Yehowa​—Nzambi utu usokolola malu masokoka

“Nzambi udiku mu diulu udi usokolola malu masokoka.”​—DANYELE 2:28.

1, 2. (a) Mmunyi mudi Yehowa ushilangana ne Muluishi wende munene? (b) Mmunyi mudi bantu baleja dishilangana edi?

YEHOWA, Nzambi udi ku mutu kua bionso ne wa dinanga, Mufuki umue ne anu yeye nkayende, udi Nzambi wa meji ne buakane. Kêna ne dijinga nansha dikese dia kusokoka bumuntu buende, midimu yende, anyi malongolola ende. Mu tshikondo tshiende tshijadika ne mu bukole buende bua diangata mapangadika, udi udimanyisha yeye muine. Nunku’eu udi ushilangana ne Muluishi wende, Satana Diabolo, eu udi ukeba bua kusokoka bumuntu buende bulelela ne majinga ende.

² Anu bu mudi Yehowa ne Satana bikale kabayi bapetangana, ke mudi kabidi batendeledi babu. Aba badi balonda bulombodi bua Satana mbamanyike bua ndimi ibidi ne mashimi. Badi bateta bua kudileja ne tshimuenekelu tshimpe, eku benza midimu ya mîdima. Bakambila bena nkristo ba mu Kolinto bua kubenga kukema bua bualu ebu. ‘Bantu aba nunku badi bapostolo badingi, bena mudimu ba mashimi, badi badiandamuna bu bapostolo ba Kristo. Ne ki mbualu bua kukema nansha; bualu bua Satana mene udi udiandamuna bu muanjelo wa munya.’ (2 Kolinto 11:13, 14) Ku lukuabu luseke, bena nkristo mbatangile kudi Yezu bu Mulombodi wabu. Pavuaye pa buloba wakaleja mu bupuangane buonso bumuntu bua Tatuende, Yehowa Nzambi. (Ebelu 1:1-3) Nenku, mu dilonda Kristo, bena nkristo badi bidikija Yehowa, Nzambi wa bulelela, mujikudi wa malu patoke, ne wa butoke. Buobu pabu kabena ne dijinga dia kusokoka bumuntu buabu, midimu yabu, anyi malongolola abu.​—Efeso 4:17-19; 5:1, 2.

3. Mmunyi mutudi mua kufudisha dibanda dia se: bantu badi balua Bantemu ba Yehowa mbenzejibue bua kudisangisha ne “kasumbu kasokome ka malu a Nzambi”?

³ Imue misangu padiye umona bipite buimpe, Yehowa udi uleja patoke malu adi atangila malongolola ende ne matuku atshilualua avua kaayi mamanyike kumpala kudi bantu. Mu ngumvuilu eu udi Nzambi udi usokolola malu masokoka. Nenku, bantu badi basue kumusadila mbabikidibue​—eyowa mbalombibue—​bua kumanya mamanyisha masokolola aa. Dikonkoloja dienza mu 1994 pa Bantemu bapite pa 145 000 mu dimue ditunga dia ku Mputu diakasokolola ne: pa muayene, yonso wa kudibu muntu pa nkayende uvua muenze makebulula mu malongesha a Bantemu ba Yehowa munda mua bidimu bisatu kumpala kua kusungula bua kulua Ntemu. Bakasungula bilondeshile budisunguidi buabu nkayabu kakuyi dibenzeja. Ne bakatungunuka ne kuikala ne budikadidi bua disua ne bua dienza dia malu. Tshilejilu, bu muakafika bamue bungi bukese ku dibenga kumvuangana ne mêyi-makulu matumbuke a nsombelu wa tshitembu wa bena nkristo, bakapangadija pashishe ne: kabavua basue kutungunuka ne dikala Bantemu. Kadi, bidi bisankisha bualu mu bidimu bitanu bishale ebi, bungi buvule bua aba bavua Bantemu kale bakela bidia bua kubangulula didisangisha diabu ne mudimu wabu bu Bantemu.

