Nyemenayi ku dikubibua kumpala kua “dikenga dinene”

“Panuamona Yeruzaleme munyungulula kudi biluilu biunguija mu tshitudilu, . . . bantu bikala mu Yudeya batuadije kunyemena ku mikuna.”​—LUKA 21:20, 21, NW.

1. Bua tshinyi dinyema didi dikengedibua ne lukasa luonso bua aba batshidi bena mu bulongolodi ebu?

BUA bantu bonso badi mu bulongolodi bua Satana, dinyema didi dikengedibua ne lukasa luonso. Bua kupandishibua pikala ndongoluelu eu wa malu wa lelu mumbushibue pa buloba, badi ne bua kufila tshijadiki tshituishi tshia se: mbiimane bashindame ku luseke lua Yehowa ne kabatshiena kabidi bena mu bulongolodi ebu bukokesha kudi Satana.​—Yakobo 4:4; 1 Yone 2:17.

2, 3. Nnkonko kayi misuikakaja ku mêyi a Yezu mafunda mu Matayo 24:15-22 ituakonkonona?

² Mu mulayi wende munene udi utangila nkomenu wa ndongoluelu eu wa malu, Yezu wakazangika dikengedibua dikole bua dinyema dia mushindu’eu. Tutu tukonkonona misangu ne misangu bidi bifunda mu Matayo 24:4-14; pabi, bìdì bilonda tshitupa etshi bidi pabi ne mushinga. Tudi tukukankamija bua kubulula Bible webe mpindieu ne kubala mvese wa 15 too ne ku wa 22.

³ Mulayi au udi umvuija tshinyi? Mu siekele wa kumpala, ntshinyi tshivua “tshintu tshia muendi tshìdì tshikebesha kabutu”? Dikalaku diatshi “mu muaba munsantu” divua tshimanyinu tshia tshinyi? Bidi ne diumvuija kayi buetu tuetu?

“Mubadi atumike ne busunguluji”

4. (a) Ntshinyi tshivua Danyele 9:27 muambe tshivua ne bua kuenzeka kunyima kua dibengibua dia Masiya kudi bena Yuda? (b) Pa kutela bualu ebu, mbua kabingila kayi mene buakamba Yezu ne: “Mubadi atumike ne busunguluji”?

⁴ Bambisha mu Matayo 24:15 se: Yezu uvua utela tshivua tshifunda mu mukanda wa Danyele. Mu nshapita wa 9 wa mukanda au mudi mulayi wakadianjila kumanyisha dilua dia Masiya ne dilumbuluisha divua ne bua kukumbajibua pa tshisamba tshia bena Yuda bua dimubenga diatshi. Tshikuabu tshitupa tshia mvese wa 27 (NW) tshidi tshiamba ne: “Pa dipuapua dia bintu bia muendi nepikale kampanda udi ukebesha kabutu.” Miyuki ya ku kale ya bena Yuda ivua ilamika tshitupa etshi tshia mulayi wa Danyele ku dinyanga dia ntempelo wa Yehowa mu Yeruzaleme kudi Antiochus IV mu siekele muibidi K.B.B. Kadi Yezu wakadimuija ne: “Mubadi atumike ne busunguluji.” Dinyanga dia ntempelo kudi Antiochus IV, nansha muvuadi bushuwa dia muendi, kadiakatuala kabutu​—ka Yeruzaleme, ka ntempelo, peshi ka tshisamba tshia bena Yuda. Nunku, mbimueneke se: Yezu uvua udimuija bamuteleji se: dikumbana dia mulayi eu divua, ki mbua matuku mashale, kadi bua matuku atshivua alua.

5. (a) Mmunyi mudi difuanyikija dia miyuki ya mu Evanjeliyo dituambuluisha bua kusunguluja “tshintu tshia muendi” tshia mu siekele wa kumpala? (b) Bua tshinyi Cestius Gallus wakalombola biluilu bia bena Roma ku Yeruzaleme mu 66 B.B.?

