Yehowa udi ufikisha bana ba bungi ku butumbi
“Bivua biakanyine bua [Nzambi], mu difikisha bana ba bungi ku butumbi, avuije Muena mudimu Ntunga-mulongo wa lupandu luabu mupuangane kupitshila mu makenga.”—EBELU 2:10, NW.
1. Bua tshinyi tudi mua kuikala bashindike ne: dilongolola dia Yehowa bua bukua-bantu nedikumbane?
YEHOWA wakafuka buloba bua buikale tshisombedi tshia kashidi tshia dîku dipuangane dia bukua-bantu, dikale ne muoyo udi kauyi ndekelu. (Muambi 1:4; Yeshaya 45:12, 18) Bulelela, nkambua wetu Adama wakenza mpekatu ne nenku wakasambulujila ndelanganyi yende mpekatu ne lufu. Kadi dilongolola dia Nzambi bua bukua-bantu nedikumbane ku butuangaji bua Dimiinu Dilaya, Yezu Kristo. (Genese 3:15; 22:18; Lomo 5:12-21; Galatia 3:16) Dinanga bua bulongolodi bua bukua-bantu diakasaka Yehowa bua kufila “Muanende umuepele mulela bua eu yonso udi uleja ditabuja kudiye kabutudibu kadi apete muoyo wa kashidi.” (Yone 3:16, NW) Ne dinanga diakasaka Yezu “bua kufila anyima wende bu tshia-bupikudi mu dishintakaja bua ba bungi.” (Matayo 20:28, NW) “Tshia-bupikudi [etshi] tshiakanangane” tshidi tshisumba tshiakabidi manême ne matekemena majimija kudi Adama ne tshivuija muoyo wa kashidi bualu buikala mua kuenzeka.—1 Timote 2:5, 6; Yone 17:3.
2. Mmunyi muvua ditumika ne mulambu wa tshia-bupikudi wa Yezu dileja mu tshimfuanyi mu Dituku dia Dibuikidila dia ku tshidimu mu Izalele?
2 Ditumika ne mulambu wa tshia-bupikudi wa Yezu divua dileja mu tshimfuanyi Dituku dia Dibuikidila dia ku tshidimu. Dituku adi, muakuidi munene wa Izalele uvua diambedi ulambula ngombe bu mulambu wa mpekatu ne uya ne mashi a ngombe au ku Mushete wa tshijila mu Mutambe Bunsantu wa tabernakle, ne bidimu kampanda kunyima uvua wenza nenku mu ntempelo. Uvua wenza bualu ebu bua diakalenga diende yeye muine, dia bena mu nzubu muende ne dia tshisa tshia Lewi. Bia muomumue, Yezu Kristo wakafila mushinga wa mashi ende kudi Nzambi tshia kumpalampala bua kubuikila mpekatu ya ‘bana babu’ ba mu nyuma. (Ebelu 2:12; 10:19-22; Lewitiki 16:6, 11-14) Dituku dia Dibuikidila, muakuidi munene uvua kabidi ulambula mbuji bu mulambu wa mpekatu ne uya ne mashi ende mu Mutambe Bunsantu, nenku ubuikidisha mpekatu ya bisa 12 bia Izalele bivua kabiyi bia buakuidi. Bia muomumue, Muakuidi Munene Yezu Kristo neatumike ne mashi ende mafidi a muoyo bua diakalenga dia bantu badi baleja ditabuja, umbusha mpekatu yabu.—Lewitiki 16:15.
Bafikisha ku butumbi
3. Bilondeshile Ebelu 2:9, 10, ntshinyi tshidi Nzambi muikale wenza munkatshi mua bidimu 1 900?
3 Munkatshi mua bidimu 1 900, Nzambi mmuenze bualu kampanda bua dikema mu diumvuangana ne “bana babu” ne Yezu. Bua muanda eu, mupostolo Paulo wakafunda ne: “Tudi tumona Yezu, udi muvuija mupuekele kakese muinshi mua banjelu, muvuadika butumbi ne lumu bua mudiye mupete lufu, bua se: ku bulenga bukena butuakanyine bua Nzambi, amone mua kulabula lufu bua muntu yonso. Bua bivua biakanyine bua eu [Yehowa Nzambi] udi bintu bionso bikalaku bua bualu buende ne udi bintu bionso bikalaku ku butuangaji buende, mu difikisha bana ba bungi ku butumbi, avuije Muena mudimu Ntunga-mulongo wa lupandu luabu mupuangane kupitshila mu makenga.” (Ebelu 2:9, 10, NW) Muena mudimu Ntunga-mulongo wa lupandu n’Yezu Kristo, wakayila butumike bupuangane mu makenga akapetaye pavuaye ne muoyo bu muntu pa buloba. (Ebelu 5:7-10) Yezu uvua muntu wa kumpala ku diledibua bu muana wa mu nyuma wa Nzambi.
