Mabenesha anyi milawu​—Bilejilu buetu lelu’eu

“Malu aa akatungunuka ne kubavuila bu bilejilu, ne akafundibua bu didimuija kutudi tuetu bàdì nshikidilu ya ndongoluelu ya malu mifikile.”​—1 KOLINTO 10:11, NW.

1. Anu bu mudi muntu ukenketa tshintu tshia tshiamu, ndikenketa kayi ditudi ne bua kuenza?

KADIYI dimueneka muinshi mua mukubu mulaba, dimoma didi mua kutuadija kunyanga ku kakese ku kakese tshintu tshia mudimu tshienza ne tshiamu tshifiike. Kudi mua kupita tshikondo kampanda kumpala kua dimoma kulua kumuenekadi pa mutu. Bia muomumue, mmuenenu ne majinga bia mu mutshima wa muntu bidi bituadija kunyanguka ku kakese ku kakese mutantshi mule kumpala kua dinyanguka edi kufikishadi ku malu manene anyi mene kumanyikadi kudi bakuabu. Anu bu mutudi ne bua kukenketa ne meji tshintu kampanda bua kumona né katshiena tshienda tshikuata dimoma, nunku dikenketa ne dîsu dikole dia mitshima yetu ne diyilongolola pa dîba bidi mua kulama muoyo-mutoke wetu wa Buena-nkristo. Mu ngakuilu mukuabu, tudi mua kupeta mabenesha a kudi Nzambi ne kuepuka milawu ya kudiye. Bamue badi mua kuela meji ne: mabenesha ne milawu bibadila Izalele wa kale bidi ne diumvuija amu dikese bua aba badi bakamangana ne nkomenu wa ndongoluelu eu wa malu. (Yoshua 8:34, 35; Matayo 13:49, 50; 24:3) Kadi, kabiena nanku to. Tudi mua kubabidila bivule ku bilejilu bia didimuija bidi bitangila Izalele, anu bu mudibi biamba mu 1 Kolinto nshapita wa 10.

2. Ntshinyi tshidi 1 Kolinto 10:5, 6 wamba pa bidi bitangila malu akamona Izalele mu tshipela?

² Mupostolo Paulo udi ufuanyikija bena Izalele muinshi mua Mozese ne bena nkristo muinshi mua Kristo. (1 Kolinto 10:1-4) Nansha muakakumbana bena Izalele bua kubuela mu Buloba Bulaya, “kudi bavule ba kudibu Nzambi kakaleja dianyisha diende, bualu bakapona panshi mu tshipela.” Nunku Paulo wakambila bena nkristo nende se: “Pabi malu aa akalua bilejilu bietu, bua tuetu katuikadi bantu badi bajinga malu a njiwu, bu muakaajingabu mene.” (1 Kolinto 10:5, 6, NW) Majinga adi akoleshibua mu mutshima, nunku tudi ne bua kuteya ntema ku bilejilu bia didimuija bìdì Paulo utela.

Didimuija ku ditendelela dia mpingu

3. Mmunyi muakenza bena Izalele mpekatu pa bidi bitangila muana wa ngombe wa ngolo?

³ Didimuija dia kumpala dia Paulo didi nunku: ‘Lekelayi kuikala batendeledi ba mpingu, bu muvua bakuabu babu; bu muakafundabu ne: Bantu bakashikama bua kudia ne bua kunua, bakabika bua kunaya.’ (1 Kolinto 10:7) Tshilejilu etshi tshia didimuija ng’etshi tshia dipingana kunyima dia bena Izalele mu nsombelu ya mu Ejipitu ne dienza muana wa ngombe wa ngolo wa ditendelela. (Ekesode, nshapita wa 32) Muyidi Stefane wakaleja muanda wa mushinga: ‘Bankambua betu kabakatumikila [Mozese, muleji-mpala wa Nzambi], [bakamubenga, NW], bakapingaja mitshima yabu mu Ejipitu; bakambila Aarona ne: Utuenzele nzambi ya kuya kumpala kuetu, bualu bua katuena bamanye bualu budi bukuate Mozese, eu wakatulopola mu buloba bua Ejipitu. Mu matuku au bakenza muana wa ngombe, bakashipela lupingu nyama, bakasanka bua bintu biakenzabu ne bianza biabu.’ (Bienzedi 7:39-41) Bambisha ne: “mu mitshima yabu” bena Izalele batomboke aba bavua balame majinga mabi akabafikisha ku ditendelela dia mpingu. ‘Bakenza muana wa ngombe, bakashipela lupingu nyama.’ Kupita apu, ‘bakasanka bua bintu biakenzabu ne bianza biabu.’ Kuvua mijiki, dimba misambu, dija maja, didia, ne dinua. Mbimueneke patoke se: ditendelela dia mpingu divua dilobesha ne dijikija lutetuku.

