Mmunyi mutudi ne bua kusambila Nzambi?

PAKAMUEBEJA muyidi kampanda lungenyi-lushidimunyi pa disambila, Yezu kakabenga bua kumupeshalu nansha. Bilondeshile Lukas 11:2-4, wakandamuna se: “Panudi nusambila nuambe ne: Tatu, dina diebe ditumbe; Bumfumu buebe bufike; dituku dionso utupe tshiakudia tshietu tshia ku dituku ku dituku; utulekele mibi yetu, bualu tuetu bine tudi tulekela onso utudi nende dibanza; kutufidi mu ditetshibua.” (Mukenji Mulenga, nkudimuinu wa bena Katolike) Ndimanyike bimpe bu Disambila dia Tatu wetu. Didi ne malu mavulavulayi.

Tuanji kumanya se: muaku wa kumpala menemene udi utuleja kutudi ne bua kutuma masambila etu​—kudi Tatu wetu. Vuluka ne: Yezu kakaleja muaba nansha umue bua kusambila bamue bantu, bimfuanyi, “bansantu,” peshi yeye muine. Mene, Nzambi wakamba ne: “Tshiena mpesha bakuabo butumbi buanyi, tshiena mua kupesha mpingu lumu luanyi.” (Yeshaya 42:8, MMM) Nunku, masambila matuma kudi tshintu anyi muntu kayi mukuabu pamutu pa Tatu wetu wa mu diulu, yeye kêna uateleja, nansha bikala mutendeledi uenza ne muoyo mujima. Mu Bible, Yehowa nkayende ke udi mubikidibue “Muteleji wa masambila.”​—Musambu wa 65:2, NW.

Bamue badi mua kuamba ne: “bansantu” badi’anu bu batuakuidi kudi Nzambi tshianana. Kadi Yezu yeye nkayende wakalongesha ne: “Meme ndi Njila, ndi Bulelela, ndi Muoyo. Bua muntu kufika kudi Tatu, anu yeye mupitshile kundi. Bionso binualomba mu dina dianyi, nembikumbaje, bua Tatu apete lumu kudi Muana.” (Yowanese 14:6, 13, MMM) Nunku, Yezu wakimansha lungenyi luonso lua se: muntu kampanda mubikidibue munsantu udi mua kuikala mutuakuidi. Tangila kabidi tshiakamba mupostolo Paulo pa bidi bitangila Kristo: ‘Kristo Yezu udi mufue, mubike kabidi, musombe ku dia bukole dia [“Nzambi,” NW], utuakuila.’ “Udi ne bukole bua kupandisha bonso badi bapitshila kudiye bua kuya kudi [“Nzambi,” NW], bualu yeye udi ushala ne muoyo kashidi bua kubakuila.”​—Bena Roma 8:34; Bena Hebreyi 7:25, Mukanda wa Mvidi Mukulu, nkudimuinu wa bena Katolike.

Dîna didi ne bua kutumba

Mêyi makuabu a disambila dia Yezu avua: “Dina diebe ditumbe.” Mmunyi mudi muntu mua kutumbisha, mbuena kuamba se: kusantuisha, anyi kuteka ku luseke, dîna dia Nzambi bikalaye kayi mudimanye peshi mutumike nadi? Nzambi udi utedibua ku dîna diende nkayende dia: Yehowa misangu mipite pa 6 000 mu “Dipungila Dikulukulu.”

Note kuinshi kua dibeji mu Ekesode 6:3 mu Bible wa bena Katolike wa Douay Version udi wamba pa bidi bitangila dîna dia Nzambi ne: “Bamue bena lelu mbadienzele dîna dia: Yehowa. . . , bualu nshindumuinu mulelela wa dîna [dia Nzambi], didi mu mifundu ya tshiena-Ebelu, bua dibenga kuenza nadi mudimu bidimu bia bungi mmujimine menemene mpindieu.” Nunku, nkudimuinu wa bena Katolike wa Nouvelle Bible de Jérusalem udi wenza mudimu ne dîna dia: Yahweh. Nansha mudi bamue bashikuluji batua ku tshia nshindumuinu eu, “Yehowa” ndishindumuna dimanyike bikole ne dia kale. Mikuabu miakulu idi ne wayi mushindu wa kushindumuna dîna dia Nzambi. Tshia mushinga nkuenza mudimu ne dîna edi bua kuditumbisha. Ekleziya wenu mmukulongeshe bua kuenza mudimu ne dîna dia Yehowa mu disambila anyi?

Biena-bualu biakanyine mu kusambila

Yezu wakalongesha kabidi bayidi bende bua kusambila ne: “Bumfumu buebe bufike.” Evanjeliyo wa Matayo udi ukumbaja mêyi aa: “Biudi musue ne bienzeke pa buloba, bu mudibio bienzeka mu diulu.” (Mateus 6:10, Mukenji Mulenga) Bumfumu bua Nzambi mmbulamatadi udi mu bianza bia Yezu Kristo. (Yeshaya 9:6, 7) Bilondeshile mulayi wa mu Bible, nebumbushe mu katupa emu mbulamatadi yonso ya bantu ne nebutuale nsombelu wa ditalala pa buloba bujima. (Musambu wa 72:1-7; Danyele 2:44; Buakabuluibua 21:3-5) Nunku bena nkristo balelela badi benza difika dia Bumfumu ebu tshiena-bualu tshinene mu masambila abu. Ekleziya wenu mmukulongeshe bua kuenza nunku anyi?

