Mu katupa kîpi emu, budikadidi bua butumbi bua bana ba Nzambi

‘Bifukibua biakatekibua kunyima kua malu a patupu mu ditekemena edi ne: Bifukibua mene nebipikudibue kabidi ku bupika bua [“dinyanguka,” NW] diabi, nebibuejibue mu [“budikadidi,” NW] bua butumbi bua bana ba Nzambi.’​—LOMO 8:20, 21.

1. Mmunyi muvua mulambu wa Yezu muleja mu tshimfuanyi mu Dituku dia Dibuikidila?

YEHOWA wakafila Muanende umuepele-mulela bu mulambu wa tshia-bupikudi wakunzuluila bantu 144 000 njila wa muoyo wa mu diulu ne matekemena a tshiendelele a pa buloba bua bantu bakuabu badi bashale. (1 Yone 2:1, 2) Anu mudibi bileja mu tshiena-bualu tshishale, mulambu wa Yezu bua bena nkristo balela ku spiritu uvua muleja mu tshimfuanyi pavua muakuidi munene wa Izalele ulambula ngombe bu mulambu wa mpekatu buende yeye, bua dîku diende ne bua tshisa tshia Lewi mu Dituku dia Dibuikidila dia ku tshidimu. Dine dituku adi, uvua ulambula mbuji bu mulambu wa mpekatu bua bena Izalele bakuabu bonso, anu bu muikala mene mulambu wa Kristo mua kupetesha bukua-bantu buonso masanka. Mu tshimfuanyi, mbuji wa muoyo uvua wambula ne uya ne mpekatu yonso ya bantu ya tshidimu tshishale, ujimina mu tshipela.a​—Lewitiki 16:7-15, 20-22, 26.

2, 3. Ntshinyi tshidi mêyi a Paulo mafunda mu Lomo 8:20, 21 umvuija?

² Panyima pa mumane kuleja ditekemena dia bantu bavua mua kulua “bana ba Nzambi” ba mu diulu, mupostolo Paulo wakamba ne: ‘Ditekemena dikole dia bifukibua didi dindila dimueneshibua dia bana ba Nzambi. Bualu bua bifukibua biakatekibua kunyima kua malu a patupu, ki mbua kudisunguila kuabi, kadi bua Nzambi wakabiteka nunku mu ditekemena edi ne: Bifukibua mene nebipikudibue kabidi ku bupika bua [“dinyanguka,” NW] diabi, nebibuejibue mu [“budikadidi,” NW] bua butumbi bua bana ba Nzambi.’ (Lomo 8:14, 17, 19-21) Mêyi aa adi ne diumvuija kayi?

³ Pavua nkambua wetu Adama mufukibue bu muntu mupuangane, uvua “muana wa Nzambi.” (Luka 3:38) Bua dienza mpekatu, wakalua ku ‘bupika bua dinyanguka’ ne wakasambulujila bukua-bantu ngikadilu eu. (Lomo 5:12) Nzambi wakitaba bua bantu baledibue ne ‘malu a patupu’ bu ditekemena didi kumpala kuabu bua dipanga bupuangane diabu dipiana, kadi wakafila ditekemena ku butuangaji bua “dimiinu,” Yezu Kristo. (Genese 3:15; 22:18; Galatia 3:16, NW) Buakabuluibua 21:1-4 udi ufunkuna tshikondo tshikala ‘lufu, madilu, muadi ne kanyinganyinga kabitshiyiku.’ Bu mudi bualu ebu buikale dilaya dienzela “bukua-bantu,” budi butujadikila ne: nsangilu mupiamupia wa pa buloba wa bantu bikale ku bukokeshi bua Bukalenge neapete diakajilula dia mu lungenyi ne dia ku mubidi too ne ku makanda a mubidi a tshishiki ne muoyo wa kashidi bu “bana ba Nzambi” ba pa buloba. Mu Bidimu Tshinunu bia Bukokeshi bua Kristo, bantu bena butumike ‘nebapikudibue ku bupika bua dinyanguka.’ Panyima pa bamane kudileja bena bulamatshi kudi Yehowa mu diteta dia ndekelu, nebikale badikadile bua kashidi ku mpekatu ne lufu bipiana. (Buakabuluibua 20:7-10) Aba bikala pa buloba dîba adi ‘nebapete [“budikadidi,” NW] bua butumbi bua bana ba Nzambi.’

