‘Ndiku ne mushinga ku mêsu kua Nzambi anyi?’

“NDIKU ne mushinga anyi? Nzambi utu utabalelangana anyi?” Ke mudi mutu wa bualu wa tshiena-bualu kampanda tshidi tshisanganyibua mu tshikandakanda tshia Christianity Today ubadibua. “Tshitupa tshinene tshia mudimu wanyi bu mufundi ntshishindamene pa bualu bua ntatu,” ke mudi Philip Yancey, mufundi wa tshiena-bualu etshi wamba. “Ntu mpingana misangu ne misangu ku nkonko imue imue eyi, anu bu muntu udi utua munu mu mputa wa kale udi kayi uuma biakane. Ntu ngumvua ngumu ya babadi ba mikanda yanyi, ne miyuki yabu ya dibungama idi ibingisha mpata yanyi.”

Pamu’apa wewe pebe ukadi mumane kudiebeja pa bidi bitangila ditabalela dia Nzambi mu nsombelu webe. Oh, udi mua kuikala muibidilangane ne Yone 3:16 (NW), udi wamba ne: “Nzambi wakananga bantu bikole e kubapa Muanende umu’epele.” Peshi ukadi mumane kubala Matayo 20:28 (NW), udi wamba ne: Yezu wakalua “bua kufila anyima wende bu tshia-bupikudi bua dishintakajibua bua ba bungi.” Pamu’apa utshidi amu udiebeja ne: ‘Nzambi utu uteya ntema yende kundi anyi? Utu untabalela pa nkayanyi anyi?’ Kudi kabingila kimpe ka kuitabuja ne: ke tshituye wenza, anu bu mutuabimona.