Bakumbane Ne Bapeshibue Bia-mudimu Bua Kulongesha Bakuabu

 ¹ Yehowa wakafunkuna Mozese bua kuikalaye muleji-mpala wende, kadi muine eu kakadimona mukumbane bua kumanyisha Faraone mêyi a Nzambi. (Ekes. 4:10; 6:12) Pakambilaye Nzambi ne: kavua mumanye kuakula, Yelemiya wakaleja ne: kavua udimona mukumbane bua kuikala muprofete wa Yehowa. (Yel. 1:6) Bushuwa, ku ntuadijilu, bavua bapange didieyemena, kadi baprofete babidi aba bakadileja bantemu bena bukitu ba Yehowa. Nzambi wakabashidimuja mu mushindu mutambe bulenga.

 ² Lelu’eu, Yehowa udi utupetesha bitudi tukengela bua kuikala ne dieyemena mu mudimu wetu. (2 Kol. 3:4, 5; 2 Tim. 3:17) Bu mulongolodi wa biamu mupiluke ne muikale ne bia-mudimu bimpe, tudi ne biamu biakanyine bua kukumbaja mudimu ne nzanzu. Mu Luishi, netufile mukanda wonso wa mabeji 192 mupatula kumpala kua 1984 udi mu stoke mu tshisumbu. Nansha bikala biamu bia mu nyuma ebi kabiyi bipiabipia, biena-bualu bia mu Bible bidimu bidi amu malu mapiamapia ne nebiambuluishe bantu bua kumanya bulelela. Ngenyi mifila ìdì ilonda eyi idi mua kuakanyina mukanda kayi wonso utualeja.

 ³ Udi mua kusonsola dijinga dia kumanya Dîyi dia Nzambi pa kuakula bua dimanya-mukanda. Udi mua kutuadija diyuki pa kuamba ne:

◼ “Lelu’eu, badi bapita kuela kashonyi pa dimanya-mukanda dilenga. Bua diebe dimona, ndimanya-mukanda dia mushindu kayi ditudi ne bua kukeba bua kupeta diakalenga ne dilubuluka? [Teleja diandamuna.] Aba badi bapeta dimanya dia Nzambi badi mua kupetelaku masanka a kashidi. [Bala Nsumuinu 9:​10, 11.] Mukanda eu [tela tshiena-bualu tshia mukanda uudi uleja] mmushindamene pa Bible. Udi ukoka ntema ku mpokolo umuepele wa dimanya didi difikisha ku muoyo wa kashidi.” Fila tshilejilu tshisunguluke tshiangatshila mu mukanda. Biasanka muntu ne muoyo umue, mushila mukanda ku dipa dia pa tshibidilu ne pungayi dîyi bua dikumbulula.

 ⁴ Mu dialukila kutangila muntu unuvua bakule nende bua mushinga wa dimanya Bible, udi mua kuamba ne:

◼ “Musangu mushale, tuvua bamone se: Bible mmpokolo wa dimanya didi mua kutupetesha muoyo wa kashidi mu matuku atshilualua. Bushuwa, tudi ne bua kuenza madikolela bua kulonga mu Mifundu tshitudi tukengela kumanya. [Bala Nsumuinu 2:​1-5.] Bantu bavule batu bamona se: imue mvese ya mu Bible mmikole bua kuyumvua. Ndi musue kukuleja mu tshikoso ngenzelu ututu tutumika nende pa tshibidilu bua kuambuluisha bantu bua kumanyabu bivule pa malongesha a ntaku a mu Bible.” Bulula mukanda uuvua mumushile mu dibeji diakanyine ne leja kakese mua kuenza dilonga dia Bible. Biajinga mukuyukidishi bua kulonga pa tshibidilu, mumvuija se: newalukile bua kumutangila ne mukanda wetu wa dilonga wa Dimanya didi difikisha ku muoyo wa kashidi.     

