Bantemu bena nkristo bena buena-muabo bua mu diulu
“Buetu tuetu, buena-muabo buetu budi mu diulu.”—FILIPOI 3:20, NW.
1. Ndilongolola kayi didi nadi Yehowa pa bidi bitangila bamue bantu?
BANTU bena dîna ba pa buloba nebakokeshe bu bakalenge ne bakuidi mu diulu, ku mutu mene nansha kua banjelu. (1 Kolinto 6:2, 3; Buakabuluibua 20:6) Mbulelela kayipu abu bua dikema! Kadi, Yehowa wakabulongolola, ne udi ubukumbaja ku butuangaji bua Muanende mulela umue, Yezu Kristo. Bua tshinyi Mufuki wetu udi wenza bualu bua mushindu’eu? Ne mmunyi mudi dimanya bualu ebu ne bua kuikala ne buenzeji kudi muena nkristo lelu’eu? Tuanjibi kumona mushindu udi Bible wandamuna ku nkonko eyi?
2. Ntshintu kayi tshipiatshipia tshivua Yezu ne bua kuenza tshivua Yone Mubatiji mumanyishe, ne tshintu etshi tshivua tshitangila tshinyi?
2 Pavua Yone Mubatiji ulongolola njila bua Yezu, wakamanyisha se: Yezu uvua ne bua kuenza tshintu kampanda tshipiatshipia. Muyuki udi wamba ne: “[Yone] uvua uyisha, wamba ne: ‘Munyima muanyi mudi mulua kampanda udi ne bukole kumpita meme; tshiena mukumbanyine mua kuinama ne kusulula nshinga ya sandale yende. Mvua munutambuishe ne mâyi, kadi yeye neanutambuishe ne spiritu munsantu.’” (Mâko 1:7, 8, NW) Kumpala kua tshikondo atshi, muntu nansha umue kavua muanji kutambushibua ne spiritu munsantu. Eu uvua ndongoluelu mupiamupia uvua utangila spiritu munsantu, ne uvua utangila dilongolola dia Yehowa dikavua pamue ne kusokolodibua bua kulongolola bantu bua bukokeshi bua mu diulu.
“Muledibue tshiakabidi”
3. Mmalu kayi mapiamapia avua atangila Bukalenge bua mu diulu avua Yezu mumanyishe Nikodeme?
3 Mu tshisangilu kampanda tshia mu musokoko ne Mufarizeyi kansanga munene, Yezu wakasokolola malu mavule pa bidi bitangila dilongolola edi dia Nzambi. Mufarizeyi Nikodeme, wakalua kudi Yezu butuku, ne Yezu wakamuambila ne: “Bikala muntu kayi muledibue tshiakabidi, kêna mua kumona bukalenge bua Nzambi to.” (Yone 3:3, NW) Nikodeme, uvua ne bua kuikala mulonge Mifundu ya tshiena-Ebelu bu muvuaye Mufarizeyi, uvua mumanye tshintu kampanda pa bulelela bunene bua Bukalenge bua Nzambi. Mukanda wa Danyele wakalaya se: Bukalenge buvua ne bua kupeshibua “kampanda mufuane muana [wa balume] wa muntu” ne “bantu badi bansantu ba Mutambe bunene.” (Danyele 7:13, 14, 27, NW) Bukalenge buvua ne bua “kubutula ne kutuisha ku nshikidilu” makalenge makuabu wonso ne kushala bua kashidi. (Danyele 2:44, NW) Mbimueneke se: Nikodeme uvua wela meji se: milayi eyi ivua ne bua kukumbanyina ditunga dia bena Yuda; kadi Yezu wakamba se: bua kumona Bukalenge, muntu udi ne bua kuledibua tshiakabidi. Nikodeme kakumvua bualu nansha bumue, nenku, Yezu wakatungunuka ne kuamba ne: “Bikala muntu kayi muledibue ku mâyi ne ku spiritu, kêna mua kubuela mu bukalenge bua Nzambi to.”—Yone 3:5, NW.