4. Ntshikondo kayi ne mmunyi muvua Yezu muledibue bu Muana wa mu nyuma wa Nzambi?
4 Yehowa wakatumika ne spiritu wende munsantu, anyi bukole buenzeji, bua kulela Yezu bu Muanende wa mu nyuma, bua amone mua kumufikisha ku butumbi bua mu diulu. Pavuaye nkayende ne Yone Mubatiji, Yezu wakinyibua mujima mu mâyi bu tshimanyinu tshia didileja diende kudi Nzambi. Muyuki wa mu Evanjeliyo wa Luka udi wamba ne: ‘Pakabatizabu bantu bonso ne Yezu kabidi, pakadiye utendelela Nzambi, diulu diakabululuka, ne [“spiritu munsantu,” NW] wakapueka pambidi pende ne mubidi bu wa nyunyu wa nkutshi; dîyi diakafuma mu diulu ne: Wewe udi Muana wanyi munanga, udi unsankisha bimpe.’ (Luka 3:21, 22) Yone wakamona spiritu munsantu upuekela Yezu ne wakumvua Yehowa wakula bua kuleja dianyisha diende kudiye bu Muanende munanga. Mu tshikondo atshi ne ku diambuluisha dia spiritu munsantu, Yehowa wakalela Yezu bu wa kumpala wa ku ‘bana ba bungi ba difikisha ku butumbi.’
5. Mbanganyi badi bikale ba kumpala ku dipetela masanka ku mulambu wa Yezu, ne badi bungi munyi?
5 ‘Bana babu’ ne Yezu badi bikale ba kumpala ku dipetela masanka ku mulambu wa Yezu. (Ebelu 2:12-18) Mu tshikena-kumona, mupostolo Yone wakabamona bamane kuikala mu butumbi pa Mukuna wa Siyona wa mu diulu pamue ne Muan’a mukoko, Mukalenge Yezu Kristo mubiishibue. Yone wakasokolola kabidi bungi buabu, wamba ne: “Ne meme kutangila, e kumona Muan’a mukoko muimane pa Mukuna wa Siona, uvua ne bantu binunu lukama makumi anayi ne binayi bikale ne dîna diende ne dîna dia Tatuende mafunda pa mpala yabu. . . . Buobu aba bavua basumbibue munkatshi mua bukua-bantu bu mamuma a diambedi bua Nzambi ne bua Muan’a mukoko, ne kabavua basangane dishima mukana muabu; kabena ne kalema.” (Buakabuluibua 14:1-5, NW) Nenku ‘bana ba bungi bafikisha ku butumbi’ mu diulu badi anu 144 001 patupu—Yezu ne bana babu ba mu nyuma.
‘Baledibue kudi Nzambi’
6, 7. Mbanganyi badi ‘baledibue kudi Nzambi,’ ne muanda eu udi umvuija tshinyi buabu buobu?
6 Aba badi Yehowa mulele ‘mbaledibue kudi Nzambi.’ Muikale wambila bine bantu aba, mupostolo Yone wakafunda ne: ‘Muntu yonso udi muledibue kudi Nzambi, katu wenza bibi, bualu bua dimiinu Diende [dia Yehowa] dia muoyo ditu dikala munda muende; yeye kêna mumanye mua kuenzenza bibi bualu bua yeye udi muledibue kudi Nzambi.’ (1 Yone 3:9) ‘Dimiinu dia muoyo’ edi n’spiritu munsantu wa Nzambi. Bu mudiye utumika pamue ne dîyi dia Nzambi, spiritu eu mmupeshe yonso wa ku bantu 144 000 “diledibua dipiadipia” bua ditekemena dia mu diulu.—1 Petelo 1:3-5, 23, NW.