4, 5. Mbienzedi kayi bia ditendelela mpingu bitudi ne bua kuepuka?

⁴ Ejipitu wa mu tshimfuanyi​—bulongolodi bua Satana—​udi mu bulelela utendelela dijikija lutetuku. (1 Yone 5:19; Buakabuluibua 11:8) Udi utendelela banayi ba teyatre, tungimba, ne bena manaya a dibidija mubidi bende lumu, pamue ne dija diabu dia maja, mijiki yabu, mmuenenu yabu pa diela bilele ne pa bikondo bia didisankisha. Bavule mbatetshibue bua kudibueja ne kasuki mu dijikija lutetuku eku batshikale bamba mudibu batendelela Yehowa. Patubu bakanyina muena nkristo kampanda bua bualu bubi, nsombelu wende wa butekete wa mu nyuma utu mua kuikala misangu mivule mufumine ku dinua maluvu makole, dija maja, ne didiolola mu mushindu kansanga didi mua kuikala pabuipi ne ditendelela dia mpingu. (Ekesode 32:5, 6, 17, 18) Dimue dijikija lutetuku didi dimpe ne dia disanka. Pabi, lelu’eu bivule bia ku mijiki, maja, bindidimbi, ne filme ya ku video bia mu bulongolodi ebu bidi bikumbana amu bua kuonesha majinga a ku mubidi.

⁵ Bena nkristo balelela kabena bapona mu ntendelelu wa mpingu. (2 Kolinto 6:16; 1 Yone 5:21) Yonso wa kutudi ikale ne ntema mivule bua kalu mupika wa dijikija lutetuku dia ditendelela mpingu ne kuikala mu njiwu ya kupeta bipeta bibi bia dikala mudiine mu didiolola mu mushindu wa bena bulongolodi ebu. Bituaditeka tuetu bine ku buenzeji bua bulongolodi ebu, majinga ne mmuenenu bia njiwu bidi mua kulua kuasa miji mu mushindu ukena kumanya mu tshieledi tshia lungenyi ne mu mutshima. Padibi kabiyi bilongolola, bidi mua kufikisha ndekelu wa bionso ‘ku dipona panshi mu tshipela’ tshia ndongoluelu wa Satana.

6. Ntshienzedi kayi tshimpe tshitudi mua kuenza pa bidi bitangila dijikija lutetuku?

⁶ Anu bu Mozese mu tshikondo tshia muanda wa muana wa ngombe wa ngolo, bushuwa “mupika wa lulamatu ne wa budimu” udi wamba ne: “Nganyi udi ku luseke lua Yehowa? Alue kundi!” Dienza tshienzedi tshimpe bua kuleja ne: tudi biimane bashindame bua ntendelelu mulelela didi mua kuikala dipandishi dia muoyo. Tshisa tshia Mozese, bena Lewi, tshiakenza bualu diakamue bua kumana buenzeji buonso bua tshinyangu. (Matayo 24:45-47; Ekesode 32:26-28) Nunku’eu, konkonona ne ntema yonso disungula diebe dia dijikija lutetuku, mijiki, video, ne bikuabu. Pikaladi dinyanguke mu mushindu kampanda, ushindamene ku luseke lua Yehowa. Ne dieyemena mu masambila kudi Nzambi, enza mashintuluka mu disungula diebe dia dijikija lutetuku ne mijiki, ne ubutule bintu bìdì binyanga malu a mu nyuma, anu bu muvua Mozese mubutule muana wa ngombe wa ngolo.​—Ekesode 32:20; Dutelonome 9:21.

