Tshinyangu tshidi mua kujika
“MISANGU yonso batu bangata dinyanga bintu ku bukole dia bana bu dipanga kanemu ne dibenga kumvuila bantu bakulumpe ne kulonda mêyi abu,” ke mudi bafundi aba: Jane Norman ne Myron Harris bamba. Nansha mudi bansonga ba bungi bela meji ne: kabena mua kuenza bualu nansha bumue bua kushintulula nsombelu eu, bafundi aba bakamanyisha ne: “nsonga umue pa 3 udi wela meji ne: bavua mua kukepesha dinyanga bintu ku bukole dia bana bu baledi babu babatabalele bikole, ne bu bana bikale ne bivule bia kuenza.” Nansha mudi dipesha bansonga mudimu wa kuenza ne dibatabalela dia baledi mua kukepesha tshinyangu, malu aa nkayawu adi mua kufika ku muji wa bienzedi ebi bibi anyi?
Padibu nkayabu, bansonga ba bungi kabatu bakeba bilumbu to, kadi padibu mu tshisumbu anyi padibu babidi babidi, badi mua kukeba bua kukoka ntema ya bantu, benza malu mabi a bupâle. Ke muvuabi bua Nelson. Pavua mfuanka wa diamba anyi maluvu amukuata, misangu mivule uvua uleja ne: uvua ne tshiji pa kunyanga bintu ku bukole. Bu muvua miyuki ya mu Ekleziya Katolike ivua yakula bua diabanya madimi ne bua manême a bena midimu ya bianza mimusaluje lungenyi, José yeye wakamona ne: uvua ne bua kuikala munkatshi mua bantu bavua babenge bua kuenza mudimu ne bakalongolola bua kunyanga bintu ku bukole bu mushindu wa kuleja ne: bavua babenge. Kadi, Nelson ne José bakasokolola tshintu tshitambe buimpe kupita bimvundu anyi tshinyangu.
Amue malu manene adi akebesha tshinyangu
Tukonkonone bimpe menemene bua tshinyi bamue bansonga badi baditua mu tshinyangu. Mipiankunde ya bungi ki mmimanye tshia kuenza to, ne “idi yamba mudi buloba buikale muaba wa bilema, wa bupâle, mûle ne bantu bapâle.” Nansha nanku, ne bishilangane ne bidi bamue bantu bitaba, luapolo kampanda luakamba ne: “Bansonga badi badiebeja bua kumanya kudi nsombelu wabu mutangile. Badi baditatshisha bikole bua malu a panu kupita mutu bantu bakulumpe bela meji.” Nansha yeye mumanye anyi kayi mumanye, nsonga udi muditue mu dinyanga bintu ku bukole udi mua kuikala uleja mu mushindu eu tshiji tshikole tshidi mu mutshima wende, malu adiye kayi mujikije anyi majinga adiye kayi mukumbaje. Bilondeshile dikonkonona dileja ku ntuadijilu wa tshiena-bualu etshi, “muntu nansha umue wa ku bavuabu bakonke kakitaba anyi kakabingisha dinyanga dia bintu ku bukole, nansha aba [bavua] baditue mu tshilele etshi.”
Nsonga udi mua kumvua dîyi dia kumuanyisha nadi anyi dia kumukankamija nadi mu mpukapuka. Bu mudi tulasa ne mushinga wa bungi menemene ne midimu mivule ilomba bua kuikala ne dimanya dibandile anyi dia malu a biamu, nsonga udi mua kudimona kayi ne makanda a kuenza bualu. Kusakidila apu, baledi, balongeshi anyi binende badi mua kuikala batamba kumujana ne bamulomba malu mamupite bukole, bashindamena pa tshidiye wenza, babenga kushindamena pa tshidiye. Ba bungi batu batomboka anyi banyanga bintu anu bualu mbapangile malu avuabu basue kuenza. Dinanga ne ntema ya baledi kabienaku mua kutamba kukepesha kanyinganyinga ka mushindu’eu anyi?
Udi mua kuikala mumone se: nansha mudi bamue bakokeshi bamueneka bu balekele bua kukandika difunda anyi dizola bintu ku bimanu ne mishindu mikuabu ya buntomboji, bantu badi bualu ebu butua ku muoyo batshidi batekemene bua balongeshi ne balombodi ba tulasa kukandabu tshinyangu. Bua bidi bitangila ditumikisha mikenji, tshibungu kampanda tshidi tshiamba ne: “Badi banyoka muntu udi munyange bintu ku bukole pa kumukosela tshibawu tshia makuta anyi pa kumuela mu buloko. Imue mbulamatadi itu ne mikenji idi yupuila baledi bujitu bua tshinyangu tshia bana babu. Kadi kabatu banyoka bantu bua bienzedi ebi nansha. Mu nsombelu ya mushindu’eu mbikole bua kutumikisha mikenji, ne bienzedi bivule bia tshinyangu kabitu binene bua kufunda tshilumbu ku kabadi to.” (The World Book Encyclopedia) Luapolo kampanda luakaleja ne: anu bashipi ba mikenji 3 pa lukama ke bavuabu bakuate.
