‘Nzambi udi mpokolo wa dinanukila ne wa disambangana’ neakuambuluishe

KUKADI bidimu bitue ku 2 000, Paulo (umue wa ku bafundi ba Bible) wakamba muvua Yehowa Nzambi muikale ‘mpokolo wa dinanukila ne wa disambangana.’ (Lomo 15:5, MMV) Bu mudi Bible utujadikila ne: Yehowa katu ushintuluka, tuikale bashindike ne: utshidi usamba bantu bende. (Yakobo 1:17) Bible udi uleja ne: Yehowa udi usamba bantu mu mishindu mishilangane. Mmishindu kayi ayi? Nzambi udi ukolesha bantu badi bamusambila bua kumulomba diambuluisha. Udi usaka kabidi bena Kristo balelela bua kusamba bena Kristo nabu. Ne mmufundishe mu Bible bilejilu bidi bitua ku muoyo, bidi bitamba kukolesha baledi badi bafuishe bana. Tumonayi mishindu isatu idi Nzambi usambangana eyi.

‘Yehowa wakamumvuila’

Mukalenge Davidi wakafunda bua Mufuki wetu Yehowa ne: ‘Nuenu bantu, numueyemene misangu yonso, nupumune milombu ya mu mitshima yenu kumpala kuende; Nzambi udi tshinyemenu tshietu.’ (Musambu 62:8) Bua tshinyi Davidi uvua weyemena Yehowa nunku? Davidi wakafunda buende yeye nkayende ne: ‘Muena dikenga eu wakadila kudiye, ne Yehowa wakamumvuila, wakamusungila ku makenga ende onso.’ (Musambu 34:6) Mu ntatu yonso ivua Davidi upeta, uvua anu usambila Yehowa bua amuambuluishe, ne Yehowa uvua anu umuambuluisha. Bua malu avua Davidi mumone, uvua mumanye ne: Nzambi uvua ne bua kumukuatshisha ne kumuambuluisha bua kutantamenaye ntatu.

Baledi badi bafuishe badi ne bua kumanya ne: Yehowa neabakuatshishe pikalabu ne dibungama dikole anu muvuaye muambuluishe Davidi. Badi mua kusambila Nzambi ‘udi umvua milombo,’ bualu neabambuluishe. (Musambu 65:2) William, utuvua batele mu tshiena-bualu tshishale, wakafunda ne: “Misangu ya bungi ntu ngumvua anu bua kufua pantu ngela meji bua muananyi, kadi ntu ndomba Yehowa bua angambuluishe. Utu anu umpesha bukole ne dikima dia kutungunuka ne kuikala ne muoyo.” Wewe pebe, wewe musambile Yehowa Nzambi munene wa mu diulu ne ditabuja, neakuambuluishe. Yehowa Nzambi udi ulaya bantu bonso badi badienzeja bua kumukuatshila mudimu ne: ‘Meme, Yehowa Nzambi webe, nenkukuate ku tshianza tshiebe tshia balume, nkuambila ne: Kutshinyi, nenkukuatshishe.’​—Yeshaya 41:13.

Balunda balelela badi mua kukuambuluisha

Baledi badi bafuishe bana batu imue misangu bajinga kuikala pa nkayabu bua kudila ne kutukija. Kadi ki mbimpe bua bikale babenga kusomba ne bantu bakuabu munkatshi mua matuku a bungi to. Bilondeshile Nsumuinu 18:1, muntu ‘udi udipandulula kudi banga bantu’ udi udienzela bibi. Nunku, bantu badi bafuishe badi ne bua kuenza muabu muonso bua kabikadi batamba kudisombela nkayabu to.

Balunda bena Kristo badi mua kuambuluisha bantu badi mu madilu bikole. Nsumuinu 17:17 udi wamba ne: ‘Mulunda utu wananga mu bikondo bionso, mmuanetu utu waleja bulela mu tshikondo tshia dikenga.’ Lucy, utuvua batele kabidi mu tshiena-bualu tshishale, uvua mumone muvua balunda bende bamusambe pavuaye mufuishe muanende. Wakafunda bua balunda bende ba mu tshisumbu wamba ne: “Bivua bitukolesha ku muoyo bikole pavuabu balua kututangila, nansha muvuabu kabayi ne tshia kuamba misangu mikuabu. Mulunda wanyi umue uvua ulua kuntangila pamvua nkayanyi ku mbelu. Uvua mumanye ne: nengikale ndila, ne imue misangu uvua ulua bua kundidisha. Mukuabu uvua umbikila matuku onso bua kunkolesha ku muoyo. Bakuabu pabu bavua batubikila kuabu bua kudia, ne batshitu anu batubikila.”

