Batuadi ba mukenji wa ditalala dia Nzambi mbabadibue bena disanka
‘Bantu badi Yehowa mupikule nebapingane, nebalue ku Siona bimba misambu; disanka dia tshiendelele nedikale pa mitu pabu.’—YESHAYA 35:10.
1. Ntshinyi tshidi bulongolodi ebu bukengela menemene?
LELU’EU kabiyi bu kuonso eku, bukua-bantu budi bukengela mutuadi wa mukenji wa lumu luimpe. Kudi dikengela dia lukasa bua muntu kampanda kumanyisha bulelela pa bidi bitangila Nzambi ne malongolola ende, ntemu ukena buôwa wikala mua kudimuija bantu babi bua kabutu kadi kalua kumpala ne wambuluisha bena mitshima miakane bua kupeta ditalala dia Nzambi.
2, 3. Pa bidi bitangila Izalele, mmunyi muvua Yehowa mukumbaje dilaya diende didi mu Amosa 3:7?
2 Mu matuku a Izalele, Yehowa wakalaya bua kupetesha batuadi ba mukenji ba mushindu’au. Ku ndekelu kua siekele wa tshitema K.B.B., muprofete Amosa wakamba ne: ‘Yehowa kena wenza bualu bikaleye kayi muanji kubusokoluela bantu bende baprofete diambedi.’ (Amosa 3:7) Mu siekele yakalonda dimanyisha edi, Yehowa wakenza malu a bungi a bukole. Tshilejilu, mu 607 K.B.B., ne dînu disumakaja wakanyoka bantu bende basungula bualu bavua bantomboji ne kabidi bikale ne tshibawu tshia mashi. Wakanyoka kabidi matunga a kumpenga akasanka bua makenga a Izalele. (Yelemiya nshapita 46-49) Pashishe, mu 539 K.B.B., Yehowa wakenzeja dikuluka dia bukokeshi bua buloba bujima bua bena Babilone, ne bu tshipeta, mu 537 K.B.B., bashadile ba Izalele bakapingana mu buloba buabu bua kuibakulula ntempelo.—2 Kulondolola 36:22, 23.
3 Aa avua malu akanyukula buloba, ne mu diumvuangana ne mêyi a Amosa, Yehowa wakadianjila kuasokoluela baprofete bavua basadila bu batuadi ba mukenji, bua kudimuija Izalele ku muanda uvua ne bua kulua. Munkatshi mua siekele wa muanda-mukulu K.B.B., wakajula Yeshaya. Munkatshi mua siekele wa muanda-mutekete K.B.B., wakajula Yelemiya. Pashishe, batangile ku ndekelu kua siekele au, wakajula Yehezekele. Buobu aba ne bakuabu baprofete ba lulamatu bakafila bumanyishi bua tshishiki budi butangila malongolola a Yehowa.
Disunguluja batuadi ba mukenji wa Nzambi lelu’eu
4. Ntshinyi tshidi tshileja ne: bukua-bantu budi bukengela batuadi ba mukenji wa ditalala?
4 Netuambe tshinyi bua lelu’eu? Bantu ba bungi badi bumvua ne: tshintu kampanda tshikuate buôwa netshienzeke padibu bamona dinyanguka dia nsangilu wa bantu. Aba badi ne dinanga dia buakane badi batatshishibua mu mutshima padibu bamona lubombo ne bubi bukole bia Bukua-buena-nkristo. Anu muakadianjila Yehowa kuamba ku diambuluisha dia Yehezekele, badi “batua mikemu ne badila bua malu mabi onso adi bantu benza munkatshi muabo.” (Ezekiyele 9:4, MMM) Nansha nanku, bantu bavule ki mbajingulule tshidi malongolola a Yehowa. Bidi bikengela kubambila.
