Ngikadilu milenga ntshimanyinu tshia bantu badi badilambule kudi Nzambi

¹ Bantu ba bungi lelu kabatshiena ne ngikadilu milenga to. Mbua tshinyi nanku? Bantu badi baya ne malu amu lubilu lubilu bapanga nansha mua kuelaku meji ku malu a bukalanga bu mudi kuambila muntu ne: “Bu wewe mua kusua,” “Tuasakidila,” anyi “Mfuilaku luse.” Dîyi dia Nzambi diakamanyisha ne: bantu nebikale ne ngikadilu mibi mu matuku a ku nshikidilu. Kuambadi ne: bantu bavua ne bua kulua ‘badisui, baditumbishi, badileji, kabayi ne kusakidila, kabayi banangi ba bana babu, kabayi mua kudikanda, kabayi basue malu mimpe ne bena lukuluku.’ (2 Tim. 3:1-4) Malu onso aa mbimanyinu bidi bilela ngikadilu mibi. Bu mudi bena Kristo bikale bantu badi badilambule kudi Nzambi, badi ne bua kudimuka bua kabalu kulonga kalasa aka kabi ka bena panu ka dipanga dia kanemu kudi bakuabu.

² Ngikadilu ntshinyi? Tudi mua kumvuija ngikadilu milenga bu dimanya bimpe menemene meji a bakuabu, kumanya mua kusomba nabu mu ditalala. Bimanyinu bia ngikadilu milenga mbiobi ebi: kanemu, dimanya malu, bulenga, bukalanga ne ditabalela bakuabu. Ngikadilu milenga eyi idi ibangila pa dinanga didi muntu munange nadi Nzambi ne muntu nende. (Luka 10:27) Kayena ilomba tshintu bua kushisha kuyipeta to, kadi idi ne mushinga wa bungi mu dikolesha malanda etu ne bakuabu.

³ Yezu Kristo wakashiya tshilejilu tshimpe tshitambe. Misangu yonso uvua anu ulonda Mukenji wa Mushinga mukole wa ne: “Nuenzele bantu malu onso anudi basue banuenzele.” (Luka 6:31) Kabienaku bitusankisha bua kumona muvua Yezu utabalela ne munange bayidi bende anyi? (Mat. 11:28-30) Ngikadilu ya Yezu milenga kayivua ifumina mu mikenji mifunda mu mikanda to. Ivua ifumina mu mutshima muimpe wa kalolo. Tudi ne bua kuidikija tshilejilu tshiende tshimpe.

⁴ Mmu nsombelu kayi mudi bena Kristo ne bua kuleja ngikadilu milenga? Ng’anu mu bikondo bia pa buabi, padi muntu ujinga bua bakuabu bamuanyishe anyi? Nya mushinga bua kuyileja anu bua padibu basua kuitabijija bakuabu malu anyi? Tòo! Tudi ne bua kuikala ne ngikadilu milenga dîba dionso. Mmu mishindu kayi menemene mutudi mua kuditatshisha bua ngikadilu eyi kumuenekayi mu malanda etu ne bakuetu batudi nabu mu tshisumbu?

⁵ Ku Nzubu wa Bukalenge: Nzubu wa Bukalenge mmuaba wetu wa ntendelelu. Tudi tuyaku bualu Yehowa mmutubikile. Bua nanku, tudi benyi. (Mus. 15:1) Tutuku benyi ba tshitembu patudi tuya ku Nzubu wa Bukalenge anyi? Tudiku tutabalela bimpe mvuadilu wetu ne ndengejilu wetu wa mubidi anyi? Bushuwa tudi ne bua kuepuka didilengeja dinekesha didi kadiyi diakanyine anyi diela kalele. Nansha padibu baya ku mpungilu peshi mu bisangilu bietu bia ku lumingu luonso, bantu ba Yehowa mbamanyike bua mushindu udibu bamueneke bushuwa bu bantu bamanye malu badi baleja patoke ne: badi batshina Nzambi. (1 Tim. 2:9, 10) Nanku tudi tuleja kanemu kudi Eu udi mutubikile ne kudi bakuetu badibu babikila pabu.

⁶ Mushindu mukuabu utudi tuleja ngikadilu milenga mu bisangilu nkufika pa dîba. Tshia bushuwa, kabitu misangu yonso bipepele to. Bamue badi mua kuikala basombele muaba mule anyi bikale ne bana ba bungi ba kuanji kulongolola. Kadi mu bisumbu bikuabu, mbatentekele ne: bamanyishi 25 pa lukama batu ne tshibidilu tshia kufika panyima pa bamane kuimba musambu wa mbangilu ne benze disambila. Ebu mbualu bunene. Mbimpe tuvuluke ne: ngikadilu milenga idi yumvuija kabidi kuikala bamanye meji adi bakuabu mua kuela pa muanda eu. Yehowa, Mutubikidi wa malu malenga, mmulongolole didia dia mu nyuma edi bua dituambuluishe bonso. Patudi tufika pa dîba, tudi tuleja dianyisha dietu bua meji adiye nawu. Kabidi, kufika kunyima kua dîba mu bisangilu kudi kukebela bantu bakadi bafike kumpala ne bateleja ditanaji ne kabidi atshi ndipanga kubaleja kanemu.

