Nzambi ke utu utukebela ntatu anyi?

PAVUA muana wa bakaji wa Marion ukavua mukole usama disama dikole dia buongo, Marion wakenza tshidi muntu yonso mua kuenza.a Wakasambila Nzambi bua amuambuluishe. Marion udi wamba ne: “Tshiena mvuluka tshikondo tshikuabu tshinkavua mudiumvuaku kabidi nanku nkayanyi, tshiyi ne dikuatshisha to.” Panyima pa matuku disama dia muanende wa bakaji diakapita bukole, nunku Marion wakabanga kuelakana bualu bua dikalaku dia Nzambi. Uvua udiebeja ne: “Bualu ebu mbuenzeke bua tshinyi?” Kavua ufika ku diumvua tshivua Nzambi wa dinanga udi uditatshisha bua bantu mua kumuelela nyima to.

Marion kêna anu nkayende mu nsombelu eu nansha. Bantu ba bungi pa buloba bujima bakadi badiumvuaku bu ne: Nzambi uvua mubalekele tshikondo tshia dikenga diabu. Lisa udi wamba kunyima kua bamane kushipa muana wa muanende wa bakaji ne: “Ntshidi anu nduangana ne lukonko elu: ‘Bua tshinyi NZAMBI mmulekele malu mabi atufikila?’ Tshiena mujimije ditabuja dianyi dionso kudi Nzambi to, kadi ndikepele bikole.” Bia muomumue, kunyima kua bamane kushipa muana mutekete wa balume wa mamu kampanda, mamu au wakamba ne: “Nzambi kavua munsambe nansha kakese mu bualu buvua bunkuate. Ki mundeje nansha tshimanyinu tshia mudiye uditatshisha bua bualu buanyi anyi ungumvuila luse to.” Wakamba kabidi ne: “Tshiena mua kufuila Nzambi luse nansha bia munyi.”

Bakuabu batu bafikila Nzambi munda padibu batangila malu mabi adi akuata bantu badi babanyunguluke. Badi bamona matunga muule tente ne bupele ne nzala, bena tshimuangi kabayi ne wa kutekela muoyo, bungi kabuyi kubala bua bana ba nshiya bualu bua disama dia SIDA ne bantu miliyo mivule bakenga ne masama makuabu. Padi bantu ba bungi bapetangana ne malu aa, batu badiula Nzambi bamba mudiye ubalengulula utangila malu abu anu ne mêsu.

Kadi mu bulelela, katuena ne bua kuela Nzambi tshilumbu pambidi bua ntatu idi ifikila bantu to. Kudi malu manene adi atusaka bua kuitaba ne: mu matuku makese emu Nzambi neajikije ntatu idi ikuata bantu. Tudi tukulomba bua ubale tshiena-bualu tshidi tshilonda bua kumona ne: Nzambi udi uditatshisha bua bualu buetu menemene.

[Mêyi adi kuinshi]