5. Mmunyi muakaleja Yezu ne: nekuikale batuadi ba mukenji mu matuku etu aa?
5 Lelu’eu kudiku muntu kampanda udi wakula patoke ne lungenyi lua dikima lua Yeshaya, Yelemiya, ne Yehezekele anyi? Yezu wakaleja ne: muntu kampanda neenze nanku. Mu didianjila kumanyisha malu a matuku etu aa, wakamba ne: “Lumu luimpe elu lua bukalenge neluyishibue pa buloba buonso buasa bu bumanyishi kudi matunga onso; ne pashishe nshikidilu nealue.” (Matayo 24:14, NW) Nnganyi lelu’eu udi ukumbaja mulayi au, usadila bu mutuadi wa mukenji, muyishi wa lumu luimpe? Difuanangana pankatshi pa malu a matuku etu aa ne a mu tshikondo tshia Izalele wa kale didi dituambuluisha bua kuandamuna lukonko alu.
6. (a) Umvuija malu mamona kudi “Izalele wa Nzambi” mu tshikondo tshia mvita ya kumpala ya buloba bujima. (b) Mmunyi muvua Yehezekele 11:17 mukumbane pa Izalele wa kale?
6 Mu matuku a mîdima a Mvita ya Kumpala ya Buloba bujima, bantu ba Yehowa ba matuku etu aa, bashadile ba “Izalele wa Nzambi” muela manyi, bakaya mu bupika bufuanangane ne bua Izalele mu Babilone. (Galatia 6:16, NW) Bakakenga bua diya mu bupika bua mu nyuma mu Babilone Munene, nsangilu wa bitendelelu bia dishima bia buloba bujima, Bukua-buena-nkristo buikale tshitupa tshiende tshipite bunene ne tshia dipila dinene. Kadi, mêyi a Yehowa mambila Yehezekele akaleja ne: kavua mubapue muoyo nansha. Wakamba ne: ‘Nennusangishe munkatshi mua bantu ba bende, nennukunguije aku bua kunupatula munkatshi mua maloba akanumuangalajabu, ne nennupe buloba bua Izalele.’ (Yehezekele 11:17) Bua kumona mua kukumbaja dilaya adi bua Izalele wa kale, Yehowa wakajula Sirise muena Perse, wakatonkola Bukokeshi bua Buloba bujima bua bena Babilone ne kunzuluilaye bashadile ba Izalele njila wa dipingana mu buloba buabu. Kadi bidi munyi bua lelu?
7. Mmuanda kayi wa mu 1919 wakaleja ne: Yezu wakenzela Babilone Munene bibi? Umvuija.
7 Ku ntuadijilu wa siekele eu, kuvua tshijadiki tshikole tshia se: Sirise Munene uvua munkatshi mua mudimu. Uvua nganyi’au? Ki mmunga muntu kadi n’Yezu Kristo, muteka mu nkuasa mu Bukalenge bua mu diulu katshia mu 1914. Mukalenge eu munene wakaleja muoyo muimpe kudi bana babu bela manyi badi pa buloba pavua, mu tshidimu tshia 1919, bena nkristo bela manyi bakapikudibua ku bupika bua mu nyuma ne kupinganabu mu “buloba” buabu, ngikadilu wabu wa mu nyuma. (Yeshaya 66:8; Buakabuluibua 18:4) Nenku Yehezekele 11:17 wakapeta dikumbana dia matuku etu aa. Mu tshikondo tshia kale bivua bikengela dikuluka dia Babilone bua kunzuluila bena Izalele njila wa dipingana mu buloba buabu. Mu bikondo bietu ebi diasulula dia Izalele wa Nzambi divua tshijadiki tshia se: Babilone Munene mmukuluke ku bukole bua Sirise Munene. Dikuluka edi divua dimanyisha kudi muanjelu muibidi wa mu Buakabuluibua nshapita wa 14, pakelaye lubila lukole ne: “Babilone Munene wakuluki, yeye uvua munuishe matunga onso mvinyo wa tshiji tshia masandi ende!” (Buakabuluibua 14:8, NW) Ntshibula kayipu bua Babilone Munene, nangananga bua Bukua-buena-nkristo! Ne ndibenesha kayipu bua bena nkristo balelela!