4. Bua bantu badi baledibue ku spiritu munsantu, mmunyi muashintuluka malanda abu ne Yehowa?
4 Yone Mubatiji ukavua muakule bua ditambushibua ne spiritu munsantu. Mpindieu, Yezu udi usakidila se: bua muntu kubuelaye mu Bukalenge bua Nzambi, udi ne bua kuledibua ku spiritu munsantu. Ku diledibua edi disunguluke, balume ne bakaji bapange bupuangane badi babuela mu malanda a pa buawu ne Yehowa Nzambi. Badi balua bana bende badiila buledi. Tudi tubala ne: “Aba buonso bakakidila [Yezu], wakabapesha bukenji bua kulua bana ba Nzambi, bualu bavua benza midimu ya ditabuja mu dîna diende; ne bavua baledibue, ki nku mashi anyi ku disua dia mubidi peshi ku disua dia muntu, kadi nku dia Nzambi.”—Yone 1:12, 13, NW; Lomo 8:15.
Bana ba Nzambi
5. Ndîba kayi divua balongi bena lulamatu batambushibue ne spiritu munsantu, ne mmidimu kayi misuikakaja ku spiritu munsantu yakenzeka mu tshine tshikondo atshi?
5 Yezu pakayukilaye ne Nikodeme, spiritu munsantu ukavua mumane kupuekela Yezu, mumuvuije muela manyi bua bukokeshi buende mu matuku avua ne bua kulua mu Bukalenge bua Nzambi, ne Nzambi wakanyisha Yezu patoke bu Muanende. (Matayo 3:16, 17) Yehowa wakalela bana ba mu nyuma bavule mu dia Pantekoste wa 33 B.B. Balongi bena lulamatu badiunguije mu tshibambalu tshia kuulu mu Yeruzaleme bakatambushibua ne spiritu munsantu. Mu tshine tshikondo atshi, bakaledibua tshiakabidi ku spiritu munsantu bua kuikala bana ba Nzambi ba mu nyuma. (Bienzedi 2:2-4, 38; Lomo 8:15) Kupit’apu, bavua bedibue manyi a spiritu munsantu bua bumpianyi bua mu diulu matuku atshilualua, ne bavua batuibue tshitampi diambedi ne spiritu munsantu bu tshimanyinu tshia ditekemena dia mu diulu adi.—2 Kolinto 1:21, 22.
6. Ndilongolola kayi dia Yehowa didi ditangila Bukalenge bua mu diulu, ne mbua tshinyi mbikumbanyine bua bantu kukumbaja muomu tshiabu tshitupa?
6 Buobu aba bavua bantu bapange bupuangane ba kumpala bavua Nzambi musungule bua kubuela mu Bukalenge. Mbuena kuamba ne: kunyima kua lufu luabu ne dibiishibua ku lufu, bavua ne bua kulua bena mu bulongolodi bua Bukalenge bua mu diulu buakokesha ku mutu kua bantu ne kua banjelu. Yehowa wakalongolola bua se: ku diambuluisha dia Bukalenge ebu, dîna diende dinene ditumbishibue ne bumfumu buende ku mutu kua bionso bubingishibue kumpala kua bufuki buonso. (Matayo 6:9, 10; Yone 12:28) Mmunyipu mudi bantu bakanyine kuikala bena mu Bukalenge abu! Satana wakatumika ne bantu pakatontololaye bua musangu wa kumpala bumfumu bua Yehowa ku mutu kua bionso mu budimi bua Edene, ne mpindieu Yehowa mmulongolola se: diandamuna ku butontolodi ebu difidibue kudi bantu. (Genese 3:1-6; Yone 8:44) Mupostolo Petelo wakafundila bantu bakasungudibua bua kukokesha mu Bukalenge abu ne: “Mubeneshibue ikale Nzambi ne Tatuende wa Mukalenge wetu Yezu Kristo, bualu, ku luse luende luvule mmutupeteshe diledibua dipiadipia ku ditekemena didi ne muoyo ku dibiishibua dia Yezu Kristo ku bafue, bua bumpianyi bukena bubola, bunyanguka ne bukena bututuka. Mbanulaminabu mu diulu.”—1 Petelo 1:3, 4, NW.
7. Mmalanda kayi masunguluke ne Yezu adi aba badi batambushibue ne spiritu munsantu bababidila?
7 Bu bana badiila buledi ba Nzambi, bena nkristo basungula aba bakalua bana babu ne Yezu Kristo. (Lomo 8:16, 17; 9:4, 26; Ebelu 2:11) Bu muakajadika Yezu muvuaye Dimiinu dilaya Abrahama, bena nkristo bela manyi a spiritu aba badi tshitupa tshisakidila, anyi tshia pashishe, tshia Dimiinu adi, dialua kupetesha bantu badi bitabuja dibenesha. (Genese 22:17, 18; Galatia 3:16, 26, 29) Ndibenesha kayi? Ndiakalenga dia kupikudibua ku mpekatu ne kufikishibua ku dipunga ne Nzambi ne kumusadila mpindieu ne bua kashidi. (Matayo 4:23; 20:28; Yone 3:16, 36; 1 Yone 2:1, 2) Bena nkristo bela manyi bàtshìdì pa buloba badi balombola bantu bena mutshima mululame ku dibenesha edi pa kufila bujadiki bua muanabu wa mu nyuma Yezu Kristo ne bua Tatuabu mubadiidi wa buledi, Yehowa Nzambi.—Bienzedi 1:8; Ebelu 13:15.