7 Yezu uvua Muana wa Nzambi ku diledibua diende dia bumuntu, anu muvua mene muntu mupuangane Adama muikale “muana wa Nzambi.” (Luka 1:35; 3:38) Kadi, panyima pa batismo wa Yezu, bivua bia mushinga pakamba Yehowa ne: “Wewe udi Muana wanyi munanga, wewe udi unsankisha bimpe.” (Mâko 1:11) Ku diambuluisha dia mêyi aa akumvuika mu dipueka dia spiritu munsantu, bivua bimueneke patoke se: tshikondo atshi Nzambi wakalela Yezu bu Muanende wa mu nyuma. Mu tshimfuanyi, dîba adi bakapesha Yezu “diledibua dipiadipia” ne diakalenga dia kupeta kabidi muoyo bu Muana wa mu nyuma wa Nzambi mu diulu. Anu bu yeye, bana babu ba mu nyuma 144 000 ‘mbaledibue tshiakabidi.’ (Yone 3:1-8; tangila Tshibumba tshia Nsentedi, 15 Kasuabanga 1992, mabeji 3, 4-6, mu Mfualansa.) Kabidi anu bu Yezu, Nzambi mmubele manyi ne mmubapeshe mudimu wa kumanyisha lumu luimpe.—Yeshaya 61:1, 2; Luka 4:16-21; 1 Yone 2:20.
Tshijadiki tshia diledibua
8. Ntshijadiki kayi tshivuaku tshia diledibua ku spiritu dia (a) Yezu (b) bayidi bende ba kumpala?
8 Kuvua tshijadiki tshia se: Yezu uvua muikale mulela ku spiritu. Yone Mubatiji wakamona spiritu upuekela Yezu ne kumvuaye mêyi a Nzambi amba bua bumuana bua mu nyuma bua Masiya uvuabu bafuma ku diela manyi. Kadi mmunyi muvua bayidi ba Yezu mua kumanya se: bavua balela ku spiritu? Ee, dituku dia dibanda diende mu diulu, Yezu wakamba ne: ‘Bulelela, Yone wakabatiza bantu ne mâyi, kadi matuku kaena mashale a bungi anuabatijibua mu [“spiritu munsantu,” NW].’ (Bienzedi 1:5) Bayidi ba Yezu bavua ‘babatijibue mu spiritu munsantu’ dituku dia Pentekoste wa mu 33 B.B. Ditshikija adi dia spiritu divua dishindikija kudi ‘tshiona tshifuma muulu bu tshipepele tshikole tshipita’ ne ‘ndimi mipanduluke bu [ya] kapia’ pa mutu pa yonso wa ku bayidi aba. Tshivua tshitambe kukemesha tshivua bukokeshi bua bayidi ‘bua kuakula miakulu mikuabu bu muakabapa nyuma dîyi dia kuambabu.’ Nenku kuvua tshijadiki tshimueneke ne tshiumvuike ku matshi tshia se: njila wa dibuela mu butumbi bua mu diulu bu bana ba Nzambi uvua muikale munzuluila balondi ba Kristo.—Bienzedi 2:1-4, 14-21; Yoele 2:28, 29.
9. Ntshijadiki kayi tshivuaku tshia se: bena Samariya, Korneliyo ne bakuabu ba mu siekele wa kumpala bavua bikale balela ku spiritu?
9 Panyima pa matuku, Filipe mumuangalaji wa Evanjeliyo wakayisha mu Samariya. Nansha muvua bena Samariya bitabe mukenji wende ne batambule, kabavua ne tshijadiki tshia se: Nzambi uvua mubalele bu bana bende. Pavua bapostolo—Petelo ne Yone—basambile bua bena kuitabuja abu ne babatentekele bianza biabu, “bakatuadija kupeta spiritu munsantu,” mu mushindu kampanda muanda au uvua mumueneke ku mêsu kua babandidi. (Bienzedi 8:4-25, NW) Etshi tshivua tshijadiki tshia se: bena kuitabuja bena Samariya bavua bikale balela ku spiritu bu bana ba Nzambi. Bia muomumue, mu 36 B.B., Korneliyo ne Bampangano bakuabu bakitaba bulelela bua Nzambi. Petelo ne bena kuitabuja bena Yuda bavua bamufile ‘bakakema, bualu bua [“bavua benda bitshikijila bantu ba bisamba dipa dia tshianana dia spiritu munsantu,” NW]. Bakabumvua bakula mu miakulu mikuabu, batumbisha Nzambi.’ (Bienzedi 10:44-48) Bena nkristo bavule ba mu siekele wa kumpala bakapeta ‘mapa a spiritu,’ bu mudi diakula mu miakulu mikuabu. (1 Bena Korente 14:12, 32, MM) Nenku bantu aba bavua ne tshijadiki tshia patoke tshia se: bavua balela ku spiritu. Kadi mmunyi muvua bena nkristo mua kumanya pashishe bikalabu balela anyi kabayi balela ku spiritu?
