Nzambi udi ukutabalela

MARY, mukaji kampanda muena nkristo udi ne bidimu 40 ne bia mu njila, mmukenge bikole mu nsombelu wende. Dienda masandi dia bayende diakafikisha ku difua dia dibaka kukadi bidimu bipite pa dikumi. Panyima pa bualu ebu, Mary wakaluangana bua kukumbaja bujitu buende bu muledi mujike ne bana bende banayi. Kadi utshidi anu nkayende, ne imue misangu bunkaya budi bumueneka bu bukena kuambula. Mary udi udiebeja ne: ‘Ebi bidi biumvuija ne: Nzambi kêna untabalela meme peshi kêna utabalela bana banyi bakena tatu anyi?’

Nansha biwikala mumane kupetangana anyi kuyi muanji kupetangana ne dikenga dia muomumue, kakuyi mpata luse nelukukuate bua nyanji ya Mary. Buonso buetu tudi bananukile nsombelu ya mateta, ne tudi mua kuikala bamane kudiebeja tshikondo ne mushindu wikala Yehowa ne bua kuenza malu bua diakalenga dietu. Amue a ku malu aa mamona ntshipeta tshia buludiludi tshia dilamata dietu ku mikenji ya Nzambi. (Matayo 10:16-18; Bienzedi 5:29) Makuabu ntshipeta tshia dikala dietu bantu bapange bupuangane badi basombele mu bukua-bantu bulombola kudi Satana. (1 Yone 5:19) Mupostolo Paulo wakafunda ne: “Bifukibua bionso bidi bitungunuka ne kutua mikemu ne kukenga popamue.”​—Lomo 8:22, NW.

Kadi, nansha mûdi wakama diteta dikole kabiena biumvuija ne: Yehowa mmukulekele anyi kêna uditatshisha bua diakalenga diebe. Mmunyi mûdi mua kuikala ne dijadika pa bualu ebu? Ntshinyi tshidi tshileja ne: Nzambi udi ukutabalela?

Tshilejilu tshia kale

Bible udi ufila bujadiki bua patoke bua ditabalela dia Yehowa dileja muntu ne muntu pa nkayende. Anjibi kuangata tshilejilu tshia Davidi. Yehowa uvua ne ditabalela dileja mulami nsonga eu pa nkayende, pa kumuangata bu ‘muntu udi mutshima wende musue.’ (1 Samuele 13:14) Kunyima, pakakokesha Davidi bu mukalenge, Yehowa wakamulaya ne: ‘Nengikale nebe miaba yonso iwaya.’​—2 Samuele 7:9, MMM.

Ebi bidi biumvuija ne: Davidi uvua ne nsombelu ‘kayi makenga,’ muepula ku lutatu kayi luonso anyi? Tòo, Davidi wakakama mateta makole kumpala ne munkatshi mua bukokeshi buende. Munkatshi mua bidimu bivule kumpala kua kuluaye mukalenge, uvua muipata kakuyi diikisha kudi Mukalenge mushipianganyi Shawula. Munkatshi mua tshikondo etshi tshia nsombelu wende, Davidi wakafunda ne: “[Anyima, NW] wanyi udi munkatshi mua nyama ya ntambue . . . munkatshi mua bana ba bantu mene badi bena menu adi mafuma ne mikete.”​—Musambu wa 57:4.

Nansha nanku, munkatshi mua dikenga edi Davidi uvua mutuishibue bua ditabalela dia Yehowa dileja muntu pa nkayende. “Wewe udi ubala masumpakana anyi,” ke muakambaye mu disambila kampanda kudi Yehowa. Eyowa, bua Davidi bivua bimueneka anu bu se: Yehowa uvua mulame luapolo lua makenga wonso. Pashishe Davidi wakasakidila ne: ‘Wele binsonji bianyi mu mulondo webe [wa tshiseba, NW]. Kabiena bifundibua mu mukanda webe, anyi?’a (Musambu wa 56:8) Ne tshimfuanyi etshi, Davidi wakaleja dieyemena dia se: Yehowa uvua mumanye ki ng’anu nsombelu kadi kabidi ne buenzeji buvua nabu nsombelu eu pa mpampakenu.