7. Mmunyi mutudi mua kukuba mutshima wa mu tshimfuanyi?

⁷ Mmunyi mutudi mua kuluisha dinyanguka ku kakese ku kakese dia mutshima? Pa kulonga Dîyi dia Nzambi ne tshisumi, pa kulekela malelela àdì abuela mu buondoke bua bieledi bietu bia lungenyi ne mu mitshima yetu. (Lomo 12:1, 2) Bushuwa, tudi ne bua kubuela mu bisangilu bia bena nkristo pa tshibidilu. (Ebelu 10:24, 25) Dibuela patupu kadiyi kudifila mu bisangilu didi mua kufuanangana ne dilaba mukubu pa ditoba dia dimoma. Dienza nunku didi mua kutukenkesha bua mutantshi muîpi, kadi kadiena dijikija muanda udi musokome muinshi. Bishilangane, pa kudilongolola kumpala kua dîba, kueleela meji, ne kufila mandamuna mu bisangilu, tudi mua kumbusha ne bukole buonso bintu bia tshinyangu bìdì mua kuikala kabiyi biumbuka lukasa mu miaba misokome ya mutshima wetu wa mu tshimfuanyi. Kuenza nunku nekutuambuluishe bua kulamata bikole ku Dîyi dia Nzambi ne nekutupe dikanda bua kutantamena mateta a ditabuja ne kulua “bakumbane mu malu onso.”​—Yakobo 1:3, 4; Nsumuinu 15:28.

Didimuija ku masandi

8-10. (a) Ntshilejilu kayi tshia didimuija natshi tshìdì tshitela mu 1 Kolinto 10:8? (b) Mmunyi mutudi mua kutumikila mu mushindu muimpe mêyi a Yezu àdì mu Matayo 5:27, 28?

⁸ Mu tshilejilu tshia Paulo tshidi tshilonda, tudi babedibue ne: ‘Tulekelayi kuenda masandi bu muakenda bakuabu babu, bakafua biabu mbombo ibidi ne binunu bisatu dituku dimue.’a (1 Kolinto 10:8) Mupostolo uvua utuma lungenyi ku tshikondo tshivua bena Izalele binamine nzambi ya dishima ne ‘pakendabu masandi ne bana bakaji ba bena Moaba.’ (Nomba 25:1-9) Tshiendenda tshia masandi tshidi ne dinyokibua dia lufu! Dilekela ngenyi ne bijingajinga bia tshiendenda kakuyi dibikanda didi amu bu dilekela mutshima wetu “upia dimoma.” Yezu wakamba ne: “Numvuile dîyi diakambabu ne: ‘Kuendi masandi.’ Kadi meme ndi nnuambila ne: muntu yonso udi utungunuka ne kutangila mukaji bua kuikala ne dialakana buende, mmumane kuenda nende masandi mu mutshima wende.”​—Matayo 5:27, 28, NW.

⁹ Tshidi tshijadika buenzeji bubi bua ‘ditangila mukaji bua kuikala ne dialakana buende’ ntshipeta tshia diela meji dinyanguke dia banjelu ba bupidia kumpala kua Mvula wa kabutu wa mu tshikondo tshia Nowa. (Genese 6:1, 2) Vuluka kabidi se: bumue bua ku malu avua atamba kubungamija a Mukalenge Davidi mu nsombelu wende buvua bujudija kudi ditungunuka diende ne kutangila mukaji kampanda mu mushindu ukêna muakanyine. (2 Samuele 11:1-4) Bishilangane, Yobo mulume muakane musele ‘wakapunga tshipungidi ne mêsu ende bua se: kalu kutshika mêsu ende kudi mushikakunde utshidi kamama,’ kuepukaye mushindu eu tshiendenda ne kudilejaye mulami wa muoyo-mutoke. (Yobo 31:1-3, 6-11) Tudi mua kufuanyikija mêsu ne madidishi a mutshima. Ne mu mutshima munyanguke ke musombela malu mabi a bungi apatukila.​—Mâko 7:20-23.