Badi bamba ne: “Vuaku!”

4. ‘Kuangata mâyi a muoyo tshianana’ kudi kumvuija tshinyi?

⁴ Ditekemena dilenga didi kumpala kua bukua-bantu. Kabiena bikemesha mudi bena nkristo balela ku spiritu batshidi pa buloba bikale bantunga-mulongo ba lukunukunu mu diambila bakuabu bua ditekemena edi! Bu mudibu bantu bikala mua kulua tshitupa tshia “mukaji musela” wa Muan’a mukoko mutumbishibue, Yezu Kristo, bashadile bela manyi badi benza mudimu mu dikumbana dia mêyi a tshiprofete aa: “Spiritu ne mukaji musela badi batungunuka ne kuamba ne: ‘Vuaku!’ Ne muntu yonso udi umvua ambe ne: ‘Vuaku!’ Ne muntu yonso udi ne nyota alue; muntu yonso udi musue angate mâyi a muoyo tshianana.” (Buakabuluibua 21:2, 9; 22:1, 2, 17, NW) Tòo, masanka a mulambu wa tshia-bupikudi wa Yezu ki mmashikile anu pa bela manyi 144 000. Spiritu wa Nzambi udi utungunuka ne kuenza mudimu ku butuangaji bua bashadile bela manyi ba mu kasumbu ka mukaji musela badi pa buloba, mu diamba ne: “Vuaku.” Muntu yonso udi mumvue ne muikale ne nyota ya buakane mmubikidibue bua kuamba ne: “Vuaku,” bua kupetela masanka ku ndongoluelu mivule ya Yehowa bua lupandu.

5. Bantemu ba Yehowa badi ne disanka dia kuikala ne banganyi munkatshi muabu?

⁵ Bantemu ba Yehowa badi ne ditabuja mu ndongoluelu wa Nzambi bua muoyo ku butuangaji bua Yezu Kristo. (Bienzedi 4:12) Badi ne disanka dia kuikala ne bantu bena mutshima mululame munkatshi muabu badi bajinga kulonga pa bidi bitangila malongolola a Nzambi ne kuenza disua diende. Nzubu yabu ya Bukalenge mmiunzuluila bonso badi basue ‘kulua bua kuangata mâyi a muoyo tshianana’ mu ‘tshikondo etshi tshia ku nshikidilu.’​—Danyele 12:4.

Mashintuluka akalua mu kupita kua tshikondo

6. Mmunyi mudi spiritu wa Nzambi mutumike pa basadidi ba Yehowa mu bikondo bishilangane?

⁶ Nzambi utu ne tshikondo tshidiye ukumbaja malongolola ende, ne ebi bidi ne buenzeji pa malanda ende ne bantu. (Muambi 3:1; Bienzedi 1:7) Nansha muvua spiritu wa Nzambi mupuekele basadidi bende ba mu bikondo bia kumpala kua Buena-nkristo, kabavua baledibue bu bana bende ba mu nyuma. Kadi, kubangila pa Yezu, tshikondo tshiakalua bua Yehowa kutumika ne spiritu munsantu bua kulela balume ne bakaji badilambule bua bumpianyi bua mu diulu. Kadi mmunyi bua matuku etu aa? Spiritu umue-umue au udi utumika pa “mikoko mikuabo” ya Yezu, kadi kêna ujula munda muayi ditekemena ne dijinga bua muoyo wa mu diulu. (Yone 10:16) Bikale ne ditekemena diabu dibapa kudi Nzambi dia kuikala ne muoyo wa tshiendelele pa buloba bua mparadizu, badi bakuatshisha ne disanka dionso bashadile bela manyi mu difila bumanyishi mu tshikondo etshi tshia diumbuka mu bulongolodi bua kale batangile mu bulongolodi bupiabupia ne buakane bua Nzambi.​—2 Petelo 3:5-13.