⁷ Patudi tusangila pamue, tutuku tumona bantu bapiabapia badi balue mu bisangilu anyi? Kubajingila difika dilenga kudi kuleja kabidi ngikadilu milenga. (Mat. 5:47; Lomo 15:7) Kubela muoyo wa disanka ku tshianza, kufukisha mimuemue, bionso ebi mmalu atutu tuenza pa tshibidilu kadi adi adisakidila pawu ku adi atusunguluja bu bena Kristo balelela. (Yone 13:35) Muntu mukuabu uvua mulue bua musangu wa kumpala ku Nzubu wa Bukalenge wakamba ne: “Ngakapetangana mu dituku dimue patupu ne bantu ba bungi ba dinanga dia bushuwa, bantu bikale wabu mushindu, ne tshitu muanji kupetangana ne bantu ba mushindu’eu mu tshitendelelu mundi mukolele. Biakandeja patoke ne: mvua mupete muaba udi bulelela.” Tshipeta tshidi ne: muntu awu wakashintulula nsombelu uvuaye nende, ne ngondo muanda-mutekete kunyima wakatambula. Bushuwa, ngikadilu milenga idi mua kulela bipeta bimpe nansha kunyima kua matuku a bungi!

⁸ Bituikala tuleja benyi ngikadilu milenga, nanku tudi ne bua ‘kutamba kuenzela bena dîku dia bena kuitabuja bimpe.’ (Gal. 6:10) Mikenji idi yamba ne: ‘Unemeke muntu mununu [mulume anyi mukaji].’ (Lew. 19:32) Katuena ne bua kulengulula bantu ba nunku mu bisangilu bietu nansha.

⁹ Kuteya ntema mikole: Mu bisangilu bia tshisumbu, bena Kristo badi bakuatshila Nzambi mudimu badi balongesha bua tuetu petu kumona mua kupeta amue mapa a mu nyuma bua kutukolesha. (Lomo 1:11) Bidi mua kuleja ne: tudi bapange malu tuetu tubungila, tutshiankunya bintu mukana, tunungana ne badi basombe netu pamue, tuya dîba dionso ku nkumba, tubala malu makuabu a tshianana peshi tuenza malu makuabu dîba dia bisangilu. Bakulu badi ne bua kufila tshilejilu tshimpe pa bualu ebu. Ngikadilu milenga ya Buena-Kristo neyitusake bua kuleja ngamba-malu kanemu ka menemene padiye wenza muyuki wende pa kumuteleja ne ntema yonso.

¹⁰ Kabidi, bua kuleja kanemu kudi ngamba-malu ne bateleji, tudi ne bua kukanga telefone yetu ya ku bianza bua kayididi dîba dia bisangilu to.

¹¹ Ngikadilu milenga ne bana: Baledi badi ne bua kuikala misangu yonso bakontolola malu adi bana benza. Padi muana utuadija kudila anyi kuenza disalu dîba dia bisangilu utekela bantu mutoyi, mbimpe kupatuka nende pambelu lukasa bua kumulekesha mutoyi. Imue misangu bidi mua kuikala bikole, kadi uvuluke se: bidi bileja ne: udi uditatshisha bua bidi bakuabu mua kuela meji. Baledi badi ne bana batekete badi bamueneka bena disalu batu basungula bua kusomba pa bibasa bia panyima bua mutoyi wa bana kautambi kutatshisha bantu ne bua kumonabu mua kuikala bajuka dîba dia bisangilu bua kupatuka nabu pambelu. Nunku, bantu bakuabu bonso badi mua kubaleja kanemu pa kubashila bibasa bia panyima, pikalabi bikengela nanku.

¹² Baledi badi kabidi ne bua kukontolola malu adi bana benza kumpala ne panyima pa bisangilu. Bana kabena ne bua kunyemakana mbilu munda mua nzubu bualu bidi mua kukebesha njiwu. Kunyemakana kabidi mbilu pambelu kudi mua kukebesha njiwu, nangananga ku mêba a dilolo padiku muîdima. Diakula ne mêyi makole pambelu pa lupangu didi mua kusuya bena mutumba ne kunyanga lumu lua ntendelelu wetu. Baledi badi badienzeja ne muoyo umue bua kukontolola bidi bana babu benza munda ne pambelu pa Nzubu wa Bukalenge mba kuela kalumbandi bualu kuenza nunku kudi kulengeja disomba dietu mu buobumue.​—Mus. 133:1.

¹³ Mu dilonga dia mukanda: Tudi tuanyisha muoyo wa disanka wa bana betu badi bafila nzubu yabu bua tuikale tuenzelamu bisangilu bia tshisumbu. Patudi tubuelamu, tudi ne bua kunemeka bintu bia mu nzubu wa bende. Kumpala kua kubuelamu, tudi ne bua kututula malaba adi muinshi mua bisabata bietu bua katulu kushiya manyanu panshi anyi pa tapi wa bende. Baledi badi ne bua kutangila bana babu bua kujadika ne: badi mu nzubu mudi dilonga dienzekela. Nansha kasumbu kikale kakese bienze bu bishilangane ne mu tshisangilu, katuena ne bua kutuadija kudienzela malu mudi muoyo wetu musue mu nzubu mua bende to. Padi muana mutekete ujinga kuya ku nkumba, muledi wende udi ne bua kumufila. Kabidi, bu mudi dilonga dia mukanda dikale padi tshisangilu tshia tshisumbu, tudi ne bua kuvuala mushindu ututu tuvuala patudi tuya ku Nzubu wa Bukalenge.

¹⁴ Ngikadilu milenga idi ne mushinga: Kuikala ne ngikadilu ya buena-Kristo kudi kuvuija mudimu wetu ne lumu kabidi kukolesha malanda etu ne bakuabu. (2 Kol. 6:3, 4, 6) Mutudi batendeledi ba Nzambi wa disanka, tudi ne bua kuikala ne tshibidilu tshia kufukishaku mimuemue, kuikala ne mpala munzuluke ne kuikalaku kabidi tuenza tumue tu-malu tulenga tudi mua kusankisha bakuabu. Ngikadilu milenga eyi neyilengeje nsombelu wetu tuetu bantu badi badilambule kudi Nzambi.