Bujadiki bua spiritu
10, 11. Mushindamene pa Lomo 8:15-17, mmunyi muudi mua kumvuija ne: spiritu udi ujadika ne aba badi bapianyi pamue ne Kristo?
10 Bena nkristo bonso bela manyi 144 000 mbapete tshijadiki tshikole tshia se: badi ne spiritu wa Nzambi. Bua bualu ebu, Paulo wakafunda ne: “Nuakapeta spiritu wa diangatshibua bu bana, bua spiritu [au] tudi tuela lubila lukole ne: ‘Abba, Tatu!’ Spiritu muine udi ujadika ne spiritu wetu ne: tudi bana ba Nzambi. Nenku bituikala bana, tudi kabidi bapianyi: bushuwa bapianyi ba Nzambi, kadi bapianyi pamue ne Kristo, anu bituakenga pamue nende ke tuetu kumona kabidi mua kutumbishibua pamue nende.” (Lomo 8:15-17, NW) Bena nkristo bela manyi badi ne nyanji ya dikala bana ba Tatuabu wa mu diulu, ngumvuilu kampanda mukole wa bumuana. (Galatia 4:6, 7) Kakuyi mpata mbashindike ne: badi bikale baledibue kudi Nzambi mu bumuana bua mu nyuma bu bapianyi pamue ne Kristo mu Bukalenge bua mu diulu. Mu bualu ebu, spiritu munsantu wa Yehowa udi wenza mudimu munene.
11 Ku buenzeji bua spiritu munsantu wa Nzambi, spiritu anyi mmuenenu mukokeshi wa bela manyi udi ubasaka bua kuandamuna mu mushindu muimpe ku tshidi Dîyi dia Nzambi diamba bua ditekemena dia mu diulu. Tshilejilu, padibu babala tshidi Mifundu yamba bua bana ba mu nyuma ba Yehowa, badi bajingulula diakamue ne: mêyi bu aa adi abatangila. (1 Yone 3:2) Mbamanye ne: “mbatambule mu Kristo Yezu” ne mu lufu luende. (Lomo 6:3, NW) Dituishibua diabu dikole didi se: mbana ba mu nyuma ba Nzambi, bikala mua kufua ne kubiishibua bua butumbi bua mu diulu, anu muvuabi bua Yezu.
12. Ntshinyi tshidi spiritu wa Nzambi mujule munda mua bena nkristo bela manyi?
12 Dikala muledibue mu bumuana bua mu nyuma ki ndijinga didima. Bantu balela ku spiritu ki mbasue kuya mu diulu bua dibungama dikebesha kudi ntatu idiku lelu pa buloba. (Yobo 14:1) Kadi, spiritu wa Yehowa mmujule munda mua bela manyi balelela ditekemena ne majinga bitu bantu kabayi nabi pa tshibidilu. Bantu balela bu aba mbamanye se: muoyo wa kashidi mu bumuntu bupuangane pa buloba bua mparadizu buenza ne dîku ne balunda ba disanka newikale muanda wa mpatshi. Kadi, muoyo wa nunku ki ndijinga dinene dia mitshima yabu. Bela manyi badi ne ditekemena edi dikole dia mu diulu mu mushindu wa se: ku budisuile badi balekela matekemena ne bionso bidibu basue bia pa buloba.—2 Petelo 1:13, 14.
13. Bilondeshile 2 Kolinto 5:1-5, ntshinyi tshivua ‘dijinga dikole’ dia Paulo, ne ntshinyi tshidi bualu ebu buleja pa bidi bitangila bantu balela ku spiritu?