8. Mmunyi mudi mukanda wa Yehezekele umvuija disanka dia bantu ba Nzambi panyima pa dilekedibua diabu mu 1919?
8 Mu Yehezekele 11:18-20, tudi tubala diumvuija dia muprofete dia disanka dia bantu ba Nzambi panyima pa dipingana diabu. Dikumbana dia kumpala dia mêyi ende diakumvuija dikezula dia Izalele mu matuku a Ezela ne Nehemiya. Dikumbana dia matuku etu aa diakumvuija bualu kampanda bua muomumue. Tutangilayi mushindu udibi. Yehowa udi wamba ne: ‘Nebapinganemu [mu buloba buabu], nebumushe bintu bionso [“bia muendi,” NW] ne bintu bionso bidi bibunyanga.’ Anu muvuabi bidianjila kulaya, kubangila mu 1919, Yehowa wakakezula bantu bende ne kubapeshilula bukole bua kumusadilabu. Bakatuadija kumbusha mu miaba yabu malongesha ne bilele bionso bia bena Babilone bivua bibanyanga ku mêsu kuende.
9. Mmabenesha kayi a mushinga avua Yehowa mupeshe bantu bende kubangila mu 1919?
9 Pashishe, bilondeshile mvese wa 19 (NW), Yehowa udi utungunuka ne kuamba ne: “Ne nembapeshe mutshima umue, ne nengele spiritu mupiamupia munda muabu; ne bushuwa nengumbushe mutshima wa dibue mu mubidi wabu ne kubapesha mutshima wa mubidi.” Mu diumvuangana ne mêyi aa, mu 1919, Yehowa wakasangisha basadidi bende bela manyi, kubapesha “mutshima umue,” mu mêyi makuabu, bua buobu kumona mua kumusadila “dikaya ku dikaya.” (Sefanya 3:9, NW) Kabidi, Yehowa wakapesha bantu bende spiritu munsantu bua kubakolesha mu mudimu wa bumanyishi ne kupatula munda muabu mamuma malenga maleja mu Galatia 5:22, 23. Ne pamutu pa mutshima mupape, muenze bu dibue, Yehowa wakabapesha mutshima mutekete, udi ukonyika, wa butumike, mutshima udi mua kutumikila disua diende.
10. Bua tshinyi Yehowa mmubeneshe bantu bende bapingaja kubangila mu 1919 too ne lelu?
10 Bua tshinyi wakenza nanku? Yehowa nkayende udi umvuija. Tudi tubala mu Yehezekele 11:20 ne: ‘Bua buobu balonde mikenji yanyi ne batumikile mêyi anyi ne babienze. Nunku nebikale bantu banyi ne meme nengikale Nzambi wabu.’ Izalele wa Nzambi wakalonga mua kutumikila mikenji ya Yehowa pamutu pa kulonda ngenyi yabu nkayabu. Bakalonga mua kuenza disua dia Nzambi kakuyi ditshina muntu. Nenku, bakamueneka bashilangane ne bena nkristo ba ku dîna ba mu Bukua-buena-nkristo. Bavua bantu ba Yehowa. Bikale nenku, Yehowa uvua mudiakaje bua kutumika nabu bu mutuadi wende wa mukenji, “mupika [wende] wa lulamatu ne wa budimu.”—Matayo 24:45-47, NW.
Disanka dia batuadi ba mukenji ba Nzambi
11. Mmunyi mudi mukanda wa Yeshaya umvuija disanka dia bantu ba Yehowa?
11 Udiku mua kufuanyikija mu meji disanka diabu pakajingululabu muaba muimpe wakapetabu anyi? Mu tshi-bungi, bakambulula mêyi a Yeshaya 61:10 ne: ‘Nentambe kusanka mu Yehowa, mutshima wanyi neutambe kusanka mu Nzambi wanyi.’ Dilaya dia mu Yeshaya 35:10 diakabakumbanyina: ‘Bantu badi Yehowa mupikule nebapingane, nebalue ku Siona bimba misambu; disanka dia tshiendelele nedikale pa mitu pabu; nebapete disanka ne diakalengele; kanyinganyinga ne kupumuna nebinyeme kule.’ Edi ke divua disanka dia batuadi ba mukenji wa ditalala dia Nzambi ba Yehowa kale mu 1919 pakatuadijabu kuyisha lumu luimpe kudi bukua-bantu buonso. Kubangila pine apu too ne lelu’eu, ki mbalekele kukumbaja mudimu eu, ne disanka diabu ndidiunde. Mu Muyuki wende wa pa Mukuna, Yezu wakamba ne: “Disanka ndia bakebi ba ditalala, bualu nebabikidibue ne: ‘bana ba Nzambi.’” (Matayo 5:9, NW, note kuinshi kua dibeji) Kubangila mu 1919 bashadile ba “bana ba Nzambi” bela manyi mbamone bulelela bua dimanyisha edi too ne mu matuku etu aa.
