Tshikondo tshia disanka​—Difila mapolome kudi bena kalasa ka 104 ka Gilada

“EDI ndituku dia disanka, ne tuetu bonso tudi tusanka.” Carey Barber, muena mu Kasumbu Kaludiki ka Bantemu ba Yehowa, wakunzulula ndongamu wa disanka wa difila mapolome kudi bena kalasa ka 104 ka Tshilongelu tshia Bible tshia Gilada mu dia 14 Luabanya 1998 ne mêyi aa. Bateleji 4 945 bavua balombibue bua kutuadija muanda eu pa kuimba musambu wa Bukalenge nimero 208, udi ne tshiena-bualu etshi: “Musambu wa disanka.”

Mibelu mikuatshishi bua kushala ne disanka

Tshitupa tshia mbangilu tshia ndongamu, mulongolongo wa miyuki mîpi mishindamene pa Bible, tshiakafila imue mibelu mikuatshishi pa mushindu wa kulama lungenyi lua disanka luvuaku dituku dia difila mapolome.

Muyuki wa kumpala uvua muenza kudi Joseph Eames wa mu Tshibambalu tshia Difunda. Wakakula pa tshiena-bualu tshia “Idikijayi lungenyi lua bena bulamatshi,” tshishindamene pa muyuki wa mu Bible udi mu 2 Samuele nshapita 15 ne 17, mudi Abashaloma muana wa Davidi, mutungile tatuende bua kumunyenga bukalenge bumupesha kudi Nzambi pa kujula buntomboji. Nansha nanku, kuvua aba bakashala bena bulamatshi kudi Mukalenge Davidi, muela manyi wa Yehowa. Ndilongesha kayi divua ba-misionere bapiabapia aba mua kulongela ku muyuki eu? Muanetu Eames wakakoma ne: “Muaba wonso unudi nuya mu mudimu wenu wa bu-misionere, ne bulamatshi buonso nukankamije lungenyi lua dienza mudimu pamue, ne lua kanemu ku bukokeshi bua teokrasi. Nuambuluishe bakuabu bua benze bia muomumue.”

Pashishe mu ndongamu au muvua David Sinclair, eu wakaleja malu-malomba dikumi, matela mu Musambu 15, bua kuikala bashikami ba mu ‘ntenta wa Yehowa.’ Muyuki wende, uvua ne tshiena-bualu etshi: “Nutungunuke bu bashikami mu ntenta wenu wa bu-misionere,” wakakankamija balongi bena mapolome bua kutumika ne musambu eu mu miaba yabu ya mudimu wa bu-misionere, miaba ikalabu bu bashikami. Muanetu Sinclair wakazangika mushinga wa kuikala bikondo bionso ne nsombelu mumvuangane ne mêyi-makulu a buena Nzambi. Tshipeta netshikale munyi? Musambu 15:5 udi wamba ne: ‘Muntu udi wenza malu aa kêna unyungishibua tshiendelele.’

John Barr, muena mu Kasumbu Kaludiki, wakalonda ne kukokaye ntema ku buenzeji bukoleshi budi nabu dimba misambu mu bisangilu bia bena nkristo. Kadi mmusambu kayi udi utamba kusankisha udibu bimba pa buloba bujima lelu’eu? Ndumu luimpe lua Bukalenge bua Nzambi bulombola kudi Masiya. Ntshinyi tshidi tshipeta tshia dimba dia musambu eu, anyi diyisha dia Bukalenge? Katupa kibidi ka musambu nimero 208 kadi kamba mu tshikoso ne: “Tutu tuyisha ne tulongesha, bantu bavule mbalue kudi Nzambi. Ne badi bimba pabu, basanka, ne bayisha Bukalenge bua Nzambi.” Eyowa, dituku dionso bayidi bapiabapia batue ku 1 000 badi benda batambula. Muanetu Barr wakakoma ne: “Bana betu, kabienaku bilengele bua kuela meji ne: badi banutuma mu teritware bua kupetangana ne bantu bikala banuindile bua kuteleja musambu wenu wa disamuna anyi?”

