Bua tshinyi ntendelelu mulelela udi upeta dibenesha dia Nzambi

“Samunayi Yah! Lupandu ne butumbi ne bukole mbia Nzambi wetu, bualu malumbuluisha ende mmalelela ne mmakane.”​—BUAKABULUIBUA 19:1, 2, NW.

1. Mmunyi muafika Babilone Munene ku ndekelu wende?

“BABILONE MUNENE” wakuluki ku mêsu kua Nzambi ne udi mpindieu wakama dibutudibua. Milayi ya mu Bible idi ileja ne: ndumba eu muena malu a Nzambi wa pa buloba bujima neakame mu katupa kîpi emu dishipibua ku bianza bia bamunangi bende bakena mu diumvuangana ne mikenji bena malu a tshididi; ndekelu wende neikale wa mu tshintuluntulu ne wa lukasa. Disokolola dia Yezu kudi Yone divua ne mêyi a mulayi aa: “Muanjelu kampanda wa bukole wakambula dibue difuane dibue dinene dia mpelu ne wakadikupa mu mbuu, wamba ne: ‘Ku dikupa dikole ke muimanshibua Babilone tshimenga tshinene, ne katshiakusanganyibua kabidi kashidi.’”​—Buakabuluibua 18:2, 21, NW.

2. Mmunyi muandamuna basadidi ba Yehowa ku dibutudibua dia Babilone?

² Dibutudibua dia Babilone Munene nebadidile kudi bamue bena mu bulongolodi bua Satana kadi kakuyi mpata ki nkudi basadidi ba Nzambi, ba pa buloba peshi ba mu diulu. Lubila luabu lua disanka kudi Nzambi neluikale: “Samunayi Yah! Lupandu ne butumbi ne bukole mbia Nzambi wetu, bualu malumbuluisha ende mmalelela ne mmakane. Bualu wakumbaji dilumbuluisha pa ndumba munene uvua unyanga buloba ne masandi ende, ne wasombuedi mashi a bapika bende ku tshianza tshiende mene.”​—Buakabuluibua 18:9, 10; 19:1, 2, NW.

Mmamuma kayi adi ntendelelu mulelela ne bua kukuama?

3. Nnkonko kayi idi ikengela diandamuna?

³ Bu mudi buloba ne bua kukezudibua ku bitendelelu bia dishima, nntendelelu wa mushindu kayi washala? Mmunyi mutudi mua kumanya lelu’eu tshisumbu tshia malu a Nzambi tshiapanduka ku dibutudibua dia nsangilu wa pa buloba bujima wa bitendelelu bia dishima wa Satana? Mmamuma kayi makane adi tshisumbu etshi ne bua kukuama? Kudi malu malomba mapite pa dikumi bua kusunguluja ntendelelu mulelela wa Yehowa.​—Malaki 3:18; Matayo 13:43.

4. Bualu bulomba bua kumpala bua ntendelelu mulelela mbualu kayi, ne mmunyi muakafila Yezu tshilejilu pa bualu ebu?

⁴ Ku mutu kua bionso, bena nkristo balelela badi ne bua kubingisha bumfumu butambe bunene buakafuila Yezu​—bumfumu butambe bunene bua Tatuende. Yezu kakafila muoyo wende bua tshipatshila kampanda tshia malu a tshididi, tshisa, tshisamba, anyi nsangilu kampanda wa bantu. Wakateka Bukalenge bua Tatuende kumpala kua bipatshila bionso bia bena Yuda bia malu a tshididi anyi bituadi bia mashintuluka. Wakandamuna dipangadija dia Satana dia kumupesha bumfumu bua pa buloba bujima ne mêyi aa: “Umuka, Satana! bualu mbafunde ne: ‘Yehowa Nzambi webe ke uudi ne bua kutendelela, amu yeye nkayende ke uudi ne bua kusadila ne mudimu munsantu.’” Ùvua mumanye kumbukila mu Mifundu ya tshiena-Ebelu ne: Yehowa udi Mfumu mutambe bunene mulelela ku mutu kua buloba buonso. Ntshisumbu kayi tshia malu a Nzambi tshidi tshitua bumfumu bua Yehowa nyama ku mikolo mu mushindu ukena kuela mpata pamutu pa ndongoluelu ya malu a tshididi ya bulongolodi ebu?​—Matayo 4:10, NW; Musambu wa 83:18.