Nansha mutu dibungama dikole ditu baledi bumvua patubu bafuisha muana kadiyi dijika lukasa, badi mua kukola ku muoyo bobu balomba Nzambi ne bakeba bua kusomba ne balunda babu bena Kristo. Baledi ba bungi bakadi bafuishe muana bakadi bamone mudi Yehowa muikale nabu. Bushuwa, Yehowa ‘udi ukolesha badi ne mitshima minyingalale, udi ujingila bilamba pa mputa yabu.’​—Musambu 147:3.

Bilejilu bia mu Bible bidi mua kukusamba

Pa kumbusha disambila ne balunda, Bible udi kabidi mua kusamba bantu badi mu madilu. Bilejilu bidimu bidi bileja ne: Yezu udi ne dijinga dikole ne udi kabidi ne bukole bua kujula bantu ku lufu bua kujikija dibungama dia baledi badi bafuishe. Bilejilu ebi bidi bisamba bantu badi bafuishe bikole. Tumonayi bilejilu bibidi.

Luka nshapita wa 7 udi uleja tshivua tshienzeke pavua Yezu mupetangane ne bantu bavua baya ku nkita. Bavua baya kujika muana umuepele wa mukaji mukamba kampanda wa mu musoko wa Naina. Mvese wa 13 udi wamba ne: ‘Pakamutangila Mukalenge, yeye wakamufua luse, wakamuambila ne: Kudidi.’

Kakuena bantu ba bungi badi mua kulekesha mamu udi muanende umuepele muikale panshi muadi to. Kadi bua tshinyi Yezu uvua muenze nanku? Bualu uvua mumanye ne: dibungama dia mamu au dikavua pa kujika. Bible udi utungunuka ne kuamba ne: Yezu ‘wakalua pabuipi, wakalenga tshituadilu tshia tshitalu tshianza; batuadi batshi bakimana. Yezu wakamba ne: Nsongalume, ndi nkuambila ne: Bika. Wakadi mufue wakabika, wakashikama, wakabanga kuakula, Yezu wakamufila kudi mamuende.’ (Luka 7:14, 15) Dîba adi, mamu eu uvua mua kuikala mudile kabidi, kadi musangu eu uvua udila bua disanka.

Dituku dikuabu, tatu mukuabu diende Yailo wakalua kudi Yezu bua kumulomba bua ambuluishe muanende wa bakaji wa bidimu 12 uvua usama bikole. Kadi muntatshi mukese pashishe, Yailo wakumvua ne: muanende uvua mufue. Bualu ebu buakamutekesha bikole, kadi Yezu kumuambila ne: ‘Kutshinyi, itabuja anu kuitabuja.’ Pakafikabu kumbelu kua Yailo, Yezu wakaya mu nzubu muvua tshitalu tshia muana. Wakamukuata ku tshianza e kuamba ne: ‘Muananyi mukaji, bika.’ Ntshinyi tshiakenzeka? ‘Muana wakabika lukasa, wakenda.’ Baledi bende bakenza tshinyi? “Bakatamba kukema,” ne kusanka bikole. Pavua Yailo ne mukajende bakidila muanabu, bakumvua disanka dia bungi. Bivua anu bu tshilota.​—Mâko 5:22-24, 35-43.

Bilejilu bia mu Bible ebi bidi biakula bua mudi bana babika ku lufu bidi bileja baledi badi bafuishe tshidibu mua kuindila. Yezu wakamba ne: ‘Kanukemi bua bualu ebu; bualu bua dîba nedilue diumvua bonso badi mu nkita dîyi diende, nebajuke.’ (Yone 5:28, 29) Yehowa mmulongolole bua Muanende abishe bantu ku lufu. Bana bungi kabuyi kubala bakadi bafue nebumvue ‘dîyi diende’ pabambilaye ne: ‘Bikayi.’ Bana abu nebatuadije kabidi kuenda ne kuakula. Anu bu Yailo ne mukajende, baledi ba bana abu “nebasanke pabu bikole bia dikema.”

Wewe mufuishe muanebe, umanye ne: Yehowa udi mua kushintulula dibungama diebe dilua disanka pamubishaye. Kadi bua wewe kupeta disanka edi, mbimpe utumikile mubelu wa mufundi wa Misambu eu: ‘Kebayi bienu Yehowa ne bukole buende, kebayi mpala wende matuku onso. Nuvuluke bienu bienzedi bia kukema biakenzeye, malu ende a kukema.’ (Musambu 105:4, 5) Eyowa, enzela Yehowa Nzambi mulelela mudimu, umutendelele anu mudiye musue.

Neupete tshinyi wewe mutuadije ‘kukeba Yehowa’ mpindieu? Disambila nedikale dikukolesha, balunda bebe bena Kristo nebikale bakusamba ne dilonga dia Bible nedilengeje nsombelu webe. Mu matuku adi kumpala neumone kabidi muikala Yehowa mua kuenza ‘malu a kukema’ bua wikale ne disanka dia kashidi ne bana bebe bauvua mufuishe.

