi.

Kukadi bidimu pabuipi ne 30, nsaserdose muena Ortodokse wa bena Greke wakitaba lumu luimpe ne wakaleja mene dijinga dia kulua umue wa ku Bantemu ba Yehowa. Kadi, balela bende bakaluisha bikole tshienzedi tshiende etshi ne bakamufinakaja bua alekele didisangisha diende ne Bantemu. Bua kusankisha dîku diende, wakatungunuka ne mudimu wende wa bu-nsaserdose; kadi, uvua misangu yonso wanyisha se: Bantemu ba Yehowa mbamuambuluishe bua kumanya bulelela ne wakabulekela bua muanzu wende munene mu tshitendelelu tshia dishima.

Nansha nanku, uvua imue misangu wakuila Bantemu ba Yehowa pavua tshikondo tshimueneka. Misangu mivule wakabela mene bantu ne: bu buobo basue kumanya malelela a mu Bible, bavua ne bua kulonga ne Bantemu. Mu kupita kua bidimu, bamue bakalonda bushuwa mubelu wende.

Matuku adi panshi aa, nsaserdose eu wakasama bikole ne wakamona se: uvua mua kufua kunyima kua tshikondo tshîpi. Pavuaye mu lupitadi, wakabikidisha bana bende, ne buonso bakadikungija ku bulalu buende.a Nunku wakabumvuija ne: bu yeye mua kufua, bavua mua kupetangana nende tshiakabidi. Wakabalondela dilongesha dia mu Bible dia dibiishibua dia bantu ku lufu kudi Yehowa bua kuikala ne muoyo mu mparadizu pa buloba, kadi pikalabu basue menemene bua kumona malu awu enzeka, bavua ne bua kulonga bulelela bua mu Bible ne kupatuka mu tshitendelelu tshia dishima. Wakabasengelela bua kudisangisha ne Bantemu ba Yehowa ne kulongela kudibu mushindu wa kulua bena nkristo balelela.

Kunyima kua tshikondo tshîpi, nsaserdose eu wakafua. Kadi, mubelu wende wa dilaya nawu bana bende wakanowa bipeta bimpe. Muanende wa bakaji, anu bu bavule ba ku balela bende, kavua nansha kakese wanyisha Bantemu ba Yehowa ne mudimu wabu. Kadi kavua mua kubenga dîyi dia pa mutshima dia tatuende pa kufua kuende, nunku kunyima kua tshipolo tshîpi, wakapetangana ne Bantemu ba Yehowa ne wakatuadija kulonga Bible. Matuku adi panshi aa wakalua Ntemu, mulambula muoyo wende kudi Yehowa Nzambi ne mmuleje tshimanyinu tshia didilambula diende pa kutambuishibua.

Mu Grèce ne mu makuabo matunga mapite pa 230, Bantemu ba Yehowa badi beyemena bukole bua spiritu munsantu wa Nzambi. Ne dikuatshisha dijima dia spiritu munsantu badi bakumbaja mulayi wa Yezu eu: “Nenupete bukole panufikila spiritu munsantu, ne nenuikale bantemu banyi mu Yeruzaleme, ne mu Yudeya mujima ne mu Samariya, too ne mu bitupa bia kulekule bia buloba.”​—Bienzedi 1:8, NW.

[Mêyi adi kuinshi]