5. (a) Mmunyi mudi batendeledi balelela ne bua kuangata dîna dia Nzambi? (b) Ntshinyi tshidi tshileja ne: Bantemu ba Yehowa badi batumbisha dîna adi?

⁵ Bualu bulomba buibidi budi se: ntendelelu mulelela udi ne bua kutumbisha ne kusantuisha dîna dia Nzambi. Wa-Bukole-Buonso wakasokolola dîna diende, Yehowa (dikudimuna Yahweh mu imue nkudimuinu ya Bible), kudi tshisamba tshiende Izalele, ne mbatumike nadi misangu binunu bivule mu Mifundu ya tshiena-Ebelu. Nansha kumpalampala, Adama, Eva, ne bakuabu bavua bamanye dîna edi, nansha muvuabu musangu ne musangu kabayi badinemeka. (Genese 4:1; 9:26; 22:14; Ekesode 6:2) Nansha mudi bakudimunyi bena Bukua-buena-nkristo ne bena Yuda bumbushe pa tshibidilu dîna dia Nzambi mu Bible yabu, Bantemu ba Yehowa mbapeshe dîna edi muaba wadi mudiakanyine ne kanemu mu Les Saintes Écritures​—Traduction du monde nouveau. Badi banemeka dîna edi, anu bu muakenza mene bena nkristo ba mu siekele wa kumpala. Yakobo udi ufila tshijadiki: ‘Simeon wakalonda bu muakadianjila Nzambi kumueneka kudi bisamba bia bende bua kusungula munkatshi muabu bantu bua kuikalabu ne dîna diende. Mêyi a baprofete adi makanangane ne bualu ebu, . . . bua bantu badi bashale bakebe [Yehowa, NW] ne bisamba bionso bia bende kabidi badi babikidibua ku dîna dianyi; [Yehowa, NW] udi wamba nunku udi umanyisha malu a kale.’ (Disendamija miaku ndietu.)​—Bienzedi 15:14-18; Amosa 9:11, 12.

6. (a) Bualu bulomba buisatu bua ntendelelu mulelela mbualu kayi? (b) Mmunyi muakazangika Yezu ne Danyele bukokeshi bua Bukalenge? (Luka 17:20, 21)

⁶ Bualu bulomba buisatu bua ntendelelu mulelela mbua se: udi ne bua kuzangamika Bukalenge bua Nzambi bu tshiamu tshimuepele tshijalame ne tshikumbanyine bua kujikija ntatu ya bumfumu ya bukua-bantu. Yezu wakalongesha balondi bende patoke bua kusambila bua Bukalenge abu kuluabu, bua bukokeshi bua Nzambi kulombolabu buloba bujima. Danyele wakasakibua kudi spiritu bua kudianjila kumanyisha pa bidi bitangila matuku a ku nshikidilu ne: ‘Nzambi wa mu diulu neajadike bukalenge bukuabu budi kabuyi bubutudibua tshiendelele. . . . Nebutshibule makalenge [a pa buloba, a tshididi] aa onso bitupa bitupa, nebuabutule, ne buobu nebujalame tshiendelele.’ Mbanganyi badi baleje ku bienzedi biabu mu siekele eu wa 20 ne: badi bapetesha Bukalenge abu dikuatshisha dijima​—mbitendelelu bia Babilone Munene peshi m’Bantemu ba Yehowa?​—Danyele 2:44; Matayo 6:10; 24:14.