12, 13. (a) Mbanganyi bakadisangisha ne Izalele wa Nzambi mu disadila Yehowa, ne bakadifila mu dienza tshinyi? (b) Ndisanka kayi dinene didi basadidi ba Yehowa bela manyi bapete?
12 Mu kupita kua bidimu, bungi bua Izalele wa Nzambi buakavula too ne mu bidimu bia 1930 pakavua disangisha dia bashadile bela manyi pabuipi ne kukumbana. Didiunda mu bungi bua bambi ba lumu luimpe diakimana mu tshikondo atshi anyi? Nansha kakese. Musumba munene wa bena nkristo bikale ne ditekemena dia muoyo pa buloba ukavua mumane kutuadija dimueneka, ne buobu aba bavua badisangisha ne bana babu bela manyi mu mudimu wa diyisha. Mupostolo Yone wakamona musumba munene eu mu tshikena-kumona, ne mushindu udiye ubumvuija mmuakanyine ntema: “Badi kumpala kua nkuasa wa bumfumu wa Nzambi; ne badi bamuenzela mudimu wa tshijila munya ne butuku.” (Buakabuluibua 7:15, NW) Eyowa, musumba munene wakaditua mu disadila Nzambi. Bu tshipeta, pakabanga bungi bua bela manyi kukepela, kunyima kua 1935, mudimu wa bumanyishi wakatumibua kumpala ne lubilu lukole kudi balunda aba ba lulamatu.
13 Mu mushindu’eu Yeshaya 60:3, 4 wakakumbana: ‘Bisamba bia bantu nebilue ku munya webe, bakalenge nebalue ku dinkenke dia kubanda kua munya webe. Banduluka biebe, tangila ku nseke yonso; buonso buabu badi badisangisha popamue, badi balua kuudi; bana bebe ba balume nebafume ku miaba idi kule, bana bebe ba bakaji nebalue batuadibue mu lubese.’ Disanka divua didiunda edi dituadile Izalele wa Nzambi ndiumvuija bimpe mu Yeshaya 60:5, mutudi tubala ne: ‘Mu diba adi neumone muanda eu, neutambe kusanka, mutshima webe neukume, neuule ne disanka; bua nebakudimune biuma bidi bituadibue pa mâyi manene, nebabifikishe kuudi, ne lupetu lua bisamba bia bantu nelufike kuudi.’
Bulongolodi bua Yehowa budi mu lubilu
14. (a) Ntshikena-kumona kayi tshia bintu bia mu diulu tshivua Yehezekele mumone, ne ndîyi kayi diakamutuminabu? (b) Ntshinyi tshivua bantu ba Yehowa bajingulule mu bikondo bietu ebi, ne bakadiumvua bikale ne dienzejibua kayi?
14 Mu 613 K.B.B., Yehezekele wakamona mu tshikena-kumona bulongolodi bua Yehowa bua mu diulu bufuane tshidiendelandela tshikale mu lubilu. (Yehezekele 1:4-28) Panyima, Yehowa wakamuambila ne: ‘Muana wa muntu, ya kudi ba mu tshisamba tshia bena Izalele, ubambile mêyi andi mbatumina.’ (Yehezekele 3:4) Mu tshidimu etshi tshia 1997, tudi tumona se: bulongolodi bua Yehowa bua mu diulu butshidi mu lubilu lukena kuimanyika bua kukumbaja malongolola a Nzambi. Pa nanku, tutshidi tudiumvua basakibue bua kuambila bakuabu malongolola aa. Mu matuku ende, Yehezekele wakamba mêyi avua menzeja buludiludi kudi Yehowa. Lelu’eu, tudi tuamba mêyi a mu Bible, Dîyi dienzeja kudi spiritu wa Yehowa. Ne mmukenji kayipu udi nawu mukanda au bua bukua-bantu! Padi eku bavule balubakana bua matuku atshilualua, Bible udi uleja ne: malu mmabipe bikole—ne pine apu kabidi, mmimpe matambe—kupita mudibu bela meji.