13 Ditekemena difila kudi Nzambi dia muoyo wa mu diulu didi ne bukole bua bungi munda mua bantu ba nunku mu mushindu wa se: nyanji yabu mmifuane ya Paulo, wakafunda ne: ‘Tudi bamanye ne: pikala nzubu ewu utudi pa buloba, [“ntenta eu,” NW], yeye mua kuupuka, tudi ne nzubu muasa kudi [“Nzambi,” NW], nzubu wa kashidi udi kayi muasa ku tshianza tshia muntu, wa mu diulu. Ke patudi tutua mikemu mpindiewu, tujinga bikole bua kuvuala nzubu wetu wa mu diulu pamutu pa mukuabu ewu, anu pikalabu mua kutusangana bavuale katuyi pambidi patupu. Eyowa, tuetu badi mu nzubu ewu, tudi tutua mikemu bazengele; bualu katuena basue kuvuula, kadi amu kuvuala tshibidi etshi pamutu pa tshikuabu, bua tshia lufu batshimine kudi muoyo. Udi mutulongoluele abi [“n’Nzambi,” NW], mutupe tshieya tshia spiritu.’ (2 Bena Korente 5:1-5, MM) ‘Dijinga dikole’ dia Paulo divua dia kubiishibua bua kuya mu diulu bu tshifukibua tshia mu nyuma tshidi katshiyi tshifua. Muikale wakula bua mubidi wa bumuntu, wakatumika ne tshimfuanyi tshia ntenta utu upuka, tshisombedi tshitekete ne tshia tshitupa tshîpi pa kutshifuanyikija ne nzubu. Nansha mudibu ne muoyo pa buloba mu mubidi wa musunyi ne utu ufua, bena nkristo badi ne spiritu bu tshieya tshia muoyo wa mu diulu utshilualua mbatekemene “nzubu muasa kudi Nzambi,” mubidi wa nyuma utu kauyi ufua anyi ubola. (1 Kolinto 15:50-53) Anu bu Paulo, badi mua kuamba ne muoyo mujima ne: “Tudi ne dikima divule ne tuakadi tutamba kusua bua tuetu kumuka mu mubidi ewu [wa bumuntu] bua kuya kusomba [mu diulu] pamue ne Mfumu.”—2 Kolinto 5:8, Muanda Mulenga Lelu.
Babueja mu bipungidi bia pa buabi
14. Pavuaye ubanjija musekelelu wa Tshivulukilu, ntshipungidi kayi tshiakatela Yezu diambedi, ne tshidi ne mudimu kayi mu diumvuangana ne bena Izalele wa mu nyuma?
14 Bena nkristo balela ku spiritu mbajadike ne: mbababueje mu bipungidi bibidi bia pa buabi. Yezu wakatela tshimue tshia kudibi pakatumikaye ne diampa kadiyi diela luevene ne mvinyo bua kubanjija Tshivulukilu tshia lufu luende luvua ne bua kulua, ne wakamba bua dikopo dia mvinyo ne: ‘Dikopo edi didi tshipungidi tshipiatshipia tshijadikibue ku mashi anyi anumatshila.’ (Luka 22:20, MML; 1 Kolinto 11:25) Mbanganyi badi babuedi ba mu tshipungidi tshipiatshipia? Yehowa Nzambi ne bena mu Izalele wa mu nyuma—aba badi Yehowa mulongolole bua kufikisha ku butumbi bua mu diulu. (Yelemiya 31:31-34; Galatia 6:15, 16; Ebelu 12:22-24) Bu muakatuadijatshi kutumika bua mashi mamuangalaja a Yezu, tshipungidi tshipiatshipia ntshipatule mu bukua-matunga tshisamba kampanda bua dîna dia Yehowa ne tshidi tshivuija bena nkristo aba balela ku spiritu tshitupa tshia “dimiinu” dia Abrahama. (Galatia 3:26-29, NW; Bienzedi 15:14) Tshipungidi tshipiatshipia tshidi tshipesha bena Izalele wa mu nyuma bonso bidibu bakengela bua kubafikisha ku butumbi pa kubabiisha bua muoyo udi kauyi ufua mu diulu. Bu muditshi ‘tshipungidi tshia tshiendelele,’ bipeta biatshi bimpe nebishale kashidi. Matuku atshilualua neasokolole bikala tshipungidi etshi mua kuikala kabidi ne mudimu mu mishindu mikuabu munkatshi ne panyima pa Milenyume.—Ebelu 13:20.
15. Mu diumvuangana ne Luka 22:28-30, mmu tshipungidi kayi tshikuabu muakatuadijabu kubueja balondi ba Yezu bela manyi, ne mmu tshikondo kayi?