4. Ntshinyi tshidi katshiyi mua kubungamija bena nkristo ba lulamatu, ne mbua tshinyi?

⁴ Bushuwa, ki mbonso bavua Bantemu kale batu bapingana nansha, ne munkatshi muabu mudi bamue bavua kale ne majitu munda mua tshisumbu tshia Buena-nkristo. Ebi kabiena ne bua kukemesha, bualu nansha umue wa ku balondi binenke ba Yezu, mupostolo Yudase, wakalenduka. (Matayo 26:14-16, 20-25) Kadi aka nkabingila kadi ne bua kutubungamija pa bidi bitangila Buena-nkristo buine anyi? Ebi bidi bivuija tshianana dilubuluka didi Bantemu ba Yehowa batungunuka ne kuenza nadi mudimu wabu wa dilongesha anyi? Kabiena nanku nansha, anu bu muvua tshienzedi tshia tshitungu tshia Yudase Iskariote katshiyi tshipumbishe malongolola a Nzambi.

Wa-Bukole-Buonso kadi wa dinanga

5. Mmunyi mutudi bamanye ne: Yehowa ne Yezu mbanange bantu, ne mmunyi mudibu baleje dinanga edi?

⁵ Yehowa udi Nzambi wa dinanga. Udi utabalela bantu. (1 Yone 4:7-11) Nansha mudi muanzu wende mutumbuke, mmusue kudia bulunda ne bantu. Bua umue wa ku basadidi bende ba kale, tudi tubala ne: ‘Abrahama wakitabuja Nzambi ne bakamubadila ditabuja diende bu buakane buende; bakamuidika: Mulunda wa Nzambi.’ (Yakobo 2:23; 2 Kulondolola 20:7; Yeshaya 41:8) Anu mutu bantu badi balunda bamanyishangana malu mabuta, anyi malu masokoka, ke mudi kabidi Yehowa wenza ne balunda bende. Mu muanda eu Yezu wakidikija Tatuende, bualu wakadia bulunda ne bayidi bende ne wakamanyishangana nabu malu masokoka. Wakabambila ne: ‘Tshiena nubikila kabidi bapika; bualu bua mupika kêna mumanye budi mukalenge wende wenza; kadi ngakanubikila balunda; bualu bua ngakanumanyisha malu onso angakumvua kudi Tatu wanyi.’ (Yone 15:15) Mamanyisha masokome, anyi “malu masokoka,” mabanyangana pamue kudi Yehowa, Muanende, ne balunda babu adi abasangisha mu tshisuikidi tshia dinanga ne bulamate tshidi katshiyi tshikoseka.​—Kolosai 3:14.

6. Bua tshinyi Yehowa kêna ukeba nansha kakese bua kusokoka majinga ende?

⁶ Diumvuija dia dîna Yehowa, “Eu udi uvuija,” didi dileja bukokeshi buende bua kulua tshionso tshidiye ujinga kulua bua kukumbaja dilongolola diende. Mushilangane ne bantu, Yehowa kêna ukeba nansha kakese bua kusokoka majinga ende bua buôwa bua se: bantu bakuabu badi mua kumupangisha bua kuakumbaja. Kêna mua kupangila nansha kakese, ke padiye usokolola patoke mu Dîyi diende, Bible, bivule bia ku bidiye ulongolola bua kuenza. Udi ulaya ne: ‘Dîyi [dianyi] . . . kadiena dipingana kundi patupu, kadiyi dianji kuenza muanda undi musue dienze, kadiyi dianji kujikija muanda ungakaditumina.’​—Yeshaya 55:11.

7. (a) Ntshinyi tshiakadianjila Yehowa kumanyisha mu Edene, ne mmunyi muvua Satana muleje ne: Nzambi mmuena bulelela? (b) Mmunyi mudi dîyi-diludiki dia mu 2 Kolinto 13:8 dikale dilelela misangu yonso?