7. Mmu mudimu kayi wa dinowa muvua Balongi ba Bible badifile, kadi ntshinyi tshivuabu bamanye bua mparadizu?

⁷ Nzambi wakatuadija ‘kufikisha bana ba bungi ku butumbi’ ne ditshikija dia spiritu munsantu mu Pentekoste wa mu 33 B.B., ne mbimueneke ne: wakateka tshikondo bua kukumbaja “Izalele wa Nzambi” wa mu nyuma udi ne bantu 144 000. (Ebelu 2:10; Galatia 6:16, NW; Buakabuluibua 7:1-8) Kubangila mu 1879, bavua batela pa tshibidilu mu tshibejibeji etshi mudimu wa dinowa uvua utangila bena nkristo bela manyi. Kadi Balongi ba Bible (babikila mpindieu ne: Bantemu ba Yehowa) bavua kabidi bamanye se: mu Mifundu mudi ditekemena dia muoyo wa kashidi pa buloba bua mparadizu. Tshilejilu, nimero wa Tshibumba tshia Nsentedi tshia Kashipu 1883 (Angl.) wakamba ne: “Pajadika Yezu bukalenge buende, ubutula bantu babi, ne bikuabu, buloba ebu nebulue mparadizu, . . . ne bonso badi mu nkita nebabuelemu. Ne mu dilua batumikidi ba mikenji ya mu mparadizu eu, badi mua kuikalamu ne muoyo tshiendelele.” Mu kupita kua tshikondo, dinowa dia bela manyi diakakepa, ne ku kakese ku kakese bantu bavua kabayi ne matekemena a mu diulu bavua benda basangishibua mu bulongolodi bua Yehowa. Pine apu, Nzambi uvua mupeshe basadidi bende bela manyi, bena nkristo balela tshiakabidi, busunguluji bua pa buabu.​—Danyele 12:3; Filipoi 2:15; Buakabuluibua 14:15, 16.

8. Mmunyi muakakola ngumvuilu wa ditekemena dia pa buloba ku ntuadijilu wa bidimu bia 1930?

⁸ Nangananga kubangila mu 1931, aba bavua ne ditekemena dia pa buloba mbadisangishe ne tshisumbu tshia Buena-nkristo. Mu tshidimu atshi, Yehowa wakakenkeshila bashadile ba ku bena nkristo balela ku spiritu bua kumonabu se: Yehezekele nshapita wa 9 udi ufunkuna kasumbu aka ka pa buloba ka bantu badibu benda batua tshimanyinu tshia lupandu bua kubuela mu bulongolodi bupiabupia bua Nzambi. Mu 1932 bavua bafike ku nkomenu wa se: bantu aba badi bu mikoko ba mu matuku etu aa bavua baleja mu tshimfuanyi kudi Yonadaba (Yehonadaba), nyanende wa Yehu. (2 Bakelenge 10:15-17) Mu 1934 bavua baleje patoke ne: “ba-Yonadaba” badi ne bua “kudifila” anyi kudilambula kudi Nzambi. Mu 1935 “tshisumbu tshinene” anyi “musumba munene”​—uvuabu bela meji kumpala ne: nkasumbu kibidi ka mu nyuma kavua mua kuikala “balunda” ba mukaji musela wa Kristo mu diulu—​uvua mujingulula bu mikoko mikuabu idi ne ditekemena dia pa buloba. (Buakabuluibua 7:4-15; 21:2, 9; Musambu 45:14, 15) Ne nangananga kubangila mu 1935, bela manyi badi bikale bantunga-mulongo mu dikeba bantu bena bululame badi bajinga bikole bua kusomba kashidi pa buloba bua mparadizu.

