Mmunyi muutu wangata bumpianyi buetu bua mushinga mukole?

‘Luayi, nudi nusankishibua kudi Tatu wanyi, nupiane bukalenge buakanulongoluelabu ku tshibangidilu tshia buloba.’​—MATAYO 25:34.

1. Mbintu bia mushindu kayi bitu bantu bapiane?

BANTU bonso badi ne bintu bidibu bapiane. Bamue badi mua kuikala bapiane bubanji. Bakuabu mbapiane bupele. Imue misangu, bantu ba mu bikondo bia kale, bua malu avuabu bamone anyi bumvue, mbashile ndelanganyi yabu lukinu lukole ludibu nalu bua tshisamba tshikuabu. Kadi tuetu bonso tudi ne tshintu tshia muomumue tshitudi bapiane. Tuetu bonso tudi bapiane mpekatu mutushila kudi Adama muntu wa kumpala. Bumpianyi abu butu bufikisha ndekelu wa bionso ku lufu.​—Muambi 9:2, 10; Lomo 5:12.

2, 3. Mbumpianyi kayi buvua Yehowa mulongoluele bana ba Adama ne Eva ku ntuadijilu, kadi bua tshinyi kabakabupeta?

² Bu mudi Yehowa Tatu wa dinanga, ku ntuadijilu wakapesha bantu bumpianyi bulenga bua dikema buvua buikale muoyo wa tshiendelele mupuangane mu Mparadizu. Baledi betu ba kumpala, Adama ne Eva, bakatuadija muoyo bikale bapuangane ne kabayi mpekatu. Buloba ke dipa divua Yehowa Nzambi mupeshe bantu. (Musambu 115:16) Wakenzela baledi betu ba kumpala aba budimi bua Edene bu tshilejilu tshia mushindu uvua buloba buonso ne bua kulua ne wakabapesha mudimu mulenga be. Bavua ne bua kulela bana, kulama buloba ne bikunyibua bionso bivuapu ne nyama kabidi, ne bavua ne bua kudiundisha Mparadizu pa buloba bujima. (Genese 1:28; 2:8, 9, 15) Bana babu bavua ne bua kuenza pabu mudimu eu. Ebu ke bumpianyi bulenga buvuabu mua kubashila!

³ Kadi bua kupetabu bionso ebi, Adama ne Eva ne ndelanganyi yabu bavua ne bua kuikala mu malanda mimpe ne Nzambi. Bavua ne bua kunanga Yehowa ne kumutumikila. Kadi Adama ne mukajende Eva kabakangata bintu bivua Nzambi mubapeshe ne mushinga to, bakashipa mukenji wende. Nunku bakajimija Mparadizu uvuabu basombele ne bintu bilenga bivua Nzambi mubalamine. Pa nanku kabavua mua kushila ndelanganyi yabu Mparadizu ne bintu ebi nansha.​—Genese 2:16, 17; 3:1-24.

4. Mmunyi mutudi mua kupeta bumpianyi buvua Adama mujimije?

⁴ Bua luse, Yehowa wakalongolola bua bana ba Adama ne Eva bamone mua kupeta bumpianyi buvua Adama mujimije. Mushindu kayi? Mu tshikondo tshivua Nzambi mujadike, Muanende Yezu Kristo wakafila muoyo wende mupuangane wa bumuntu bua diakalenga dia bana ba Adama. Kristo wakabasumba bonso ku muoyo wende. Kadi kabena bapeta bumpianyi ebu tshianana to. Badi ne bua kuikala ne lumu luimpe ku mêsu kua Nzambi, ludibu mua kupeta padibu bitabuja mulambu wa Yezu udi ubuikila mpekatu ne padibu balejila ditabuja adi ku butumike buabu. (Yone 3:16, 36; 1 Timote 2:5, 6; Ebelu 2:9; 5:9) Nsombelu webe udiku uleja ne: udi muangate mulambu eu ne mushinga anyi?

