Udi muvuluke anyi?

Udi muanyishe dibala dia nimero mipiamipia ya Tshibumba tshia Nsentedi anyi? Nunku, anjibi kumona né udi mua kuandamuna ku nkonko idi ilonda eyi:

▫ Bulelela mu malu a ntendelelu budi mua kupetshibua anyi?

Yezu Kristo wakamba ne: “Nenumanye bulelela, ne bulelela nebunupikule.” (Yone 8:32, NW) Yezu kakaleja amu se: bulelela budi mua kupetshibua kadi wakaleja kabidi ne: kubupeta kudi kukengedibua bua ntendelelu wetu kuanyishibua kudi Nzambi. Wakambila mukaji muena Samariya ne: “Batendeledi balelela nebatendelele Tatu ne nyuma ne bulelela.” (Yone 4:23, NW)​—15/4, dibeji 5.

▫ Robert Estienne uvua nganyi, ne mmunyi muakashiyaye tshimanyinu tshiende?

Robert Estienne uvua mupatudi wa mikanda uvua ne muoyo mu siekele wa 16. Mu matuku ende a muoyo wakaditua ne kasuki mu mudimu wa dipatula Mifundu Minsantu ne wakenza madikolela ne disuminyina bua kusokolola mêyi a mu Bible bu muvuawu ku mfundilu wa kumpala. Ndongoluelu wende wa dikosa mifundu mu mvese mifunda nimero mmutangalake lelu’eu.​—15/4, mabeji 10, 14.

▫ Mmunyi mutudi tubabidila dibala Bible dituku dionso?

Mifundu idi misangu yonso anu isakidila diumvuija kampanda dipiadipia, ne milayi idi itangila matuku a ku nshikidilu idi yenda itukemesha ku diambuluisha dia bitudi tumona, tumvua, ne ku malu akatuenzekela. Bu mudi dimonamona malu mu nsombelu dietu dienda dialabala ne tuakama ntatu, tudi tuanyisha tshishiki mibelu ya mu Bible. (Nsumuinu 4:18)​—1/5, dibeji dia 14.

▫ Mmunyi muudi mua kuvuluka mvese ya mu Bible?

Paudi ubala Bible, enza tshimanyinu ku mvese iwudi usungula iwudi nangananga musue bua kuvuluka, peshi uyifunde mu mabeji a karné ne uteke karné aka muaba uwikala ne bua kuyimona dituku dionso. Eku wenza madikolela bua kuyikuata ku muoyo, eleelapu meji ne tumika nayi. Kutetshi bua kukuata ku muoyo mvese mivule musangu umue to, pamu’apa mvese umuepele peshi ibidi ku lubingu luonso.​—1/5, dibeji dia 17.

▫ Mmamanyisha kayi adi mu Evanjeliyo wa Luka adi bafundi bakuabu kabayi bafile?

Nansha mudi bivule bidi Luka mufunde bifuanangane ne bidi mu miyuki idi Matayi ulonda, bia pa lukama 59 mbishilangane. Luka wakakula bua bishima bisambombo bia pa buabi mu mukanda wende, ne wakalonda bimfuanyi bia Yezu bitambe bungi ebu misangu mipite pa ibidi bidi bafundi bakuabo ba Evanjeliyo kabayi balonde.​—15/5, dibeji dia 12.

▫ Ndibalakana kayi dia butoke dia pa buadi diakasokolodibua mu 1935?

Tshidimu atshi tshisamba tshia Yehowa tshiakafika ku dijingulula se: musumba munene mutela mu Buakabuluibua 7:9, 14 kauvua ufunkuna kasumbu kiibidi ka mu diulu, kadi uvua ufunkuna bena ditekemena dia pa buloba. (Yone 10:16, NW)​—15/5, dibeji dia 20.

▫ Mmishindu kayi miakanyine iwudi mua kusamba bena kanyinganyinga?

Teleja. Petesha dijadikila. Ikala mudiakaje. Udianjile kuenza bualu kampanda padibi biakanyine. Tuma mukanda wa dikankamijangana nawu peshi karte. Sambila nabu. (Yakobo 5:16) Tungunuka ne kubambuluisha.​—1/6, mabeji 13, 14.