7. Mmunyi mudi batendeledi balelela bangata Bible?

⁷ Bualu bulomba buinayi bua kupeta dianyisha dia kudi Nzambi mbua se: basadidi balelela ba Nzambi badi ne bua kubingisha Bible bu Dîyi difunda ku spiritu wa Nzambi. Nunku kabena mua kufika ku ditshimunyibua kudi mudimu wa bajanyi ba Bible, badi benza madikolela bua kuleja Bible bu mukanda wa malu madifundila patupu kudi bantu ne ntupakanyi yonso ya ku difunda edi. Bantemu ba Yehowa badi bitabuja ne: Bible udi Dîyi dia Nzambi difunda ku spiritu, anu mene bu muakafundila Paulo Timote: “Mufundu wonso mmufunda ku spiritu wa Nzambi ne udi ne mushinga bua kulongesha, bua kubela, bua kupingajilula malu mu bulongame, bua kubela ne kunyoka mu buakane bua muntu wa Nzambi ikale mukumbane tshishiki, mulongolola biakane bua mudimu wonso muimpe.”a Ke bualu kayi, Bantemu ba Yehowa badi bangata Bible bu muludiki wabu, mukanda wabu bua nsombelu wa dituku dionso, ne mushimi wabu wa ditekemena bua nsombelu wa matuku atshilualua.​—2 Timote 3:16, 17, NW.

Ntendelelu wa dinanga, ki ng’wa lukinu

8. Bualu bulomba buitanu bua ntendelelu mulelela mbualu kayi?

⁸ Mmunyi muakasunguluja Yezu balondi bende balelela? Diandamuna diende didi ditufikisha ku tshimanyinu tshitanu tshinene tshidi tshisunguluja ntendelelu mulelela. Yezu wakamba ne: “Ndi nnupesha mukenji mupiamupia: nunangangane bamue ne bakuabu, amu bu mundi mununange, nuenu penu nunangangane bamue ne bakuabu. Ku muanda eu bonso nebanumanye munudi bayidi banyi: binuikala ne dinanga munkatshi muenu.” (Yone 13:34, 35, NW) Mmunyi muakaleja Yezu dinanga diende? Pa kufila muoyo wende bu mulambu wa tshia-bupikudi. (Matayo 20:28; Yone 3:16) Bua tshinyi dinanga dilelela nngikadilu udi ne mushinga bua bena nkristo balelela? Yone wakumvuija ne: ‘Bananga, tunangangane, bualu bua dinanga didi difume kudi Nzambi . . . Muntu udi kayi ne dinanga kêna muanji kumanya Nzambi; bualu bua Nzambi udi dinanga.’​—1 Yone 4:7, 8.

9. Mbanganyi badi baleje dinanga dilelela, ne mmushindu kayi?

⁹ Mbanganyi badi mu bikondo bietu ebi baleje mushindu eu wa dinanga, nansha kumpala kua lukinu munkatshi mua bisa, matunga, peshi bisamba? Mbanganyi badi batshimune diteta dia ndekelu, nansha too ne ku lufu, bua se: dinanga diabu ditshimune? Tudiku mua kuamba ne: mbadiambike bena Katolike balume anyi bakaji badi bamanyike mudibu ne tshitupa kampanda mu bujitu bua dishipangana divua dienzeke mu Rwanda mu 1994 anyi? Mbena Ortodokse bena Serbie peshi mbena Katolike bena Croatie badi baditue mu “dikezula dia bisa” ne bikuabu bienzedi bikena bia Buena-nkristo mu mvita ayi ya bena ditunga mu Balkans anyi? Peshi mbamfumu bena malu a Nzambi bena Katolike anyi bena Mishonyi badi bavudije kansungasunga ne lukinu mu Irlande wa ku Nord mu bule bua makumi makese a bidimu bishale anyi? Bushuwa Bantemu ba Yehowa kabena mua kubandibua bu bantu bakaditua mu mvita yonso ya mushindu’eu. Mbakenge mu maloko ne tumponya tua kasuba, too ne ku lufu mene, pamutu pa kutungila dinanga diabu dia Buena-nkristo.​—Yone 15:17.