Pabuipi ne ku ndekelu wa muoyo wende, Davidi uvua mua kufunda bilondeshile malu akamonaye nkayende ne: ‘[Biidia, NW] bia muntu bidi bijadikibua kudi Yehowa, ne yeye udi usanka bua njila wende. Biatankukaye, kêna udishinda tshibula, bualu bua Yehowa udi umukuata ne tshianza tshiende.’ (Musambu wa 37:23, 24) Wewe pebe udi mua kuikala ne dishindika dia se: nansha mudi mateta ebe mua kuikala a munanunanu ne malunguluke, Yehowa udi umona ne wangata dinanukila diebe ne mushinga. Paulo wakafunda ne: “Nzambi ki mmupange buakane bua kupuaye mudimu wenu muoyo ne dinanga dinuakaleja bua dîna diende, bu munuvua basadile bansantu ne munudi nutungunuka ne kubasadila.”​—Ebelu 6:10, NW.

Kupita apu, Yehowa udi mua kuenza malu bua diakalenga diebe pa kukupetesha bukole bua kunanukila tshipumbishi kayi tshionso tshidi tshiteka mu njila webe. “Makenga a muntu muakane adi a bungi,” ke muakafunda Davidi, ‘kadi Yehowa udi umusungila ku onso.’ (Musambu wa 34:19) Bushuwa, Bible udi utulondela ne: mêsu a Yehowa ‘adi akenzakana ku nseke yonso ya buloba bua kuleja bukole buende kudi bantu badi ne mitshima miakane kudiye.’​—2 Kulondolola 16:9.

Yehowa mmukukoke

Bujadiki bua pa mutu bua ditabalela dia Yehowa dileja muntu pa nkayende budi mua kusanganyibua mu mêyi a Yezu. “Muntu nansha umue kêna mua kulua kundi,” ke muakambaye, “bikala Tatu udi muntume kayi mumukoke.” (Yone 6:44, NW) Eyowa, Yehowa udi wambuluisha bantu muntu ku muntu bua kubabidila masanka a ku mulambu wa Yezu. Mmunyi? Mu bualabale bunene, nku butuangaji bua mudimu wa buambi bua Bukalenge. Bushuwa, mudimu eu udi wambuluisha bu “tshimanyinu bua matunga wonso,” kadi udi ulenga muntu yonso pa nkayende. Bu mûdi uteleja ne wanyisha mukenji wa lumu luimpe ntshijadiki tshia diditatshisha dia Yehowa dikuleja pa nkayebe.​—Matayo 24:14, NW.

Ku diambuluisha dia spiritu munsantu, Yehowa udi ukoka bantu kudi Muanende ne ku ditekemena dia muoyo wa kashidi. Ebi bidi biambuluisha muntu yonso bua kujingulula ne kutumikila malelela a mu nyuma nansha mudiku mikalu ne mapanga bupuangane bia ku tshilelelu. Bushuwa, muntu kêna mua kumvua malongolola a Nzambi kakuyi diambuluisha dia spiritu wa Nzambi. (1 Kolinto 2:11, 12) Anu bu muakafundila Paulo bena Tesalonike, “bonso kabena ne ditabu[j]a.” (2 Tesalonike 3:2) Yehowa udi upetesha spiritu wende anu kudi aba badi baleja dijinga dia kuikala bakokibue kudiye.

Yehowa udi ukoka bantu bualu mmubanange muntu ku muntu ne mmusue bua bapete lupandu. Mbujadiki kayipu bukole bua ditabalela dia Yehowa dileja muntu pa nkayende! Yezu wakamba ne: “Tatu wenu wa mu diulu kena musue muana umue wa mu bana aba bakese afue.” (Matayo 18:14) Eyowa, ku mêsu kua Yehowa muntu ne muntu udi ne mushinga. Ke bua tshinyi Paulo uvua mua kufunda ne: ‘Udi upesha muntu yonso difutu bu mudi midimu yende.’ (Lomo 2:6) Ne mupostolo Petelo wakamba ne: ‘Nzambi kêna ne kansungasunga, kadi yeye udi witabuja wa mu tshisamba tshionso udi umutshina, udi wenza malu makane.’​—Bienzedi 10:34, 35.

Bishima bia Yezu

Ditabalela dia Nzambi dileja muntu ku muntu divua dilejibue mu mushindu udi ulenga ku muoyo mu bishima bienza kudi Muanende, Yezu. Muondapa aa avua enjibua ne nyanji miondoke. (Mâko 1:40, 41) Bu mudi Yezu ‘kayi mua kuenza bualu nansha bumue ku disua diende nkayende, kadi wenza amu bidiye umona Tatu wenza,’ luse luende ludi mundidimbi wa diditatshisha dia dinanga dia Yehowa bua yonso wa ku basadidi bende.​—Yone 5:19, NW.