“Telejayi mêyi a badi bamonemone malu” ke tshiena-bualu tshia muyuki uvua James Mantz wa mu Tshibambalu tshia Difunda muenze pashishe. Wakaleja ne: tudi mua kulongela amue malu anu ku diambuluisha dia bitudi badimuenene nkayetu. (Ebelu 5:8) Nansha nanku, Nsumuinu 22:17 udi utukankamija bua ‘kuteleja matshi etu ne kumvua mêyi a bena meji,’ anyi aba bakadi bamonemone malu. Balongi bena mapolome badi mua kulongela bivule kudi aba badi badianjile kumpala kuabu. Muanetu Mantz wakamba ne: “Mbamanye mua kumvuangana mishinga ne basumbishi ba mu magazen a muaba udibu. Mbamanye miaba ya mu tshimenga idi ikengela kuepuka bua njiwu ya ku mubidi ne ya mu bikadilu. Mbamanye bitu bibungamija bantu ba muaba udibu. Ba-misionere bakadi ne matuku a bungi mbamanye binudi nukengela bua kuikala ne disanka ne kulubuluka mu mudimu wenu.”

Muikale wakula pa tshiena-bualu tshia se: “Anyishayi muaba wenu wa mudimu wa teokrasi,” Wallace Liverance, sekretere wa Tshilongelu tshia Gilada, wakumvuija ne: pavua eku bamue ba-misionere, bu mudi mupostolo Paulo, Timote ne Bânaba, Nzambi mubapeshe miaba yabu ya mudimu ku diambuluisha dia spiritu munsantu anyi dileja kampanda dia tshishima, ba-misionere balongesha mu Gilada badi babapesha muaba mu budimi bua buloba bujima kudi “mupika wa lulamatu ne wa budimu.” (Matayo 24:45-47, NW) Wakafuanyikija miaba ya mudimu wa bu-misionere ne miaba ivua Gideona mupeshe bantu bende bavua ne bua kuluisha bena Midiyana. (Balumbuluishi 7:16-21) Muanetu Liverance wakabela ne: “Anyishayi muaba wenu wa mudimu wa teokrasi wa bu-misionere. Anu bu muvua basalayi ba Gideona ‘bimane muntu pa muaba wende muntu pa muaba wende,’ nuangate muaba wenu wa mudimu bu muaba wenu wa kuikala. Ikalayi ne ditabuja dia se: Yehowa udi mua kutumika nenu anu bu muakatumikaye ne bantu nkama isatu ba Gideona.”

Kusankidila bantu kudi kufikisha ku disanka

Umue musangu Tshibumba tshia Nsentedi tshiakumvuija ne: “Pamutu pa kuimanyikila bipatshila bietu ne nsombelu wetu pa bintu bienza bia mu ndongoluelu eu, bintu bitudi katuyi bashindike ne: nebitungunuke, mbitambe buimpe ne bia meji bua kuvuija disankidila bantu tshipatshila tshietu tshilelela ne kulonga mua kupeta disanka dia bushuwa mu dienzela bakuabu malu.” Mu diumvuangana ne muanda au, Muanetu Mark Noumair, umue wa ku balongeshi ba mu Tshilongelu tshia Gilada, wakayukila ne kasumbu ka balongi malu adibu bamone mu budimi ne wakumvuija ne: “Kuleja diditatshisha dia nsungasunga bua bakuabu ke tshianuvuija ba-misionere bimpe.”

Nsapi bua kupeta disanka mu budimi bua ku ba bende

Ng’imue nsapi kayi bua kufika ku dilubuluka ne kupeta disanka mu mudimu wa bu-misionere? Muanetu Charles Woody wa mu Tshibambalu tshia Mudimu ne Harold Jackson, misionere wa kale mu Amerike Latine ne muambuluishi mu Komite wa Dilongesha, bakayukila ne bena mu Komite ya Filiale mishilangane bavua babuele mu kalasa ka tshitema ka tshilongelu tshia bena mu filiale. Tangila tshilejilu tshia mibelu ivua bantu aba ne bua kufila:

Albert Musonda wa mu Zambie wakamba ne: “Padi misionere udianjila kuela tshidia bua kuya ne kuela bana betu muoyo, bidi bijula lungenyi luimpe menemene bualu bana betu nebasemene pabuipi ne misionere, ne misionere neasemene pabuipi nabu.”

Rolando Morales wa mu Guatemala wakaleja ne: padi bantu bena bulunda bapesha ba-misionere bapiabapia tshintu kampanda tshia kunua, badi mua kuandamuna ne bulenga ne mbabi yonso ne: “Ndi muenyi mu ditunga edi. Mvua mua kuangata, kadi mubidi wanyi kawena ne ndongoluelu wa bukubi wa ku tshifukilu udi nende webe mubidi nansha. Ndi ntekemena se: dimue dituku ndi mua kuangata, ne nengikale ne disanka dia kuenza nanku.” Diandamuna nanku didi ne bipeta kayi? “Bantu kabakubungama, ne ba-misionere nebikale badileje bena bulenga kudi bakuabu.”