Pamu’apa newitabe ne: dikolesha bana bimpe didi mua kuikala mushindu mutambe bulenga wa kujikija tshikebeshi tshinene tshia buenzavi. Kadi padi nsombelu wa mu dîku unyanguka, lutatu ludi lumueneka mu bantu. Mulongeshi Ana Luisa Vieira de Mattos, wa mu iniversite wa mu tshimenga tshia São Paulo (mu ditunga dia Brésil), udi wamba ne: “dipangika dia buludiki buimpe bua baledi, dipangika dia mikandu ne diyukidilangana, dilengulula dia malu ne dipanga dia musangelu” ng’amue a ku malu adi ajula ntatu bua bansonga.
Bushuwa, mu tshikondo tshietu etshi tudi bamone mudi mêyi a Yezu aa akumbana: ‘Dinanga dia ba bungi nedikepe, bualu bua tshishiku tshiakudiunda munda muabu.’ (Matayo 24:12) Ne nnganyi udi mua kuamba ne: mêyi adi mu 2 Timote 3:1-4 kaena akumbana? Mupostolo Paulo wakafunda ne: ‘Kadi umanye bualu ebu ne: palua matuku a ku nshikidilu malu makole nealue. Bantu nebikale badisui, banangi ba biuma, baditumbishi, badileji, bapendi ba Nzambi, kabayi batumikila mêyi a baledi babu, kabayi ne kusakidila, kabayi ne tshijila, kabayi banangi ba bana babu, bashipi ba bipungidi, bena bunsonge, kabayi mua kudikanda, bena luonji, kabayi basue malu mimpe, nebikale batungidianganyi, bena lukuluku, bûjibue ne diambu, banangi ba masanka, kabayi banangi ba Nzambi.’ Bualu budi ne: kusomba patupu munkatshi mua bantu badi ne ngikadilu eyi kudi kufikisha ku buenzavi. Nansha nanku, katuena ne bua kulekela to. Mu tshibungi, bantu mbapangile bua kujikija tshinyangu, kadi tudi mua kupeta bantu badi bafike ku dishintulula nsombelu wabu, kabayi kabidi ne bibidilu bibi anyi bienzenza to. Buabu buobu tshinyangu ntshijike.
Buludiki buimpe bua bansonga
Ntshinyi tshidi tshiambuluishe bena tshinyangu ne bantu bakuabu bua kushintulula bumuntu buabu? Nansha mudibi mua kumueneka bikolele bamue balongeshi ne baledi bua buobu kuitaba, Bible udi ufila mibelu milenga ne miakanyine tshikondo tshietu etshi. Mu diyilonda, bantu bavua bena tshinyangu kumpala mbafike ku ditumikila mukenji eu musunguluke wa Nzambi: ‘Kulondi kunyima kua tshisumbu tshia bantu tshinene bua kuenza malu mabi.’ (Ekesode 23:2) Bantu ba bungi mbakokibue ku bulelela bua mu Dîyi dia Nzambi budi butangila mitabuja ne malongesha avuabu kabayi banji kumvua kuonso eku, ne bidibu balonge mbibasake ku dienza malu mimpe. Tangila José, nsongalume wa mu São Paulo. Uvua mukolele mu tshitendelelu tshivua tshitaba bua kuenza mudimu ne bimfuanyi. Pakamanyaye ne: dîna dia Nzambi n’Yehowa, ne se: Katu witaba ntendelelu wa bimfuanyi, José wakashintuluka bua kuenza tshidi tshimpe ku mêsu kua Nzambi.—Ekesode 20:4, 5; Musambu 83:18; 1 Yone 5:21; Buakabuluibua 4:11.
Nelson, pamutu pa kupeta malu malondangane adi abungamija mu bisumbu bia bena tshinyangu ne bia bantu bavua babenga bua kuenza mudimu, wakapeta ditekemena dilelela bua matuku atshilualua, ne malu aa mmamupeshe disulakana dipite bungi. Udi wamba ne: “Pamutu pa bena dîku dietu kumbengabu bua malunda mabi ne bua dinua dia diamba, mpindieu ndi muntu udibu batamba kunemeka ku nzubu. Misangu mivule tatu utu ungambila bua meme kubela bakulu banyi ba balume. Katshia Bantemu ba Yehowa batuadija kundongesha Bible, ndi mupete disanka bualu mpindieu ndi ne tshipatshila mu nsombelu wanyi.” Marco, nsongalume udi musombele mu tshimenga—muibidile kusombela miaba idi tshinyangu—wakasanka bikole pakamanyaye ne: Bukalenge bua Nzambi nebuvuije buloba ebu mparadizu.—Buakabuluibua 21:3, 4.