Bumpianyi bupetela mu Abalahama

5. Mmunyi muakaleja Abalahama ne: uvua wangata malanda ende ne Yehowa ne mushinga?

⁵ Bua Yehowa kukumbaja bidiye mulongolole bua buloba, wakenzela Abalahama malu mu mushindu wa pa buawu. Wakambila muena lulamatu au bua umbuke mu ditunga diabu aye mu buloba buvuaye yeye nkayende ne bua kumuleja. Abalahama wakitaba kayi welakana to. Abalahama mumane kufika mu buloba abu, Yehowa wakamba ne: ndelanganyi ya Abalahama ke ivua ne bua kupiana buloba abu, kadi ki nyeye Abalahama to. (Genese 12:1, 2, 7) Ntshinyi tshiakenza Abalahama? Wakitaba bua kuenzela Yehowa mudimu mu muaba wonso ne mu mushindu wonso uvuaye umuambila bua ndelanganyi yende ipete bumpianyi buayi. Abalahama wakenzela Yehowa mudimu mu buloba bua bende bidimu 100, too ne ku lufu luende. (Genese 12:4; 25:8-10) Wewe uvuaku mua kuikala muenze nanku anyi? Yehowa wakamba ne: Abalahama uvua “mulunda” wende.​—Yeshaya 41:8.

6. (a) Ntshinyi tshiakaleja Abalahama pakitabaye bua kulambula muanende? (b) Mbumpianyi kayi bua mushinga buvua Abalahama mua kushila ndelanganyi yende?

⁶ Abalahama wakenza bidimu bia bungi kumpala kua kulela muanende Isaka uvuaye munange bikole. Pakalua Isaka nsongalume, Yehowa wakambila Abalahama bua amulambule muanende eu. Abalahama kavua mumanye ne: ukavua pa kuenza muanda uvua uleja bualu buvua Nzambi nkayende ne bua kulua kuenza bua kufila Muanende bu tshia-bupikudi to. Bushuwa, wakenza tshivua Nzambi mumuambile. Ne pakavuaye pa kulambula Isaka, muanjelu wa Yehowa wakamukanda. (Genese 22:9-14) Yehowa ukavua muambe ne: malu avuaye mulaye Abalahama avua ne bua kukumbanyina mu Isaka. Ke bua tshinyi Abalahama wakitabuja ne: pavuabi mua kuikala ne mushinga, Nzambi uvua mua kubisha Isaka ku lufu, nansha muvua bualu bua nanku kabuyi buanji kuenzeka to. (Genese 17:15-18; Ebelu 11:17-19) Bu muvua Abalahama kayi mubenge ne muanende, Yehowa wakamuambila ne: “Ku diambuluisha dia dimiinu diebe bisamba bionso bia pa buloba nebidibeneshe.” (Genese 22:15-18, NW) Mêyi aa akaleja ne: Dimiinu uvuabu bambe mu Genese 3:15 anyi Masiya musungidi, uvua ne bua kuluila mu ndelanganyi ya Abalahama. Mbumpianyi kayipu bua mushinga buvuaye ne bua kuyishila!

7. Mmunyi muvua Abalahama, Isaka ne Yakoba baleje ne: bavua bangata bumpianyi buabu ne mushinga?

⁷ Abalahama kavua mumanye diumvuija dia tshivua Yehowa wenza dîba adi to, nansha muanende Isaka peshi muikuluende Yakobo bakalua ‘bapianyi nende ba mulayi [wa] muomumue’ kabavua pabu bamanye to. Kadi buonso buabu bavua beyemene Yehowa. Kabavua balamate makalenge a mu bimenga avua mu buloba abu nansha, bualu bavua batekemene tshintu tshitambe buimpe: ‘musoko udi ne bishimikidi, mulongolodi wawu ne muibaki wawu [muikale] Nzambi.’ (Ebelu 11:8-10, 13-16) Kadi ndelanganyi yonso ya Abalahama kayakangata ne mushinga bumpianyi buvua Abalahama muyishile to.

Bamue bantu bakapepeja bumpianyi buabu

8. Mmunyi muakaleja Esau ne: kavua wangata bumpianyi buende ne mushinga?

⁸ Esau, muanabute wa Isaka, kakangata bumuanabute buende ne mushinga. Wakapepeja bintu bia tshijila. Nenku dimue edi pavua Esau ne nzala, wakapanyisha bumuanabute buende kudi muanabu Yakoba. Wakabupanyisha ku tshinyi? Ku diampa ne bisekiseki! (Genese 25:29-34; Ebelu 12:14-17) Tshisamba tshivua malu avua Nzambi mulaye Abalahama ne bua kukumbanyina tshiakapatukila mu Yakoba, eu wakalua Nzambi kupesha dîna dipiadipia dia Isalele. Bumpianyi bua pa buabu abu buakabunzuluila njila wa masanka kayi?