⁵ “Tshintu tshia muendi” tshivuabu ne bua kutentekela tshivua tshinyi? Mbia mushinga bua kumanya se: muyuki wa Matayo udi wamba ne: “Panuamona tshintu tshia muendi tshìdì tshikebesha kabutu . . . tshiimane mu muaba munsantu.” Pabi, muyuki wa muomumue mu Luka 21:20, (NW) udi wamba ne: “Panuamona Yeruzaleme munyungulula kudi biluilu biunguija mu tshitudilu, nunku numanye se: kabutu kende kasemenyi pabuipi.” Mu 66 B.B., bena nkristo bavua basombele mu Yeruzaleme bakamona tshivua Yezu mudianjile kumanyisha. Mulongolongo wa mianda yakenzeka ya dibundangana pankatshi pa bena Yuda ne bena mbulamatadi wa bena Roma yakafikisha Yeruzaleme ku dilua muaba mufuke wa ditombokela bena Roma. Bu tshipeta, tshinyangu tshiakajuka mu Yudeya, Samariya, Ngalileya, Dekapole, ne Fenisi, ku Nord mu Syrie, ne ku Sud mu Ejipitu. Bua kupingajilula ndambu wa ditalala mu tshitupa atshi tshia Ampire wa bena Roma, Cestius Gallus wakalombola biluilu bia masalayi kumbukila ku Syrie kuya ku Yeruzaleme, uvua bena Yuda batela bu “tshimenga tshinsantu” tshiabu.​—Nehemiya 11:1, NW; Yeshaya 52:1.

6. Mmunyi muakenzekabi bushuwa bua “tshintu tshia muendi” tshìvuà ne bua kukebesha kabutu “tshiimane mu muaba munsantu”?

⁶ Masalayi a bena Roma avua ne tshibidilu tshia kuambula mabendela, peshi bimanyishilu, bivuabu bangata bu bia tshijila, kadi bivua biangatshibua kudi bena Yuda bu bimfuanyi bia ditendelela. Bia mushinga, muaku wa tshiena-Ebelu mukudimuna ne: “tshintu tshia muendi” mu mukanda wa Danyele mmutumika nawu nangananga bua bimfuanyi bia ditendelela ne ntendelelu wa bimfuanyi.a (Dutelonome 29:17) Nansha muvuaku dikandamana dia bena Yuda, masalayi a bena Roma mambule bimanyishilu bia ditendelela akabuela mu Yeruzaleme mu Kasuabanga 66 B.B. ne pashishe kutuadijawu kushimbula tshimanu tshia ntempelo ku Nord. Kakuvua mpata pa bualu ebu​—“tshintu tshia muendi” tshivua ne bua kukebesha kabutu ka Yeruzaleme mu ka-bujima tshivua “tshiimane mu muaba munsantu”! Kadi mmunyi muvua muntu mua kunyema?

Dinyema divua dikengedibua ne lukasa luonso!

7. Mbualu kayi buakenza tshiluilu tshia bena Roma mu mushindu ukena mutekemena?

⁷ Mu tshimpitshimpi ne bienze bu kakuena kabingila nansha kamue bilondeshile mmuenenu wa bantu, tshikondo tshivuabi bimueneke ne: Yeruzaleme uvua mua kukuatshibua kabiyi lutatu, tshiluilu tshia bena Roma tshiakumbuka. Bantomboji bena Yuda bakipatangana ne biluilu bia bena Roma bivua binyema kadi kushikilabu ku Antipatrise, kilometre bu 50 kumbukila ku Yeruzaleme. Pashishe bena Yuda bakapingana. Bafika mu Yeruzaleme, e kudisangishabu mu ntempelo bua kudilongolola bua kutshimuna mvita. Bansonga bakangatshibua ku mudimu wa kukolesha ngumbu ne bua kusadila mu busalayi. Bena nkristo bavua mua kubuelakana mu malu aa anyi? Nansha bu buobu mua kuepuka malu aa, batshivua mua kuikala anu mu muaba wa njiwu pakapingana biluilu bia bena Roma anyi?

