Bua tshinyi bavule kabena bitaba ne: bitendelelu bidi mua kusanga bantu?
“UNANGE muntu nebe.” (Matayo 22:39, MMM) Bitendelelu bia bungi bitu bitumbisha dîyi dia mushinga edi. Bu biobi bikale bilongesha bimpe bena kuitabuja babi bua kunanga muntu nabu, bavua mua kuikala badisange pamue mu buobumue. Kadi ke tshiutu umona anyi? Bitendelelu bidiku bisaka bantu ku dikala mu buobumue anyi? Matuku adi panshi aa bavua bele bantu ba mu ditunga dia Allemagne lukonko elu: “Bitendelelu bidi bisanga bantu pamue anyi, peshi mbimueneke bu bidi bibatapulula?” Bantu 22 pa 100 bakandamuna ne: bitendelelu bidi bisanga bantu, kadi bantu 52 pa 100 bakandamuna bobu ne: bidi bipandulula anyi bitapulula bantu. Pamuapa bena mu ditunga dienu badi bela pabu meji a muomumue.
Bua tshinyi bantu ba bungi badi bela mpata bua se: bitendelelu bidi mua kusanga bantu? Pamuapa mbua malu a kale adibu bamanye. Pamutu pa kusanga bantu mu buobumue, misangu mivule bitendelelu bitu bibakosolola. Imue misangu batu benza malu a tshikisu makuate buôwa mu dîna dia bitendelelu. Tangilaku bimue bilejilu bia mu bidimu 100 bidi bishale ebi.
Benzeja kudi bitendelelu
Mu mvita mibidi ya buloba bujima, bena Katolike ba mu ditunga dia Croatie ne bena Ortodokse ba mu ditunga dia Serbie bavua mu tshitupa tshia Balkan bakaluishangana. Bisumbu ebi bionso bibidi bivua biamba muvuabi bilonda Yezu uvua mulongeshe bayidi bende bua kunanga muntu nabu. Pabi mvita yabi yakafikisha ku tshiakabikila mukebuludi kampanda bu “dishipangana dia bantu dibi ditambe dikuate ne buôwa dia katshia ne katshia.” Mubidi wakavuayila bantu pakumvuabu ne: balume, bakaji ne bana bapite pa 500 000 bakafua.
Mu 1947, ditunga dia Inde divua ne bantu bafike ku miliyo 400, bungi buvua bu tshia bitanu tshimue tshia bantu bonso ba pa buloba: nangananga ba Hindu, ba Mizilma ne ba Sikhs. Pakakosololabu ditunga dia Inde, kuakapatuka ditunga dia Pakistan dia bamizilma. Tshikondo atshi bantu bavua banyema tshimvundu mu Inde ne mu Pakistan bavua babosha, babakuma, babakengesha bibi ne babasa bingoma misangu ya bungi ivua bantu bashipangane bua malu a bitendelelu.
Kusakidila ku malu mabi aa, nkujuke kabidi ku ntuadijilu kua bidimu bia 2000 bualu bukuabu bua njiwu: terorisme anyi mianda ya tshikisu idi itshingishangana. Lelu, pa buloba bujima bantu badi mu dipampakana bua tshikisu tshia mushindu eu; ne bisumbu bia bungi bia ba teroriste anyi bena tshikisu aba bidi bidiamba mudibi ne diumvuangana ne bitendelelu. Bantu kabena bamona bitendelelu ne: bidi bibasaka ku buobumue to. Kadi batu bamona misangu ya bungi ne: mu bitendelelu mudi tshikisu ne diabulukangana. Nunku kabiena bikemesha padi tshikandakanda tshia FOCUS tshia mu Allemagne tshifuanyikija bitendelelu binene bia pa buloba (bena Buddha, Bukua-buena-Kristo, bena Confucius, ba Hindu, ba Mizilma, Buena Yuda, ne bena Tao) ne kapia ka mu tshingoma.
Dikokangana didi mu bitendelelu
Padi bimue bitendelelu biluishangana, munda mua bikuabu pamu mudi dikokangana. Tshilejilu, bidimu bidi panshi ebi dikokangana pa malongesha ndipandulule bitendelelu bia Bukua-buena-Kristo. Bamfumu ba bitendelelu ne bena kuitabuja pabu batu bajula nkonko ne: Dikanda lulelu ndianyishibue anyi? Kadi kutula mafu? Badi mua kutambuisha bantu bakaji bunsaserdose anyi? Mmunyi mudi bitendelelu ne bua kumona diangatangana dia balume ne balume anyi dia bakaji ne bakaji? Bitendelelu bidi mua kuanyisha mvita anyi? Pa kumona dikokangana edi, bantu ba bungi badi badiebeja ne: ‘Mmunyi mudi bitendelelu mua kusanga bantu mu buobumue padibi kabiyi mua kusanga bena kuitabuja babi mu buobumue?’
Mbimueneke patoke se: bitendelelu ki mbifike ku disanga bantu mu buobumue to. Kadi mu bitendelelu bionso mutu matapuluka anyi? Kudiku tshitendelelu tshidi tshishilangane ne bikuabu ebi tshidi mua kusanga bantu mu buobumue anyi?
[Tshimfuanyi mu dibeji 3]
Bampulushi batapike mu tshimvundu tshivua pankatshi pa bitendelelu bia mu Inde mu 1947
[Mêyi a dianyisha]
Foto wa Keystone/Getty Images