9. Panyima pa 1935, bua tshinyi bamue bena nkristo bakalekela didia ne dinua bimanyishilu mu Didia dia Dilolo dia Mukalenge?

⁹ Panyima pa 1935 bamue bena nkristo bavua bikale badia diampa ne banua mvinyo mu Didia dia Dilolo dia Mukalenge bakalekela. Bua tshinyi? Bualu bakajingulula ne: matekemena abu avua a pa buloba, kaavua a mu diulu nansha. Mukaji kampanda uvua mutambule mu 1930 wakamba ne: “Nansha muvuabu bangata [didia ne dinua] bu bualu buakanyine bua kuenza, nangananga bua ba-ministre ba lukunukunu ba ku dîba ne ku dîba, tshivuaku mutuishibue ne: mvua ne ditekemena dia mu diulu. Nenku mu 1935, bavua batutokeshile ne: bavua benda basangisha musumba munene udi ne ditekemena dia kusomba pa buloba kashidi. Bantu bavule ba munkatshi muetu bakasanka bua kumvua ne: tuvua bena mu musumba munene au, ne tuakalekela didia ne dinua dia bimanyishilu.” Nansha mikanda ya bena nkristo yakashintulula ngenyi ivua munda muayi. Pavua eku mikanda ya bidimu bia kale milongolola diambedi bua balondi ba Yezu balela ku spiritu, biangatshile mu 1935 Tshibumba tshia Nsentedi ne mikanda mikuabu ya ‘mupika wa lulamatu’ biakafila biakudia bia mu nyuma biakanyine majinga a bela manyi ne bena diabu badi ne ditekemena dia pa buloba.​—Matayo 24:45-47, NW.

10. Mmunyi mudibu mua kupingaja muntu mukuabu pa muaba wa muela manyi mupange lulamatu?

¹⁰ Fuanyikija ne: muela manyi kampanda mmulue muntu mupange lulamatu. Nebapingaje muntu mukuabu pa muaba wende anyi? Paulo wakaleja nenku mu muyuki wende wa mutshi wa olive wa mu tshimfuanyi. (Lomo 11:11-32) Bikalabi bikengela kupingaja munga muntu pa muaba wa eu udi mulela ku spiritu, pamu’apa Nzambi neafile dibikila dia mu diulu kudi muntu kampanda muena ditabuja dia tshilejilu mu dimuenzela mudimu wa tshijila munkatshi mua bidimu bia bungi.​—Fuanyikija ne Luka 22:28, 29; 1 Petelo 1:6, 7.

Tubingila tuvule bua kuleja dianyisha

11. Nansha ditekemena dietu dikale dia mushindu kayi, ntshinyi tshidi Yakobo 1:17 utujadikila?

¹¹ Muaba wonso utudi tusadila Yehowa mu lulamatu, neakumbaje bitudi tukengela ne majinga etu malulame. (Musambu 145:16; Luka 1:67-74) Nansha bituikala ne ditekemena dia bushuwa dia mu diulu anyi bikala ditekemena dietu dia pa buloba, tudi ne tubingila tuimpe tua bungi tua kulejila dianyisha kudi Nzambi. Misangu yonso utu wenza malu adi bua diakalenga dia aba badi bamunange. Muyidi Yakobo wakamba ne: “dipa dilenga dionso, dipa diakane dionso didi difuma mu diulu, diumbukila kudi Tatu wa butoke,” Yehowa Nzambi. (Yakobe 1:17, MMM) Tuanjibi kukonkonona ndambu mukese wa mapa ne mabenesha aa.