8. Ntshienzedi kayi tshivua tshikengedibua ne lukasa luonso tshiakenza bena nkristo mu ditumikila mêyi a mulayi wa Yezu?

⁸ Bena nkristo mu Yeruzaleme ne mu Yudeya yonso bakalonda diakamue didimuija dia mu mulayi wa Yezu Kristo ne bakanyema muaba wa njiwu au. Dinyema divua dikengedibua ne lukasa luonso! Pashishe, bakaya mu rejon ya mikuna, ne bamue bavua mua kuikala basombele ku Pela, mu provense wa Pérée. Aba bakangata ne mushinga didimuija dia Yezu kabakapingana mu mushindu mupote bua kuteta bua kulama bintu biabu bia ku mubidi. (Fuanyikija ne Luka 14:33.) Bumbuka mu nsombelu eu, bakaji biimite ne bamushi ba bana bakapeta bushuwa lutatu bua kuenza luendu ku makasa. Dinyema diabu kadivua nansha dijingakaja kudi mikandu ya dituku dia Nsabatu, ne muvu wa mashika ukavua pabuipi, kadi kauvua muanji kutuadija. Aba bakangata ne mushinga didimuija dia Yezu dia kunyema lukasa bavua mu dikubibua pambelu pa Yeruzaleme ne Yudeya. Muoyo wabu uvua musuikakaja ku dienza bualu ebu.​—Fuanyikija ne Yakobo 3:17.

9. Mmunyi muakapingana mu katupa kîpi biluilu bia bena Roma, ne ntshipeta kayi tshiakamueneka?

⁹ Tshidimu tshiakalonda mene, mu 67 B.B., bena Roma bakatuadijilula diela bena Yuda mvita. Tshiakumpala, Ngalileya wakatshimunyibua. Tshidimu tshiakalonda, Yudeya wakasasudibua. Mu 70 B.B., masalayi a bena Roma akajingila Yeruzaleme muine. (Luka 19:43) Nzala yakalua ya kavuambu menemene. Bavua bajikila mu tshimenga etshi bakaavua baluishangana umue ne mukuabu. Yonso uvua uteta kunyema uvua ushipibua. Tshiakabenzekela tshivua, anu bu muakamba Yezu, “dikenga dinene.”​—Matayo 24:21.

10. Bituabala ne busunguluji, ntshinyi tshikuabu tshituabambisha?

¹⁰ Ebi biakakumbaja mu ka-bujima tshiakadianjila kuamba Yezu anyi? Tòo, malu makuabu atshivua ne bua kuenzeka. Bituabala Mifundu ne busunguluji, bu muakadimuija Yezu, katuakupangila kumanya malu atshidi kumpala. Netuele kabidi meji bikole pa bidi bitangila buenzeji buawu mu nsombelu yetu.

“Tshintu tshia muendi” tshia matuku etu aa

11. Mmu mvese kayi mikuabu ibidi mudi Danyele utela “tshintu tshia muendi,” ne ndupolo kayi lua tshikondo ludibu bakula malu alu muaba eu?

¹¹ Bambisha bualu ebu se: kusakidila ku bitudi bamone mu Danyele 9:27 (NW), mu Danyele 11:31 ne 12:11 (NW) mudi mêyi matela a pa mutu adi atangila “tshintu tshia muendi tshìdì tshikebesha kabutu.” Mu miaba yonso eyi idibu batshitela kabena bamba bualu pa dibutudibua dia Yeruzaleme. Bushuwa, mêyi a mu Danyele 12:11 mmamba anu mvese ibidi kunyima kua ditela “tshikondo tshia [ku] nshikidilu.” (Danyele 12:9) Tudi mu lupolo elu lua tshikondo biangatshile ku 1914. Nunku tudi ne bua kuikala ne ntema bua kusunguluja “tshintu tshia muendi tshìdì tshikebesha kabutu” tshia matuku etu aa ne pashishe kujadika se: tudi bapatuke mu muaba wa njiwu.