⁷ Katupa kîpi panyima pa buntomboji mu Edene, Yehowa wakasokolola mu tshikoso tshipeta tshia ndekelu tshia dikokangana dia munanunanu pankatshi pende yeye ne Muluishi wende, Satana. Dimiinu dilaya kudi Nzambi divua ne bua kubozeka, kadi ki nkubutudibua nansha, pavua eku Satana ndekelu wa bionso ne bua kubozeka bia lufu. (Genese 3:15) Mu 33 B.B., bushuwa Diabolo wakaboza Dimiinu, Kristo Yezu, pa kukeba lufu luende. Mu mushindu’eu, Satana wakakumbaja Mufundu ne pine apu wakajadika mudi Yehowa muikale Nzambi wa bulelela, nansha muvua bualu ebu kabuyi dijinga dia Satana. Dikina diende dia bulelela ne buakane, pamue ne lutambishi luende, mmuenenu ukena wa dinyingalala, biakamufikisha ku dienza menemene tshivua Nzambi mudianjile kumanyisha ne: ntshivuaye mua kuenza. Eyowa, bua baluishi bonso ba bulelela, nansha bua Satana muine, dîyi-diludiki edi ndilelela se: ‘Katuena bamanye mua kupumbisha malu malelela, anu bua kuakuatshisha.’​—2 Kolinto 13:8.

8, 9. (a) Ntshinyi tshidi Satana mumanye, kadi dimanya edi didi diteka dikumbaja dia malongolola a Yehowa mu njiwu anyi? (b) Ndidimuija kayi dia patoke didi baluishi ba Yehowa babenga, ne mbua tshinyi?

⁸ Katshia bajadika Bukalenge bua Nzambi mu 1914 mu mushindu ukena umueneka ne mêsu, Buakabuluibua 12:12 (NW) mmukumbane: “Bua bualu ebu, sankayi, muulu ne nuenu badi basombemu! Diakabi kudi buloba ne mbuu, bualu Diabolo wapueki kunudi muikale ne tshiji tshikole, bu mudiye mumanye ne: udi ne lupolo luîpi lua tshikondo.” Kadi, dimanya dia se: tshikondo tshiende ntshîpi didi dienzeja Satana bua kushintulula nsombelu wende anyi? Bua Satana, abi bidi bu ditaba ne: Yehowa udi Nzambi wa bulelela ne se: bu Mukokeshi Mukulu, mmuakanyine dimutendelela anu yeye nkayende. Kadi, Diabolo ki mmusue kuitaba dipangila, nansha mudiye mumanye malu aa.

⁹ Mu butoke buonso Yehowa udi usokolola tshikala mua kuenzeka palua Kristo bua kulumbuluisha ndongoluelu wa bulongolodi bua Satana. (Matayo 24:29-31; 25:31-46) Mu muanda eu, Dîyi diende didi dimanyisha pa bidi bitangila bakokeshi ba mu bulongolodi ebu ne: ‘Patshidibu bamba ne: Tudi ne ditalala, katuyi ne bualu; apu dibutuka dia tshintuluntulu dilualua kudibu, bu mudi kanyinganyinga kalua kudi mukaji udi ne difu.’ (1 Tesalonike 5:3) Aba badi balonda bulombodi bua Satana badi babenga didimuija ditoke edi. Mbafofome mêsu bua mitshima yabu mibi, ne ebi bidi bibapangisha bua kunyingalala bua nsombelu wabu mubi ne kushintulula ngenyi yabu ne ngenzelu ya malu bidi biteta bua kupumbishisha malongolola a Yehowa.

10. (a) Mmu bualabale kayi mudi 1 Tesalonike 5:3 mupete dikumbana, kadi mmunyi mudi bantu ba Yehowa ne bua kuandamuna? (b) Bua tshinyi bantu bakena ditabuja badi mua kutamba kufuna bulobo mu matuku atshilualua mu diluisha tshisamba tshia Nzambi?

¹⁰ Kubangila nangananga mu 1986, pakamanyishabu Tshidimu tshia Ditalala dia Buloba bujima kudi Bulongolodi bua Matunga Masanga, buloba mbuule tente ne miyuki ya ditalala ne bukubi. Bakela bidia bisunguluke ne tshipatshila tshia kukuba ditalala dia pa buloba, bimueneka ne: mbipeteshe ndambu wa dilubuluka. Edi ke dikumbana dijima dia mulayi eu anyi, peshi tudi mua kuindila dimanyisha dia dikema dia matuku atshilualua dia mushindu mukuabu? Yehowa neatokeshe bualu abu mu tshikondo tshiende tshijadika. Mu dindila, tushalayi batabale mu nyuma, “bindile ne balame bikole mu lungenyi dikalaku dia dituku dia Yehowa.” (2 Petelo 3:12, NW) Bu mudi tshikondo tshitungunuka ne kupita ne miyuki mikuabu mivule ya ditalala ne bukubi, bamue bantu badi bumvua didimuija edi, kadi basungula bua kudibenga, badi mua kutamba kulua bedi ba mpata mu dishindika ne: Yehowa kakukumbaja, anyi kêna mua kukumbaja dîyi diende. (Fuanyikija ne Muambi 8:11-13; 2 Petelo 3:3, 4.) Kadi bena nkristo balelela mbamanye se: Yehowa neakumbaje dilongolola diende!