¹⁰ Bituatumikila mêyi a Yezu, katuakushiila ngenyi mibi muaba bua itukokeshe pa kubandila bimfuanyi bia bantu badi butaka anyi pa kutungunuka ne kuelela muena nkristo netu, muena mudimu netu, anyi muntu kayi yonso mukuabu meji a masandi. Dimoma kaditu diumbushibua pa tshiamu pa kukupula patupu muaba udi munyanguke. Nunku, kuipatshi mu mushindu mupepele ngenyi ne nginyikilu ya tshiendenda bienza amu bu idi ne mushinga anu mukese. Angata mapangadika makole bua udiumbushe nkayebe ku nginyikilu ya tshiendenda. (Fuanyikija ne Matayo 5:29, 30.) Paulo udi ulanga bena kuitabuja nende ne: “Nufuishe bitupa bia mubidi wenu bidi pa buloba bua bidi bitangila masandi, dipanga bukezuke, disamina mutshima wa kuangatangana, majinga mabi, ne dialakana, didi mene ditendelela dia mpingu. Bua malu awu tshiji tshikole tshia Nzambi tshidi tshilua.” Eyowa, bua malu bu mudi tshiendenda tshia masandi, “tshiji tshikole tshia Nzambi tshidi tshilua”​—bu dikumbaja dia mulawu wende. Nunku tudi ne bua ‘kufuisha’ bitupa bia mubidi wetu pa bidi bitangila malu aa.​—Kolosai 3:5, 6, NW.

Didimuija ku didiabakena dia buntomboji

11, 12. (a) Ndidimuija kayi dìdì difila mu 1 Kolinto 10:9, ne didi divuluija bualu kayi buakenzeka? (b) Mmunyi mudi didimuija dia Paulo mua kuikala ne buenzeji kutudi?

¹¹ Paulo udi udimuija pashishe ne: ‘Tulekelayi kuteta Mukalenge bu muakamuteta bakuabu babu, bakashipibua kudi nyoka.’ (1 Kolinto 10:9) Patshivuabu mu luendu mu tshipela pabuipi ne mukalu wa Edome, bena Izalele ‘bakajana Nzambi ne Mozese kabidi ne: Nuakatulopuela mu Ejipitu bua kutufuisha mu tshipela nunku bua tshinyi? Kakuena biakudia, kakuena mâyi, ne bidia ebi bia tshianana biakututonda,’ mana mapetesha mu tshishima. (Nomba 21:4, 5) Anjibi kuela meji! Bena Izalele abu bavua ‘bajana Nzambi,’ pa kupepeja biakudia biakabapeteshaye!

¹² Ku didiabakena diabu, bena Izalele bavua bateta lutulu lua Yehowa. Dinyoka kadiakapangika, bualu Yehowa wakatuma nyoka ya lulengu munkatshi muabu, ne bavule bakafua basumibue kudi nyoka. Kunyima pakanyingalala bantu ne Mozese kubakuila, tshipupu tshiakajika. (Nomba 21:6-9) Bushuwa bualu ebu budi ne bua kutudimuija bua katuleji mmuenenu wa buntomboji, wa didiabakena, nangananga bua Nzambi ne ndongoluelu yende ya teokrasi.

Didimuija ku dinungana

13. 1 Kolinto 10:10 udi utudimuija ku tshinyi, ne Paulo uvua wela meji ku buntomboji kayi?

¹³ Pa kutela tshilejilu tshiende tshia ndekelu tshivua tshitangila bena Izalele mu tshipela, Paulo udi ufunda ne: “Kanuikadi kabidi banunganyi, anu bu muakanungana bamue ba kudibu, amu bua kushipibua kudi mubutudi.” (1 Kolinto 10:10, NW) Buntomboji buakajuka pakenza Kore, Datane, Abirame, pamue ne balunda babu malu mu mushindu ukêna ulonda teokrasi ne kutontolola bukokeshi bua Mozese ne Aarona. (Nomba 16:1-3) Kunyima kua dibutudibua dia bantomboji aba, bena Izalele bakatuadija kunungana. Bivua nunku bualu bakatuadija kuelangana meji ne: dibutudibua dia bantomboji aba kadivua diakane. Nomba 16:41 udi wamba ne: ‘Pakatshiabu bena Izalele bonso bakatontolola Mozese ne Aarona ne: Nuenu nuakushipa bantu ba Yehowa.’ Bu tshipeta tshia ditobolola diabu dia mushindu uvua dilumbuluisha diakane dikumbajibue mu tshikondo atshi, bena Izalele 14 700 bakashipibua ku tshipupu tshituma kudi Nzambi.​—Nomba 16:49.

