Bakapanga mua kuiba mu Afrike wa ku Ouest

Bu mudibi bilonda kudi Eunice Ebuh

“Bivi badi ne bingoma bavua balongolole bua kutubuelela dituku dituvua tuenza pa tshibidilu Dilonga dia Mukanda dia Tshisumbu kumbelu kuetu. Tutu tushiya biibi biunzulula bua bana betu ba balume ne ba bakaji ne basankididi ba bulelela. Pamu’apa bivi bavua bamanye bibidilu bietu ne dîba dietu dia tshisangilu. Tudi bamanye bimpe ne: bavua bibe vuatire muaba mukuabu ne balue kuindila pabuipi ne tshiibi tshietu dituku ne dîba dia dilonga dia mukanda.

“Anu bu bisongakaja, lumingu luakaluabu alu luvua lua dikumbula dia mutangidi wa tshijengu. Pamutu pa tuetu kudisangishila kumbelu kuetu, tuvua badisangishile ku Nzubu wa Bukalenge. Bisangilu bimane kujika, kuvua tshisangilu tshia bakulu. Pa tshibidilu meme ne bana tuvua ne bua kuikala baye kumbelu, kadi bayanyi, udi muikale mukulu, wakatuambila bua tumuindile. Wakamba ne: kabavua ne bua kunenga to. Nunku, tuakamuindila.

“Pashishe tuakamona se: vuatire wetu kavua utema. Mutangidi wa tshijengu ne bayanyi kabavua bamanye mua kumulongolola. Nansha mulongolodi wa mashinyi utuakabikila wakapangila pende.

“Bana bavua ne bua kuya kumbelu lua makasa. Mutantshi mukese kunyima, meme kuya panyi kumbelu. Ngakafika pabuipi ne dîba dikumi. Meme nansha bana katuakabuela ne vuatire mu lupangu, bivua ne bua kuikala bitulombe bua kunzulula tshiibi tshinene.

“Pangakabuela mu nzubu wanyi wa bulalu, ngakumvua muadi wa tshingoma, muadi mukole. Ngakadiebeja tshivua tshipitakana. Meme kuteta bua kuela bampulushi nshinga, kadi telefone uvua munyanguke. Meme kutuluka panshi lubilu ne kukanga tshiibi tshia tshiamu tshia dibuelela, pashishe meme kunyema bua kukanga tshiibi tshia pankatshi. Meme kujima midilu. Tshipapu tshivua tshikuate bana banyi, nunku meme kubambila bua bikale batukije. Tuetu kusambila Yehowa pamue bua atukube. Pine apu, bayanyi utshivua anu ku Nzubu wa Bukalenge uluangana bua kutemesha mashinyi.

“Ntangidila pa dididishi, meme e kumona muntu mulale panshi mu musesu pambelu pa tshiibi. Bivua bimueneka ne: bivi bakavua baye, nunku meme kubueja muntu eu uvua mutapike mu vuatire wanyi ne kuya nende ku lupitadi lubilu. Mvua mu njiwu, kadi mvua ne bua kuenza bualu kampanda. Bia dibungama, muntu au wakafua dituku diakalonda.

“Nansha kuenzeke diakabi edi, malu avua mua kuikala mabi matambe. Dikumbula dia mutangidi wa tshijengu divua dienze bua katuenzedi dilonga dia mukanda mu nzubu muetu. Dinyanguka dia vuatire divua dienze bua dîku dijima kadipinganyi kumbelu mu mashinyi. Bayanyi, uvuabu bushuwa mua kuikala bakuate kudi bivi, kakapingana kumbelu pa dîba. Malu aa ne makuabu avua matuambuluishe butuku abu.

“Yehowa udi lumbu luetu ne tshisokomenu tshietu. Bidi anu bu mudi mufundu wamba ne: ‘Bikala Yehowa kayi ulama musoko, mutentekedi udi utabala patupu.’”​—Musambu 127:1.