Kanemu kakanyine bua bia-mudimu bidi Yehowa utumika nabi

11. Ntshinyi tshivua Danyele ne Yozefe bamanye pa bidi bitangila Yehowa?

¹¹ Pavua Mukalenge Nebukadnezare, mukokeshi wa Ampire mupiamupia wa Babilone, mupete tshilota tshilubakaji tshivuaye kayi mua kuvuluka, wakakeba diambuluisha. Bakuidi bende, bena majimbu, ne bena mupongo kabavua mene mua kumuambila muvua tshilota tshiende peshi kufila diumvuija diatshi. Kadi, Danyele musadidi wa Nzambi, wakenza nanku, nansha muakitabaye ne lukasa luonso ne: disokolola dia tshilota ne diumvuija diatshi kabivua tshipeta tshia meji ende yeye nansha. Danyele wakamba ne: ‘Nzambi udiku mu diulu udi usokolola malu masokoka, ne yeye wakamanyisha mukalenge Nebukadnezare malu akadi pa kulua mu matuku atshidi kumpala.’ (Danyele 2:1-30) Siekele mivule kumpala, Yozefe, muprofete mukuabu wa Nzambi, wakajadika bualu bua muomumue ne: Yehowa udi Musokolodi wa malu masokoka.​—Genese 40:8-22; Amosa 3:7, 8.

12, 13. (a) Nnganyi uvua muprofete mutambe bunene wa Nzambi, ne bua tshinyi udi wandamuna nanku? (b) Mbanganyi lelu’eu badi basadila bu “balami ba malu masokoka a tshijila a Nzambi,” ne mmunyi mutudi ne bua kubangata?

¹² Muprofete mutambe bunene wa Yehowa wakasadila pa buloba uvua Yezu. (Bienzedi 3:19-24) Paulo wakumvuija ne: ‘Nzambi, mumane kuambila batatu mêyi ende kudi baprofete bende kale mu bitupa bia bungi ne mu biambidi bia bungi, ku nshikidilu kua matuku aa wakatuambila bietu dîyi kudi Muana wakatekeye mupianyi wa bintu bionso, [“ku butuangaji buende,” NW] wakafuka buloba kabidi.’​—Ebelu 1:1, 2.

¹³ Yehowa wakakula ne bena nkristo ba kumpala ku butuangaji bua Muanende, Yezu, eu wakabamanyisha malu masokoka a Nzambi. Yezu wakabambila ne: ‘Bakanupa bienu lungenyi lua kumanya malu a bukalenge bua Nzambi adi masokoka.’ (Luka 8:10) Pashishe Paulo wakakula bua bena nkristo bela manyi bu “bindondi bia Kristo ne balami ba malu masokoka a tshijila a Nzambi.” (1 Kolinto 4:1, NW) Lelu’eu, bena nkristo bela manyi badi batungunuka ne kusadila mushindu’au, benza kasumbu ka mupika wa lulamatu ne wa budimu udi ku butuangaji bua Kasumbu Kaludiki kende muikale ufila biakudia bia mu nyuma mu tshikondo tshiakanyine. (Matayo 24:45-47) Bituikala tunemeka bikole baprofete ba kale benzeja kudi spiritu wa Nzambi, ne nangananga Muana wa Nzambi, katuenaku kabidi ne bua kunemeka tshia-mudimu etshi tshienza ne bantu tshidi Yehowa utumika natshi lelu’eu bua kusokolola mamanyisha a mu Bible a mushinga wa bungi bua bantu bende mu bikondo ebi bikole anyi?​—2 Timote 3:1-5, 13.

Dijikula patoke anyi disokoka dia malu?