12, 13. Bua tshinyi mbikumbanyine bua kuleja Nsangilu wa Matunga bu “tshintu tshia muendi” tshia matuku etu aa?

¹² “Tshintu tshia muendi” atshi tshia matuku etu aa ntshinyi? Malu menzeke adi afunkuna Nsangilu wa Matunga, wakatuadija kutumika mu 1920, katupa kîpi kunyima kua bulongolodi ebu bumane kubuela mu tshikondo tshiabu tshia ndekelu. Kadi mmunyi muvuaye mua kuikala “tshintu tshia muendi tshìdì tshikebesha kabutu”?

¹³ Vuluka se: muaku wa tshiena-Ebelu bua “tshintu tshia muendi” mbatumike nawu mu Bible nangananga bua bimfuanyi bia ditendelela ne ngenzelu ya ditendelela bimfuanyi. Nsangilu wa Matunga wakatendeledibua anyi? Bushuwa wakatendeledibua! Bamfumu ba bitendelelu bakamuteka “mu muaba munsantu,” ne balondi babu bakatuadija kumukukuila ne mumfuemfue. Tshipangu tshia Ditunga tshia Ekleziya ya Kristo mu Amerike tshiakamba ne: Nsangilu awu uvua ne bua kuikala “tshiamu tshia diendesha tshididi tshia Bukalenge bua Nzambi pa buloba.” Parlema wa États-Unis wakapeta mikanda mivulavulayi mifumine kudi bisumbu bia malu a Nzambi bimukankamija bua kushindika Tshipungidi tshia Nsangilu wa Matunga. Tshikongo tshia banene ba ba-Baptiste, ba-Congrégationaliste, ne ba-Presbyterien mu Grande-Bretagne tshiakamutumbisha bu “tshiamu tshia mudimu tshimu’epele tshidiku bua kufika ku [ditalala pa buloba].”​—Tangila Buakabuluibua 13:14, 15.

14, 15. Mmu mushindu kayi uvua Nsangilu wa Matunga ne pashishe Matunga Masanga bifike ku dikala “mu muaba munsantu”?

¹⁴ Bukalenge bua Masiya bua Nzambi buakajadikibua mu muulu mu 1914, kadi matunga akatuadija kuluangana bua bumfumu budikadile buawu nkayawu. (Musambu 2:1-6) Pakafidibua lungenyi lua kuenza Nsangilu wa Matunga, matunga atshivuà afuma ku diluangana mu mvita ya kumpala ya buloba bujima, pamue ne bamfumu ba bitendelelu bàvuà babeneshe biluilu biawu, bakavua bamane kuleja mukavuabu balekele mikenji ya Nzambi. Kabavua batangila Kristo bu Mukalenge. Nunku, bakapa bulongolodi bua bantu mudimu wa Bukalenge bua Nzambi; bakateka Nsangilu wa Matunga “mu muaba munsantu,” muaba uvua kauyi wende.

¹⁵ Bu mupinganyi wa Nsangilu eu, Matunga Masanga akatuadija kuikalaku mu dia 24 Kasuamansense 1945. Kunyima, ba-pape ba ku Roma bakasekelela Matunga Masanga bu “ditekemena dia ndekelu bua diumvuangana ne ditalala” ne “tshiakuidi tshia ndekelu bua ditalala ne ndumbuluilu muakane.” Eyowa, Nsangilu wa Matunga, pamue ne mupinganyi wende, Matunga Masanga, biakalua bushuwa tshimfuanyi tshia ditendelela, “tshintu tshia muendi” ku mêsu kua Nzambi ne kua tshisamba tshiende.

Dinyema tshinyi?

16. Banangi ba buakane badi ne bua kupatuka mu tshinyi lelu’eu?

¹⁶ Pa ‘kumona’ malu aa, pa kujingulula tshidi bulongolodi ebu bua bukua-matunga ne mudibu babukukuila, banangi ba buakane badi ne bua kunyemena ku muaba wa bukubi. Kupatuka mu tshinyi? Kupatuka mu etshi tshìdì tshimfuanyi tshia matuku etu aa tshia Yeruzaleme ukena lulamatu, mbuena kuamba ne: Bukua-buena-nkristo, ne mu Babilone Munene yonso mujima, ndongoluelu wa pa buloba bujima wa bitendelelu bia dishima.​—Buakabuluibua 18:4.

