Tuambuluishayi Bakuabu Bua Kupetabu Masanka
1 Yehowa udi ulaya bua kutulongesha tshitudi ne bua kumanya. Mu Musambu wa 32:8, udi ufila dilaya edi: ‘Nenkuyishe lungenyi, nenkuleje njila uudi ne bua kuendela, nenkupe meji patshidi dîsu dianyi kuudi.’ Dijadika edi didi mpokolo wa masanka mavule buetu. Bikala ne lungenyi lua didilambula, tudi tujinga kuleja kudi muntu netu bilenga bidiye mua kupeta pa kulonda mibelu ya meji ya mu Bible. (Yesh. 48:17) Ke tshiwenza pa kufila mukanda wa Muoyo wa kashidi mu Luabanya. Mu mbuelelu yebe, udi mua kuleja mu mishindu mishilangane mushinga wa Bible.
2 Bu mudi ntatu ya mu dibaka mipita kutangalaka mu tshikondo tshietu, udi mua kufila lungenyi elu pa kushindamena pa mukanda wa “Muoyo wa kashidi”:
◼ “Bantu bavule bandi muyukidilangane nabu badi banyingalala bua divula dia dikema dia ntatu mu dibaka ne bungi bua mabaka adi afua. Udi wela meji kayi bua nsombelu eu? [Lekela muntu andamune.] Ba bungi kabena bajingulula tubingila tuondoke tua ntatu eyi nansha. Bu bikala bena mabaka bavua badiakaje bua kuenza madikolela ne muoyo umue, kabavua anu mua kupandisha dibaka diabu, kadi bavua kabidi mua kulabula disanka dilelela. Ditumikila mibelu ya mu Bible didi diambuluisha bua kuikala ne nsombelu wa disanka mu dibaka.” Bala Efeso 5:28, 29, 33. Bulula mukanda mu dibeji dia 243, nukonkonone tshikoso tshia 16 ne tshia 17, pashishe ufile mukanda.
3 Bana badi bakengela ne: baledi babu babalamine bikondo bia pa buabi ne batabalele dishidimunyibua diabu. Pa kuleja mukanda wa “Muoyo wa kashidi,” udi mua kuamba ne:
◼ “Tudi bonso tuteya ntema bua nsombelu wa matuku adi alua wa bana betu balela. Bua kuebe kumona, mmushindu kayi mupita bulenga udi baledi mua kulongoluelabu bana babu nsombelu mulenga bua matuku adi alue? [Lekela muntu andamune.] Tuteleje mubelu eu wa mu Bible udi lusumuinu elu lufunda kukadi bidimu bu 3 000 lufila. [Bala Nsumuinu 22:6.] Nansha bikala bana betu bababidila bikole dilongesha dia mu kalasa, baledi babu, mu dîku, ke badi babapetesha dishidimunyibua dipite bulenga. Didi dilomba dîba, ditabalela ne dinanga, kadi didi bushuwa diakanyine madikolela.” Bulula mukanda mu dibeji dia 245 ne nukonkonone tshikoso tshia 20 ne tshia 21. Pashishe, umvuije mushindu wa kutumika ne mukanda eu bua kulonga Bible mu dîku.
4 Imue misangu neujinge kuleja mukanda wa “Muoyo wa kashidi” pa kumvuija ne: buloba nebulue mparadizu:
◼ “Nudi nudiebeja bushuwa ne: nnsombelu wa mushindu kayi udi mutuindile mu matuku adi alua. Mu disambila dia Tatu Wetu, Yezu wakatulongesha bua kusambila ne: disua dia Nzambi dienzeke pa buloba bu mudidi dienzeka mu diulu. Buloba nebulue mushindu kayi pakumbana mêyi aa? [Lekela muntu andamune.] Monaku tshimfuanyi tshizola tshia buloba ebu bua mparadizu. [Leja tshimfuanyi mu dibeji dia 12 ne dia 13. Pashishe ubale Yeshaya 11:6-9, muleja mu tshikoso tshia 12.] Kabiena bilengele kusomba muaba wa mushindu eu anyi? Mukanda eu udi umvuija bidi bikengedibua bua dîku diebe ne wewe muine nusombe mu mparadizu eu.”
5 Bidi bia mushinga bua kulongolola dileja diebe biwajinga kupeta dilubuluka ku nzubu ne ku nzubu. Kumpala kua kukokola ku tshiibi kampanda, wikale mudiakaje bua kumanyisha lungenyi kampanda lusunguluke lua mu Bible. Wikale kabidi mulame mu lungenyi diumvuija dia mu tshikoso pa lungenyi kampanda lua milowo lua mu tshibejibeji peshi lua mu trakte utudi tujinga kufila bikala muntu mubenge mukanda. Mu ngondo wa Luabanya, tubabidilayi misangu yonso idi itumuenekela bua kukuna ntete ya Bukalenge. (Muambi 11:6) Nenku netuambuluishe bantu netu bua kupetabu masanka a kashidi.