14. Ndîba kayi ditu bena nkristo batungunuja midimu yabu mu musokoko, nenku badi balonda tshilejilu tshia nganyi?

¹⁴ Dijikula patoke dia Yehowa mu disokolola malu didi diumvuija ne: bena nkristo badi ne bua kusokolola misangu yonso ne mu nsombelu yonso tshintu kayi tshionso tshidibu bamanye anyi? Eyo, bena nkristo badi balonda mubelu wa Yezu mupesha bapostolo bende bua kuikala ‘ne budimu bu bua nyoka ne bu nyunyu ya nkutshi idi kayiyi iluishangana.’ (Matayo 10:16) Biabambilabu bua kubenga kutendelela Nzambi bu mudi tuondo tuabu tua muoyo tulomba, bena nkristo badi batungunuka ne “kutumikila . . . Nzambi,” bualu mbajingulule ne: tshia-mudimu tshienza ne bantu nansha tshimue katshiena ne bukenji bua kukandika ntendelelu wa Yehowa. (Bienzedi 5:29) Yezu muine wakaleja ngikadilu musunguluke wa bualu ebu. Tudi tubala ne: “Kunyima, Yezu kuya mu Ngalileya. Kavua musue kuya mu Yudeya, bualu bena Yuda bavua bamukeba bua kumushipa. Nenku, tshibilu tshia Tuzubu tua ntenta tshivua bena Yuda benza tshivua pabuipi. Ke Yezu kubandamuna [bana babu ba ku mubidi bavua kabayi bitabuja] ne: . . . ‘Nuenu nuye mu tshibilu, meme tshiena nya mpindiewu to, bualu diba dianyi ki ndianji kukumbana.’ Yezu ubambila meyi aa, kushalaye mu Ngalileya. Bana babo bamane kuya mu tshibilu, yeye pende kuya, kadi mu musokoko, kayi udileja kudi bantu.”​—Yowanese 7:1, 2, 6, 8-10, Mukanda wa Mvidi Mukulu.

Kuamba anyi kubenga kuamba?

15. Mmunyi muakaleja Yozefe ne: dilama bualu busokoka didi imue misangu muanda wa dinanga udi ukengela kuenza?

¹⁵ Mu imue nsombelu, kulama bualu busokoka kakuena patupu kua meji kadi kabidi nkua dinanga. Tshilejilu, ntshinyi tshiakenza Yozefe, tatu mudishi wa Yezu, pakamanyaye ne: mubangila wende, Mariya, uvua muimite? Tudi tubala ne: “Kadi, Yozefe bayende, bualu uvua muakane ne kavua musue kumuela patoke, wakasua kukosoloka nende mu musokoko.” (Matayo 1:18, 19, NW) Mmunyipu muvuabi mua kuikala dipanga dia bulenga bua kumuela patoke!

16. Mbujitu kayi budi nabu bakulu pamue ne bakuabu bena mu tshisumbu pa bidi bitangila malu mabuta?

¹⁶ Malu mabuta adi mua kukeba nsombelu mukole anyi kanyinganyinga, katuena ne bua kuasokoluela bantu badi kabayi ne bukenji. Bakulu bena nkristo mbalame bualu ebu mu lungenyi padibu ne bua kufila mibelu ya nsungansunga anyi busambi kudi bena nkristo nabu peshi pamu’apa padibu bafila dinyoka bua dienzela Yehowa mpekatu munene. Dijikija malu aa bilondeshile Mifundu didi ne mushinga wa bungi; disokolola malu mabuta kudi bantu badiwu kaayi atangila kadiena ne mushinga ne ndipanga dia dinanga. Bushuwa, bena mu tshisumbu tshia Buena-nkristo kabakuteta bua kusokolola ku bukole mamanyisha masokoka adi munda mua bakulu, kadi nebanemeke bujitu bua bakulu bua kusokoka malu mabuta. Nsumuinu 25:9 udi ubambisha ne: “Udilumbuluile tshilumbu tshiebe ne muena mutumba n’ebe, ne kusokolodi bualu busokoka bua munga muntu.”

17. Bua tshinyi bena nkristo misangu ya bungi batu basokoka malu mabuta, kadi bua tshinyi kabena mua kuenza nenku misangu yonso?