8. “Disokolodibua” dia bana balela mu nyuma ba Nzambi ntshinyi?
8 Bible udi wakula bua “disokolodibua” dia bana balela mu nyuma aba ba Nzambi. (Lomo 8:19) Pa kubuela mu Bukalenge bu bakalenge badisangishe pamue ne Yezu, nebadifile mu dibutula ndongoluelu wa malu wa Satana. Ndekelu wa bionso, bua bidimu tshinunu, nebambuluishe bua kupuijila mabenesha a ku mulambu wa tshia-bupikudi pa bukua-bantu ne nenku babandisha bantu ku bupuangane buakajimija Adama. (2 Tesalonike 1:8-10; Buakabuluibua 2:26, 27; 20:6; 22:1, 2) Disokolodibua diabu ndikonge malu wonso matela kuulu eku. Ntshintu tshidibu bindile ne muoyo kulukulu kudi bantu bafuka badi bitabuja.
9. Mmunyi mudi Bible wakula bua kasumbu ka pa buloba bujima ka bena nkristo bela manyi?
9 Kasumbu ka bena nkristo bela manyi pa buloba bujima ke “tshisumbu tshia banabute bakadi bamana kufunda mêna abu mu diulu.” (Ebelu 12:23, NW) Badi ba kumpala ku dibabidila mulambu wa tshia-bupikudi wa Yezu. Badi kabidi “mubidi wa Kristo,” ke tshidi tshileja malanda abu masheme munkatshi muabu, pamue ne Yezu kabidi. (1 Kolinto 12:27) Paulo wakafunda ne: “Bu mudi mubidi muikale umue kabidi ne bitupa bivule, kadi bitupa ebi nansha biobio bikale bivule, buonso buabio bidi bienza anu mubidi umue; ke mudibio kabidi ne bua Kristo. Tuetu bonso, nansha bena Yuda, nansha bena Ngreka, nansha bapika, nansha badikadile, mbatuoweshe mu dina dia Musambi umue, badienze mubidi umue, kabidi buonso buetu tudi buule anu ne Musambi umue.”—1 Bena Korente 12:12, 13, MMM; Lomo 12:5; Efeso 1:22, 23; 3:6.
“Izalele wa Nzambi”
10, 11. Mu siekele wa kumpala, bua tshinyi Izalele mupiamupia uvua ukengedibua, ne mbanganyi bavua benza tshisamba tshipiatshipia etshi?
10 Bidimu bipite pa 1 500 kumpala kua dilua dia Yezu bu Masiya mulaya, ditunga dia Izalele wa ku mubidi divua tshisamba tshia Yehowa tshia pa buatshi. Nansha muakabavuluijabo misangu ne misangu, tshisamba tshionso mu ka-bujima tshiakadileja tshibule lulamatu. Pakamueneka Yezu, tshisamba atshi tshiakamubenga. (Yone 1:11) Nenku, Yezu wakambila bamfumu ba malu a Nzambi bena Yuda ne: ‘Nebanunyenge bukalenge bua Nzambi, nebabupe tshisamba tshidi tshikuama mamuma abu.’ (Matayo 21:43) Kuitaba “tshisamba atshi tshidi tshikuama mamuma [a Bukalenge]” kudi ne mushinga bua lupandu.
11 Tshisamba tshipiatshipia ntshisumbu tshia bena nkristo bela manyi, balela dia Pantekoste wa 33 B.B. Benamu ba kumpala bavua balongi ba Yezu bena Yuda bakamuitaba bu Mukalenge wabu wa mu diulu. (Bienzedi 2:5, 32-36) Kadi, bavua bena mu tshisamba tshipiatshipia tshia Nzambi, ki mbualu bavua ndelanganyi ya bena Yuda, apo mbua dileja ditabuja diabu kudi Yezu. Nunku, Izalele wa Nzambi eu mupiamupia uvua tshintu kampanda tshisunguluke—tshisamba tshia mu nyuma. Bena Yuda bavule pakabengabu Yezu, dibikila dia kulua tshisamba tshipiatshipia diakalabajibua kudi bena Samariya ne Bampangano. Tshisamba tshipiatshipia tshiakabikidibua ‘Izalele wa Nzambi.’—Galatia 6:16.
