Bakenza disua dia Yehowa

Mozese ne Arona​—Bamanyishi ba bukitu ba Dîyi dia Nzambi

ELABI meji pa bualu ebu: Mozese muntu wa bidimu makumi muanda mukulu ne muanabu wa balume, Arona, bimana kumpala kua muntu mutambe bukole pa buloba bujima​—Faraone wa mu Ejipitu. Kudi bena Ejipitu muntu eu kêna anu muleji mpala wa nzambi yabu patupu. Badi bitabuja ne: yeye muine udi nzambi. Udi wangatshibua bu Horus mudienze muntu, nzambi udi ne mutu wa kabemba. Muteka pamue ne Isis ne Osiris, Horus uvua nzambi wa mu busatu butambe bunene munkatshi mua nzambi milume ne mikaji yonso ya mu Ejipitu.

Muntu kayi yonso uvua usemena padi Faraone uvua ne bua kumona munkatshi mua tshifulu tshiende tshia bumfumu tshimfuanyi tshikuate buôwa tshia mutu wa nyoka wa kobra. Bilondeshile biambamba, nyoka au uvua mua kuluka kapia ne kabutu pa muluishi kayi yonso wa Faraone. Mpindieu Mozese ne Arona badi balua kumpala kua mfumu-nzambi eu ne dilomba ditu kadiyi dianji kuenzeka​—dia se: alekele bena Izalele badi mu bupika bua kuyabu kuenzela Nzambi wabu Yehowa difesto.​—Ekesode 5:1.

Yehowa wakadianjila kumanyisha ne: mutshima wa Faraone neutuna. Nenku, Mozese ne Arona kabakakemeshibua pa kumvua diandamuna diende ditobolodi edi: ‘Yehowa nnganyi? Tshiena ngitabuja dîyi diende bua kulekela Bena Izalele. Meme tshiena mumanye Yehowa ne tshiena ndekela Bena Izalele.’ (Ekesode 4:21; 5:2) Pa nanku, tshishimikidi tshiakashibua bua ditembangana didi dikuatshisha buôwa. Mu dimonangana diakalonda, Mozese ne Arona bakaleja Faraone tshijadiki tshikole tshia se: bavua baleji-mpala ba Nzambi mulelela ne wa bukole buonso.

Tshishima tshidi tshienzeka

Anu bu muvua Yehowa mumutumine dîyi, Arona wakenza tshishima tshiakashindika bukulu bua Yehowa pa mutu pa nzambi ya mu Ejipitu. Wakela dikombo diende panshi kumpala kua Faraone, ne musangu umue diakakudimuka nyoka munene! Mupampakaja kudi tshishima atshi, Faraone wakabikidisha bakuidi bende bena dialu.a Ku diambuluisha dia makole a ba-demon, bantu abu bavua ne bukokeshi bua kuenza tshishima tshia buena etshi ne makombo abu mine.

Bikala Faraone ne bakuidi bende bavua basanka, bivua anu bua katupa kîpi. Fuanyikijayi mu lungenyi mushindu wakalua mpala yabu pakaminabu nyoka yabu umue ku umue kudi nyoka wa Arona! Buonso bavua muaba au bavua mua kumona se: nzambi ya bena Ejipitu kayivua mua kuelekena ne Nzambi mulelela, Yehowa nansha.​—Ekesode 7:8-13.

Nansha kunyima kua bionso ebi, mutshima wa Faraone uvua anu ne tshitunu. Anu pakatumabu mikumu dikumi ya kabutu, anyi bipupu mu Ejipitu kudi Nzambi, ke pakashisha Faraone kuambila Mozese ne Arona se: ‘Bikayi, yayi bienu munkatshi mua bantu banyi, ne nuenu ne Bena Izalele; yayi bienu nutendelele Yehowa bu munuakamba.’​—Ekesode 12:31.

Malongesha buetu tuetu

Ntshinyi tshiakapesha Mozese ne Arona bukokeshi bua kusemena kudi Faraone muena bukole wa mu Ejipitu? Kumpala, Mozese wakapanga dieyemena mu nzanzu yende, wamba ne: uvua “muena tshikukumina.” Nansha pakavuaye mumana kushindikila se: mmupete dikuatshisha dia Yehowa, wakalomba ne: ‘Ndi nkusengelela ne, Utume muntu uudi musue kutuma.’ Mmuomumue ne: Mozese wakalomba bua Nzambi kutumaye muntu mukuabu. (Ekesode 4:10, 13) Pabi, Yehowa wakatumika ne mudipuekeshi Mozese, kumupeshaye meji ne bukole bikengedibue bua kukumbajaye mudimu wende.​—Nomba 12:3.

Lelu’eu, basadidi ba Yehowa ne Yezu Kristo badi bakumbaja dîyi-dituma dia ‘kuvuija bantu ba mu matunga wonso bayidi.’ (Matayo 28:19, 20, NW) Bua kuenza tshietu tshitupa mu dikumbaja dia bukenji ebu, tudi ne bua kutumika bilenga ne dimanya dia Mifundu kabidi ne nzanzu kayi yonso itudi mua kuikala nayi. (1 Timote 4:13-16) Pamutu pa kumona amu bilema bietu, tuanyishayi ne ditabuja mudimu kayi wonso mutupesha kudi Yehowa. Udi mua kutuvuija bakumbane ne kutukolesha bua tuetu kuenza disua diende.​—2 Kolinto 3:5, 6; Filipoi 4:13.

Bu muvua Mozese muluisha kudi bantu ne ba-demon, uvua bushuwa ukengela diambuluisha ditambe dia ku tshilelelu. Nenku, Yehowa wakamushindikila ne: ‘Nakukuvuija bu Nzambi ku mêsu kua Faraone.’ (Ekesode 7:1) Eyowa, Mozese uvua ne dikuatshisha ne bukokeshi bia kudi Nzambi. Muikale ne spiritu wa Yehowa, Mozese kavua ne kabingila ka kutshinyina Faraone peshi misumba ya mulombodi muditambishi eu.

Tudi petu ne bua kueyemena spiritu munsantu wa Yehowa, anyi bukole buenzeji, bua kukumbaja mudimu wetu. (Yone 14:26; 15:26, 27) Ne dikuatshisha dia kudi Nzambi tudi mua kuambulula mêyi a Davidi, wakimba ne: “Mu Nzambi mene mundi ngeyemena, tshiyi ne buowa. Bantu badi bamanye mua kungenzela tshinyi?”​—Musambu wa 56:11.

Bua luse luende Yehowa kakalekela Mozese nkayende mu mudimu wende nansha. Kadi, Nzambi wakamba ne: ‘Arona mukulu’ebe neikale muprofete webe. Wewe newambe mêyi wonso andi nkuambila; ne Arona mukulu’ebe neambile Faraone.’ (Ekesode 7:1, 2) Ndinanga kayipu didi nadi Yehowa bua kuenza mudimu mu mikalu ya tshivua Mozese mua kukumbaja!

Nzambi mmutupeteshe nsangilu wa bena nkristo ba dinanga badi bitaba mutobo wa ku dikala Bantemu ba Yehowa, Mutambe Kutumbuka. (1 Petelo 5:9) Nunku, nansha tuetu bapetangane ne bipumbishi, tuikale bu Mozese ne Arona​—bamanyishi ba bukitu ba dîyi dia Nzambi.

[Mêyi adi kuinshi]

[Tshimfuanyi mu dibeji 25]

Mozese ne Arona bakatumika ne bukitu bu baleji-mpala ba Yehowa kumpala kua Faraone