Kalasa ka 101 ka Gilada​—Ne mitalu bua midimu mimpe

MUFUKI wetu, Yehowa Nzambi, udi ne mitalu bua midimu mimpe, ne ke mudibi kabidi bua Muanende, Yezu Kristo. Bu mudiye tshitembelu tshietu, Yezu wakaleja mitalu mu dikumbaja mudimu wende mumupesha kudi Nzambi, uvua ukonga ‘didifila bua bualu buetu, bua . . . kudilengejila bantu badi mua kuikala bende bine, bikala ne lukunukunu [“mitalu,” NW] lua kuenza midimu mimpe.’ (Tito 2:14) Bantu 48 bena mu kalasa ka 101 ka Tshilongelu tshia Bible tshia Watchtower tshia Gilada mbaleje bushuwa mitalu yabu bua midimu mimpe. Programe wa difila mapolome a ba-misionere aba wakenjibua mu dia 7 Kabitende 1996, ku Nsangilu wa Bilongelu wa Watchtower ku Patterson, mu New York.

Mibelu mikuatshishi bua kushala ne mitalu

Mulombodi wa programe wa difila mapolome uvua Carey Barber, muena mu Kasumbu Kaludiki, ne bidimu bipite pa 70 mu mudimu wa ku dîba ne ku dîba. Mu mêyi ende a mbangilu, Muanetu Barber wakakoka ntema ku mudimu wa diyisha ne dilongesha wa Yezu, uvua “butoke bua bena panu.” (Yowanese 8:12, MMM) Wakaleja ne: Yezu kakadilamina mudimu au wa bunême kadi wakalomba bayidi bende bua kulekelabu butoke buabu bukenke muomumue. (Matayo 5:14-16) Disanka edi dia mudimu didi disakidila kipatshila ku nsombelu wa muena nkristo ne diteka bujitu bunene pa makaya a aba bonso badi “ne nsombelu wa bana ba butoke.”​—Bena Efeze 5:8, MMM.

Kunyima kua mêyi aa a mbangilu, Don Adams wa mu Biro Bilombodi bia Mudimu ku tshilombuelu tshia ku Brooklyn wakapeshibua dîyi. Wakakula pa tshiena-bualu tshia “Ndayi kumpala, kanupinganyi tshianyima.” Muanetu Adams wakakoka ntema ku Tshilongelu tshine tshia Gilada ne ku tshipatshila tshiatshi​—kualabaja diyisha dia lumu luimpe mu matunga a kule. Wakakula bua diya kumpala dia bulongolodi bua Nzambi, budi bupatule mikanda miumvuiji ya Bible mu buloba bujima mu miakulu mipite pa 300. Mukanda wa Dimanya didi difikisha ku muoyo wa kashidi, mupatula mu 1995, udi upeteka mu miakulu 111 ne mbalongolole bua kupatukawu mu miakulu mipitshidile. Bakadi batuadije kukuata nawu mudimu mu diambuluisha bayidi bapiabapia ba Yezu bua kufika ku diditshipa ne ku batismo munkatshi mua ngondo mikese patupu. Nunku ba-misionere bapiabapia nebikale ne biambuluishi bia ndekelu bua dilonga dia Bible mu mudimu wabu.

Pashishe, Lyman Swingle, muena mu Kasumbu Kaludiki, wakakula pa tshiena-bualu tshia “Tungunukayi ne dikuatshila Yehowa mudimu wenu wa tshijila,” tshishindamene pa Buakabuluibua 7:15. Bu mudi Yehowa yeye muine muikale Nzambi wa disanka, dimusadila kashendende ke didi divuija muntu muena disanka. (1 Timote 1:11) Bu tshipeta tshia mudimu eu wa disanka, musumba munene wa bantu ba mu bitupa bionso bia buloba mbafike ku dimutendelela. Munkatshi mua bidimu, aba badi balongeshibue mu Tshilongelu tshia Gilada mbenze tshiabu tshitupa mu diambuluisha bavule ba ku bantu aba bua kufika ku dimanya dijalame dia bulelela. Pa nanku, tudi ne kabingila kanene ka kuitabuja ne: Yehowa neatungunuke ne kubenesha aba bàdì batumibua mpindieu bua kusangisha bakuabu bena mu musumba munene udi wenda udiunda.

