Udi muvuluke anyi?

Udiku mumone nimero ya ndekelu ya Tshibumba tshia Nsentedi mikale ne dikuatshisha kuudi anyi? Nunku bua tshinyi kubenga kuteta tshivulukilu tshiebe ne nkonko idi ilonda eyi:

◻ Ndilongesha kayi ditudi mua kulongela ku dikuluka dia tshimpitshimpi dia bena Amona? (Sefanya 2:9, 10)

Yehowa kêna ulengulula tshienzedi tshia dipingaja buluishi ku bulenga buende, ne mu tshikondo tshiende tshijadika, neenze tshienzedi kampanda, anu bu muakenzaye mu bikondo bia kale. (Fuanyikija ne Musambu 2:6-12.)​—15/12, dibeji dia 10.

◻ Mmu mishindu kayi mudi bena nkristo ne ditalala?

Tshiakumpala, badi ne ‘ditalala ne Nzambi [ku butuangaji] bua Mukalenge [wabu] Yezu Kristo.’ (Lomo 5:1) Tshibidi, badi ne ditalala munkatshi muabu buobu bine pa kudima ‘meji adi afuma mu diulu,’ adi ‘diambedi mimpe, pashishe a ditalala.’ (Yakobo 3:17)​—1/1, dibeji dia 11.

◻ Dîyi dia Nzambi ndifuanyikijibue ne bimue bintu kayi, ne mmunyi mudibi ne dikuatshisha kutudi?

Dîyi dia Nzambi ndifuanyikijibue ne mabele madiishi, biakudia bikole, mâyi matalaji ne makezudi, lumuenu, ne muele wa mvita mutue. Kujingulula tshidi mbikidilu eyi yumvuija kudi kuambuluisha ministre kampanda bua kutumika ne Bible ne nzanzu yonso.​—1/1, dibeji dia 29.

◻ Dimanya-mukanda dia nkatshinkatshi didi ne bua kutuambuluisha bua kuenza tshinyi?

Bua kubala bimpe, kufunda bintu bidi mua kubadibua, kudiunda mu lungenyi ne mu malu a tshitembu, ne kupeta dikela dikuatshishi didi dikengedibua mu nsombelu wa dituku dionso ne mu mudimu wa tshijila udi upatula bipeta bilenga.​—1/2, dibeji dia 10.

◻ Ndilongesha kayi dia mushinga didi ditangila dimanya-mukanda ditudi mua kulongela kudi Yezu?

Dimanya-mukanda tudi ne bua kutumika nadi, ki mbua kuditumbisha tuetu nkayetu, kadi bua kusamuna Mulongeshi mutambe bunene, Yehowa Nzambi. (Yone 7:18)​—1/2, dibeji dia 10.

◻ Bukalenge bua Nzambi ntshinyi?

Bukalenge mmbulamatadi wa mu muulu muteka kudi Nzambi udi ukumbaja disua Diende dia kumbusha buenzeji bua mpekatu ne lufu ne kupingajilula nsombelu miakane pa buloba. (Danyele 2:44; Buakabuluibua 11:15; 12:10)​—1/2, dibeji dia 16.

◻ Mmunyi mudi Bible upetesha dilongesha didi dikengedibua bua kutuisha tshinyangu ku nshikidilu wa kashidi?

Ku diambuluisha dia Dîyi diende, Bible, Yehowa udi ulongesha bantu bua kuikalabu banangi ba ditalala ne bakane. (Yeshaya 48:17, 18) Dîyi dia Nzambi didi ne bukokeshi bua kubuela mu mutshima wa muntu ne kuwulenga, pa kukudimuna ngelelu wende wa meji ne ngikadilu wende. (Ebelu 4:12)​—15/2, dibeji 6.

◻ Mmu mushindu kayi mutudi mua kuamba bua mulayi wa Yeshaya nshapita wa 35 ne: udi ne makumbana asatu?

