Malu masokoka mu dîna dia Mfumu

LUBUNGIBUNGI lua mulùngu luakanyanga njila wa muinshi mua buloba wa ku Tokyo, mu Japon mu Luabanya 1995, luakashipa bantu 12, kusamisha binunu bikuabu bia bantu, ne luakambuluisha bua kusokolola bualu kampanda busokoka. Kasumbu ka malu a Nzambi kamanyike ku dîna dia Aum Shinrikyo (Bulelela Bukulu) kavua kunguije mu musokoko lubungibungi lua mulùngu mukole mu tshilaminu tshia bia-mvita bua kutumika nalu mu dilumbila bipatshila bidi bikemesha.

Ngondo umue pashishe, bombe butayike buakasunsula nzubu wa mbulamatadi mu tshimenga tshia Oklahoma, mu États-Unis, ne buakashipa bantu 167. Malu malelela akasua kuleja ne: dinyanga adi divua mu mushindu kampanda disuikakaja ku mushindu uvua mbulamatadi muimanyike midimu ya Filiale wa kasumbu ka malu a Nzambi ka ba-Davidien ku Waco, mu Texas, anu bidimu bibidi kumpala. Tshikondo atshi bena mu katendelelu aku batue ku 80 bakafua. Bombe butayike buakasokolola kabidi tshintu tshivua tshisokoka ku mêsu a bantu ba bungi: Bivule bia ku bisumbu bia basalayi ba pa buabu bidi bitumika mpindieu mu États-Unis, pabuipi ne bimue bia kudibi badi babinungena bua se: bidi bilongolola mu musokoko tshienzedi kampanda bua kuluisha mbulamatadi.

Pashishe, batangile ku ndekelu kua 1995, bakasangana bitalu bia bantu 16 buosha mu ditu pabuipi ne tshimenga tshia Grenoble, mu France. Bavua bena mu Kasumbu ka Ntempelo wa Dîba, katendelelu kakese, bakakula bualu buabu mu Kasuamansense 1994 mu ngumu mu ditunga dia Suisse ne dia Canada pavua bantu 53 ba ku benamu badishipe peshi bashipibue. Kadi nansha panyima pa bualu ebu bua buôwa, katendelelu aka kakatungunuka ne kutumika. Too ne lelu’eu, bukole busonsodi ne bipatshila biaku mbishale bibutshika mu musokoko.

Njiwu ya malu masokoka a bitendelelu

Mu ditangila malu menzeke aa, bidiku bikemesha bua mudi bantu bavule bikale bajoja bisumbu bia malu a Nzambi ne dîsu dikole anyi? Bushuwa, muntu nansha umue ki mmusue bua kutua bulongolodi busokome nyama ku mikolo​—bua malu a Nzambi anyi bukena bua malu a Nzambi—​budi bunyanga dieyemena diende ne bumusaka ku dilumbila bipatshila bidiye kayi wanyisha. Kadi, ntshinyi tshidi bantu mua kuenza bua kuepuka dipona mu buteyi bua dibuelakana mu nsangilu misokome idi ifila dielakana?

Mu mushindu mupepele, eu yonso udi ukonkonona dikala muena mu nsangilu musokome udi ne bua kuikala ne meji pa kujadika bipatshila bilelela bia nsangilu eu. Tudi ne bua kudilama ku dienzejibua kudi balunda anyi bamanyangana nabu, ne mapangadika adi ne bua kuikala mashindamene ki mpa mpampakenu, kadi pa malu malelela. Vuluka ne: pamu’apa muntu nkayende ke watuilangana ne bipeta bionso bialua​—ki mbakuabu bonso nansha.

Dilonda mêyi-maludiki a mu Bible ke njila mushindame wa diepuka bisumbu bia njiwu bidi ne bipatshila bidi kabiyi bia bunême. (Yeshaya 30:21) Ebi bidi bilomba dilama ndubidilu mu malu a tshididi, dileja dinanga kudi bakuabu, nansha kudi baluishi, diepuka “midimu ya mubidi,” ne didima mamuma a spiritu wa Nzambi. Pa mutu pa bionso, bena nkristo balelela kabena ne bua kuikala bena mu bulongolodi ebu, anu muvua Yezu mene kayi muenamu, ne njila eu udi ubepula ku dibuelakana mu nsangilu misokome ya mu bulongolodi ebu.​—Galatia 5:19-23, NW; Yone 17:14, 16; 18:36; Lomo 12:17-21; Yakobo 4:4.

