Baledi​—Filayi tshilejilu tshimpe kudi bana benu

¹ Dîyi dia Nzambi didi dituambila ne: “Tatu [ne mamu] wa muntu muakane neatambe kusanka.” (Nsu. 23:24, 25) Ndibenesha kayipu bua baledi badi bafile tshilejilu tshimpe kudi bana babu! Muena mu komite wa filiale kampanda wakamba nunku bua baledi bende: “Bulelela ke buvua nsombelu wabu mujima, ndi musue panyi kubuvuija nsombelu wanyi mujima.” Ntshinyi tshidi bana ne bua kumona kudi baledi babu?

² Bikadilu bimpe ne kanemu ka bungi: Baledi badi ne bujitu bua kubueja munda mua bana babu ngikadilu mimpe. Muntu utu ulonga bikadilu bimpe padiye ubibandila ne ubidikija, ki ng’anu ku dilongesha dia mukana patupu to. Bu mudibi nanku, mbikadilu kayi biutu nabi? Bana bebe batuku bakumvua wamba ne: “umfuile luse,” “bu wewe mua kusua” ne “tuasakidila” anyi? Nutuku nuenzelangana malu ne kanemu ka bungi mu dîku anyi? Utuku uteya ntema padi bakuabu bakula anyi? Utuku uteleja bana bebe padibu bakuambila malu anyi? Ngikadilu mimpe eyi nudiku nuyileja ku Nzubu wa Bukalenge ne kumbelu kuenu anyi?

³ Makanda a mu nyuma mashindame ne mudimu wa lukunukunu: Muanetu kampanda udi muenze bidimu bipite pa 50 mu mudimu wa ku dîba ne ku dîba udi wamba ne: “Mamu ne tatu bavua tshilejilu tshilenga tshia dikema bua mushindu uvuabu banyisha bisangilu ne muvuabu ne lukunukunu mu mudimu.” Mmunyi muudi uleja bana bebe ne: udi uditatshisha bua kutabalela makanda a mu nyuma a bena mu dîku diebe? Nutuku nukonkonona pamue mvese wa ku dituku anyi? Nudiku ne dilonga dia mu dîku dia pa tshibidilu anyi? Bana bebe batuku bakumona ubala Bible ne mikanda ya Société anyi? Mmalu kayi atubu bumvua pautu wenza disambila bua dîku? Utuku uyikila ne bana bebe pa malu a mu nyuma adi adiundishangana, pa kuakula bua malu mimpe adi atangila bulelela ne tshisumbu anyi? Nutuku ne dijinga dikole dia kubuela mu bisangilu bionso ne kupatuka pamue mu buambi anyi?

⁴ Baledi, elayi meji pa tshilejilu tshinudi nufila kudi bana benu. Tshiotshi tshilenga, nebatshiangate ne mushinga mukole mu nsombelu wabu mujima. Mukaji wa mutangidi muena ngendu kampanda, ukadi mpindieu ne bidimu 70, wakamba ne: “Tshilejilu tshimpe tshia baledi banyi bena Kristo bena dinanga tshitshiena amu ne dikuatshisha kundi. Ne disambila dianyi dinene ndia kuleja dianyisha dianyi dionso bua bumpianyi ebu pa kukuata nabu mudimu biakane mu bikondo bionso bidi kumpala.”