Tshia Kuenza Ntshinyi Ne Bena Mu Dîku Diebe?

¹ Bavule ba kutudi badi ne bena mu dîku badi kabayi mu bulelela. Tudi tujinga bikole bua kumona bantu aba batudi banange baditua munyima muetu mu njila wa muoyo! Diditatshisha dietu bua nsombelu wabu wa tshiendelele wa matuku atshilualua didi mua kuikala ditambe bunene pikalabu bena mu nzubu muetu. Kukadi pamu’apa bidimu bivule bitudi tuteta bua kusonsola dianyisha diabu bua bulelela, kadi katuena ne bua kukoma ne: kakuena ditekemena.

² Nansha pavua Yezu uyisha, ‘bana babu ba difu dimue kabakamuitabuja.’ (Yone 7:⁠5) Musangu kampanda, bena mu dîku diende bakela meji ne: uvua mujimije lungenyi. (Mâko 3:21) Pabi, Yezu kakabangata bu bajimine nansha. Bana babu bakafika ku ditaba bulelela. (Bien. 1:14) Yakobo, muana wa mamuende wakalua dikunji dia tshisumbu tshia bena nkristo. (Gal. 1:​18, 19; 2:⁠9) Bituasua kupeta disanka dia kumona bena mu dîku dietu bakidila bulelela, katulekedi bua kuteta kubalenga ne lumu luimpe lua Bukalenge.

³ Tuikale bakoleshanganyi mitshima, ki mbabungamijanganyi: Bantu bavua Yezu uyisha bavua badiumvua bakoleshibue mitshima, ki mbasuyibue nansha. (Mat. 11:​28, 29) Kavua ubabungamija ne malongesha avuabu kabayi mua kumvua. Bituasua kukolesha mitshima ya bena mu dîku dietu ne mâyi a bulelela, tubanuishe dikopo dimue ku musangu, ki mbeketshi mûle tente nansha! Mutangidi muena ngendu kampanda wakamba ne: “Batu bapatula bipeta bitambe buimpe ne bena mu mêku abu ng’aba batu basonsola dijinga diabu pa kufila bumanyishi ku kakese ku kakese.” Mu mushindu eu, imue misangu nansha baluishi batu bafika ku diela nkonko ne, ndekelu wa bionso, bapeta nyota ya bulelela.​—⁠1 Pet. 2:​2; fuanyikija ne 1 Kolinto 3:​1, 2.

⁴ Bena nkristo bavule basele mbafile bumanyishi bulenga kudi bena dibaka nabu pa kushiya mukanda mubulula mu dibeji dìdì mua kukoka ntema yabu. Muanetu wa bakaji kampanda uvua wenza nanku wakalonga mene ne bana bende mu mushindu wa bayende kutelejaye, ufila mumvuija avua mua kumuambuluisha. Imue misangu, uvua umuebeja ne: “Lelu, ndi mulonge bualu kampanda ne kansanga mu dilonga dianyi. Udi wela meji kayi pa bualu ebu?” Ndekelu wa bionso, bayende wakitaba bulelela.

⁵ Tuikale ne kanemu, katuyi bapange lutulu: Mumanyishi mukaji kampanda wakamba ne: “Nansha bena mu dîku pabu badi ne bukenji bua kulamata ku mmuenenu wabu.” Nenku tudi ne bua kuleja kanemu padibu bafila ngenyi yabu peshi batulomba mu mêyi masunguluke bua katuyukidi nabu pa bulelela. (Muam. 3:7; 1 Pet. 3:15) Mu dikala nabu lutulu, ne dinanga, mu dimanya kubateleja bimpe, tudi mua kudiakaja bua kubabidila bikondo bia kufila bumanyishi buzanzamuke. Bidi mua kuikala bimpe bua kulama lutulu, bu mudibi bileja kudi muyuki wa muena nkristo wakakama dimutatshisha mu bule bua bidimu 20 kudi mukajende uvua kayi ne ditabuja dimue nende. Bu muakatuadija mukajende kushintuluka, muena nkristo eu wakamba ne: “Ndianyisha kayipu dindi nadi kudi Yehowa bua mushindu uvuaye mungambuluishe bua kudima muoyo mule, bualu mpindieu ndi mmona tshipeta tshiawu: Mukajanyi watuadiji kuenda mu njila wa muoyo!”

⁶ Tshia kuenza ntshinyi ne bena mu dîku diebe? Pamu’apa, ku diambuluisha dia ngikadilu webe muimpe wa Buena-nkristo ne dia masambila ebe mabenzela, “udi mua kubatshimuna bua Yehowa.”​—⁠1 Pet. 3:​1, 2, NW, note kuinshi.