Tangila kabidi tshilejilu tshia muntu uvua mu tshisumbu tshia babundi ba bilumbu, muluishanganyi wa mu njila ne muena tshinyangu. Bu muvuaye muana wa nshiya ne mukole bibi, Valter uvua mukeme pakamonaye ne: mu ndongoluelu eu munyanguke, Nzambi udi ne bantu bende. Badi badienzeja ne muoyo mujima bua kutumikila mêyi-maludiki a mu Bible mu nsombelu wabu, balejangana luse, bunême ne bulenga. Valter udi wamba ne: “Dilaya dia Yezu ndilelela. Mpindieu ndi ne dîku dinene dia ‘bana betu ba balume ne bana betu ba bakaji ne bamamu ne batatu.’ Bua matuku atshilualua, ndi muindile tshikondo tshikala bantu basombe mu disanka ne mu buobumue mu bukokeshi bua mbulamatadi muakane wa Nzambi.”—Mâko 10:29, 30; Musambu 37:10, 11, 29.
Bualu bulenga kupita ditontolola
Kusakidila ku dileja bunême ne dinanga kudi bantu nabu, bantu aba bavua bena tshinyangu kumpala bakalonga mua ‘kuikala ne malu mabi lukuna.’ (Musambu 97:10; Matayo 7:12) Bidi munyi buebe wewe? Nansha wewe ukenga bualu tshinyangu ntshitangalake, dilonga Dîyi dia Nzambi nedikufikishe ku dimona Yehowa bu muntu mulelela, muikale bu Tatu wa dinanga wa mu diulu udi uditatshisha bua bualu buebe. (1 Petelo 5:6, 7) Nzambi udi mua kukuambuluisha bua kukola mu nyuma, nansha wewe ne mateketa anyi bupele. Ebu mbualu bulenga!
Bushuwa, Yehowa ne Muanende Yezu Kristo mbasue bua bantu ba mishindu yonso bapete mushindu wa kulonga bulelela bua mu Bible. Dîyi dia Nzambi didi mua kuambuluisha bantu bua kulekela tshinyangu kubangila ku mpindieu ne kubasaka bua kuyabu kumpala mu ditumikila mêyi-maludiki a Nzambi. Bu tshipeta, badi babuela munkatshi mua bena-muntu badi pa buloba bujima bamanyike bua bienzedi biabu bikezuke ne bimpe, mu tshisumbu tshia Bantemu ba Yehowa pa buloba bujima. Mu diumvuangana ne Efeso 4:24 (NW), bena Kristo aba ba muoyo mululame ‘mbavuale bumuntu bupiabupia buakafukibua bilondeshile disua dia Nzambi mu buakane ne bulamatshi bia bushuwa.’ Mu katupa kîpi emu buloba nebuule ne bantu ba mushindu’eu bualu anu buobu nkayabu ke bapanduka ne kushala ne muoyo kashidi.—Tangila Luka 23:43.
Bukua panu bupiabupia mudi kamuyi tshinyangu nebulue bualu bulelela
Udi witaba ne: tshinyangu tshidi mua kujika bushuwa anyi? Bikalabi ne: eyowa, mmunyi muikala dishintuluka dinene nunku mua kuenzeka? Mu katupa kakese emu Bukalenge bua Nzambi nebubutule ndongoluelu eu mubi. Nebupuile bantu bikala pa buloba bujitu bua dishipa dionso dia mikenji miakane ya Nzambi ku budisuile. (Tangila Yeshaya 24:5, 6.) Pikala ‘batomboki babutudibua buonso buabu,’ bantu badi banange buakane buobu nebasungidibue. ‘Yehowa neabakuatshishe, neabasungile; neabapandishe mu bianza bia bantu babi, ubasungila, bualu bua badi banyemena kudiye.’—Musambu 37:38-40.
Bushuwa, nebajikije bua kashidi malu adi akebesha tshinyangu. Ke muikalabi bua dibunda dionso dia bibawu, dikengeshangana, makenga ne bubi kabidi. Ditalala, buakane bua bushuwa, bupole ne bukubi nebikale mu bukua panu bupiabupia. Yeshaya 32:18 udi umvuija malu akumbana mu mushindu mulelela ne: ‘Bantu banyi nebashikame mu miaba ya ditalala, ne mu nzubu idi kayiyi ne njiwu pepi, ne mu bikishilu bia ditalala.’ Bushuwa, bantu badi baleja bakuabu dinanga ne bunême nebasombe mu mparadizu mulenga ne wa buloba bujima.
Pamue ne bantu bakuabu miliyo mivule, bantu bavua bena tshinyangu kumpala bakadi mu malanda mashême ne Yehowa Nzambi. Kabena babuela kabidi mu bienzedi bia tshinyangu nansha. Wewe pebe newitabe bua Dîyi dia Nzambi dikuludike bua kupeta muoyo mu bukua panu ebu bupiabupia anyi? Bua tshinyi kubenga kuidikija mufundi wa misambu wa kale wakafunda mêyi a Yehowa ne: ‘Nenkuyishe lungenyi, nenkuleje njila uudi ne bua kuendela, nenkupe meji patshidi dîsu dianyi kuudi.’—Musambu 32:8.
[Tshimfuanyi mu dibeji 7]
Ntema ne dinanga dia baledi bidi bikuba bansonga