12, 13. Mmunyi muakamuenekabi patoke se: Izalele mupiamupia kavua kasumbusumbu patupu ka Buena-Yuda?
12 Mu Izalele wa kale, pavua bantu bavua kabayi bena Yuda balua bena kuitabuja, bavua ne bua kutumikila Mikenji ya Mozese, ne balume bavua ne bua kuleja muanda eu pa kutengudibua. (Ekesode 12:48, 49) Bamue bena nkristo bena Yuda bakela meji se: bivua mua kuikala bia muomumue mu Izalele wa Nzambi bua bavua kabayi bena Yuda. Pabi, Yehowa uvua ne tshinga tshintu tshishilangane mu tshieledi tshiende tshia lungenyi. Spiritu munsantu wakalombola mupostolo Petelo ku Nzubu wa Mumpangano Korneliyo. Pakandamuna Korneliyo ne dîku diende ku bumanyishi bua Petelo, bakapeta spiritu munsantu—bangabanga mene ne kutambushibua mu mâyi. Ebi biakaleja patoke se: Yehowa uvua muanyishe Bampangano aba bu bena mu Izalele wa Nzambi kakuyi dibalomba bua kutumikila Mikenji ya Mozese.—Bienzedi 10:21-48.
13 Bungi kampanda bua bena kuitabuja bakamona muanda eu mukole bua kuwitaba, nenku bualu ebu bujima bavua ne bua kubusombela panshi kudi bapostolo ne bakulu mu Yeruzaleme. Kasumbu aka kàvuà ne bukokeshi kakateleja bujadiki busulakaja pa mushindu uvua spiritu munsantu mupuekele bena kuitabuja bavua kabayi bena Yuda. Makebulula mu Bible akaleja se: etshi tshivua dikumbana dia mulayi mufunda ku spiritu. (Yeshaya 55:5; Amosa 9:11, 12) Dipangadika dijalame diakapeteka: Bena nkristo bakena bena Yuda kabavua ne bua kutumikila Mikenji ya Mozese to. (Bienzedi 15:1, 6-29) Nenku, Izalele wa mu nyuma uvua bushuwa tshisamba tshipiatshipia, kavua kasumbusumbu patupu ka Buena-Yuda to.
14. Dibikila dia tshisumbu tshia bena nkristo ne: “bisa dikumi ne bibidi bidi bitangalake” kudi Yakobo didi diumvuija tshinyi?
14 Mu diumvuangana ne ebi, pavuaye ufundila bena nkristo bela manyi ba mu siekele wa kumpala, mupostolo Yakobo wakatangija mukanda wende kudi “bisa dikumi ne bibidi bidi bitangalake.” (Yakobo 1:1, NW; Buakabuluibua 7:3-8) Bushuwa, ba muena-muabu ba Izalele mupiamupia kabavua bena mu bisa kampanda bisunguluke. Kakuvua ditapulukangana munkatshi mua bisa bishilangane 12 mu Izalele wa mu nyuma bu muvuabi mu Izalele wa ku mubidi. Kadi, mêyi a Yakobo mafunda ku spiritu adi aleja se: bilondeshile mmuenenu wa Yehowa, Izalele wa Nzambi uvua mupingane mu ka-bujima kende pa muaba wa bisa 12 bia Izalele wa ku mubidi. Bu muena Izalele wa ku mubidi mua kulua muena mu tshisamba tshipiatshipia, dîku diende dia ku mubidi—nansha né uvua muena mu tshisa tshia Yuda anyi tshia Lewi—kadivua ne mushinga.—Galatia 3:28; Filipoi 3:5, 6.
Tshiovo tshipiatshipia
15, 16. (a) Mmunyi mudi Yehowa wangata bena Izalele wa Nzambi badi kabayi bena Yuda? (b) Izalele mupiamupia uvua muashila pa tshishimikidi kayi tshikumbanyine?