9. Bua bumpianyi buabu bua mu nyuma, mmunyi muakapikudibua bana ba Yakoba anyi Isalele?

⁹ Mu tshikondo kampanda tshia nzala, Yakoba ne dîku diende bakaya mu Ejipitu. Bakavulanganamu ne kuluabu ba bungi, kadi bakalua kabidi bapika. Yehowa kavua mupue muoyo tshipungidi tshivuaye mudie ne Abalahama to. Mu tshikondo tshivua Nzambi mujadike, wakapatula bana ba Isalele mu bupika ne kubambilaye ne: uvua ne bua kubabueja mu “buloba budi ne mabele ne buitshi bia bungi,” buloba buvuaye mulaye Abalahama.​—Ekesode 3:7, 8; Genese 15:18-21.

10. Ku Mukuna wa Sinai, mmalu kayi makuabu a dikema akenzeka pa bidi bitangila bumpianyi bua bana ba Isalele?

¹⁰ Pavua bana ba Isalele mu njila batangile mu Buloba Bulaya, Yehowa wakabasangisha ku Mukuna wa Sinai. Wakabambila ne: ‘Binuatumikila dîyi dianyi, ne binuanemeka tshipungidi tshianyi, nuenu nenuikale bantu banyi ba munkatshi mua bantu bonso; bualu bua buloba buonso mbuanyi. Nuenu nenuikale kundi bu bukalenge bua bakuidi, bu tshisamba tshia tshijila.’ (Ekesode 19:5, 6) Kunyima kua bantu bonso bamane kuitaba bualu ebu ne dîyi dimue, Yehowa wakabapesha Mikenji yende; kavuaku muanji kuenzela tshinga tshisamba bualu bua nunku to.​—Musambu 147:19, 20.

11. Mbimue bintu kayi bia mushinga bivua mu bumpianyi bua mu nyuma bua bana ba Isalele?

¹¹ Tshisamba tshipiatshipia atshi tshiakapeta bumpianyi bulenga bua mu nyuma! Bavua batendelela Nzambi umuepele mulelela. Nzambi uvua mubapikule mu Ejipitu ne buobu nkayabu bakadimuena malu a dikema pakabapeshaye Mikenji ku Mukuna wa Sinai. Bumpianyi buabu buakavula kabidi pakapetabu makuabu ‘mêyi a Nzambi [a tshijila]’ ku diambuluisha dia baprofete. (Lomo 3:1, 2) Yehowa wakabasungula bua kuikalabu bantemu bende. (Yeshaya 43:10-12) Masiya anyi Dimiinu uvua ne bua kupatukila mu tshisamba tshiabu. Mikenji ivua yakula bualu buende, ne ivua ne bua kumumanyisha ne kubambuluisha bua kujingululabu ne: bavua nende dijinga. (Galatia 3:19, 24) Bavua ne bua kupeta mushindu wa kuenza mudimu pamue ne Masiya anyi Dimiinu au bu bukalenge bua bakuidi ne tshisamba tshia tshijila.​—Lomo 9:4, 5.

12. Nansha muakabuela bena Isalele mu Buloba Bulaya, ntshinyi tshiakapangilabu bua kupeta? Bua tshinyi?

¹² Yehowa wakafikisha bena Isalele mu Buloba Bulaya anu muvuaye mulaye. Kadi anu muakalua mupostolo Paulo kumvuija, bua dipanga diabu dia ditabuja, buloba abu kabuvua bushuwa ‘muaba wa dikisha’ to. Tshisamba etshi mu kabujima katshiakabuela mu “dikisha [dia Nzambi]” bualu katshiakajingulula dituku dia dikisha dia Nzambi diakatuadija kunyima kua difukibua dia Adama ne Eva ne katshiakenza malu mumvuangane ne tshipatshila tshiadi nansha.​—Ebelu 4:3-10, MMM.

13. Bua dibenga kuangata bumpianyi buabu bua mu nyuma ne mushinga, ntshinyi tshiakajimija tshisamba tshia Isalele mu kabujima?