15 “Bana ba bungi” badi Yehowa mulongolole bua ‘kufikisha ku butumbi’ mbababueje kabidi muntu ku muntu mu tshipungidi tshia Bukalenge bua mu diulu. Pa bidi bitangila tshipungidi etshi pankatshi pende ne balondi ba mu makasa ende, Yezu wakamba ne: “Nuenu nudi bantu bakalamata kundi mu mateta anyi; ne ndi ngenza nenu tshipungidi, anu bu mudi Tatu wanyi muenze nanyi tshipungidi, bua bukalenge, bua numone mua kudia ne kunua ku mesa anyi mu bukalenge buanyi, ne nusombe mu nkuasa ya bumfumu bua kulumbuluisha bisa dikumi ne bibidi bia Izalele.” (Luka 22:28-30, NW) Bakabanjija tshipungidi tshia Bukalenge pavua bayidi ba Yezu bedibue manyi ne spiritu munsantu mu Pentekoste wa mu 33 B.B. Tshipungidi atshi ntshishale tshitumika bua kashidi pankatshi pa Kristo ne bakalenge badi badisange nende. (Buakabuluibua 22:5) Bua nenku, bena nkristo balela ku spiritu mbajadike ne: badi mu tshipungidi tshipiatshipia ne mu tshipungidi tshia Bukalenge. Pa nanku, mu misekelelu ya Didia dia Dilolo dia Mukalenge, anu bashadile bela manyi bakese batshidi pa buloba ke badi badia diampa, didi dileja mubidi wa Yezu wa bumuntu kauyi mpekatu, ne banua mvinyo, udi umvuija mashi ende mapuangane mitshikija ku lufu ne adi ajadika tshipungidi tshipiatshipia.—1 Kolinto 11:23-26; tangila Tshibumba tshia Nsentedi, 1 Luishi 1989, mabeji 17-20 (Mfual.).
Babikila, basungula ne bena lulamatu
16, 17. (a) Bua kuikala bafikisha ku butumbi, ntshinyi tshidi bantu bonso 144 000 ne bua kuenza? (b) “Bakalenge dikumi” mbanganyi, ne ntshinyi tshidibu benza ne bashadile ba ku “bana babu” ne Kristo batshidi pa buloba?
16 Ditumika dia kumpala ne mulambu wa tshia-bupikudi wa Yezu didi dienzeja bua bantu 144 000 kubikidibua bua muoyo wa mu diulu ne kusungudibua pa kuikala balela ku spiritu kudi Nzambi. Bushuwa, bua kuikala bafikisha ku butumbi, badi ne bua ‘kutamba kunanukila bua kujadika dibikidibua ne disungudibua diabu,’ ne badi ne bua kudileja bena lulamatu too ne ku lufu. (2 Petelo 1:10; Efeso 1:3-7; Buakabuluibua 2:10) Bashadile bakese ba ku bela manyi batshidi pa buloba mbalame muoyo-mutoke wabu nansha mudibu babaluisha kudi “bakalenge dikumi” badi tshimfuanyi tshia makokeshi onso a tshididi. Muanjelu wakamba ne: “Bine aba nebaluishe Muan’a mukoko, kadi, bualu yeye udi Mukalenge wa bakalenge ne Mfumu wa bamfumu, Muan’a mukoko neabatshimune. Kabidi, aba badi babikidibue ne basungudibue ne bena lulamatu pamue nende nebenze pabu nunku.”—Buakabuluibua 17:12-14, NW.
17 Bu mudiye mu diulu, bakokeshi ba bantu kabena mua kuenza Yezu, “Mukalenge wa bakalenge,” tshintu nansha tshimue. Kadi badi baleja tshikisu kudi bashadile ba ku “bana babu” batshidi pa buloba. (Buakabuluibua 12:17) Tshikisu atshi netshijike mu mvita ya Nzambi ya Armagedone, pafilabu butshimunyi kudi “Mukalenge wa bakalenge” ne “bana babu”—“aba badi babikidibue ne basungudibue ne bena lulamatu.” (Buakabuluibua 16:14, 16, NW) Mu dindila tshikondo atshi, bena nkristo balela ku spiritu badi ne mudimu wa bungi. Ntshinyi tshidibu benza mpindieu kumpala kua Yehowa kubafikishaye ku butumbi?
Diandamuna diebe didi tshinyi?
◻ Mbanganyi badi Nzambi ‘ufikisha ku butumbi bua mu diulu’?
◻ ‘Kuledibua kudi Nzambi’ kudi kumvuija tshinyi?
◻ Mmunyi mudi ‘spiritu ujadika’ ne bamue bena nkristo?
◻ Bantu balela ku spiritu mbabueja mu bipungidi kayi?
[Tshimfuanyi mu dibeji 15]
Mu Pentekoste wa mu 33 B.B., bakafila tshijadiki tshia se: njila wa dibuela mu butumbi bua mu diulu uvua muikale munzulula