15. Bua tshinyi nsombelu mmibipe bikole kupita mudi bavule bela meji lelu’eu?
15 Malu mmabipe bikole bualu, anu bu mutudi balonge mu biena-bualu biapitshi ebi, Bukua-buena-nkristo ne bitendelelu bikuabu bionso bia dishima nebibutudibue mu katupa kîpi emu, bibutuka butubutu anu bu muakabutuka Yeruzaleme mu 607 K.B.B. Kabidi, nsangilu wa malu a tshididi wa buloba bujima, muleja mu mukanda wa Buakabuluibua bu nyama wa luonji muikale ne mitu muanda-mutekete ne nsengu dikumi, ukadi pa kumbushibua, anu muakenzekelabi matunga mavule avua mutumba ne Yeruzaleme. (Buakabuluibua 13:1, 2; 19:19-21) Mu matuku a Yehezekele Yehowa wakumvuija ne bukole buonso buôwa bua bungi bukeba kudi disemena dia kabutu ka Yeruzaleme. Kadi mêyi ende neikale ne diumvuija ditambe bunene pajingulula bantu bua kabutu kadi kenda kasemena ka bulongolodi ebu. Yehowa wakambila Yehezekele ne: ‘Nunku, muana wa muntu, pumuna muoyo, pumuna muoyo ne kanyinganyinga kakole ne mutshima wa majiya ku mesu kuabu. Pakukonkabu ne: Bualu kayi udi upumuna muoyo? Wewe ubakudimune dîyi ne: Bualu bua lumu ludi lulua; ne palumvuabu, mitshima ya bantu bonso neyipandike, maboko onso neikale matekete, mioyo ya bantu bonso neyipange, binu bionso nebitekete-teketee bu mâyi. Mukalenge Yehowa udi wamba ne: Tangila, bualu ebu budi bulua, nebuenjibue.’ (Yehezekele 21:6, 7; Matayo 24:30) Malu a buôwa adi pabuipi. Diditatshisha dietu diondoke bua bantu netu didi ditusaka bua kumanyisha didimuija edi, bua kuamba “bualu bua lumu ludi lulua” lua tshiji tshia Yehowa.
16. Bua bena bupuekele, bua tshinyi nsombelu mmitambe buimpe kupita mudi bavule bela meji?
16 Pine apu, bua bena bupuekele malu mmimpe matambe kupita mudi bantu ba bungi bela meji. Mushindu kayi? Mu mushindu wa se: Yezu Kristo wakafua bua mpekatu yetu ne mpindieu udi ukokesha bu Mukalenge wa Bukalenge bua Nzambi. (1 Timote 1:15; Buakabuluibua 11:15) Ntatu ya bukua-bantu idi imueneka bu ikena kujikija, nebayitshimune mu katupa kîpi emu ku diambuluisha dia Bukalenge abu bua mu diulu. Lufu, masama, mabuejila, nzala, ne dibunda bibawu nebilue malu a kale, ne Bukalenge bua Nzambi nebukokeshe mu mparadizu pa buloba kakuyi buluishi. (Buakabuluibua 21:3, 4) Bukua-bantu nebupete ditalala dia Nzambi—malanda a ditalala pankatshi pa muntu ne Yehowa Nzambi ne pankatshi pa muntu ne muinende.—Musambu 72:7.