▫ Ntshinyi tshidi bana betu ba mu nyuma ba balume ne ba bakaji mua kuenza bua kuambuluisha aba badi mu mêku mabulukangane mu malu a ntendelelu bua kunanukila?

Pa tshibidilu, akula mêyi a dikankamijangana nawu, mimpe, ne a disambangana kudibu. (1 Tesalonike 5:14) Ebi nebikale bu dikankamijibua bua tshieledi tshiabu tshia lungenyi ne bua mubidi. Padibi biakanyine ne bifuanyine, ubabueje mu midimu yebe ya teokrasi ne ya ku mubidi. Ubavuluke mu masambila ebe. (Lomo 1:9; Efeso 1:16)​—1/6, dibeji dia 29.

▫ Mmafutu kayi adi apetshibua ku dileja lutulu dîba dia didifila mu mudimu wa budimi?

Lutulu ludi lupetesha mumanyishi wa Bukalenge mushindu wa kutantamena dibenga kusankidila ne buluishi kayi bionso bipeta. Pamutu pa kutandangana ne bena nzubu bamfika-munda, ba-ministre bena lutulu nebapete mushindu wa kufila diandamuna dipole ne kumbuka mu ditalala dionso, nunku bakuba ditalala ne disanka. (Matayo 10:12, 13) Kupita apu, bantu bafuane mikoko nebakokibue ku mukenji wa Bukalenge.​—15/6, dibeji dia 12.

▫ Bua tshinyi kumanya bulelela bua mu Bible kudi ne mushinga mukole?

Kumanya bulelela kudi kutusungila ku mashimi, ditshimbakana, ne ku bitabataba. Ne patudi tubulonda mu nsombelu wetu, bulelela budi butukolesha bua kunanukila makenga ne butupetesha ditekemena didi dituambuluisha bua kuimana kuulu mu diteta kayi dionso.​—1/7, dibeji dia 8.

▫ Mbujitu kayi bua kumpala buvua nabu bena nkristo bela manyi bu muakapinganabu pa muaba wa bena Izalele ba ku tshilelelu?

Ndisanka dia mudimu dia kumanyisha bunême bua Yehowa munkatshi mua matunga. (Yeshaya 43:21; 1 Petelo 2:9)​—1/7, dibeji dia 19.

▫ Ntshinyi tshidi miaku ya mupostolo Petelo ya se: mulume udi ne bua ‘kuambika mukajende lumu’ yumvuija? (1 Petelo 3:7, NW)

Mulume udi wambika mukajende lumu kêna umupuekesha anyi umupepeja nansha. Bishilangane, udi uleja ku mêyi ende ne bienzedi biende​—pa nkayende ne patoke—​se: udi umuangata ne mushinga. (Nsumuinu 31:10-31)​—15/7, dibeji dia 19.

▫ Bua tshinyi tudi mua kuamba ne: kuipata muenji wa mibi ukena munyingaladi mu tshisumbu nkuleja dinanga?

Dipatshibua ntshijadiki tshia dinanga bua Yehowa ne njila yende. (Musambu wa 97:10) Didi dileja dinanga bua aba badi bipatshila njila muakane bualu didi diumbusha munkatshi muabu muntu uvua mua kuikala ne buenzeji bubi kudibu; ebi bidi kabidi bikuba bukezuke bua tshisumbu. (1 Kolinto 5:1-13)​—15/7, dibeji dia 25.

▫ Mmunyi mudi “mupika wa lulamatu ne wa budimu,” udibu bakule bualu buende mu Matayo 24:45-47, mua kusungulujibua lelu’eu?

Badi basungulujibua nangananga ku mudimu udibu benza pa kupetesha mikanda miumvuiji ya Bible, pa kulongesha ne kumanyisha “lumu luimpe lua Bukalenge,” ne ku dilamata diabu dikole ku Dîyi dia Nzambi, Bible. (Matayo 24:14; 28:19, 20)​—1/8, dibeji dia 16.