Ntshinyi tshidi mua kuambuluisha ba-misionere bua kutantamana mu miaba yabu ya mudimu? Muanetu Paul Crudass, muena dipolome wa kalasa ka 79 ka Gilada, musadile mu Libéria munkatshi mua bidimu 12, wakamba ne: “Ndi mumanye mudibi bilelela se: baledi batu bumvua bana babu babasamina muoyo. Kadi kudi bikondo bidi misionere ukeba bua kuibidila ne ditunga, muaba udiye musombele, nshidimukilu ne bantu. Udi mua kumvua muoyo wa kubilekela. Bu yeye mua kupeta mukanda ufuma kuabu wamba ne: ‘Udi mutusamine muoyo bikole be; katuena bamanye tshituenza paudi kuyiku,’ abi bidi mua kuikala tshionso tshidiye ukengela bua kupaya bisaka biende ne kuya kuabu. Mbia mushinga wa bungi bua balela badi muaba eu lelu’eu kuvulukabu bualu abu.”

Panyima pa diela nkonko, muyuki wa ndekelu mu ndongamu uvua muenza kudi Theodore Jaracz, muena mu Kasumbu Kaludiki. Tshiena-bualu tshiende: “Tekayi Bukalenge pa muaba wa kumpala mu nsombelu wenu.” Mmunyi mudi ba-misionere mua kushala batuishile mêsu pa mudimu wabu ne kubenga kubuela mu ditanaji? Wakabakankamija bua kuikala ne ndongamu wa didilongela dia Bible, diabambuluisha bua kuteka bipatshila bia Bukalenge pa muaba wa kumpala mu nsombelu. Ne kuvua divuluija edi dienza mu tshikondo tshiakanyine: “Bamue ba-misionere mbalengulule didilongela bualu bakalua kudina mu malu a biamu biendesha kudi nzembu, a ordinatere ne a dimanyishangana malu ku biamu. Tudi ne bua kuikala ne tshieledi tshia lungenyi tshitue bua kuikala ne nkatshinkatshi mu ditumika ne tshia-mudimu kayi tshionso ne kubenga kupitshisha dîba divule mu bualu kampanda budi mua kuangata muaba wa didilongela dietu dia Dîyi dia Nzambi.”

Panyima pa muyuki wa Muanetu Jaracz, kuakalua difila dia mapolome ne dibala dia mukanda wa dianyisha mufunda kudi balongi. Muleji-mpala wa balongi wakumvuija nyanji ya muntu yonso mushindu’eu: “Tudi bamone tshijadiki tshilelela tshia dinanga diakamba Yezu ne: nedisunguluje bayidi bende, ne bualu ebu mbutushindikile tshiakabidi ne: nansha tuetu muaba kayi, kudi bulongolodi bua musangelu, bua dinanga ne buenze bu mamuetu, budi butukuatshisha. Ne dikuatshisha dia mushindu’eu, tudi badiakaje bua kuya ku mfudilu kua buloba.” Uvua nkomenu udi usonsola bua dituku edi dia disanka dia difila mapolome kudi bena kalasa ka 104 ka Gilada.

[Kazubu mu dibeji 24]

Bishiferi bia kalasa

Bungi bua matunga maleja mpala: 9

Bungi bua matunga mudibu babatume: 16

Bungi bua balongi: 48

Bungi bua mabaka: 24

Muayene wa bidimu: 33

Muayene wa bidimu mu bulelela: 16

Muayene wa bidimu mu mudimu wa ku dîba ne ku dîba: 12

[Tshimfuanyi mu dibeji 25]

Bena mapolome ba mu kalasa ka 104 ka Tshilongelu tshia Bible tshia Watchtower tshia Gilada

Mu liste udi kuinshi eku, milongo mbayibale bituadijile kumpala baya panyima, ne mêna mbaatele bituadijile ku dia bakaji baya ku dia balume mu mulongo wonso

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Tshimfuanyi mu dibeji 26]

Bana betu bakalongesha bena mu kalasa ka 104: (kubangila ku dia bakaji) W. Liverance, U. Glass, K. Adams, M. Noumair