17, 18. Nkabutu kayi kakebesha “tshintu tshia muendi” tshia matuku etu aa?

¹⁷ Vuluka kabidi ne: mu siekele wa kumpala, pakabuela tshiluilu tshia bena Roma ne bimanyishilu biatshi bia ditendelela mu tshimenga tshinsantu tshia bena Yuda, tshivua muaba au bua kutuala kabutu ka Yeruzaleme ne ndongoluelu wende wa ntendelelu. Mu matuku etu aa kabutu kakaadi pa kulua, ki mpa tshimenga tshimue patupu, anyi pa Bukua-buena-nkristo nkayabu, kadi mpa ndongoluelu wa buloba bujima wa bitendelelu bia dishima.​—Buakabuluibua 18:5-8.

¹⁸ Mu Buakabuluibua 17:16 (NW), mbadianjile kuamba ne: nyama wa luonji wa dikala dikunze wa mu tshimfuanyi eu, mbuena kuamba ne: Matunga Masanga, neakudimukile Babilone Munene mufuane ndumba ne neamubutule bia tshikisu. Utumika ne ngakuilu wa mu tshimfuanyi, udi wamba ne: “Nsengu dikumi iwamonyi, ne nyama wa luonji, mine eyi neyikine ndumba ne neyimubutule ne kumushiya butaka, ne neyidie mubidi wende ne neyimuoshe butubutu mu kapia.” Tshiavua muanda eu kumvuija tshidi tshikuatshisha buôwa bua kutshibándila. Netshituishe ku tshibungubungu bitendelelu bia dishima bia mushindu kayi wonso mu bitupa bionso bia buloba. Ebi nebileje bushuwa ne: dikenga dinene diatuadiji.

19. Mbantu ba mushindu kayi badi benza bulongolodi bua Matunga Masanga katshia ku dienjibua diabu, ne bua tshinyi bualu ebu budi bua mushinga?

¹⁹ Mbia mushinga bua kumanya se: biangatshile mu 1945 pakatuadija kutumika Matunga Masanga, babengi ba malu a Nzambi ne dikalaku diende mbavue kuvudija bungi bua badi bamuenza. Mu bikondo bishilashilangane pa buloba bujima, bakebi ba mashintuluka ba mushindu’eu mbadivuije tshiamu tshia mudimu bua kukepesha bikole anyi kukandika menemene malu a Nzambi. Pabi, mu bidimu bikese bishale ebi, difinakajibua dia bisumbu bia malu a Nzambi kudi mbulamatadi ndilue kukepela mu miaba mivule. Bua bamue bantu bidi mua kumueneka ne: njiwu yonso pa bitendelelu yajiminyi.

20. Ndumu kayi ludi bitendelelu bia mu bulongolodi ebu bidiendeshile biobi bine?

²⁰ Bitendelelu bia Babilone Munene mbitungunuke ne kuikala bukole bujudiji bua tshimvundu tshia tshinyangu pa buloba. Biena-bualu bia ngumu bidi pa tshibidilu bifunkuna bitupa biluanganyi ne bisumbu bia bena tshikisu pa kubibikila ku dîna dia bitendelelu bidi bisumbu ebi bitua nyama ku mikolo. Bampulushi bakandiki ba bimvundu ne basalayi mbafike ku dibuela ku bukole mu ntempelo bua kukanda tshimvundu pankatshi pa bisumbu bia malu a Nzambi biluishanganyi. Bikongo bia malu a Nzambi mbiambuluishe buntomboji bua tshididi ne mfranga. Dikinangana dia bena malu a Nzambi ndivuije patupu madikolela a Matunga Masanga bua kulama malanda mashindame pankatshi pa bisa. Pa kulonda tshipatshila tshia ditalala ne dikubibua, matunga adi menze Matunga Masanga mmasue kumona dijika dia buenzeji kayi buonso bua malu a Nzambi budi butshiamakana kumpala kuawu.