14, 15. (a) Umue wa ku mpekatu ya ‘bantu bakena ba Nzambi’ bakabuela mu musokoko mu tshisumbu uvua mpekatu kayi? (b) Ntshinyi tshitudi mua kulongela ku bualu buenzeke buvua butangila Kore?

¹⁴ Mu siekele wa kumpala B.B., ‘bantu badi kabayi ba Nzambi’ bakabùelà mu musokoko mu tshisumbu tshia bena nkristo bavua balongeshi ba dishima ne banunganyi. Bantu aba bavua ‘bavuija bukokeshi tshianana, bapenda bena butumbi,’ balume bela manyi bavua tshikondo atshi ne bujitu bua mu nyuma bua kutangila tshisumbu. Pa bidi bitangila batontolodi aba bakena batshinyi ba Nzambi, muyidi Yuda wakamba kabidi ne: ‘Bantu aba badi batontolodi [banunganyi, NW], bajanyi, benda bu mudi nkuka yabu.’ (Yuda 3, 4, 8, 16) Lelu’eu, bamue badi balua banunganyi bualu badi balekela mmuenenu muoneshi mu malu a mu nyuma udiunda mu mutshima wabu. Misangu mivule badi bashindamena pa mapanga a aba badi mu miaba ya butangidi mu tshisumbu ne batuadija kunungana bualu buabu. Dinungana diabu ne didiabakena bidi nansha mua kufika too ne ku ditobolola mikanda ya ‘mupika wa lulamatu.’

¹⁵ Mbiakanyine bua kudiela nkonko ne muoyo umue pa tshiena-bualu kampanda tshia mu Mifundu. Kadi, mmunyi muikalabi bituikala mua kulubuluja mmuenenu mubi udi mua kumueneka mu diyukidilangana ditobolodi munkatshi mua kasumbu ka balunda ba pa muoyo? Mbia meji bua tuetu kudiebeja tuetu bine se: ‘Dinungana edi ndifuane kufikisha ku tshinyi? Kabienaku bitambe buimpe bua kulekela dinungana ne kusambila ne budipuekeshi bua kupeta meji anyi?’ (Yakobo 1:5-8; Yuda 17-21) Kore ne bavua bamutua nyama ku mikolo, bakatombokela bukokeshi bua Mozese ne Aarona, bavua mua kuikala batuishibue se: mmuenenu wabu uvua muakane, ne kabakakonkonona tshivua tshibasaka ku dienza nunku. Nansha nanku, mmuenenu wabu kavua muakane nansha kakese. Bivua kabidi nunku bua bena Izalele bakatontolola pa bidi bitangila dibutudibua dia Kore ne bantomboji bakuabu. Mmunyipu mudibi bia meji bua kulekela bilejilu bia mushindu’eu bitusaka bua kukonkonona bipatshila bietu, kulekela dinungana anyi didiabakena, ne kulekela bua Yehowa atulongolole!​—Musambu wa 17:1-3.

Longelayiku, ne petayi mabenesha

16. Mbualu kayi butudi tupeta mu mubelu ùdì mu 1 Kolinto 10:11, 12?

¹⁶ Ku buenzeji bua spiritu wa Nzambi, Paulo udi ukomesha liste wa mikenji ya didimuija nayi ne mubelu eu: “Pabi, malu aa akatungunuka ne kubavuila bu bilejilu, ne akafundibua bu didimuija kutudi tuetu bàdì nshikidilu ya ndongoluelu ya malu mifikile. Nunku, eu udi wela meji ne: mmuimane kuulu, adimuke bua kavu kupona.” (1 Kolinto 10:11, 12, NW) Katupepeji muaba wetu mu tshisumbu tshia bena nkristo.