¹³ Isalele wa ku mubidi uvua mua kuikala mukumbaje bungi buonso bua bantu badi ne bua kudia Bukalenge bua mu diulu ne Masiya bua kuikalabu bukalenge bua bakuidi ne tshisamba tshia tshijila. Kadi kabakangata bumpianyi buabu bulenga ebu ne mushinga to. Bantu bakese patupu ba mu Isalele wa ku mubidi ke bakitaba Masiya pakaluaye. Ke bua tshinyi anu bantu bakese ke bakabuela mu bukalenge bua bakuidi bukavuabu bamanyishe. Bakanyenga Isalele wa ku mubidi Bukalenge ne ‘bakabupa tshisamba tshidi tshikuama mamuma abu.’ (Matayo 21:43) Ntshisamba kayi atshi?

Bumpianyi bua mu diulu

14, 15. (a) Kunyima kua lufu lua Yezu, mmunyi muakatuadija bisamba kudibenesha ku diambuluisha dia “dimiinu” dia Abalahama? (b) Mbumpianyi kayi budi bena mu “Isalele wa Nzambi” bapeta?

¹⁴ Tshisamba tshiakapeshabu Bukalenge ebu ntshia “Isalele [wa] Nzambi” anyi Isalele wa mu nyuma udi muenza ne bayidi ba Yezu Kristo 144 000, balela ku spiritu. (Galatia 6:16; Buakabuluibua 5:9, 10; 14:1-3) Bamue ba munkatshi mua bantu aba 144 000 bavua bena Yuda ba ku mubidi, kadi ba bungi bavua bantu ba bisamba bia bende. Mushindu au ke wakatuadija kukumbana mulayi uvua Yehowa muambile Abalahama wa se: bisamba bionso bivua ne bua kudibenesha ku diambuluisha dia “dimiinu” diende. (Bienzedi 3:25, 26, NW; Galatia 3:8, 9) Pakakumbana mulayi au musangu wa kumpala, Yehowa Nzambi wakela bantu ba bisamba bia bende manyi a spiritu munsantu ne kuluabu bana bende ba mu nyuma, bana babu ne Yezu Kristo. Nenku buobu pabu bakalua tshitupa tshibidi tshia “dimiinu” adi.​—Galatia 3:28, 29.

¹⁵ Kumpala kua Yezu kufua, wakamanyisha bena Yuda bavua ne bua kuikala mu tshisamba tshipiatshipia etshi bua tshipungidi tshipiatshipia tshivua ne bua kujadikibua ku mashi ende. Pavuabu bitabuja mulambu au, bantu bavua babuela mu tshipungidi atshi bavua bavuijibua “bapuangane kashidi.” (Ebelu 10:14-18, NW) Uvua mua ‘kubavuija bakane’ ne kubabuikidila mpekatu yabu. (1 Kolinto 6:11, MML) Nenku, mu ngumvuilu au ke mudibu anu muvua Adama kumpala kua kuenzaye mpekatu. Kadi bantu aba kabena ne bua kusomba mu mparadizu pa buloba to. Yezu wakamba ne: uvua uya kubalongoluela muaba mu diulu. (Yone 14:2, 3) Badi balekela malu avuabu batekemene pa buloba bua kupeta ‘bumpianyi budibu babalamine mu diulu.’ (1 Petelo 1:4, MML) Ntshinyi tshidibu baya kuenzamu? Yezu wakumvuija ne: ‘Ndi ngenza nenu tshipungidi bua bukalenge.’​—Luka 22:29, NW.

16. Mmudimu mulenga kayi udi muindile bena Kristo bela manyi kumpala eku?

¹⁶ Pikalabu bakadi mu diulu, bantu aba bakokesha ne Kristo nebumbushe ntatu yonso idi ditombokela bumfumu bua Yehowa dikebeshe pa buloba. (Buakabuluibua 2:26, 27) Bu mudibu tshitupa tshibidi tshia dimiinu dia Abalahama, nebatuadile bantu ba bisamba bionso mabenesha a muoyo mupuangane. (Lomo 8:17-21) Ebu mbumpianyi bua mushinga budibu nabu!​—Efeso 1:16-18.