12. Bua tshinyi tudi mua kuamba ne: Yehowa mmupeshe yonso wa ku basadidi bende bena lulamatu ditekemena dilenga?

¹² Yehowa mmupeshe yonso wa ku basadidi bende bena lulamatu ditekemena dilenga. Mmubikile bamue bua muoyo wa mu diulu. Yehowa wakafila ditekemena dia mpatshi dia dibiishibua bua muoyo wa kashidi pa buloba kudi bantemu bende ba mu tshikondo tshia kumpala kua Buena-nkristo. Tshilejilu, Abrahama uvua ne ditabuja mu dibiishibua ne uvua muindile “musoko udi ne bishimikidi [“bia bushuwa,” NW]”​—mu Bukalenge bua mu diulu muabiishibuaye bua muoyo wa pa buloba. (Ebelu 11:10, 17-19) Kabidi, mu tshikondo etshi tshia ku nshikidilu, Nzambi udi upesha miliyo mivule ya bantu ditekemena dia muoyo wa kashidi pa buloba bua mparadizu. (Luka 23:43; Yone 17:3) Bushuwa, muntu yonso udi Yehowa mupeshe ditekemena bunene nunku udi ne bua kuikala ne dianyisha diondoke bua ditekemena adi.

13. Mmunyi mudi spiritu munsantu wa Nzambi muikale ne buenzeji kudi bantu bende?

¹³ Yehowa udi upesha bantu bende spiritu wende munsantu bu dipa. Bena nkristo badibu bapeshe ditekemena dia mu diulu mbedibue manyi a spiritu munsantu. (1 Yone 2:20; 5:1-4, 18) Nansha nanku, basadidi ba Nzambi badi ne matekemena a pa buloba badi bapeta diambuluisha ne bulombodi bia spiritu. Munkatshi mua bantu aba muvua Mozese, eu uvua ne spiritu wa Yehowa, anu muvua balume 70 bateka bua kumuambuluisha. (Nomba 11:24, 25) Ku buenzeji bua spiritu munsantu, Besalele wakambuluisha bu mumanyi mupiluke wa mudimu wa bianza bua tabernakle wa mu Izalele. (Ekesode 31:1-11) Spiritu wa Nzambi wakapuekela Gideona, Yefeta, Samsona, Davidi, Eliya, Elisha, ne bakuabu. Nansha muikalabu kabayi mua kufikisha bantu aba ba mu bikondo bia kale ku butumbi bua mu diulu, bavua balombola ne bambuluisha kudi spiritu munsantu wa Nzambi, anu mudi mikoko mikuabu ya Yezu lelu’eu. Bua nanku, dikala ne spiritu wa Nzambi kadiena diumvuija ne: mu mishindu yonso tudi ne dibikila dia mu diulu. Kadi, spiritu wa Yehowa udi ufila bulombodi, utuambuluisha bua kuyisha ne kukumbaja midimu mikuabu mitupesha kudi Nzambi, utupesha bukole bupite bua pa tshibidilu, ne upatula munda muetu mamuma ende a dinanga, disanka, ditalala, muoyo-mule, bulenga, buimpe, ditabuja, bupole-malu, ne didikanda. (Yone 16:13; Bienzedi 1:8; 2 Kolinto 4:7-10; Galatia 5:22, 23, NW) Katuena ne bua kuikalaku bena dianyisha bua dipa edi dia kalolo dia kudi Nzambi anyi?