17. Ndidiunda kayi didi difila disanka mu mitshima ya batuadi ba mukenji wa ditalala dia Nzambi?
17 Mu bimue bitupa bia buloba, misumba mivule ya kukatshila ya bena bupuekele idi yandamuna ku mukenji eu wa ditalala dia Nzambi. Bua kutela anu bilejilu bikese, tshidimu tshishale ditunga dia Ukraine divua dipete didiunda dia bamanyishi 17 pa lukama. Mozambique uvua mupete didiunda dia 17 pa lukama, Lithuanie didiunda dia 29 pa lukama. Russie uvua ne didiunda dia bamanyishi 31 pa lukama, eku Albanie mupete didiunda dia bamanyishi 52 pa lukama. Didiunda edi didi dileja makumi a binunu bia bantu bena muoyo mululame badi basue kupeta ditalala dia Nzambi ne badi balamate ku luseke lua buakane. Divula dia lukasalukasa dia nunku didi dipesha dîku dijima dia bena nkristo disanka.
18. Nansha bantu bateleja anyi babenga, mmuenenu wetu neikale tshinyi?
18 Bantu batu bitaba pa lukasa muaba uudi musombele anyi? Bikalabi nanku, tudi tusanka pamue nebe. Kadi, mu imue teritware, bidi bilomba mêba mavule a mudimu mukole kumpala kua kupeta musankididi wa bulelela nansha umue. Aba badi basadila mu teritware ya nunku mbatekeshe maboko abu anyi? Tòo. Bantemu ba Yehowa mbavuluke mêyi a Nzambi mambila Yehezekele pakapeshaye diambedi muprofete eu utshivua nsonga mudimu wa kuyisha binende bena Yuda: ‘Buobu nansha biumvuabu dîyi diebe, nansha biabengabu kudiumvua (bualu bua badi tshisamba tshia bantombokedi) nebamanye ne: Muprofete udi munkatshi muetu.’ (Yehezekele 2:5) Bu Yehezekele, tudi tutungunuka ne kuambila bantu pa bidi bitangila ditalala dia Nzambi nansha buobu bitaba anyi babenga. Biatelejabu, tudi tutshionkomoka. Biatukomabu nyima yabu, biatusekabu, nansha biatukengeshabu, tudi tunanukila. Tudi banange Yehowa, ne Bible udi wamba ne: “Dinanga . . . didi ditantamena malu onso.” (1 Kolinto 13:4, 7, NW) Bualu tudi tuyisha ne ditantamana, bantu mbamanye tshidi Bantemu ba Yehowa. Mbamanye mukenji wetu. Palua nshikidilu, nebamanye ne: Bantemu ba Yehowa bakateta bua kubambuluisha bua bapete ditalala dia Nzambi.
19. Bu basadidi ba Nzambi mulelela, ndisanka kayi dinene ditudi tupeta?
19 Kudiku disanka dikuabu dipite kusadila Yehowa anyi? Tòo! Disanka dietu dipite bunene didi difumina ku malanda etu mimpe ne Nzambi ne ku dimanya ne: tudi tuenza disua diende. ‘Disanka didi kudi bantu badi bamanye tshiona tshia badi basanka. Yehowa, badi benda biabu mu munya wa pa mpala pebe.’ (Musambu 89:15) Misangu yonso tuanyishayi disanka dia kuikala batuadi ba mukenji wa ditalala dia Nzambi kudi bukua-bantu. Ne mitalu yonso tukumbajayi tshietu tshitupa mu mudimu’eu too ne padi Yehowa wamba ne: wajiki.
Udi muvuluke anyi?
◻ Mbanganyi badi batuadi ba mukenji wa ditalala dia Nzambi lelu’eu?
◻ Mmunyi mutudi bamanye ne: Babilone Munene wakakuluka mu 1919?
◻ Ntshinyi tshidi diditatshisha dinene dia “musumba munene”?
◻ Bua tshinyi matuku atshilualua adi abungamija kupita mudi bantu ba bungi bela meji lelu’eu?
◻ Bua bena mitshima milulame, bua tshinyi matuku atshilualua adi mua kuikala mimpe matambe kupita mudibu bela meji?
[Bimfuanyi mu dibeji 21]
Padibu bamona dinyanguka dia nsangilu wa bantu, bavule badi bumvua ne: tshintu kampanda tshikuate buôwa netshienzeke
[Bimfuanyi mu dibeji 23]
Batuadi ba mukenji wa ditalala dia Nzambi mbantu bena disanka ditambe bunene pa buloba lelu’eu