17. Mbintu kayi bia mu bumpianyi buabu bidi bena Kristo bela manyi bapeta patshidibu ba buloba?

¹⁷ Kadi bumpianyi bua bayidi bela manyi ba Yezu kabuena anu buapetabu mu matuku atshilualua to. Yezu wakabambuluisha bua kumanya Yehowa, Nzambi umuepele mulelela, mu mushindu uvua munga muntu kayi mua kubamanyishaye to. (Matayo 11:27; Yone 17:3, 26) Ku mêyi ende ne ku tshilejilu tshiende, wakabalongesha tshidi ‘kueyemena Yehowa’ ne kumutumikila biumvuija. (Ebelu 2:13; 5:7-9) Yezu wakabapesha dimanya dia bulelela budi butangila malu adi Nzambi mulongolole ne wakabajadikila ne: spiritu munsantu uvua ne bua kubambuluisha bua kumvuabu malu aa bimpe menemene. (Yone 14:24-26) Wakabaleja mushinga wa Bukalenge bua Nzambi. (Matayo 6:10, 33) Yezu wakabapesha kabidi mudimu wa kuyisha ne kuvuija bantu bayidi mu Yelushalema, mu Yudaya, mu Samalea ne mu bitupa bia ku mfudilu kua buloba.​—Matayo 24:14; 28:19, 20; Bienzedi 1:8.

Bumpianyi bua mushinga bua musumba munene

18. Mmu mushindu kayi mudi mulayi wa Yehowa wa se: bisamba bionso nebidibeneshe ku diambuluisha dia “dimiinu” dia Abalahama wenda ukumbana lelu?

¹⁸ Bidi bimueneka ne: bungi buonso bua Isalele wa mu nyuma anyi “kasumbu kakese” ka bapianyi ba Bukalenge aku bukadi bukumbane. (Luka 12:32, MML) Kukadi bidimu bia bungi mpindieu, Yehowa mmutangije ntema ku mudimu wa disangisha musumba munene wa bantu bakuabu ba mu bisamba bionso. Nenku, mulayi uvua Yehowa muambile Abalahama wa se: bisamba bionso bivua ne bua kudibenesha ku diambuluisha dia “dimiinu” diende udi wenda ukumbana miaba yonso. Bantu aba badi Yehowa mubeneshe badi pabu bamuenzela mudimu wa tshijila ne mbajadike ne: bua kupetabu lupandu badi ne bua kuitabuja Muana wa mukoko wa Nzambi: Yezu Kristo. (Buakabuluibua 7:9, 10) Ukadiku muitabe lubila ludi Yehowa mukuele bua wewe kuikala mu tshisumbu etshi tshia bantu badi ne disanka anyi?

19. Mbumpianyi kayi budibu batekemene kudi bantu ba bisamba bia bende badi Nzambi ubenesha mpindieu?

¹⁹ Mbumpianyi kayi bua mushinga budi Yehowa upesha bantu badi kabayi mu kasumbu kakese? Ki mbumpianyi bua mu diulu to. Mbumpianyi buvua Adama mua kuikala mushile ndelanganyi yende, mmumue ne: mushindu wa kupeta muoyo wa tshiendelele mupuangane mu mparadizu wikala mua kutangalaka pa buloba buonso ku kakese ku kakese. Mu buloba abu ‘lufu kaluakuikalamu kabidi; madilu kaakuikalamu kabidi; nansha muadi, nansha kanyinganyinga kabidi.’ (Buakabuluibua 21:4) Nenku Dîyi dia Nzambi didi dikuambila wewe ne: ‘Eyemena Yehowa ne enza malu mimpe; nunku neushikame mu buloba, neudie biakudia mu dimueyemena diebe. Wikale ne disanka diebe mu Yehowa, ne yeye neakupe milombu idi mutshima webe ulomba. Tshitupa tshîpi katshiyi tshianji kulepa, muntu mubi kêna wikalaku kabidi. Kadi badi ne mitshima mipuekele nebapiane buloba, mioyo yabu neyisanke mu ditalala dikumbane. Bantu bakane nebapiane buloba, nebashikamemu tshiendelele.’​—Musambu 37:3, 4, 10, 11, 29.

