Udi muvuluke anyi?

Udi muanyishe dibala dia nimero mipiamipia ya Tshibumba tshia Nsentedi anyi? Nunku, anjibi kumona né udi mua kuandamuna ku nkonko idi ilonda eyi:

▫ Bua tshinyi bena nkristo ba kumpala kabavua basekelela diledibua dia Yezu?

Bilondeshile The World Book Encyclopedia, “Bena nkristo ba kumpala kabavua basekelela diledibua [dia Yezu] bualu bavua bamona disekelela dia diledibua dia muntu kayi yonso bu tshilele tshia bampangano.”​—15/12, dibeji 4.

▫ Tudi ne bua kuenza masambila kudi Yezu anyi?

Tòo, bualu masambila ng’umue mushindu wa ntendelelu wakuenzela anu Nzambi Wa-Bukole-Buonso. Pa kutuma masambila etu wonso kudi Yehowa Nzambi, tudi tuleja ne: tudi tuangata ne mushinga mubelu wa Yezu bua kusambila se: “Tatu wetu udi mu diulu.” (Matayo 6:9)​—15/12, dibeji dia 25.

▫ Bua tshinyi kuakenjibua ndumbuluilu mushilangane bua mpekatu munene wa Mukalenge Davidi padiye mufuanyikija ne mpekatu ya Ananias ne Safira? (2 Samuele 11:2-24; 12:1-14; Bienzedi 5:1-11)

Mukalenge Davidi wakapona mu mpekatu munene bualu bua butekete bua mubidi. Pakamusokoluelabo tshiakenzaye, wakanyingalala, ne Yehowa wakamufuila luse​—nansha muvua bipeta bia mpekatu yende ne bua kumufikila. Ananias ne Safira bakenza mpekatu bualu ne lubombo luonso bakashima, pa kuidikija bua kudinga tshisumbu tshia bena nkristo ne nunku ‘kushima spiritu munsantu ne Nzambi.’ (Bienzedi 5:3, 4) Abi biakamueneka patoke ne: bivua tshijadiki tshia mutshima mubi, nunku, tshilumbu tshiabu tshiakakoshibua ne dîsu dikole.​—1/1, mabeji a 27, 28.

▫ Ntshinyi tshidi mua kutuambuluisha bua kusadila Yehowa ne mutshima wa disanka?

Tudi ne bua kudima mmuenenu muimpe ne wa dianyisha bua mabenesha etu ne masanka a mudimu matupetesha kudi Nzambi, ne katupu muoyo nansha kakese se: patudi tutumikila Dîyi dia Nzambi tudi tumusankisha.​—15/1, mabeji a 16, 17.

▫ Mmalu kayi abidi atudi ne bua kulama mu lungenyi bituasua kufila dikankamija dimpe?

Bua kumpala: tuelayi meji pa tshia kuamba bua se: dikankamija dietu dikale disunguluke. Buibidi: tukebayi tshikondo tshiakanyine bua kusemena kudi muntu udi muakanyine ka-lumbandi anyi udi ukengela dimuibaka.​—15/1, dibeji dia 23.

▫ Bua tshinyi bena “musumba munene” badi ne “malala a mabua mu bianza biabo”? (Buakabuluibua 7:9)

Dinyukula malala a mabua didi dileja se: “musumba munene,” ne disanka dionso udi usekelela Bukalenge bua Yehowa ne Mukalenge wende muela manyi, Yezu Kristo. (Tangila Lewitiki 23:39, 40.)​—1/2, dibeji dia 17.

▫ Mmalongesha kayi a mushinga mukole adi asanganyibua mu mukanda wa Yobo?

Mukanda wa Yobo udi utuleja mushindu wa kupita ne malu. Udi uleja bilejilu bidi bijula ntema bia mushindu udi muntu kampanda udi wakamangana ne ntatu ne bua​—anyi kayi ne bua—​kubedibua. Kupita apu, bualu bumona kudi Yobo nkayende budi mua kutuambuluisha bua kuandamuna ne meji wonso patudi banyukula kudi nsombelu mikole.​—15/2, dibeji dia 27.

▫ Ntshinyi tshidi bishima bia Yezu bitulongesha?

Bishima bia Yezu bidi bitumbisha Nzambi, pa kushiya tshitembelu bua bena nkristo kutumbishabo Nzambi. (Lomo 15:6) Bidi bikankamija dienza buimpe, dileja kalolo, dileja luse.​—1/3, dibeji dia 8.

▫ Mbua tshipatshila kayi butu bakulu bakonkonona biakane nkonko milongolola ne baditshipe bapiabapia?

Mbua kushindika ne: yonso wa kudibu udi umvua tshishiki malongesha a nshindamenu a Bible ne mmumanye tshidi tshilombibue bua kuikala Ntemu wa Yehowa.​—1/3, dibeji dia 13.

▫ Mmunyi mudi masambila adi mu Bible mua kuikala ne diambuluisha kutudi?

Pa kukonkonona masambila adi mu Mifundu, tudi mua kusunguluja aa akenjibua mu nsombelu idi mifuanangane ne yetu petu. Kupeta, kubala ne kueleela meji pa masambila a mushindu’eu nebituambuluishe bua kulengeja diyukidilangana dietu ne Yehowa.​—15/3, mabeji 3, 4.

▫ Ntshinyi tshidi ditshina Nzambi?

Ditshina Nzambi ndikakala dia Yehowa, ndimunemeka diondoke, disuikakaja ku ditshina dimpe dia kubenga kumubungamija. (Musambu wa 89:7)​—15/3, dibeji dia 10.

▫ Mmishindu kayi isatu idi Bible utuleja se: tudi ne mushinga ku mêsu a Nzambi?

Bible udi buludiludi utulongesha se: yonso wa kutudi udi pa nkayende muakanyine ku mêsu a Nzambi (Luka 12:6, 7); ne udi uleja patoke tshidi Yehowa wangata ne mushinga mutudi (Malaki 3:16); ne udi ulonda tshidi Yehowa muenze bua kuleja dinanga diende kutudi. (Yone 3:16)​—1/4, mabeji a 11, 12, 14.

▫ Bua tshinyi Ebelu 10:24, 25 udi umvuija bivule kupita dîyi-dituma patupu dia kudisangisha pamue?

Mêyi aa a Paulo adi afila dîyi-dikulu difundisha ku spiritu bua bisangilu bionso bia bena nkristo​—ne bushuwa menemene, bua tshikondo kayi tshionso tshidi bena nkristo badisangisha pamue.​—1/4, dibeji dia 16.