Tuikalayi Bilejilu Mu Mêyi ne Mu Tshikadilu

¹ Mupostolo Paulo wakabela Timote bua kulua tshilejilu mu mêyi ne mu tshikadilu. (1 Tim. 4:12) Tuetu petu, tudi ne bua kuikala ne mêyi ne tshikadilu bia tshitembu, nangananga patudi tukumbaja mudimu wetu, bualu bidi mua kujadika né tudi mua kulenga mioyo ya bantu batudi tutuilangana nabu.

² Ngikadilu yetu mimpe idi ne bua kumueneka mu malu onso, mbuena kuamba ne: bukalanga buetu, ditua dietu dia bakuabu mushinga, bulenga buetu, kanemu ketu ne mbabi yetu. Mu dileja ngikadilu eyi, netuleje ne: tudi bamanye buenzeji budi bienzedi bietu mua kuikala nabu pa majinga a bakuabu. Tudi mua kufuanyikija ngikadilu milenga mu mudimu ne mukele udi wambuluisha bua kuvudija muenya wa biakudia. Katshiyi mukele, tshiakudia tshimpe netshilue tshitalale ne katshiyi tshisankisha bua kutshidia. Dipanga ngikadilu milenga mu malanda etu ne bakuabu nedikale ne buenzeji bua mushindu umue.​—⁠Kolos. 4:⁠6.

³ Tuikalayi bilejilu mu mêyi: Mimuemue ya bulunda ne dielangana muoyo wa musangelu mmalu a mushinga mukole a dimuangalaja dietu dia lumu luimpe. Paudi ‘ulùnga’ mbuelelu webe ne luya ne muoyo umue, muteleji webe neumvue ne: udi umutabalela bushuwa. Padiye wakula, umuteleje bimpe ne unemeke mmuenenu wende bu mudibi bikengela. Paudi wakula, wakule ne mbabi ne disanka.​—⁠Tangila Bienzedi 6:⁠8.

⁴ Bitu bienzeka imue misangu ne: tutuilangane ne muntu ukena witaba, nansha muena luonji. Mmunyi mutudi mua kuenza? Petelo udi utukankamija bua kuakula ne “lutulu ne kanemu kondoke.” (1 Pet. 3:15, NW; Lomo 12:​17, 18) Yezu wakamba ne: pikala muntu mubenge mukenji wa Bukalenge ne kapeje konso, tudi ne bua ‘kututula nsenga idi mu makasa etu.’ (Mat. 10:14) Mu dilama ngikadilu ikena kadiwu mu nsombelu bu nunku, tudi mua kutuyisha mioyo ya bantu bena luonji.

⁵ Tuikalayi bilejilu mu tshikadilu: Kumanyisha lumu luimpe mu misesu ne miaba ya patoke kudi kutulomba bua kuikala ne kanemu, kuikala ne lubatshi, kubenga kufiatutuka ne kubenga kutatshisha bapitshi ba njila. Patudi mu mbanza ya bantu badi basankidila bulelela, tudi ne bua kulama ngikadilu ya bukalanga ne kuenda bu bantu bakalanga, badi baleja dianyisha diabu bua dibakidila didibu babaleja. Muana yonso udi utushindikija udi ne bua kunemeka batuakididi betu ne bintu biabu, ne udi ne bua kuteleja muyuki ne kanemu. Bana ba mutu mukole badi bafila mmuenenu mubi.​—⁠Nsum. 29:⁠15.

⁶ Pa kumona tshimuenekelu tshietu, muntu nansha umue kedi mpata ne: tudi ba-ministre ba Dîyi dia Nzambi. Mvuadilu wetu ne mmuenekelu wetu kabikadi bia buvualavi peshi bidilekelele to, kabikadi bitua mu mêsu anyi kabidi ne dinekesha to. Tshimuenekelu tshietu tshidi ne bua kuikala tshiakanyine lumu luimpe! (Tangila Filipoi 1:​27.) Pa kulama ntema ya pa buayi ku tshimuenekelu tshietu ne ku malu makuabu, katuena tufila kabingila nansha kamue bua kulenduisha muntu anyi bua kudiwulabu mudimu wetu. (2 Kol. 6:​3, 4, NW) Mêyi etu ne tshikadilu tshietu bia tshitembu bidi bilengeja mukenji wa Bukalenge, ne bitumbisha Yehowa.​—⁠1 Pet. 2:⁠12.