17. Bitumvua disakibua kampanda dibi mu mutshima wetu, ntshinyi tshitudi ne bua kuenza?

¹⁷ Anu bu mudi tshiamu tshifiike tshikuata dimoma pa lukasa, bia muomumue tuetu ndelanganyi ya muena mpekatu Adama tudi bapiane nginyikilu ku bubi. (Genese 8:21; Lomo 5:12) Nunku, katuena ne bua kupuekesha maboko patudi tumvua disakibua kampanda dikena diakanyine mu mutshima wetu. Bishilangane, tuangate dipangadika dikole. Padi tshiamu tshifiike tshianyika ku kapepe katalale anyi mu muaba udi mua kutshidia, didiika diatshi didi dienjibua lukasa menemene. Tudi ne bua kuepuka didianyika ku “kapepe” ka bulongolodi bua Satana, ne dijikija lutetuku diabu dibi, tshiendenda tshitangalake, ne nginyikilu mubi wa lungenyi.​—Efeso 2:1, 2.

18. Ntshinyi tshidi Yehowa muenze pa bidi bitangila nginyikilu mibi ya bukua-bantu?

¹⁸ Yehowa mmupeteshe bukua-bantu mushindu wa kuluisha nginyikilu mibi itudi bapiane. Wakafila Muanende mulela-umuepele bua se: aba bonso badi benza midimu ya ditabuja kudiye bapete muoyo wa kashidi. (Yone 3:16) Bitualonda menemene makasa a Yezu ne kuleja bu-muntu bu bua Kristo, netuikale dibenesha bua bakuabu. (1 Petelo 2:21) Kabidi, netupete ki mmilawu, kadi mabenesha a kudi Nzambi.

19. Mmunyi mutudi mua kupetela diambuluisha ku dikonkonona bilejilu bia mu Mifundu?

¹⁹ Nansha mutudi lelu’eu mua kutupakana bu muakenza bena Izalele ba ku kale, tudi ne Dîyi dia Nzambi difunda mu ka-bujima bua kutulombola. Mu mabeji adi, tudi tulonga pa bidi bitangila malanda a Yehowa ne bukua-bantu pamue ne ngikadilu yende milenga mileja kudi Yezu, ‘tshifuanyikiji tshia butumbi bua Nzambi ne tshimuenekelu tshijalame tshia bu-muntu Buende mene.’ (Ebelu 1:1-3, NW; Yone 14:9, 10) Ku diambuluisha dia masambila ne dilonga dia Mifundu ne tshisumi, tudi mua kupeta ‘meji a Kristo.’ (1 Kolinto 2:16) Patudi tutuilangana ne matetshibua ne mateta makuabu a ditabuja dietu, tudi mua kupetela diambuluisha ku dikonkonona bilejilu bia kale bia mu Mifundu ne nangananga tshilejilu tshitambe bionso tshia Yezu Kristo. Bituenza nunku, katuakupeta milawu ya kudi Nzambi ìdì ne bua kukumbajibua. Pamutu payi, netupete dianyishibua dia kudi Yehowa lelu’eu ne mabenesha ende bua kashidi.

[Mêyi adi kuinshi]

Newandamune munyi?

◻ Mmunyi mutudi mua kulonda mubelu wa Paulo wa kubenga kulua batendeledi ba mpingu?

◻ Ntshinyi tshitudi mua kuenza bua kulonda didimuija dia mupostolo ku masandi?

◻ Bua tshinyi tudi ne bua kuepuka dinungana ne didiabakena?

◻ Mmunyi mutudi mua kupeta mabenesha a kudi Nzambi, ne kuepuka milawu?

[Tshimfuanyi mu dibeji 18]

Bituikala basue mabenesha a kudi Nzambi, tudi ne bua kuepuka ditendelela dia mpingu

[Bimfuanyi mu dibeji 20]

Anu bu mudi dimoma dikengela kumbushibua, tuangatayi dipangadika dikole bua kumbusha majinga mabi mu mitshima yetu