10. Bua tshinyi bena nkristo balelela badi balama ndubidilu?

¹⁰ Bualu bulomba buisambombo bua ntendelelu muanyishibue kudi Nzambi ng’ebu bua ndubidilu pa bidi bitangila malu a tshididi a bulongolodi ebu. Bua tshinyi bena nkristo badi ne bua kulama ndubidilu mu malu a tshididi? Paulo, Yakobo, ne Yone badi batupesha kabingila kanene bua ndubidilu eu. Mupostolo Paulo wakafunda ne: Satana udi “nzambi wa ndongoluelu eu wa malu,” udi ufofomija bieledi bia lungenyi bia bakena bena kuitabuja ku diambuluisha dia mishindu kayi yonso idiku, pa kukonga ne tshididi tshiabuludianganyi. Muyidi Yakobo wakamba ne: “Bulunda ne bulongolodi ebu ndukuna ne Nzambi,” ne mupostolo Yone wakamba ne: “Bulongolodi ebu bujima mbulale mu bukokeshi bua mubi.” Nunku, muena nkristo mulelela kêna mua kunyanga budiambiki buende kudi Nzambi pa kudibuejakaja mu mianda ya bulongolodi bunyanguke bua tshididi ne bukole bua Satana.​—2 Kolinto 4:4; Yakobo 4:4; 1 Yone 5:19, NW.

11. (a) Mmunyi mudi bena nkristo bangata mvita? (b) Nkabingila kayi ka mu Mifundu kadi kabingisha mmuenenu eu? (2 Kolinto 10:3-5)

¹¹ Pa kutangila malu malomba abidi adi ku mutu eku, bua muanda-mutekete budi budileja patoke, mbuena kuamba ne: bena nkristo balelela kabena ne bua kudibuejakaja mu mvita. Bualu ntendelelu mulelela mbuena-muntu bua pa buloba bujima buashila pa dinanga, nunku tshintu nansha tshimue katshiena mua kuabulula anyi kushimbula “nsangilu mujima wa . . . bana betu pa buloba bujima.” Yezu wakalongesha dinanga, ki ndukinu; wakalongesha ditalala, ki mmvita. (1 Petelo 5:9, NW; Matayo 26:51, 52) “Mubi” umue umue eu, Satana, wakalobesha Kaina bua kushipa Abele mmutungunuke ne kumiamina lukinu munkatshi mua bukua-bantu ne kukebesha mvita ne dipumunyibua dia mashi bua matapuluka a malu a tshididi, a malu a Nzambi, ne a bisa. Bena nkristo balelela ‘kabena balonga mvita nansha kakese,’ nansha bibalomba kujimija tshintu kayi. Mu ngakuilu wa mu tshimfuanyi, mbamane ‘kufula nkasu ya kudima nayi ku miele yabu ya mvita, mbafule miele ya kukosa nayi matamba mafubidila a mitshi ku mafuma abu.’ Badi bakuama mamuma a ditalala a spiritu wa Nzambi.​—1 Yone 3:10-12; Yeshaya 2:2-4; Galatia 5:22, 23.

Nzambi udi ubenesha bukezuke bua nsombelu ne malongesha

12. (a) Bualu bulomba bua muanda-mukulu mbualu kayi, kadi mmatapuluka kayi mu malu a Nzambi awudi mua kutela? (b) Mmunyi muvua Paulo muzangike bualu bulomba ebu bua muanda-mukulu?

¹² Buobumue bua Buena-nkristo mbualu bulomba bua muanda-mukulu bua ntendelelu mulelela. Kadi, bitendelelu biabuludianganyi bia Bukua-buena-nkristo ki mbikumbaje bualu ebu. Bivule bia ku bitendelelu bidi bibikidibue bu bidi bitangalake kuonso mbidiabulule mu tusumbusumbu tuvulavulayi, ne ntupakanyi ke tshipeta. Anjibi kuangata bu tshilejilu, ntendelelu wa bena Batiste mu États-Unis, udi mudiabulule mu bena Batiste ba ku Nord (Ekleziya ya bena Batiste ya Amerike mu États-Unis) ne bena Batiste ba ku Sud (Tshiovo tshia bena Batiste ba ku Sud), pamue ne makumi a bisumbu bikuabu bia bena Batiste bidi bifumine ku matapuluka. (World Christian Encyclopedia, dibeji dia 714) Matapuluka a bungi mmafumine ku mashilangana a malongesha anyi ndongoluelu wa ekleziya (tshilejilu, Ekleziya Presbytérienne, Épiscopale, Congrégationaliste). Matapuluka a Bukua-buena-nkristo mmafuanangane ne aa a bitendelelu bikena bia Bukua-buena-nkristo​—tshia Buda, Izlame, anyi Hindu. Ntshinyi tshivua mupostolo Paulo mubele bena nkristo ba kumpala? ‘Bana betu, ndi nnusengelela bua dîna dia Mukalenge Yezu Kristo, bua buonso buenu nuambe dîyi diodimue, ne bua kakuikadi matapuluka munkatshi muenu; kadi bua nuenu nuikale bakajibue tshishiki mu meji amue ne mu lungenyi lumue.’​—1 Kolinto 1:10; 2 Kolinto 13:11.