Mulayi wa Yeshaya uvua ne dikumbana dia kumpala pakapingana bena Yuda kumbukila ku bupika bua bena Babilone mu 537 K.B.B. Udi ne dikumbana dia mu nyuma didi dienda ditungunuka lelu’eu kumbukila ku dilekedibua dia Izalele wa mu nyuma ku bupika bua Babilone Munene. Ne newikale ne dikumbana disatu disuikakaja ku dishindika dia mu Bible dia nsombelu ya mu mparadizu muena-dîna pa buloba. (Musambu wa 37:10, 11; Buakabuluibua 21:4, 5)​—15/2, dibeji dia 17.

◻ Mmunyi muvua ditabalela dia Nzambi dileja muntu ku muntu dilejibue mu bishima bienza kudi Muanende, Yezu?

Bu mudi Yezu ‘kayi mua kuenza bualu nansha bumue ku disua diende nkayende, kadi wenza anu budiye umona Tatu wenza,’ luse luende ludi mundidimbi wa diengeleka wa diditatshisha dia Yehowa bua yonso wa ku basadidi bende. (Yone 5:19)​—1/3, dibeji 5.

◻ Tshiambilu tshia “nkita ya tshivulukilu” tshidi Yezu mutumike natshi mu Yone 5:28, 29 (NW) tshidi tshiumvuija tshinyi?

Muaku wa tshiena-Greke mne·meiʹon (nkita ya tshivulukilu) mutumika nawu apa udi uleja ne: Yehowa udi uvuluka malu a kale a muntu udi mufue, pa kukonga ne ngikadilu yende mipiana ku tshilelelu ne tshivulukilu tshiende tshijima. Ebi bidi bifila tshijadiki tshikole tshia mudi Nzambi ne ditabalela bua bantu dileja muntu ku muntu!​—1/3, dibeji 6.

◻ Mmukenji kayi wa didimuija udi mu mulayi wa Sefanya udi ne diambuluisha dikuatshishi buetu?

Lelu’eu ki ntshikondo tshia kulekela mpata yasa miji mu mitshima yetu ne kuladikija mu bieledi bietu bia lungenyi dilua dia dituku dia Yehowa. Kabidi, tudi ne bua kuikala badimukile buenzeji butekeshanganyi bukebesha kudi kalèngù. (Sefanya 1:12, 13; 3:8)​—1/3, dibeji dia 17.

◻ Bua tshinyi mbikole bua kushala ne bulamatshi kudi Nzambi?

Bualu bulamatshi ku mikenji mbubengangane ne minyikibua a budinangi atudi bapiane kudi baledi betu. (Genese 8:21; Lomo 7:19) Kupita apu, Satana ne ba-demon bende mbapangadije bua kutuvuija bantu bapange bulamatshi kudi Nzambi. (Efeso 6:12; 1 Petelo 5:8)​—15/3, dibeji dia 10.

◻ Mmu nsombelu kayi inayi mutudi ne bua kuakama lutatu lua bulamatshi ku mikenji, ne ntshinyi tshiatuambuluisha bua kuenza nunku?

Nsombelu eyi inayi ke bulamatshi kudi Yehowa, kudi bulongolodi buende, kudi tshisumbu, ne kudi muena dibaka netu. Diambuluisha dimue mu diakama ntatu eyi nkuanyisha ne: kuakama lutatu lua bulamatshi ku mikenji nkusuikakaja bikole ku dibingishibua dia bumfumu butambe bunene bua Yehowa.​—15/3, dibeji dia 20.

◻ Ndilongesha kayi ditudi mua kulongela ku bualu buakenzekela Davidi pa kuteta bua kutuala mushete wa tshiovo ku Yeruzaleme? (2 Samuele 6:2-7)

Davidi wakapanga kulonda ngenyi-miludiki ivua Yehowa mufile pa bidi bitangila diambula dia Mushete, ne ebi biakakebesha lufu. Dilongesha ndia se: katuena ne bua kudiwula Yehowa bua ntatu idi ipatuka patudi tupanga kulonda ngenyi-miludiki yende miakane. (Nsumuinu 19:3)​—1/4, mabeji 28, 29.