Anjibi kuangata tshilejilu tshia tshishima kampanda tshiakenza Yezu, tshifunda mu Markuse 7:31-37 (MMM). Apa Yezu wakuondapa mulume kampanda uvua muena mapapa ne uvua ne lutatu lua diakula. “Kuya nende pa nkayende,” ke mudi Bible ulonda. Pashishe, ‘kutangilaye mulu, kuitshija mioyo wamba ne: “Efata,” mmumue ne: “Jibuka.”’

Bua tshinyi Yezu wakaya ne muntu eu kule ne musumba wa bantu? Ee, bidi pamu’apa se: muntu muena mapapa udi ne lutatu bua diakula uvua mua kumvua bundu kumpala kua babandidi. Yezu uvua mua kuikala musunguluje disumpakana dia muntu eu, ne ke bua tshinyi wakasungula bua kumuondapa ku lupengeleke. “Muyuki eu mujima,” ke mudi mushikuluji kampanda wa Bible wamba, “udi utuleja ne dikanzabala dionso ne: Yezu wakangata muntu au ki ng’anu bu mubedi kampanda; wakamuangata bu muntu wa mushinga wa pa nkayende. Muntu eu uvua ne majinga, ne lutatu bia pa buabi, ne pa kutumika ne kanemu kengeleki Yezu wakamuangata mu mushindu wa kuepuka dimutapa ku mutshima ne mu mushindu uvuaye mua kumvua.”

Muyuki eu udi uleja ne: Yezu uvua ne diditatshisha dileja muntu ku muntu. Udi mua kujadika se: ùdi bia muomumue ukutabalela. Bushuwa, lufu luende bu mulambu luvua tshimanyinu tshia dinanga bua buloba bujima bua bukua-bantu buakanyine kupikudibua. Kadi, udi pa nkayebe mua kubabidila tshienzedi atshi, anu bu muakenza Paulo, wakafunda ne: “Muana wa Nzambi, wakannanga [meme] e kudifila bua bualu buanyi.” (Galatia 2:20, NW) Ne bu muakaleja Yezu ne: ‘uvua mumumone, uvua mumone Tatu,’ tudi mua kuikala ne dishindika dia se: Yehowa udi ne ditabalela dia muomumue bua yonso wa ku basadidi bende.​—Yowanese 14:9, MMM.

Yehowa udi ulua Mufutshi

Kupukila dimanya dia Nzambi kudi kukonga kufika ku dimanya ngikadilu wonso wa bumuntu buende anu bu mudibu busokolola mu Bible. Dîna dine dia Yehowa didi diumvuija ne: “Udi Uvuija,” pa kuleja se: Yehowa udi mua kulua tshionso tshidiye usungula bua kukumbaja disua diende. Mu bule bua muyuki wa bantu, mmukumbaje midimu kabukabu, pa kukonga ne eyi ya Mufuki, Tatu, Mukalenge Munene, Mulami, Yehowa wa biluilu, Muteleji wa masambila, Mulumbuluishi, Mushidimunyi Munene, ne Mupikudi.b

Bua kuanyisha ngumvuilu mujima wa dîna dia Nzambi, tudi kabidi ne bua kufika ku dimanya Yehowa bu Mufutshi. Paulo wakafunda ne: “Pabi, mbikole bua kumulengelela bikala muntu kayi ne ditabuja, bualu eu udi usemena kudi Nzambi udi ne bua kuitabuja se: udi ne utu udienza mufutshi wa aba badi bamukeba menemene.”​—Ebelu 11:6, NW.

Yehowa mmulaye muoyo wa kashidi pa buloba bua mparadizu kudi aba badi lelu’eu basungula bua kumusadila ne mutshima mujima. Ki nkuleja budisui bua kuindila dikumbana dia dilaya adi dia mpatshi, peshi ki nkuleja lutambishi bua kudifuanyikija muikale ne muoyo muaba au. Mozese “uvua muludike mêsu ende ku difutu.” (Ebelu 11:26, NW) Bia muomumue Paulo uvua windila ne luzuku dikumbana dia dilaya dia Nzambi bua bena nkristo bela manyi. Wakafunda ne: “Ndi ntungunuka ne lubilu luanyi mutangile ku tshipatshila bua kupeta difutu dia dibikila dia muulu dia kudi Nzambi, ku butuangaji bua Yezu Kristo.”​—Filipoi 3:14, NW.