 ⁵ Bantu ba bungi badi banyingalala bua miliyo ya bana badi bakenga pa buloba bujima. Pamu’apa udi mua kuambuluisha mukuyukidishi bua kumvuaye mmuenenu wa Nzambi pa nsombelu wabu wa dikenga pa kuamba ne:

◼ “Kakuyi mpata ukadi mupete mapiamapia pa bidi bitangila bana pa buloba bujima badi ne nzala, basama ne balekelela. Mmunyi mudi bibambalu bitangidi bia malu aa kabiyi bifika ku dilengeja nsombelu eu? [Teleja diandamuna.] Nzambi udi ujinga malu matambe buimpe bua bantu. Mona tshidiye ulaya mu Bible bua bana ne bakulumpe. [Bala Buakabuluibua 21:⁠4.] Mukanda eu [tela tshiena-bualu] udi ufila mamanyisha mavule pa bulongolodi buasa kudi Nzambi muikala kamuyi lutatu.” Bikalaku mushindu, leja tshimfuanyi tshia Mparadizu ne utshiumvuije. Fila mukanda ne enza malongolola bua kualukila.

 ⁶ Bituikala tuvua bakule bua makenga a bana musangu wa kumpala, tudi mua kutungunuja diyukidilangana mushindu’eu mu dikumbulula:

◼ “Musangu mushale pamvua mulue, uvua muleje dinyingalala diebe bua nsombelu wa dibungama wa bana badi mu mêku mapanduluke, peshi badi bafua ne nzala, basama ne badi bapetangana ne tshinyangu. Bidi bikolesha ku mutshima pa kumona se: Bible udi wakula bua bulongolodi muikala masama, lutatu ne lufu kabiyi bisubisha kabidi bana ne bakulumpe. Nsombelu mutambe bulenga pa buloba mmuleja mu mulayi kampanda wa mu mukanda wa Yeshaya.” Bala Yeshaya 65:​20-25 ne umvuija. Akula bua mushindu wa kulonga Bible ku diambuluisha dia mukanda wa Dimanya.

 ⁷ Bu mutu disambila dikale tshibidilu tshia bantu bena kuitabuja, udi mua kutuadija diyuki pa tshiena-bualu etshi pa kuamba ne:

◼ “Mu bimue bikondo bia muoyo wetu, bavule ba kutudi batu batuilangana ne ntatu itu itusaka bua kusambila Nzambi bua kupeta diambuluisha diende. Kadi ba bungi batu bela meji ne: masambila abu kaena mandamuna. Mbimueneke mene se: masambila menza patoke kudi bamfumu ba bitendelelu bua ditalala kaena mateleja. Tudi tuamba nunku bualu mvita ne tshinyangu bitshidi bitungunuka ne kutatshisha bukua-bantu. Nzambi utuku uteleja bushuwa masambila anyi? Bikalabi nanku, bua tshinyi masambila a bungi adi amueneka bu mukanda mufundila muntu kampanda kakuyi diandamuna diawu? [Teleja diandamuna.] Musambu wa 145:18 udi umvuija tshidi tshikengela kuenza bua masambila etu atelejibue. [Bala mvese eu.] Tshia kumpala, masambila matuma kudi Nzambi adi ne bua kuikala menza ne muoyo umue ne mikale mu diumvuangana ne bulelela budi mu Dîyi diende, Bible.” Leja mukanda mutumika nawu ne koka ntema pa tshidiwu wamba bua mushinga wa disambila.

 ⁸ Bua kutungunuja diyukidilangana divua diashila pa disambila, udi mua kuteta kuamba ne:

◼ “Mvua muanyishe mutuvua bakule nebe bua disambila. Kakuyi mpata, newitabuje se: Yezu wakatutuadila diambuluisha dilelela pa kumvuija lungenyi luende pa bitudi mua kulomba mu masambila.” Bala Matayo 6:​9, 10 ne ela kashonyi pa biena-bualu bia mushinga bivua Yezu muzangike mu disambila dia Tatu Wetu. Bulula mukanda wa Dimanya pa nshapita wa 16, udi ne tshiena-bualu tshia “Mushindu uudi mua kusemena kudi Nzambi,” ne ebeja né udi mua kuleja mushindu wa kuulonga.

 ⁹ Patutu tuakula ne bakuabu bua dimanya dia Nzambi, pamu’apa tutu tuebeja ne: “Nnganyi udi mukumbane bua malu aa?” Mifundu idi yandamuna se: “Tudi bakumbane.”​—⁠2 Kol. 2:​16, 17, NW.