“Lejayi disanka dia Yehowa” ke tshiena-bualu tshiakazangika Daniel Sydlik, yeye pende muena mu Kasumbu Kaludiki. Wakaleja ne: basadidi bonso ba Nzambi, pamue ne ba-misionere aba bapiabapia, badi ne muabi wa kulongesha bantu njila wa muoyo wa kashidi ne mushindu wa kusanka mu muoyo wa mpindieu. “Dilongesha,” ke muakamba Muanetu Sydlik, “mmudimu udi udifuta nkayawu. Bidi bimueneka mu mpala ya bantu badi balongesha ne mu mpala ya bantu badi balonga.” (Musambu wa 16:8-11) Wakatela mêyi a misionere kampanda wa mu Estonie, wakamba ne: “Tudi ne mukenji mutambe bunene kumpala kua buloba bujima, ne mpala wetu ke udi uuleja.” Tshimuenekelu tshia mpala wetu tshidi mua kutunzuluila biibi bia bungi ne kujula disankidila. Bantu mbasue kumanya tshidi tshivuija basadidi ba Yehowa bena disanka. “Nunku tabalelayi mpala wenu,” ke muakabela Muanetu Sydlik. “Bantu batu basanka pa kumona bantu bena disanka.”

Ulysses Glass, udi mudifile mu dilongesha balongi ba Gilada biangatshile ku kalasa ka 12 mu 1949, wakenzela bateleji muyuki pa tshiena-bualu tshia “Ne lutulu, lamayi anyima yenu.” Lutulu ntshinyi? Ludi lufila lungenyi lua kuindila bualu kampanda mu bupole, kuleja ditukija padiku diyobola anyi dilubakana. Muntu muena lutulu udi ushala mupoleshe; eu ukena ne lutulu uyaya lubilulubilu ne ufiika munda lukasa. “Bavule batu bela meji ne: lutulu ludi luleja butekete ne ngelakanyi,” ke muakabambisha Muanetu Glass, kadi “kudi Yehowa ludi tshimanyinu tshia bukole ne tshipatshila.” (Nsumuinu 16:32) Mbipeta kayi bilenga bidi lutulu lufuta? “Lutulu mu lupolo kampanda lua tshiji nelukulame ku matuku lukama a kanyinganyinga,” ke mudi lusumuinu lumue lua bena Chine luamba. “Lutulu ludi lunemesha bumuntu bua muntu,” ke muakumvuija Muanetu Glass. “Bushuwa, ludi lubuikila ngikadilu mikuabu milenga ne buanga bua diyilama dîba dionso. Ludi luvuija ditabuja dimpe, ditalala didi dinenga mutantshi mule, ne dinanga dikena kunyungusha.”

“Ndisanka pa kupeta mudimu wa kudi Yehowa Nzambi ku butuangaji bua bulongolodi buende,” ke muakamba Mark Noumair, wakasadila bu misionere mu Kenya bidimu 11 ne udi mpindieu mulongeshi wa ku Gilada. Mu dienza muyuki wende pa tshiena-bualu tshia “Binuikala bapange ditabuja, kanuakunenga bikole,” Muanetu Noumair wakakoka ntema ku tshilejilu tshia Mukalenge Ahaza wa Yuda. Yeshaya wakajadikila mukalenge dikuatshisha dia Yehowa mu mudimu wende, kadi Ahaza utshivua anu mupange kueyemena kudi [Yehowa]. (Yeshaya 7:2-9) Pashishe Muanetu Noumair wakazangika se: ba-misionere​—bushuwa, tuetu bonso—​badi bakengela bikale ne ditabuja kudi Yehowa bua kumona mua kunenga bikole mu midimu yabu ya teokrasi. Ntatu ya pa buayi mu mudimu wa bu-misionere idi ilomba ditabuja dikole. “Misangu yonso nuvuluke se: kakuena nsombelu mupuangane mu ndongoluelu eu wa malu,” ke muakamba Muanetu Noumair.