20. Mmunyi mudi “mikoko mikuabo” ipeta tshitupa tshinene tshia bumpianyi bua mu nyuma bua bena Kristo bela manyi?

²⁰ “Mikoko mikuabo” ya Yezu idi ne bumpianyi pa buloba bulombola kudi Bukalenge bua mu diulu. (Yone 10:16a) Nansha muikalabu kabayi mua kuya mu diulu, badi bashala ne tshitupa tshinene tshia bumpianyi bua mu nyuma budi nabu bela manyi. Ku diambuluisha dia kasumbu kajima ka bela manyi aka anyi “mupika wa lulamatu ne wa budimu” ke kudi mikoko mikuabu mipete mushindu wa kumvua milayi milenga idi mu Dîyi dia Nzambi. (Matayo 24:45-47; 25:34, NW) Bonso pamue, bela manyi ne mikoko mikuabu, mbamanye ne badi batendelela Nzambi umuepele mulelela: Yehowa. (Yone 17:20, 21) Bonso pamue, badi bela Nzambi tuasakidila bua mushinga wa mulambu wa Yezu udi ubuikila mpekatu. Badi benza mudimu pamue mu tshisumbu tshimue tshilombola kudi Mulami umue: Yezu Kristo. (Yone 10:16b) Bonso badi benza tshisumbu tshia bana betu ba buloba bujima. Bonso badi ne disanka dia kuikala Bantemu ba Yehowa ne ba Bukalenge buende. Nanku biwikala musadidi mudilambule kudi Yehowa ne mutambule, bionso ebi mbumpianyi buebe bua mu nyuma.

21, 22. Mmunyi mutudi tuetu bonso mua kuleja ne: tudi tuanyisha bumpianyi buetu bua mu nyuma?

²¹ Bumpianyi bua mu nyuma ebu budi ne mushinga kayi ku mêsu kuebe? Biwikala ubuangata ne mushinga wa bungi, utu umona kuenza disua dia Nzambi bu tshintu tshia mushinga wa bungi menemene mu nsombelu webe anyi? Bua kujadika bualu ebu, utuku uteleja mubelu wa mu Dîyi diende ne udi bulongolodi buende bukupesha bua kuikala kubuela mu bisangilu bia tshisumbu tshia bena Kristo anyi? (Ebelu 10:24, 25) Udiku utungunuka ne kuenzela Nzambi mudimu nansha mu ntatu bua kuleja ne: bumpianyi abu budi ne mushinga wa bungi ku mêsu kuebe anyi? Dianyisha diebe bua bumpianyi ebu ndikole dikumbane bua kukuambuluisha bua kukandamena bualu buonso budi mua kukusaka bua kulonda nsombelu udi mua kukufikisha ku dijimija bumpianyi ebu anyi?

²² Tuetu bonso tuangatayi bumpianyi bua mu nyuma budi Nzambi mutupeshe ne mushinga. Tushale batuishile mêsu etu ku Mparadizu udi ulua kumpala ne tudituayi mu dienza midimu ya mu nyuma idi Yehowa utupesha mpindieu. Tuetu benze bua nsombelu wetu ikale mushindamene pa malanda etu ne Yehowa, netshikale tshijadiki tshia se: tudi tuangata bumpianyi budi Nzambi mutupeshe ne mushinga wa bungi. Tuikalayi munkatshi mua bantu badi bamba ne: ‘Nenkutumbishe, Nzambi wanyi, Mukalenge wanyi. Nemvudijile dîna diebe disanka too ne tshiendelele.’​—Musambu 145:1.

Udi mua kumvuija munyi?

• Bu Adama mushale ne lulamatu kudi Nzambi, mbumpianyi kayi buvuaye mua kuikala mutushile?

• Mmunyi muvua ndelanganyi ya Abalahama miangate bumpianyi buayi?

• Mbintu kayi bidi mu bumpianyi budi nabu bayidi bela manyi ba Kristo?

• Mbumpianyi kayi budi nabu bena mu musumba munene, ne mmunyi mudibu baleja ne: badi babuangata ne mushinga?

[Bimfuanyi mu dibeji 20]

Nzambi wakalaya ndelanganyi ya Abalahama bumpianyi bua mushinga mukole

[Bimfuanyi mu dibeji 23]

Udiku wanyisha bumpianyi buebe bua mu nyuma anyi?