Nkonko ya babadi

Tudi mua kuamba ne: basadidi ba Nzambi bàdì ne ditekemena dia kuikala ne muoyo pa buloba badi ne spiritu wa Nzambi bungi bumue ne bena nkristo bela manyi anyi?

Lukonko elu ki ndupialupia nansha. Bualu bumue bumu’ebu bukavua bumana kuakula mu “Nkonko ya babadi” mu Tshibumba tshia Nsentedi (Anglais) tshia mu dia 15 Tshisanga 1952. Bu mudi bantu bavule balue Bantemu kunyima, tudi mua kupinganuna pa lukonko elu pa kuambulula tshikavua tshimana kuamba.

Mu tshikoso, diandamuna didi: eyowa, bana betu ba lulamatu ba mu tshisumbu tshia mikoko mikuabu badi mua kupeta spiritu munsantu wa Nzambi bungi bumue ne bana betu bela manyi.​—Yone 10:16.

Bushuwa, ebi kabiena bisua kumvuija ne: spiritu udi utumika mushindu umue kudi bantu bonso. Vuluka basadidi ba lulamatu ba kumpala kua bikondo bia Buena-nkristo, bavua bapete bushuwa spiritu wa Nzambi. Ne bukole bua spiritu, bamue ba kudibu bakashipa nyama ya luonji, kuondapa babedi, ne kujula too ne bafue. Ne bavua dijinga ne spiritu bua kufunda mikanda ya mu Bible mifundisha kudi Nzambi. (Balumbuluishi 13:24, 25; 14:5, 6; 1 Bakelenge 17:17-24; 2 Bakelenge 4:17-37; 5:1-14) Tshibumba tshia Nsentedi atshi tshiakamba ne: “Nansha muvuabu kabayi bena mu tshisumbu tshia bela manyi, bavua buujibue ne spiritu munsantu.”

Mu luidi lukuabu, tuangate balume ne bakaji ba mu siekele wa kumpala bavua bedibue manyi a spiritu munsantu, ne kulua bana ba Nzambi ba mu nyuma ne ditekemena dia kuya mu diulu. Bonso bavua bedibue manyi, kadi kabiena biumvuija ne: spiritu wakatuadija kutumika mu mushindu umue kudi bonso. Mbileja patoke mu 1 Kolinto nshapita wa 12. Mupostolo Paulo udi wakulamu bua mapa a spiritu. Tudi tubala mu mvese wa 8, wa 9, ne wa 11 ne: ‘Bua mukuabo udi upebua dîyi dia meji kudi [n]yuma; mukuabo dîyi dia lungenyi kudi [n]yuma muomumue; munga muntu udi upebua ditabuja mu [n]yuma muomumue, mukuabo udi upebua tshipedi tshia kuondapa mabedi mu [n]yuma umue. . . . Kadi [n]yuma umue muomumue udi wenzeja malu aa onso, udi utapuluila muntu ne muntu tshipedi tshiende bu mudiye musue.’

Bia mushinga, mu tshikondo atshi, ki mbela manyi bonso bakapeta bipedi bia spiritu bia dienza bishima. Mu 1 Kolinto nshapita wa 14, Paulo wakakula bua tshisangilu kampanda tshia tshisumbu muvua muntu kansanga muikale ne dipa dia miakulu, kadi kamuyi muntu uvua ne dipa dia kukudimuna. Nansha nanku, tshikondo kampanda kumpala, yonso wa kudibu ukavua muedibue manyi a spiritu. Mbia meji bua kuamba ne: muntu uvua mupete dipa dia miakulu uvua ne spiritu wa bungi kupita bakuabu bavua mu tshisangilu etshi anyi? Tòo. Bela manyi bakuabu kabavua bapangile bualu, bienza bu ne: kabavua mua kujingulula pabu Bible bu muntu au anyi kabavua pabu mua kuakama matetshibua. Spiritu uvua utumika mu mushindu wa pa buawu kudi muntu uvua ne dipa dia miakulu. Nansha nanku, yeye ne bakuabu bavua dijinga ne kushala pabuipi ne Yehowa ne “kutungunuka ne kuujibua ne spiritu munsantu,” anu bu muakafunda Paulo.​—Efeso 5:18, NW.

Pa bidi bitangila bashadile bela manyi lelu, bushuwa mbapete spiritu wa Nzambi. Mu tshikondo kampanda wakatumika nabu mu mushindu wa pa buawu​—mu tshikondo tshia diedibua manyi ne diangatshibua bu bana ba mu nyuma. Pashishe badi ‘batungunuka ne kuujibua ne spiritu munsantu,’ badi bapeta diambuluisha diende padibu bakeba mua kumvua Bible bimpe menemene, padibu mu buambi, anyi padibu bakama matetshibua​—muntu pa nkayende anyi mu tshisumbu.

Bena mu “mikoko mikuabu,” nansha mudibu kabayi bedibue manyi, badi bapeta spiritu munsantu mu mikuabu mishindu. Tshibumba tshia Nsentedi tshia mu dia 15 Tshisanga 1952, tshiakamba ne:

“‘Mikoko mikuabu’ lelu’eu itu yenza mudimu wa buambi anu bu mutu bashadile benza, mu nsombelu mikole ya mushindu umue, ne idi ileja lulamatu ne muoyo-mutoke bia muomumue. Bonso badi badiila ku mesa amue a mu nyuma, badia biakudia bimue, bamina malelela amue. Bu mudibu ba mu tshisumbu tshia bashala pa buloba, ne ditekemena dia kuikala pa buloba ne ditabalela dikole ku bintu bia pa buloba, badi ne bua kuikala batabalela bikole mifundu idi yakula bua nsombelu wa mu bulongolodi bupiabupia; eku bashadile bela manyi, ne ditekemena dia kuya mu diulu ne ditabalela dikole ku bintu bia mu nyuma, badi ne bua kuikala babilonga ne tshisumi tshionso mu Dîyi dia Nzambi. . . . Kadi bualu bulelela budi bushala ng’ebu: malelela a muomumue ne bujinguludi bua muomumue bidi bipeteka kudi bisumbu bionso bibidi, ne mushindu udi bantu ne bantu baditua mu dilonga ke udi ujadika dijingulula dia malu a mu diulu peshi a pa buloba didibu mua kupeta. Spiritu wa Mukalenge udi upeteka bungi bumue kudi bisumbu bionso bibidi, ne dimanya ne bujinguludi bidi bipeshibua mushindu wa muomumue kudibi bionso bibidi, ne bionso bidi ne nsombelu ya mumue bua kubidia.”