Udi pebe mua kuindila difutu didi Yehowa mulaye kudi aba badi bananukila. Ditekemena difutu adi ntshitupa tshia dimanya diebe dia Nzambi ne dinanukila diebe mu mudimu wende. Nunku eleela meji dituku ku dituku pa mabenesha adi Yehowa mukulamine. Mary, udi mutela ku ntuadijilu eku, mmuenze madikolela a pa buawu bua kuenza nunku. “Bua musangu wa kumpala mu nsombelu wanyi,” ke mudiye wamba, “ndi mufume ku dianyisha ne: mulambu wa tshia-bupikudi wa Yezu udi untangila. Ndi mutuadije kumvua ne: Yehowa udi untabalela pa nkayanyi. Ndi muena nkristo kukadi bidimu bipite pa 20, kadi anu matuku adi panshi aa ke andi mutuadije menemene kuitabuja muanda eu.”

Ku diambuluisha dia dilonga ne dieleela meji dienza ne mutshima mujima pa Bible, Mary, pamue ne miliyo mikuabu, mmufike ku dimanya se: Yehowa udi utabalela bantu bende ki ng’anu bu tshisumbu kadi kabidi bu muntu ku muntu. Bu muvua mupostolo Petelo mutuishibue bikole kudi bualu ebu wakasakibua ku difunda ne: ‘Upuila [Nzambi] kanyinganyinga kebe kuonso, bualu udi ukutabalela.’ (1 Petelo 5:7, NW) Eyowa, Nzambi udi ukutabalela wewe!

[Mêyi adi kuinshi]

[Kazubu mu dibeji 6]

Dibiishibua​—Tshijadiki tshia mudi Nzambi utabalelangana

TSHIJADIKI tshituishi tshia ditabalela dia Nzambi dileja muntu yonso tshidi tshisanganyibua mu Bible mu Yone 5:28, 29 (NW): “Kanukemi bua bualu ebu, bualu bua dîba nedilue diumvua buonso badi mu nkita ya tshivulukilu dîyi [dia Yezu] ne nebapatukemu.”

Mu mushindu udi ukoka ntema, muaku wa tshiena-Greke mne·meiʹon (nkita ya tshivulukilu) mbatumike nawu apa pamutu pa taʹphos (dijambu). Muaku taʹphos udi wowo usambuluja patupu lungenyi lua dijiika. Kadi mne·meiʹon udi uleja ne: malu a kale a muntu udi mufue mmavulukibue.

Pa bualu ebu, anjibi kuela meji pa bidi bitangila tshikala dibiishibua ne bua kulomba kudi Yehowa Nzambi. Bua kupingaja muntu kampanda ku muoyo, ùdi ne bua kumanya tshintu tshionso tshidi tshitangila muntu au​—pa kukonga ne ngikadilu yende mipiana ku tshilelelu ne tshivulukilu tshiende tshijima. Anu pa kuenza nunku ke padi muntu wenzuludibua ne bumuntu bua muomumue.

Bushuwa, ebi kabiena mua kuenzeka bilondeshile mmuenenu wa bantu, kadi “bionso bidi bitekete bua [Nzambi, NW].” (Markuse 10:27, MMM) Ùdi mene mua kujingulula tshidi mu mutshima wa muntu. Nansha bikala muntu mumane kufua kukadi siekele mivule, tshivulukilu tshia Nzambi pa bidi bimutangila katshiena mua kutupakana; katshitu tshinyanguka. (Yobo 14:13-15) Nunku, pa kutela Abrahama, Izake, ne Yakoba, Yezu uvua mua kuamba nansha siekele mivule kunyima kua bamane kufua ne: Yehowa ‘kêna Nzambi wa bafue, udi Nzambi wa badi ne muoyo; bualu buende yeye buonso badi ne muoyo.’​—Luka 20:38.

Nunku, miliyare ya bantu badi bafue idi mu tshivulukilu tshia Yehowa Nzambi mu kanungu kuonso. Ntshijadiki kayipu tshia mpatshi tshia mudi Nzambi ne ditabalela dileja muntu ku muntu!

[Tshimfuanyi mu dibeji 7]

Yezu uvua ne ditabalela dileja muntu ku muntu bua bavuaye wondapa