Bashilangane ne tutendelelu tua njiwu tutela kuulu eku, Bantemu ba Yehowa mbalongi ba Bible ba dilambu badi bangata ditabuja diabu ne mushinga ne bateta patoke bua kuikala ne nsombelu mumvuangane ne ditabuja edi. Mu buloba bujima, mbamanyike bimpe bu tshisumbu tshia malu a Nzambi tshidi ‘tshikeba ditalala ne tshidilonda.’ (1 Petelo 3:11) Mukanda wabu wa Les Témoins de Jéhovah: Prédicateurs du Royaume de Dieu udi ubambisha mu mushindu mujalame ne: “Bantemu ba Yehowa ki nnsangilu musokome mu ngumvuilu nansha umue. Mitabuja abu mashila pa Bible mmumvuija bimpe mu mikanda idi muntu yonso mua kupeta. Kabidi, badi benza madikolela a pa buawu bua kubikila bantu bua kubuela mu bisangilu [biabu] bua badimuene ne badiumvuile tshidi tshienzeka.”

Tshitendelelu tshilelela katshiena nansha kakese tshitumika ne malu masokoka. Batendeledi ba Nzambi mulelela mbalongeshibue bua kubenga kusokoka bumuntu buabu anyi bua kubuitshidija tshipatshila tshiabu bu Bantemu ba Yehowa. Bayidi ba Yezu ba kumpala bakuuja Yeruzaleme ne dilongesha diabu. Bakaleja patoke mitabuja abu ne mudimu wabu. Mbia muomumue bua Bantemu ba Yehowa lelu’eu. Mu mushindu mumvuike, padi mamfumu a batshikokesha-nkaya akandika budikadidi bua ntendelelu kakuyi kabingila kajalame, bena nkristo badi ne bua kutungunuka ne mudimu wabu ne budimu ne dikima dionso, pa kutumikila “Nzambi bu mfumu, pamutu pa bantu,” nsombelu mubenzeja ku bukole bualu bua bumanyishi buabu bua patoke buenza ne muoyo mukole.​—Bienzedi 5:27-29, NW; 8:1; 12:1-14; Matayo 10:16, 26, 27.

Biwikala ukadiku muele meji ne: Bantemu ba Yehowa badi mua kuikala kasumbu kasokome ka malu a Nzambi, bivua pamu’apa nanku bualu kuvua mutambe kubamanya bimpe to. Ke muvuabi ne bua kuikala bua bantu ba bungi mu siekele wa kumpala.

Bienzedi nshapita 28 udi utuambila bua dipetangana kampanda dia mupostolo Paulo ne “bantu bavua ku mutu kua bena Yuda.” Bakamuambila ne: “Tudi bamone biakanyine bua kuteleja tshidi ngenyi yebe, bualu, bushuwa pa bidi bitangila kasumbu aka, tudi bamanye ne: miaba yonso badi bakamba bibi.” (Bienzedi 28:16-22, NW) Bua kuandamuna, Paulo “wakabalondoluela malu, wakabayisha bua buk[a]lenge bua Nzambi,” ne ‘bakuabu bakadi bitabuja malu akambaye.’ (Bienzedi 28:23, 24) Bivua bushuwa bua diakalenga diabu dia tshiendelele bua kumanya malu malelela avua atangila Buena-nkristo bulelela.

Bu mudibu badifile mu mudimu wa Nzambi wa patoke ne mumanyike kudi bantu, Bantemu ba Yehowa nebikale ne disanka dia kusokolola malu matoke a mudimu ne mitabuja biabu kudi eu yonso udi ujinga kumanya malu malelela. Bua tshinyi kubenga kukonkonona wewe nkayebe, nunku bua umone mua kumanya ditabuja diabu mu mushindu muakanyine?

[Tshimfuanyi mu dibeji 6]

Bantemu ba Yehowa badi ne disanka dia kusokolola tshidibu ne tshidibu benza