14. Mmunyi mutudi tupetela masanka ku mapa a Nzambi a dimanya ne meji?

¹⁴ Dimanya ne meji mmapa a kudi Nzambi atudi ne bua kuikadila bena dianyisha, nansha bikala ditekemena dietu dia mu diulu anyi dia pa buloba. Dimanya dijalame dia Yehowa didi dituambuluisha bua “kujadika malu a mushinga wa bungi” ne bua “kuenda mu mushindu muakanyine Yehowa bua kumusankisha tshishiki.” (Filipoi 1:9-11; Kolosai 1:9, 10, NW) Meji a Nzambi adi ambuluisha bu bukubi ne bulombodi mu nsombelu. (Nsumuinu 4:5-7; Muambi 7:12) Dimanya dilelela ne meji mbishindamene pa Dîyi dia Nzambi, ne bashadile bela manyi bakese badi nangananga bakokibue ku tshidi Dîyi edi diamba bua ditekemena diabu dia mu diulu. Kadi, dinanga bua Dîyi dia Nzambi ne ngumvuilu muimpe wa Dîyi edi ki mmushindu udi Nzambi uleja ne: tudi babikila bua muoyo wa mu diulu nansha. Bantu bu mudi Mozese ne Danyele bakafunda mene bitupa bia Bible, kadi nebabiishibue bua kuikala ne muoyo pa buloba. Nansha ditekemena dietu dikale dia mu diulu anyi dia pa buloba, buonso buetu tudi tupeta biakudia bia mu nyuma ku diambuluisha dia “mupika wa lulamatu ne wa budimu” muanyisha kudi Yehowa. (Matayo 24:45-47, NW) Buonso buetu tudi ne dianyisha bua dimanya ditudi bapete nunku.

15. Ntshinyi tshidi dimue dia ku mapa matambe bunene a Nzambi, ne mmunyi muudi udiangata?

¹⁵ Dimue dia ku mapa matambe bunene a Nzambi didi ndongoluelu wa dinanga wa mulambu wa tshia-bupikudi wa Yezu, udi utupetesha masanka nansha tuetu bikale ne ditekemena dia mu diulu anyi dia pa buloba. Nzambi mmunange bantu “bikole e kubapa Muanende umuepele mulela bua eu yonso udi uleja ditabuja kudiye kabutudibu kadi apete muoyo wa kashidi.” (Yone 3:16, NW) Ne dinanga dia Yezu diakamusaka “bua kufila anyima wende bu tshia-bupikudi mu dishintakaja bua ba bungi.” (Matayo 20:28, NW) Anu bu muakumvuija mupostolo Yone, Yezu Kristo ‘udi bu mulambu wa kubuikila nawu mibi yetu [ya bela manyi]; ki ng’wa mibi yetu nkayayi, kadi wa mibi ya bonso ba pa buloba kabidi.’ (1 Yone 2:1, 2) Pa nanku, buonso buetu tudi ne bua kuikala ne dianyisha diondoke bua ndongoluelu eu wa dinanga bua kupeta lupandu batangile ku muoyo wa tshiendelele.b

Newikalemu anyi?

16. Mbualu kayi bua tshikuma butuavuluka panyima pa dibuela dia dîba mu dia 11 Tshisanga 1998, ne nnganyi udi ne bua kuikalamu?

¹⁶ Dianyisha bua tshia-bupikudi tshifila kudi Nzambi ku diambuluisha dia Muanende didi ne bua kutusaka bua kuikala ku Nzubu ya Bukalenge anyi miaba mikuabu yasangila Bantemu ba Yehowa panyima pa dibuela dia dîba mu dia 11 Tshisanga 1998 bua kuvuluka lufu lua Kristo. Pakabanjijaye musekelelu eu ne bapostolo bende ba lulamatu butuku bua ndekelu bua muoyo wende wa pa buloba, Yezu wakamba ne: “Tungunukayi ne kuenza nenku bua kumvuluka.” (Luka 22:19, 20, NW; Matayo 26:26-30) Bashadile bela manyi bakese nebadie diampa kadiyi luevene, didi tshimfuanyi tshia mubidi wa Yezu wa bumuntu kauyi mpekatu, ne nebanue mvinyo mukunze kayi musambakaja, udi umvuija mashi ende mitshikija bu mulambu. Anu bena nkristo balela ku spiritu ke badi ne bua kudia ne kunua bualu anu buobu ke badi mu tshipungidi tshipiatshipia ne mu tshipungidi tshia Bukalenge, ne badi ne bujadiki kabuyi kuela mpata bua spiritu munsantu wa Nzambi bua se: diabu ditekemena ndia mu diulu. Bantu bakuabu miliyo mivule nebikalemu bu babandidi bena kanemu badi ne dianyisha bua dinanga dileja kudi Nzambi ne Kristo mu diumvuangana ne mulambu wa Yezu udi uvuija muoyo wa kashidi bualu bulelela.​—Lomo 6:23.