15 Bilondeshile mmuenenu wa Yehowa, bena mu tshisamba tshipiatshipia etshi bakena bena Izalele mbena Yuda mu nyuma buuja tengatenga! Mupostolo Paulo wakumvuija ne: “Eu udi muena Yuda pambelu ki mmuena Yuda [menemene] to, ne eu udi mutengula pambelu, ku mubidi, ki mmutengula [bia bushuwa] to. Kadi, muena Yuda ng’eu udi [muena Yuda] munda muende, ne ditengudibua diende ndia mu mutshima ku spiritu, kadi, ki nku mikenji mifunda to. Butumbi buende budi bufumina, ki nkudi bantu, apo kudi Nzambi.” (Lomo 2:28, 29, NW) Bampangano bavule bakandamuna ku dibikila dia kuikala tshitupa tshia Izalele wa Nzambi, ne muanda eu wakakumbaja mulayi wa Bible. Tshilejilu, muprofete Hoshea wakafunda ne: “Nendeje luse kudi eu umvua tshiyi muleje luse, ne nengambile aba badi kabayi tshisamba tshianyi ne: ‘Nudi tshisamba tshianyi’; ne ku luatshi luseke netshiambe ne: ‘Udi Nzambi wanyi.’”—Hoshea 2:23, NW; Lomo 11:25, 26.
16 Bu muvua bena Izalele ba mu nyuma kabayi muinshi mua tshiovo tshia Mikenji ya Mozese, mpa tshishimikidi kayi pavuabu bena tshisamba tshipiatshipia? Yehowa wakenza tshiovo tshipiatshipia ku butuangaji bua Yezu ne tshisamba etshi tshia mu nyuma. (Ebelu 9:15) Yezu pakabanjijaye Tshivulukilu tshia lufu luende, mu dia 14 Nizan 33 B.B., wakapitshisha diampa ne mvinyo kudi bapostolo bende 11 ba lulamatu ne kuamba se: mvinyo uvua uleja “mashi a tshiovo.” (Matayo 26:28; Yelemiya 31:31-34) Anu bu mudibi bifunda mu muyuki wa Luka, Yezu wakamba ne: lupanza lua mvinyo luvua luleja “tshiovo tshipiatshipia.” (Luka 22:20, NW) Mu dikumbana dia mêyi a Yezu, pakapueka spiritu munsantu dia Pantekoste ne Izalele wa Nzambi kuledibua, Bukalenge buakumbushibua kudi Izalele wa ku mubidi ne kupeshibua eu mupiamupia, tshisamba tshia mu nyuma. Pa muaba wa Izalele wa ku mubidi, tshisamba tshipiatshipia etshi tshivua mpindieu musadidi wa Yehowa, tshienza ne bantemu bende.—Yeshaya 43:10, 11.
“Yeruzaleme mupiamupia”
17, 18. Mmumvuija kayi adi mafidibue mu mukanda wa Buakabuluibua pa butumbi budi buindile bena nkristo bela manyi?
17 Mbutumbi kayipu abu budi buindile ba muabi abu bua kuabanyangana dibikila edi dia mu diulu! Ne ndisanka kayipu dia kumanya malu a tuyayi tukamona adi mabindile! Mukanda wa Buakabuluibua udi ututapila ka-diosha pa bidi bitangila bumpianyi buabu bua mu diulu. Tshilejilu, mu Buakabuluibua 4:4 (NW), tudi tubala se: “Ne nkuasa makumi abidi ne inayi ivua minyunguluke nkuasa wa bumfumu; ne pa nkuasa eyi ya bumfumu meme kumona basombepu kudi bakulu makumi abidi ne banayi, bavuale bilamba bia pa mutu bitoke, ne bifulu bia butumbi bia ngolo pa mitu yabu.” Bakulu 24 aba mbena nkristo bela manyi, babiishibue ku lufu ne mpindieu bikale ne mianzu ivua Yehowa mubalaye mu diulu. Bifulu biabu ne nkuasa yabu ya butumbi bidi bituvuluija bukalenge buabu. Anjibi kufuanyikija dikasa didibu batute mu lusenge bua kusadila ku nyunguluilu wa nkuasa wa bumfumu wa Yehowa!
