Mapa makumbanyine Mukalenge

EWE musue kupesha muntu kampanda wa mushinga mukole dipa, neumupeshe tshinyi? Mu bikondo bivuabu bafunda Bible, bimue bintu bia mupuya muimpe bivua ne mushinga anu bu ngolo, bikumbane bu dipa dia kupesha mukalenge.a Ke bualu kayi mu bintu bivua bena lubuku lua mitoto bapeshe “mukalenge wa bena Yuda” muvua bintu bibidi bia mupuya muimpe.​—Matayi 2:1, 2, 11.

Bible udi kabidi wamba ne: pavua mukalenge mukaji wa Sheba muye kutangila Solomo, ‘wakamupa ntalanta ya or lukama ne makumi abidi, ne bintu bia mupuya muimpe bia bungi, ne mabue a mushinga mukole; kakuakadi bintu bia mupuya muimpe bikuabu bu biakapa mukalenge mukaji wa Sheba Mukalenge Solomo.’b (2 Kulondolola 9:9) Bakalenge bakatumina kabidi Solomo bintu bia mupuya muimpe bu tshimanyinu tshia muoyo wabu muimpe.​—2 Kulondolola 9:23, 24.

Bua tshinyi bintu bia mupuya muimpe ebi ne bikuabu bidibu batele bivua ne mushinga mukole mu bikondo bivuabu bafunda Bible? Bualu bavua benza nabi mudimu munene bu mudi: kulengeja nabi mubidi, benza nabi mudimu mu malu a ntendelelu ne pavuabu bajika bitalu. (Tangila kazubu ka ne: “Dienza mudimu ne bintu bia dipembu dimpe mu bikondo bivuabu bafunda Bible.”) Pa kumbusha dienza nabi midimu minene, bintu bia mupuya muimpe ebi bivua ne mushinga wa bungi bualu bavua bafuma nabi ntanta mile ne bavua babipanyisha ku mushinga mukole.

DIPITSHILA MU TSHIPELA TSHIA ARABIE

Mu bikondo bivuabu bafunda Bible, imue mitshi ya mupuya muimpe ivua itoloka mu tshibanda tshia Yadene. Kadi bintu bikuabu bia mupuya muimpe bivua bifumina mu matunga makuabu. Bible udi utela mishindu mishilashilangane ya bintu bia mupuya muimpe. Bua bidi bitambe kumanyika tudi ne: safran, alowe, mafuta a mitshi, sinamone, musenga wa manananshi ne wa mula. Pa kumbusha ebi, kuvua kabidi bintu bia kulengeja nabi biakudia bu mudi tshisosa tshia kimen, tshia mante ne tshia anete.

Bintu bia mushinga mukole ebi bivua bifumina kuepi? Alowe, kasia ne cinnamone bavua babipeta muaba udi ditunga dia Chine, dia Inde ne dia Sri Lanka lelu. Bintu bia mupuya muimpe bu mudi mula ne musenga wa manananshi bivua bifumine ku mitshi ne ku bisosa bia mu bipela kumbukila ku Sud kua Arabie too ne mu Somalie mu Afrike. Nare uvua yeye anu mu mikuna ya Himalaya mu Inde.

Bua kufikisha bintu bia mupuya muimpe mu Isalele, bavua ne bua kupitshila nabi mu Arabie. Mukanda kampanda wakumvuija ne: “Bu muvuabu ne bua kupitshila ne bintu bia mupuya muimpe ebi mu Arabie, mu bidimu binunu bibidi kumpala kua Yezu, Arabie wakalua muaba uvuabu bapanyina bintu bia bungi pankatshi pa matunga a ku Est ne a ku Ouest.” (The Book of Spices) Bimenga bia kale, ngumbu ne miaba ivua bangenda mushinga batudila mu Négueb wa ku Sud kua Isalele, mbileje ne: muaba au ke uvua njila ya bangenda mushinga ba bintu bia mupuya muimpe. Tshikandakanda kampanda tshidi tshiamba ne: Malu aa adi kabidi “aleja muvua bungenda mushinga buvua buenzeka ku Sud kua Arabie too ne ku Mbuu wa Mediterane buvua bupetesha bantu makasa a bungi.”​—The World Heritage Centre of UNESCO.

