Bakenza disua dia Yehowa

Badi basekelela Yezu bu Masiya ne Mukalenge!

MUSUMBA ùdì wenza mitoyi udi ubuela mu Yeruzaleme mu dia 9 Nizan 33 B.B., wakakemesha bena mu Yudeya bavule. Nansha muvuabi kabiyi bualu bua ku mpukapuka bua kumona bantu batshimukila mu tshimenga etshi kumpala kua Pasaka, bakumbudi aba bavua bashilangane. Muntu munene munkatshi muabu uvua muntu kampanda mubande pa muana wa mpunda. Muntu eu uvua Yezu Kristo, ne bantu bavua badija bilamba panshi ne malala a mabue kumpala kuende mu diela mbila ne: ‘Hosana ikale kudi muana wa Davidi; udi ulua mu dina dia Mukalenge atumbishibue; Hosana mu diulu.’ Batua anu mêsu bamona musumba eu, bavule bakavua mu Yeruzaleme bakasakibua bua kudisanga ku bena mindololotshi aba.​—Matayo 21:7-9; Yone 12:12, 13.

Nansha muvuaye musekelela tshikondo atshi, Yezu uvua mumanye ne: mateta avua mamuindile. Ee, matuku atanu patupu, uvua ne bua kushipibua mu tshine tshimenga atshi! Eyowa, Yezu uvua mumanye ne: Yeruzaleme uvua teritware ukena muakididianganyi, ne wakalongolola dibuela diende didi dikoka ntema mu tshimenga etshi ne luine lungenyi elu mu mutu muende.

Mulayi wa kale mukumbaja

Mu 518 K.B.B., Zekâya wakadianjila kumanyisha dibuela dia butshimunyi dia Yezu mu Yeruzaleme. Wakafunda ne: “Ela mbila ya disanka, wewe nsongakaji wa mu Yeruzaleme. Ke Mfumu webe awu ufika kuudi; udi muakane ne mutshimunyi; mmudipuekeshe, mubande pa mpunda, pa muana wa nyama wa mpunda. . . . Neatshibule buta bua mvita, afile bupole mu bukua bisamba. Bumfumu buende nebufike ku mbu ne ku mukuabo, ku musulu wa Efrata too ne ku ntengu ya buloba.”​—Zekariya 9:9, 10, MMM.

Nenku dibuela dia Yezu mu Yeruzaleme mu dia 9 Nizan diakakumbaja mulayi wa mu Bible. Kauvua muanda wa mu mpukapuka nansha, kadi uvua mulongolola bimpe. Kumpala, mutshikale pambelu pa Yeruzaleme, Yezu wakaludika babidi ba ku bayidi bende ne: ‘Yayi mu musoko udi buludiludi bunudi batangile, nenumone nyama wa mpunda musuika ne muanende. Nuyisulule, nulue nayi kuneku. Bianukonka muntu dîyi, numuambile ne: Mukalenge udi nayi bualu; yeye neayitume lubilu.’ (Matayo 21:1-3) Kadi bua tshinyi Yezu wakasua bua kubuela mu Yeruzaleme pa mpunda, ne ntshinyi tshivua diumvuija dia diandamuna dia musumba?

Dimanyisha didi ditangila bumfumu

Tshimfuanyi tshidi tshituila muîsu tshitu misangu ya bungi tshia bukole kupita dîyi diamba. Pa nanku, ku misangu Yehowa uvua wenzeja baprofete bende bua kuenza dileja dia mukenji wabu bua kukolesha mukenji wabu wa buprofete. (1 Bakelenge 11:29-32; Yelemiya 27:1-6; Yehezekele 4:1-17) Mushindu eu mubandile wa diyukidilangana mumona ne mêsu wakashiya tshikuma tshikena mua kukupuka mu lungenyi nansha mene lua mubambishi muena mutshima mutambe kupapa. Mu mushindu wa muomumue, Yezu wakenza dileja dia dimanyisha dia bukole pa kubanda pa mpunda mutangile mu tshimenga tshia Yeruzaleme. Mmunyi?