21. (a) Nnganyi wajadika tshikondo tshikala Babilone Munene ne bua kubutudibua? (b) Ntshinyi tshidi tshikengedibua kuenza ne lukasa kumpala kua bualu ebu kuenzekabu?

²¹ Kudi kabidi bualu bukuabu bua mushinga bua kutabalela. Nansha muatumikabu ne nsengu ya biluilu bia matunga adi enza Matunga Masanga bua kubutula Babilone Munene, dibutudibua edi nedikale bushuwa dikumbajibua dia dilumbuluisha dia kudi Nzambi. Dikumbaja dia dilumbuluisha nedilue mu tshikondo tshijadika kudi Nzambi. (Buakabuluibua 17:17) Tshitudi ne bua kuenza ntshinyi mpindieu? “Patukayi munkatshi muende”​—patukayi munkatshi mua Babilone Munene—​ke mudi Bible wandamuna.​—Buakabuluibua 18:4, NW.

22, 23. Dinyema dia mushindu’eu didi dilomba kuenza tshinyi?

²² Dinyemena edi ku muaba wa dikubibua ki ndiongoloka bua kupengama mu muaba kampanda, bu muakenza bena nkristo bena Yuda pakashiyabu Yeruzaleme. Ndipatuka lubilu mu bitendelelu bia Bukua-buena-nkristo, eyowa, mu tshitupa kayi tshionso tshia Babilone Munene. Ebi bidi biumvuija kutapuluka menemene ki ng’anu ku malongolodi a bitendelelu bia dishima kadi kabidi ne ku bilele biawu ne tshinyikilu tshia lungenyi tshidiwu alela. Ndinyemena ku muaba wa dikubibua mu bulongolodi bua teokrasi bua Yehowa.​—Efeso 5:7-11.

²³ Bua musangu wa kumpala, pakasunguluja basadidi bela manyi ba Yehowa tshintu tshia muendi tshia matuku etu aa, Nsangilu wa Matunga, kunyima kua Mvita ya Kumpala ya Buloba Bujima, mmunyi muakandamuna Bantemu? Bakavua bamane kuditapulula ne ekleziya ya Bukua-buena-nkristo. Kadi bakajingulula ku kakese ku kakese ne: batshivua balamate ku bimue bilele ne ngenzelu bia Bukua-buena-nkristo, bu mudi ditumika ne nkuruse ne disekelela Nowele ne makuabu mafesto a bampangano. Pakamanyabu bulelela pa malu aa, bakenza malu ne lukasa luonso. Bakangata ne muoyo mujima mubelu udi mu Yeshaya 52:11: ‘Umukayi, umukayi, nulupuke mu muaba wawa, kanulengi tshintu tshidi tshibipa! Nulupuke munkatshi mua musoko au; nudilengeje, nuenu badi batuala malonga a Yehowa.’

24. Biangatshile nangananga mu 1935, mbanganyi badi baditue pabu mu dinyema?

²⁴ Biangatshile nangananga mu 1935, musumba udi wenda uvula wa bakuabu, bantu bavua balonge ditekemena dia kuikala ne muoyo wa kashidi pa buloba bua mparadizu, bakatuadija kuenza tshienzedi tshia muomumue. Buobu pabu ‘mbamone tshintu tshia muendi tshidi tshiimane mu muaba munsantu,’ ne badi bajingulula tshiditshi tshiumvuija. Kunyima kua diangata dipangadika diabu dia kunyema, mbakupuishe mêna abu mu liste ya malongolodi adi mikale bitupa bia Babilone Munene.​—2 Kolinto 6:14-17.