Malu mamona àdì akankamija mudimu wa mitalu

Mu bule bua dishidimunyibua diabu ku Gilada, ku ndekelu yonso wa lumingu balongi bavua bapitshisha dîba mu mudimu wa patoke, wikala kabidi diditatshisha diabu dia kumpala mu midimu yabu ya bu-misionere. Wallace Liverance, umue wa mu tshisumbu tshia balongeshi ba Gilada, wakela balongi 15 nkonko, bakalonda malu akamonabu. Pashishe Leon Weaver wa mu Komité wa Tshibambalu tshia Mudimu ne Lon Schilling wa mu Komité wa Midimu ya Betele bakela bena mu komité ya filiale nkonko, bafumine ku Afrike ne Amerike Latine, bakalonda malu akamonabu a mu mudimu wa bu-misionere ne bavua ne mibelu milenga bua aba bakapeta mapolome bu ba-misionere. Mu Sierra Leone, ke muakalejabu, bantu bu 90 pa lukama ba ku aba bakatambula mu tshidimu tshia mudimu tshia 1995 bavua bambuluisha kudi ba-misionere. Mmuyuki kayipu mulenga wa mudimu wa mitalu!

Ndekelu, Milton Henschel, mulombodi wa Société, wakenzela bateleji 2 734 muyuki pa tshiena-bualu tshia “Bulongolodi bua Yehowa budi bumueneka mbua pa buabu.” Ntshinyi tshidi tshivuija bulongolodi bua Nzambi tshintu tshikena ne tshintu tshia mumue natshi? Ki mbunene buabu peshi bukole buabu nansha, kadi mbua padibu bulombola kudi mêyi-makaji makane ne mapangadika a bu-nzuji bia Nzambi. Mu bikondo bia kale mbantu ba Yehowa, tshisamba tshia Izalele, bavua bambika mêyi ende a tshijila, akabavuija tshisamba tshia pa buatshi. (Lomo 3:1, 2) Lelu’eu, bulongolodi bua Yehowa budi mu buobumue bu mudibu butumika muinshi mua bulombodi bua Yezu Kristo. (Matayo 28:19, 20) Budi buenda busonga nkela, buenda budiunda. Kudiku bulongolodi bukuabu pa buloba bùdì ne Kasumbu Kaludiki kabu kakeba meji mu Dîyi dia Nzambi, Bible, kumpala kua kuangata mapangadika manene anyi? Mu mishindu eyi ne mikuabu kabidi, bulongolodi bua Yehowa bùdì bumueneka budi bushuwa bua pa buabu.

Programe wa disanka wakatua ku ndekelu ne difila dia mapolome ne dibala dia mukanda wa bena kalasa aka ùvuà umvuija dianyisha diabu bua dishidimunyibua edi dia pa buadi.

[Kazubu mu dibeji 22]

Bishiferi bia kalasa

Bungi bua matunga maleja mpala: 9

Bungi bua matunga a kuya kutumika: 12

Bungi bua balongi: 48

Muayene wa bidimu: 31,7

Muayene wa bidimu mu bulelela: 13,8

Muayene wa bidimu mu mudimu wa ku dîba ne ku dîba: 9,8

[Tshimfuanyi mu dibeji 23]

Bena mapolome a kalasa ka 101 ka Tshilongelu tshia Bible tshia Watchtower tshia Gilada

Mu liste udi kuinshi eku, milongo mbayibale bituadijile kumpala baya panyima, ne mêna mbaatele bituadijile ku dia bakaji baya ku dia balume mu mulongo wonso.

(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.