18 Mu Buakabuluibua 14:1 (NW), tudi tupeta kakuabu ka-diosha: “Ne meme kutangila, e kumona Muan’a mukoko muimane pa mukuna wa Siyona, uvua ne bantu binunu lukama ne makumi anayi bikale ne dîna diende ne dîna dia Tatuende mafunda pa mpala yabu.” Muaba eu tudi tumona bungi bujadika bua bela manyi aba—144 000. Muanzu wabu mu bukalenge mmusunguluja nunku ku diimana diabu ne Mukalenge mushikika mu nkuasa wa bumfumu, “Muan’a mukoko,” Yezu. Ne badi pa Mukuna wa Siyona wa mu diulu. Mukuna wa Siyona wa pa buloba uvua usanganyibua mu Yeruzaleme, tshimamuende wa bukalenge tshia Izalele. Mukuna wa Siyona wa mu diulu udi ufunkuna muanzu mutumbuke wa Yezu ne banyanende bena bumpianyi, badi benza Yeruzaleme wa mu diulu.—2 Kulondolola 5:2; Musambu 2:6.
19, 20. (a) Bena nkristo bela manyi nebikale bena mu bulongolodi kayi bua mu diulu? (b) Mmunkatshi mua lupolo kayi lua dîba mudi Yehowa musungule aba bikala ne buena-muabu mu diulu?
19 Mu diumvuangana ne ebi, bela manyi mu butumbi buabu bua mu diulu badi bakula bualu buabu bu “Yeruzaleme Mupiamupia.” (Buakabuluibua 21:2, NW) Yeruzaleme wa pa buloba uvua “tshimenga tshia Mukalenge munene” ne kabidi muaba uvua ntempelu. (Matayo 5:35, NW) Yeruzaleme Mupiamupia wa mu diulu mbulongolodi bua bukokeshi bua Bukalenge budi Mfumu mutambe bunene ku mutu kua bionso, Yehowa, ne Mukalenge wende musungula, Yezu, bakokesha mpindieu ku butuangaji buabu ne budi mudimu wa buakuidi wenjibua eku mabenesha manene afumina ku nkuasa wa bumfumu wa Yehowa bua diondapibua dia bukua-bantu. (Buakabuluibua 21:10, 11; 22:1-5) Mu tshikuabu tshikena-kumona, Yone wakateleja bakula bua bena nkristo bela manyi babiishibue ku lufu bena lulamatu bu ‘mukaji wa Muan’a mukoko.’ Ntshimfuanyi kayipu tshidi tshileja bunyana buikalabu nabu ne Yezu ne dimutumikila diabu dia ku budisuile! Fuanyikijabi disanka dikala mu diulu papeta, ndekelu wa bionso, wa ndekelu wa kudibu difutu diende dia mu diulu. Nanku, mpindieu, “dibaka dia Muan’a mukoko” didi mua kuenzeka! Pashishe, bulongolodi bua bukalenge bua mu diulu abu nebukumbane bujima.—Buakabuluibua 19:6-8.
20 Eyowa, mabenesha a mpatshi mmalamina aba bavua mupostolo Paulo muakule bualu buabu ne: “Buetu tuetu, buena-muabu buetu budi mu diulu.” (Filipoi 3:20, NW) Munkatshi mua bidimu pamue ne binunu bibidi, Yehowa mmusungule bana bende ba mu nyuma ne mmubalongolole bua bumpianyi bua mu diulu. Bilondeshile bijadiki bionso, mudimu wa disungula ne dilongolola ukadi pepi ne kujika. Kadi kuvua malu mavule avua ne bua kulonda, anu bu muakasokolola Yone mu tshikena-kumona tshiende tshifunda mu Buakabuluibua nshapita wa 7. Nanku mpindieu, tshisumbu tshikuabu tshia bena nkristo tshidi tshikoka ntema yetu, ne netutangile muanda wa tshisumbu etshi mu tshiena-bualu tshidi tshilonda.
Udi uvuluka anyi?
◻ Mmidimu kayi mishilangane ya spiritu idi imueneka pa bena bumpianyi bua mu diulu?
◻ Mmalanda kayi a bunyana adi pankatshi pa Yehowa ne bela manyi? ne pankatshi pabu ne Yezu pende?
◻ Mmunyi mudi tshisumbu tshia bena nkristo bela manyi tshilejibue mu Bible?
◻ Izalele wa Nzambi uvua muashila pa tshishimikidi kayi tshikumbanyine?
◻ Mmasanka kayi a mudimu a mu diulu adi malamina bena nkristo bela manyi?
[Bimfuanyi mu dibeji 10]
Munkatshi mua tshikondo tshia bidimu pamue ne binunu bibidi, Yehowa mmusungule bantu bakokesha mu Bukalenge bua mu diulu