[Kazubu mu dibeji 5]

“Luaku ne mamu uvua mufuishe bana babidi au”

Kehinde ne mukajende Bintu m’Bantemu ba Yehowa ba mu ditunga dia Nigéria bavua bafuishe bana babidi mu njiwu ya mashinyi. Katshia anu tshikondo atshi, batu ne dibungama dikole bua lufu lua bana babidi abu. Nansha nanku, Yehowa udi ubambuluisha bualu badi bamueyemena, ne badi batungunuka ne kumanyisha bena mutumba babu mukenji wa disanka udi mu Bible.

Bantu bakuabu bavua bamone muvua Kehinde ne Bintu bikale batukije ne bikale ne bukole. Dimue dituku mamu mukuabu diende Ukoli kuambila umue wa ku balunda ba Bintu ne: “Luaku ne mamu uvua mufuishe bana babidi musangu umue ne utshidi uyisha dîyi dia Nzambi. Ndi mmusue kumanya tshidi tshimupesha bukole.” Pavua Bintu mufike kua mamu Ukoli, mamu eu wakamuambila ne: “Ndi musue kumanya bua tshinyi utshidi uyisha malu a Nzambi uvua mushipe bana bebe. Nzambi wakangata muananyi wa bakaji umue umvua nende. Katshia apu, tshitu musue kabidi malu a Nzambi to.” Bintu wakangata Bible wende bua kumumvuija bua tshinyi bantu batu bafua, ne bua tshinyi tudi mua kuikala bashindike ne: bantu batudi bafuishe nebabike.​—Bienzedi 24:15; Lomo 5:12.

Pashishe, mamu Ukoli wakamba ne: “Mvua ngela meji ne: Nzambi ke utu ushipa bantu. Kadi mpindieu ndi mumanye bulelela.” Wakatuadija kulonga Bible ne Bantemu ba Yehowa bua kumanya bimpe malu adi Nzambi mulaye.

[Kazubu mu dibeji 6]

‘Ndi musue kusamba bantu, kadi tshiena mumanye tshia kuenza to’

Padi bena mu dîku dia muana udi mufue bumvua dibungama dia bungi, balunda babu badi mua kupanga tshia kuenza. Mbasue kuambuluisha bena mu dîku adi, kadi badi batshina ne: badi mua kuamba anyi kuenza bualu kampanda budi mua kubabungamija kabidi bikole. Bua muntu udi udiambila ne: ‘Ndi musue kusamba bantu, kadi ntshiena mumanye tshia kuenza to,’ udi mua kutangila malu adi alonda aa.

❖ Ki mbimpe kuepuka badi bafuishe bualu kuena mumanye tshia kuamba anyi tshia kuenza to. Dibasombesha tshianana didi dibakolesha. Wewe kuyi mumanye tshia kuamba, udi mua kubela mu tshitupa ne kubambila mudi bualu abu bukutonde. Nebibaleje mudi malu abu akutonda. Udi utshina ne: wewe mutuadije kudila, neuvudije kanyinganyinga kabu anyi? Bible udi wamba ne: “Nudile ne badi badila.” (Lomo 12:15) Muadi webe udi uleja muudi pebe unyingalala, ne bualu ebu nebubasambe.

❖ Enza bualu kampanda. Udi mua kulambila badi bafuishe biakudia anyi? Udi mua kubasukuila malongo anyi? Udi mua kubayila nansha mu tshisalu anyi? Ki mbimpe kubambila ne: “Nudi nukeba ne: nnuambuluishe anyi?” Nansha wewe muambe mêyi aa ne muoyo mujima, baledi badi bafuishe nebamone ne: kuena ne mushindu wa kubambuluisha bualu udi ne bia bungi bia kuenza. Kadi udi mua kuamba ne: “Mpeshayiku mudimu wa kuenza.” Pashishe, enza tshidibu bakuambila. Ki mbimpe kubuela mu nzubu yabu ya munda anyi mu malu abu to.

❖ Ki mbimpe kubambila ne: “Ndi mumanye tshinudi numvua.” Muntu ne muntu utu ne muende mudiye umvua padiye ufuisha. Nansha biwikala pebe ukadi mufuishe muana, kuena mumanye tshidibu bobu bumvua menemene to.

❖ Nekupite matuku a bungi bua malu kupinganawu muawu ne kale kakese. Udi mua kutungunuka ne kubambuluisha misangu yonso iudi ne mushindu. Ku ntuadijilu, bantu ba bungi batu balua kusamba dîku didi mu madilu, kadi ki mbikumbane to. Utungunuke ne kubatangila nansha panyima pa mbingu ne ngondo ya bungi.a

[Mêyi adi kuinshi]

[Bimfuanyi mu dibeji 7]

Bible udi uleja ne: Yezu udi ne bukole ne dijinga dia kubisha bana bakadi bafue