17. Ntshinyi tshitudi ne bua kuvuluka pa bidi bitangila diedibua manyi a spiritu?

¹⁷ Mitabuja a kale a mu bitendelelu, mpampakenu mikole idi ijuka bua lufu lua munangibue kampanda, ntatu idiku mpindieu mu nsombelu wa ku dituku dionso, anyi nyanji ya dikala bapete dibenesha kampanda dia pa buadi dia kudi Yehowa bidi mua kusaka bamue bua kutupakana pa kuela meji ne: badi ne dibikila dia mu diulu. Kadi buonso buetu tudi ne bua kuvuluka ne: Mifundu kayena itulomba bua kudia ne kunua bimanyishilu bia Tshivulukilu bua kuleja dianyisha dietu bua mulambu wa tshia-bupikudi wa Yezu. Kabidi, diedibua manyi a spiritu ‘ki mbualu bua disua dia muntu, anyi bua bienzedi bia muntu, kadi [didi] anu bua Nzambi,’ Eu wakalela Yezu bu Muana wa mu nyuma ne udi ufikisha bana bakuabu 144 000 patupu ku butumbi.​—Lomo 9:16; Yeshaya 64:8.

18. Mmabenesha kayi adi kumpala bua bavule ba ku aba badi basadila Yehowa lelu’eu?

¹⁸ Muoyo wa kashidi pa buloba bua mparadizu nditekemena difila kudi Nzambi dia bantu bavule menemene badi basadila Yehowa mu matuku aa a ku nshikidilu. (2 Timote 3:1-5) Mu katupa kîpi emu, nebapete mparadizu eu mulenga. Dîba adi Bakokeshi nebaludike malu a pa buloba mu bukokeshi bua mu diulu. (Musambu 45:16) Nekuikale nsombelu ya ditalala bualu bantu bikala pa buloba nebatumikile mikenji ya Nzambi ne kulonga bivule pa njila ya Yehowa. (Yeshaya 9:6, 7; Buakabuluibua 20:12) Nekuikale mudimu wa bungi wa kuenza, diasa nzubu ne dikokesha buloba. (Yeshaya 65:17-25) Ne elabi meji bua disangila dia mêku tshiakabidi ne disanka padi bafue bapingana ku muoyo! (Yone 5:28, 29) Panyima pa diteta dia ndekelu, bubi buonso nebujimine. (Buakabuluibua 20:7-10) Pashishe, buloba nebuule bua kashidi ne bantu bapuangane badi ‘bapikula ku bupika bua dinyanguka ne badi ne [“budikadidi,” NW] bua butumbi bua bana ba Nzambi.’

[Mêyi adi kuinshi]

Newandamune munyi?

◻ ‘Kuangata mâyi a muoyo tshianana’ kudi kumvuija tshinyi?

◻ Nansha ditekemena dietu dikale dia mu diulu anyi dia pa buloba, ntubingila kayi tutudi natu bua kuikala ne dianyisha kudi Nzambi?

◻ Mmu musekelelu kayi wa ku tshidimu mutudi ne bua kubuela buonso buetu?

◻ Ntshinyi tshidi matuku atshilualua malamine bavule ba ku bantu ba Yehowa?

[Tshimfuanyi mu dibeji 18]

Bantu miliyo mivule bakadi babange ‘kuangata mâyi a muoyo tshianana.’ Udi pebe munkatshi muabu anyi?