25. Ntshinyi tshidi tshilombibue pa kumbusha dikosa malanda onso avua muntu mua kuikala nawu ne bitendelelu bia dishima?

²⁵ Nansha nanku, kupatuka mu Babilone Munene kudi kumvuija bivule kupita kulekela bitendelelu bia dishima. Nkupita pa dibuela mu bimue bisangilu ku Nzubu wa Bukalenge, peshi kupatuka mu buambi bua lumu luimpe mu mudimu wa budimi musangu umue anyi ibidi ku ngondo. Muntu udi mua kuikala pambelu pa Babilone Munene mu mubidi, kadi mmumushiye bushuwa panyima anyi? Mmuditapulule yeye muine ku bulongolodi budi Babilone Munene muikale tshitupa tshiabu tshinene anyi? Utshidi mulamate ku malu adi aleja tshinyikilu tshia lungenyi tshiabu​—tshinyikilu tshidi tshipetula mêyi-makulu a buakane a Nzambi anyi? Udi upepeja nsombelu mulenga pa ditumika ne bitupa bia lulelu ne lulamatu mu dibaka anyi? Udi uzangika bipatshila biende nkayende ne bia ku mubidi kupita bipatshila bia mu nyuma anyi? Kêna ne bua kudilekela yeye muine ku buenzeji bua ndongoluelu eu wa malu.​—Matayo 6:24; 1 Petelo 4:3, 4.

Tshintu nansha tshimue katshipumbishi dinyema diebe!

26. Ntshinyi tshiatuambuluisha kabiyi amu bua kutuadija patupu dinyema kadi bua kudijikija mu mushindu muimpe?

²⁶ Mu dinyemena dietu ku dikubibua, bidi bia mushinga menemene bua katutangidi bintu bidi panyima ne dialakana dikole. (Luka 9:62) Tudi ne bua kulama bieledi bietu bia lungenyi ne mitshima yetu bijalamija bikole pa Bukalenge bua Nzambi ne buakane buende. Tudiku bapangadije bua kuleja ditabuja dietu pa kubikeba diambedi, ne dieyemena dia se: Yehowa neabeneshe nsombelu wa lulamatu wa mushindu’eu anyi? (Matayo 6:31-33) Mitabuja etu mashila pa Mifundu adi ne bua kutusaka ku kipatshila aka eku bindile ne muoyo mujima disokolodibua dia malu a mushinga enzeka pa buloba.

27. Bua tshinyi bidi bia mushinga bua kuela meji bikole pa bidi bitangila nkonko mijula muaba eu?

²⁷ Dikumbaja dia dilumbuluisha dia Nzambi nedituadije ne dibutudibua dia Babilone Munene. Nsangilu eu wa bitendelelu bia dishima mufuane ndumba neakupudibue ne kakuikalaku kabidi. Tshikondo atshi tshidi pabuipi menemene! Netuikale luseke kayi muntu pa nkayende palua tshikondo tshia mushinga atshi? Ne ku nkomenu wa dikenga dinene, pikala bishadile bia ndongoluelu eu mubi wa Satana bibutudibue, netusanganyibue ku luseke kayi? Bituikala mua kuenza tshidi tshikengedibua mpindieu, dikubibua dietu ndijadikibue. Yehowa udi utuambila ne: ‘Kadi muntu yonso udi ungumvuila, neashikame mu [dikubibua, NW].’ (Nsumuinu 1:33) Pa kutungunuka ne kusadila Yehowa ne bulamatshi ku mikenji ne disanka mu matuku a nkomenu wa ndongoluelu eu, tudi mua kufika ku disadila Yehowa bua kashidi.

[Mêyi adi kuinshi]

Udi muvuluke anyi?

◻ “Tshintu tshia muendi” tshia matuku etu aa ntshinyi?

◻ Mmu ngumvuilu kayi mudi “tshintu tshia muendi . . . mu muaba munsantu”?

◻ Dinyemena ku dikubibua mpindieu didi dilomba kuenza tshinyi?

◻ Bua tshinyi tshienzedi etshi tshidi tshikengedibua ne lukasa luonso?

[Tshimfuanyi mu dibeji 16]

Bua kupanduka, balondi ba Yezu bavua ne bua kunyema kakuyi dijingakana