Mmunyi mutudi mua kuyisha balela betu?

1. Bua tshinyi busunguluji budi ne mushinga patudi tuyisha balela betu?

¹ Netshikale disanka dinene be bua kubuela mu bulongolodi bupiabupia ne balela betu, bikala nabu mu ntendelelu wa Yehowa! Bualu bua mushindu eu budi mua kuenzeka bituikala tuyisha balela betu. Nansha nanku, bua kufika ku dibayisha mu mushindu muimpe, bidi bikengela kuikala ne busunguluji. Mutangidi wa tshijengu mukuabu udi wamba ne: “Bantu badi bapatula bipeta bimpe ng’aba badi bajula balela babu nyota ya kumanya malu a Nzambi ndambu ndambu.” Mmunyi mutudi mua kuenza nunku?

2. Mmunyi mudi ditabalela mulela wetu ne muoyo mujima mua kutuambuluisha bua kumujula nyota ya kumanya malu a Nzambi?

² Kujula nyota ya kumanya malu a Nzambi: Udianjile kuela meji bimpe bimpe pa mushindu uudi mua kujula balela bebe nyota ya kumanya malu a Nzambi. (Nsu. 15:28) Mmalu kayi atu atamba kubasankisha? Nntatu kayi idibu nayi? Udi mua kubaleja tshiena-bualu anyi mvese kampanda udi wakula pa bualu abu. Bikala balela bebe basombele kule nebe, udi mua kuyikila nabu nunku ku nshinga anyi pa kubafundila mikanda. Ukune ntete ya bulelela ne windile bua Yehowa ayikoleshe, pamutu pa kubambila malu a bungi musangu umue.​—1 Kol. 3:6.

3. Mmunyi mudi disua kumanya malu etu dia balela mua kutunzuluila njila wa kubayishila?

³ Yezu uvua muambile muntu uvuaye mupatule demon ya bungi ne: ‘Uye kuebe kudi balunda [anyi balela] bebe, ubamanyishe malu manene akukuenzela Mukalenge ne luse luakukufueye.’ (Mâko 5:19) Anji tshinkabi tshivua mua kuikala tshienzeke pakakulaye ne balela bende! Nansha mudi malu kaayi mua kuenzeka buebe mushindu eu, balela bebe batu anu basua kumanya malu ebe ne a bana bebe. Kubambila bua muyuki muimpe uuvua muenze mu Kalasa ka Mudimu wa Nzambi, bua mpungilu uuvua mubuele, muuvua muye kutangila nzubu ya Betele anyi kubambila bualu kampanda buimpe mu nsombelu webe, kudi mua kukunzuluila njila wa kubambila malu malenga pa bidi bitangila Yehowa ne bulongolodi buende.

4. Mmateyi kayi atudi ne bua kuepuka patudi tuyisha balela betu?

⁴ Ikala ne busunguluji: Paudi uyisha balela, ki mbimpe kubambila malu a bungi musangu umue to. Muanetu wa balume kampanda udi uvuluka tshikondo tshivuaye utuadijilaku dilonga Bible, udi wamba ne: “Patuvua tujikija dilonga, mvua ngambila Mamu malu onso amvua mulonge mu Bible au, nkoka a eku ne kuaka; misangu ya bungi mvua mfika ku dikokangana ne Papa.” Nansha bikala mulela wetu ujinga kumanya malu a bungi, umuandamune mu mushindu udi umushiya ne nyota ya kumanya kabidi malu makuabu. (Nsu. 25:7) Wikale amu ne kanemu, ne bulenga ne lutulu anu bu muutu pautu uyikila ne bantu mu buambi.​—Kolos. 4:6.

5. Netuenze tshinyi bikala balela betu babenge ne: tubayishe?

⁵ Umue musangu balela babu ne Yezu bakela meji ne: uvua mujimije lungenyi. (Mâko 3:21) Kadi panyima pa matuku, bamue ba kudibu bakamuitabuja. (Bien. 1:14) Balela bebe bobu babenge kukuteleja musangu wa kumpala, kuteketshi mu mikolo to. Nsombelu ne mmuenenu yabu bidi mua kushintuluka. Tungunuka ne kukeba dîba dikuabu dia kubambila malu adi mua kubakeba nzala. Pamuapa neubambuluishe bua kutuadija kuendela mu njila udi ufikisha ku muoyo wa tshiendelele.​—Mat. 7:13, 14.