¹⁷ Dîyi-diludiki edi ndilelela kabidi mu dîku anyi munkatshi mua balunda ba pa muoyo. Dilama amue malu mabuta ndia mushinga bua kuepuka dikokangana ne malanda a makeyikeyi. “Lupepele lua ku Nord ludi lulela bu mu bisama bikole mvula wa mudimbi; ne ludimi ludi lusokolola bualu busokoka, mpala wa bunyengu.” (Nsumuinu 25:23, NW) Bushuwa, bulamatshi kudi Yehowa ne mêyi-maludiki ende a buakane, pamue ne dinanga bua bantu benji ba bilema, bidi imue misangu mua kulomba nansha bua kuambila baledi, bakulu bena nkristo, anyi bantu bakuabu badi ne bukenji malu mabuta.a Kadi misangu ya bungi, bena nkristo batu badilamina malu masokoka a bakuabu mu dibenga kuasokolola, baalama anu bu mudibu balama abu buobu bine.

18. Nngikadilu kayi isatu ya bena nkristo idi mua kutuambuluisha bua kujadika tshitudi ne bua kuamba ne tshitudi katuyi ne bua kuamba?

¹⁸ Mu tshikoso, muena nkristo udi widikija Yehowa pa kulama amue malu mabuta padibi bikengedibua, uasokolola anu padibi biakanyine. Mu dipangadija bua tshidiye ne bua kuamba ne tshidiye kayi ne bua kuamba, mmulombola kudi budipuekeshi, ditabuja, ne dinanga. Budipuekeshi budi bumukanda bua kubenga kunekesha dileja mushinga wende nkayende, pa kuteta mua kukemesha bakuabu nansha mu dibambila tshintu tshionso tshidiye mumanye peshi mu dibatabuluja ntema ne malu masokoka adiye kayi mua kuamba. Ditabuja mu Dîyi dia Yehowa ne tshisumbu tshia Buena-nkristo didi dimusaka ku diyisha mamanyisha a mu Bible menzeja ku spiritu wa Nzambi eku muikale mudimuke bua kuepuka diamba malu adi mua kudianjila kunyingalaja bakuabu. Eyowa, dinanga didi dimusaka bua kuamba patoke malu adi atumbisha Nzambi ne adi bantu bakengela bua kumanya ne tshipatshila tshia kupeta muoyo. Ku lunga luseke, udi ulama malu a bende mabuta, pa kujingulula ne: misangu mivule diasokolola didi mua kufikisha ku dileja dipanga dia dinanga.

19. Nngenzelu kayi wa malu udi wambuluisha bua kusunguluja bena nkristo balelela, ne abi bidi bifikisha ku tshipeta kayi?

¹⁹ Mmuenenu eu wa nkatshinkatshi udi wambuluisha bua kusunguluja bena nkristo balelela. Kabena basokoka bumuntu bua Nzambi ku nyima kua tshidingishilu kampanda tshidi katshiyi ne dîna anyi kua dilongesha dia Busatu-Bunsantu dikena kujingulula ne kumvuija. Nzambi idi kayiyi mimanyike ntshimanyinu tshia bitendelelu bia dishima, ki ntshia ntendelelu mulelela nansha. (Tangila Bienzedi 17:22, 23.) Bantemu bela manyi ba Yehowa badi banyisha bushuwa disanka dia kuikala “balami ba malu masokoka a tshijila a Nzambi.” Mu disokoluela bakuabu malu masokoka aa mu mushindu mutoke, badi bambuluisha mu dikoka bantu ba mitshima milulame bua bakebe bulunda ne Yehowa.​—1 Kolinto 4:1, NW; 14:22-25; Zekâya 8:23; Malaki 3:18.

[Mêyi adi kuinshi]

Newandamune munyi?

◻ Bua tshinyi Yehowa kêna ukeba nansha kakese bua kusokoka majinga ende?

◻ Mbanganyi badi Yehowa usokoluela malu ende masokoka?

◻ Mbujitu kayi budi nabu bena nkristo pa bidi bitangila malu mabuta?

◻ Nngikadilu kayi isatu yambuluisha bena nkristo bua kumanya tshidibu ne bua kuamba ne tshidibu kabayi ne bua kuamba?

[Bimfuanyi mu mabeji 8, 9]

Yehowa udi usokolola malu masokoka ku diambuluisha dia Dîyi diende