Mu bikondo bifundilebu Bible bavua batumika ne mpunda bua bipatshila bia lumu. Tshilejilu, Solomo wakaya mutangile ku diedibua diende dia manyi bu mukalenge mubande pa “mpunda” (mule) wa tatuende, muana wa mâyi masange wa mpunda mulume. (1 Bakelenge 1:33-40) Nenku dibuela dia Yezu mu Yeruzaleme pa mpunda divua ne bua kumvuija ne: uvua udileja yeye muine bu mukalenge.a Ngenzelu ya musumba yakakolesha dimanyisha edi. Tshisumbu tshia bantu etshi, kakuyi mpata tshienza nangananga ne bena Ngalileya, tshiakadija bilamba panshi kumpala kua Yezu​—bualu bua lumu bùdì buvuluija dimanyisha dia patoke dia bumfumu bua Yehu. (2 Bakelenge 9:13) Difunkuna diabu dia Yezu bu “Muana wa Davidi” diakazangika bukenji buende buakanyine bua bumfumu. (Luka 1:31-33) Ne ditumika diabu ne malala a mabue diakaleja patoke dikokela diabu ku bukokeshi buende bua bumfumu.​—Fuanyikija ne Buakabuluibua 7:9, 10.

Nenku bena mindololotshi aba bakabuela mu Yeruzaleme mu dia 9 Nizan bakaleja patoke tshimfuanyi tshia se: Yezu uvua Masiya musungula wa Nzambi ne Mukalenge. Bushuwa, ki mbonso bavua ne disanka bua kumona Yezu muleja mu mushindu’eu. Nangananga Bafarizeyi bakela meji ne: kabivua bikumbane nansha kakese bua Yezu kupeshibuaye lumu lua bumfumu lua tshishiki bu elu nansha. “Muyishi,” ke muakalombabu, bikale kakuyi mpata ne tshiji mu mêyi abu: “Ubele bayidi bebe.” Yezu wakandamuna se: ‘Biapuwabu, mabue neele mbila.’ (Luka 19:39, 40) Eyowa, Bukalenge bua Nzambi buvua tshiena-bualu tshia diyisha dia Yezu. Uvua ne bua kumanyisha ne dikima dionso mukenji eu nansha bantu bitabe peshi babenge.

Dilongesha buetu tuetu

Biakakengela dikima dikole bua Yezu kubuelaye mu Yeruzaleme mu mushindu mudianjila kumanyisha kudi muprofete Zekâya. Uvua mumanye ne: mu dienza nenku uvua udisonsuela tshiji tshia bena lukuna bende. Kumpala kua dibanda diende mu diulu, Yezu wakapesha balondi bende mudimu wa kuyisha lumu luimpe lua Bukalenge bua Nzambi ne ‘kuvuija ba bisamba bionso bayidi.’ (Matayo 24:14; 28:19, 20) Bua kukumbaja mudimu eu bidi bikengela dikima. Ki mbonso badi ne disanka dia kuteleja mukenji eu nansha. Bamue mbena kalèngù, eku bakuabu baubenga. Imue mbulamatadi mmiele mikalu bua mudimu wa diyisha peshi mmiukandike kashidi.

Kadi, Bantemu ba Yehowa mbajingulule se: lumu luimpe lua Bukalenge bua Nzambi bujadika ludi ne bua kuyishibua, nansha biateleja bantu peshi biadikandabu bua kuenza nenku. (Yehezekele 2:7) Bu mudibu batungunuka ne dienza mudimu eu wa dipandisha mioyo, mbashindikila kudi mulayi wa Yezu eu: “Monayi! Ndi nenu matuku onso too ne ku nkomenu wa ndongoluelu eu wa malu.”​—Matayo 28:20, NW.

[Mêyi adi kuinshi]