Bualu bukuabu, Yezu wakaleja kabidi se: masambila etu adi mua kukongoloja ne malu etu nkayetu adi atutangila. Wakamba ne: “Dituku dionso utupe tshiakudia tshietu tshia ku dituku ne ku dituku, utulekele mibi yetu, bualu tuetu bine tudi tulekela onso utudi nende dibanza; kutufidi mu ditetshibua.” (Lukas 11:3, 4, Mukenji Mulenga) Mêyi a Yezu adi umvuija ne: tudi mua kukeba disua dia Nzambi mu malu onso, ne se: tudi mua kuakula ne Yehowa pa bualu kayi buonso budi mua kuikala bututatshisha anyi bunyanga ditalala dietu dia mu lungenyi. Kusambila pa tshibidilu mushindu’eu kudi kutuambuluisha bua kuvuluka se: tudi dijinga ne Nzambi. Nunku tudi tuvuluka bikole buenzeji buende mu nsombelu wetu. Dilomba dibuikidila kudi Nzambi dia ku dituku ku dituku didi padi ne mushinga. Pa nanku tudi tutamba kuvuluka matekete etu​—ne tutamba kulekelela mapanga a bakuabu. Padi Yezu utubela bua kusambila bua ditusungila ku matetshibua mbikumbanyine, nangananga pa kumona bibidilu bibi bia mu bulongolodi ebu. Mu diumvuangana ne disambila adi, tudi tuepuka ne budimu buonso nsombelu ne ngikadilu idi mua kutufikisha ku bubi.

Nunku, kakuena mpata bua se: Disambila dia Tatu wetu didi ditulongesha bivule pa mushindu wa kuenza masambila adi asankisha Nzambi. Kadi Yezu uvua ujinga bua tuetu kuangata disambila edi ne kudiambulula pa tshibidilu tshianana anyi?

Mibelu ya pa mutu pa disambila

Yezu wakafila ngenyi-mishidimunyi ya pa mutu pa disambila. Mu Matewuse 6:5, 6, tudi tubala ne: “Panudi nusambila, kanuidikiji badingidiji ba malu; bua kusambila, mbasue kunangama mu nzubu ya disambila ne mu masangu a njila bua kubamonabo. . . . Kadi wewe, paudi usambila, buela mu tshibambalu tshiebe, winjile kumbelu, utendelele Tatuebe mu musokoko. Yeye Tatuebe udi umona mu musokoko awu, neakufute.” (MMM) Mêyi aa adi atulongesha ne: disambila kadiena ne bua kuikala dienza ne lungenyi lua kudileja, lua batumone batuambe. Utu upumuina Yehowa mutshima webe mu musokoko, bu mudi Bible utubela anyi?​—Musambu wa 62:8.

Yezu wakafila didimuija edi: “Panudi nusambila, lekelayi kuvudija miaku bu mudi bantu ba bisamba bikuabo benza, bela meji ne: pakulabo miaku mivule, nebabateleje bipite.” (Matewuse 6:7, MMM) Mbimueneke patoke se: Yezu kavua muanyishe dikuata masambila mu mutu to​—nansha kuabala mu mukanda kampanda. Mêyi ende adi kabidi abenga ditumika ne lunzadi.

Missel kampanda (mukanda wa mabala ne misambu bia mu misa) udi witaba se: “Disambila dietu ditambe bulenga didi mua kuikala ngenyi idi idipatukila nkayayi patudi tukudimuka kudiye bua kumuela tuasakidila peshi patudi mu dikengela, mu bikondo bia kanyinganyinga, anyi mu dimutendelela dietu dia pa tshibidilu dia ku dituku ku dituku.” Masambila a Yezu yeye muine avua adipatukila nkayawu, kaavua makuata ku muoyo. Tshilejilu, bala disambila dia Yezu didi difunda mu Yone nshapita wa 17. Didi mu diumvuangana ne disambila dia tshitembelu, didi diela kashonyi pa dijinga dia Yezu dia kumona dîna dia Yehowa disantuishibua. Masambila a Yezu avua adipatukila ne alenga ku muoyo.

Masambila adi Nzambi uteleja

Biwikala uvua mulongeshibue bua kuenza masambila makuata ku muoyo, bua kusambila “bansantu” anyi bimfuanyi, peshi bua kutumika ne bintu bia ditendelela nabi, bu mudi lunzadi, kusambila mushindu uvua Yezu muleje kudi mua kumueneka bangabanga bu kubi. Nansha nanku, kumana bualu nkufika ku dimanya Nzambi​—dîna diende, malongolola ende, bumuntu buende. Udi mua kufika ku dimanya edi pa kulonga Bible bikole. (Yone 17:3) Bantemu ba Yehowa mbadiakaje ne mbasue kukuambuluisha mu muanda eu. Ee, mbambuluishe miliyo pa buloba bujima bua ‘kuteta, kulabula, kumvua ne, Yehowa udi muakane’! (Musambu wa 34:8) Paudi umanya Nzambi bikole, udi usakibua bua kumusamuna bikole mu masambila. Ne paudi usemena bikole kudi Yehowa mu masambila a dimunemekela, malanda ebe nende neatambe kukola.

Nunku, batendeledi balelela ba Nzambi bonso mbakankamija bua ‘kusambila diba dionso.’ (1 Bena Tesalonyika 5:17, MMM) Ikala mujadike se: masambila ebe adi bushuwa mu diumvuangana ne Bible, kusangisha ne ngenyi-mishidimunyi ya Yezu Kristo. Nunku udi mua kujadika se: masambila ebe neanyishibue kudi Nzambi.

[Tshimfuanyi mu dibeji 7]

Patudi tulonga bia bungi pa bidi bitangila Yehowa, tudi tusakibua bikole bua kumusambila kumbukila mu mutshima