Bangenda bavua ne tshibidilu tshia kuambula bintu bia mupuya muimpe ebi, benza nabi luendu lua mutantshi wa kilometre 1 800, bapitshila mu Arabie. (Yobo 6:19) Bible udi wakula bua bangenda bena Yishemaele bavua bambule bintu bia dipembu dimpe bu mudi ‘bilabu bia mupuya muimpe ne manananshi, bavua baya kubisumbisha mu Ejipitu.’ (Gen 37:25, MMM) Bana ba Yakoba bakapana muanabu Jozefe bu mupika kudi bangenda aba.

“MUABA UVUA UPETESHA BANTU MAKUTA A BUNGI KATSHIA KU KALE”

Bangenda mushinga ba mu Arabie ke bavua batamba kupanyisha bintu bia mupuya muimpe munkatshi mua bidimu nkama ne nkama. Anu bobu nkayabu ke bavua balua ne bintu bia mupuya muimpe bia mu Asie bu mudi kasia ne cinnamone. Bu muvuabu basue kupangisha bena mu Mediterane bua kuikalabu basumbila bintu anu ku Est muaba uvuabu babipanyishila, bena Arabie bakamuangalaja mianu ya dishima ivua yenza buôwa, ileja njiwu ivua bantu mua kupeta pavuabu bakeba bintu bia mupuya muimpe. Mukanda kampanda udi wamba ne: muaba uvuabu bapanyina bintu ebi uvua “pamuapa muaba uvua upetesha bantu makuta a bungi katshia ku kale.”​—The Book of Spices.

Mmiyuki kayi ivua bena Arabie batangalaje? Mumanyi wa malu a kale muena Greke diende Hérodote wa mu siekele muitanu kumpala kua Yezu, udi umvuija mianu ya nyunyi ivua yenza buôwa yenza masua ayi ne mitshi ya cinnamone mu mbuebue ivua bantu kabayi mua kubuela. Wakafunda ne: bua kupeta bintu bia mupuya muimpe ebi, bantu bavua babiangula bavua bateka mabulu a minyinyi kuinshi kua lubuebue. Pavua nyunyi eyi izuka bua kukoka minyinyi ya bungi mu muasua ayi, masua avua amata panshi. Nunku, bantu bavua mua kuangula cinnamone ivua mienza nayi masua aa ne lukasa luonso bua kuya kuyipana kudi bangenda mushinga. Miyuki eyi yakatangalaka bikole mu bantu. Nunku, mukanda kampanda udi wamba kabidi ne: “bua njiwu ivuabu bafuikakaja mu mutu eyi, bantu bavua bapana mitshi ya cinnamone ku mushinga mukole menemene.”​—The Book of Spices.

Panyima pa matuku, bantu bakalua kumanya mayele a bena Arabie ne kabatshivua kabidi babasumba bintu to. Mu bidimu lukama bia kumpala kua Yezu, tshimenga tshia Alexandrie mu Ejipitu tshiakalua tshisabu tshinene ne muaba uvuabu bapanyishila bintu bia mupuya muimpe. Matu a mu Lomo avua umbuka mu bisabu bia mu Ejipitu matangile ku Inde, diakamue bendeshi ba matu bakalonga mua kuendesha matu abu ne tshipepele tshikole tshia pa Mbuu mualabale wa Inde. Biakenza bua bintu bia mupuya muimpe bivua mushinga mukole ebi bivulangane bikole ne bipueke mushinga.

Lelu eu katuena mua kufuanyikija mushinga wa bintu bia mupuya muimpe ebi ne wa ngolo to. Katuena mua kubiangata kabidi bu mapa adi makumbanyine mukalenge to. Kadi bantu ba bungi pa buloba bujima badi batungunuka ne kuenza nabi manananshi a pambidi, manga ne bua kulengeja nabi biakudia biabu. Bushuwa, buimpe bua bintu bia mupuya muimpe budi busaka bantu bua kubinanga bikole anu bu muvuabi kukadi bidimu bia bungi.