13, 14. (a) ‘Kuikala bantu ba tshijila’ kudi kumvuija tshinyi? (b) Mmunyi mudi ntendelelu mulelela ulamibua mukezuke?

¹³ Bualu bulomba bua tshitema bua ntendelelu muanyishibue kudi Nzambi mbualu kayi? Dîyi-diludiki dimue dia mu Bible ndileja mu Lewitiki 11:45: “Nuikale bantu ba tshijila bualu bua meme ndi wa tshijila.” Mupostolo Petelo wakambulula bualu bulomba ebu pakafundaye ne: “Bu mudi yeye wakanubikila udi wa tshijila, nunku nuenu kabidi nulue ba tshijila mu malu onso a [nsombelu, NW] wenu.” (Disendamija miaku ndietu.)​—1 Petelo 1:15.

¹⁴ Ntshinyi tshidi tshikongibue mu dikengela edi dia kuikala ba tshijila? Ntshia se: batendeledi ba Yehowa badi ne bua kuikala bakezuke mu nyuma ne mu malu a tshitembu. (2 Petelo 3:14) Kakuena muaba bua benji ba mpekatu bakena banyingaladi, benji ba mpekatu ku bukole, badi ku nsombelu wabu baleja kadiwu bua mulambu wa tshia-bupikudi wa Kristo. (Ebelu 6:4-6) Yehowa udi ulomba se: tshisumbu tshia bena nkristo tshishale tshikezuke ne tshia tshijila. Mmunyi mudibi bikumbajibua? Mu bualabale kampanda nku tshienzedi tshia dipata aba badi mua kutundubija tshisumbu.​—1 Kolinto 5:9-13.

15, 16. Mmashintuluka kayi adi bena nkristo bavule benze mu nsombelu yabu?

¹⁵ Kumpala kua kumanya bulelela bua Buena-nkristo, bavule bavua ne nsombelu mibi, ya dikeba dia masanka, ya budinangi. Kadi dîyi didi ditangila Kristo diakabashintulula, ne mbapete dilekelela bua mpekatu yabu. Paulo wakaleja nunku ne bukole pakafundaye ne: ‘Kanuena bamanye ne: bantu babi kabena bapiana bukalenge bua Nzambi anyi? Kanudingibu; bena tshiendenda, anyi bena mpingu, anyi bena masandi; anyi badileji bu bakaji, anyi balume badi benzelangana malu a bundu, anyi bibi, anyi bena lukuka lua bintu, anyi bakuatshiki ba maluvu, anyi bapendianganyi, anyi banyengi ba bintu, kabena bapiana bukalenge bua Nzambi. Bakuabu benu bavua nunku; kadi [nuakatokeshibua pa kusukudibua, NW].’ (Disendamija miaku ndietu.)​—1 Kolinto 6:9-11.

¹⁶ Mbia bushuwa se: Yehowa udi wanyisha ba ku aba badi banyingalala bua nsombelu wabu ukena mu diumvuangana ne Mifundu, bakudimuna mutshima, ne balua balondi balelela ba Kristo ne malongesha ende. Mbanange bushuwa bantu nabu anu bu mudibu badinange ne badi baleja nunku mu mishindu mivule, tshilejilu pa kuleja tshisumi mu mudimu udi ufikisha mukenji wa muoyo kudi bonso badi bateleja.​—2 Timote 4:5.

“Bulelela pabu nebunupikule”

17. Bualu bulomba bua dikumi bua ntendelelu mulelela mbualu kayi? Fila bilejilu.

¹⁷ Kudi bualu bulomba bua dikumi budi nabu Yehowa bua aba badi bamutendelela mu spiritu ne mu bulelela​—dilongesha dikezuke. (Yone 4:23, 24) Yezu wakambila balondi bende ne: “Nenumanye bulelela, bulelela pabu nebunupikule.” (Yowanese 8:32, MMM) Bulelela bua mu Bible budi butupikula ku malongesha akena ambika Nzambi lumu, bu mudi dia anyima ukena ufua, dia inferno wa kapia, ne dia mpurgatoriyo. (Muambi 9:5, 6, 10; Yehezekele 18:4, 20) Budi butupikula ku bualu budimbakane bua Babilone bua “Busatu Butambe Bunsantu” bua Bukua-buena-nkristo. (Dutelonome 4:35; 6:4; 1 Kolinto 15:27, 28) Ditumikila bulelela bua mu Bible didi divuija bantu bena dinanga, baditatshishi bua bakuabu, bimpe, bena luse. Buena-nkristo bulelela kabutu nansha musangu umue bukankamija bena Dikongoloja badisombuedi, bakena luse, bu mudi Tomás de Torquemada, anyi bakebeshi ba mvita bena lukinu; bu mudi ba-pape bakebeshi ba Krwazade. Pabi, Babilone Munene mmupatule mushindu eu wa mamuma mu bule bua muyuki wa bantu, kumbukila ku tshikondo tshia Nimrod too ne ku mpindieu.​—Genese 10:8, 9.

Dîna disunguluji

18. (a) Mbanganyi badi bakumbaje malu malomba dikumi bua ntendelelu mulelela ne mmushindu kayi? (b) Ntshinyi tshitudi ne bua kuenza muntu pa nkayende bua kupiana dibenesha didi diteka kumpala kuetu?

¹⁸ Mbanganyi lelu’eu badi mu bulelela buonso bakumbaja malu malomba aa dikumi a ntendelelu mulelela? Mbanganyi badi bamanyike ne banyisha kudi bakuabu bua lumu luabu bu balami ba muoyo mutoke ne banangi ba ditalala? Pa buloba bujima Bantemu ba Yehowa mbamanyike bu bantu badi ‘kabayi bena mu bulongolodi ebu.’ (Yone 15:19, NW; 17:14, 16; 18:36) Tshisamba tshia Yehowa ntshiambika lumu bua dîna diende diditshi nadi ne bualu tshidi tshisamba tshia Bantemu bende, anu bu muvua mene Yezu Kristo ntemu muena lulamatu kudi Tatuende. Tudi bangate dîna adi dia tshijila, bamanye bujitu buetu bua kuikala ne nsombelu udi mu diumvuangana ne tshididi diumvuija. Ne, bu mutudi Bantemu bende, nditekemenapu kayi dia butumbi didi diteka kumpala kuetu! Mbuena kuamba ne: kuikala bena mu dîku dia bantu bena butumike, badi mu buobumue, badi batendelela Mfumu mutambe bunene wa bukua-mabulunge mu mparadizu muasulula pa buloba apa. Bua kupeta dibenesha dia mushindu’eu, tutungunukayi ne kudisunguluja patoke bu bena ntendelelu mulelela ne kuangata dîna dia Bantemu ba Yehowa ne didisua dionso “bualu malumbuluisha ende mmalelela ne mmakane”!​—Buakabuluibua 19:2, NW; Yeshaya 43:10-12; Yehezekele 3:11.

[Mêyi adi kuinshi]

Mmunyi muwandamuna?

◻ Mmunyi mudi basadidi ba Yehowa bangata dibutudibua dia Babilone Munene?

◻ Malu malomba manene bua ntendelelu mulelela mmalu kayi?

◻ Mmunyi mudi bulelela bukupikula?

◻ Ndumu kayi lua pa bualu lutudi nalu bu mutudi Bantemu ba Yehowa?

[Bimfuanyi mu dibeji 17]

Bantemu ba Yehowa badi bayisha ne balongesha lumu luimpe lua Bukalenge bua Nzambi

[Tshimfuanyi mu dibeji 18]

Bena nkristo balelela mbalame misangu yonso ndubidilu pa bidi bitangila malu a tshididi a bulongolodi ebu ne mvita

[Mêyi a dianyisha]

Ndeke: Ku dianyisha dia Tshibambalu tshia malu a Biluilu, London