Tshivulukilu—Muanda Wa Mushinga Mukole
1 Mu Dia lumingu dia 23 Luabanya, kunyima kua dibuela dia dîba, netusekelele Tshivulukilu tshia lufu lua Kristo. (Luka 22:19) Kakuyi mpata, muanda eu ng’wa mushinga mukole! Mu dilama muoyo mutoke wende kudi Yehowa too ne ku lufu, Yezu wakaleja ne: kudi mushindu bua muntu kushalaye mulamate tshishiki kudi Nzambi nansha muikale mu tshikondo tshia ditetshibua dikole, nenku kubingishaye bululame bua bumfumu bukulu bua Yehowa. (Eb. 5:8) Kabidi, ku diambuluisha dia lufu luende Kristo mmufile mulambu wa bu-muntu mupuangane uvua ukengedibua bua kusungila bukua-bantu, upetesha aba badi ne ditabuja mushindu wa kuikala ne muoyo wa kashidi. (Yone 3:16) Dikalaku dietu mu Tshivulukilu, didi dileja dianyisha dietu diondoke bua dinanga dia Yehowa ne bua mulambu wa Yezu mutufidila.
2 Bonso tudi bakankamija bua kulonda programe wa dibala dia Bible mulongolola bua dia 18 too ne dia 23 Luabanya mufunda mu Calendrier des Témoins de Jéhovah 1997. Ku lukuabu luseke, diyukidilangana dia mu dîku dia nshapita 112-16 ya mu mukanda wa Le plus grand homme de tous les temps nedituambuluishe bua kuashila ntema yetu pa lumingu lua mushinga mukole lua mu miyuki ya bantu.
3 Tudiku mua kuvudija dipatuka dietu mu buambi mu tshikondo tshia Tshivulukilu anyi? Mu Luabanya, bamanyishi bavule nebababidile tshishiki matuku a ndekelu a mbingu atanu bua kuikala bampanda-njila bambuluishi. Bua tshinyi kuena pebe mua kuenza nunku? Tudi bonso mua kuenza muetu muonso bua kuleja bantu mushinga wa dibuela mu Tshivulukilu. Bu muikalatshi mu Dia lumingu, nebikale bipepele bua bantu ba bungi kubuelamu. Tutabalelayi bua kubikila aba bonso badi balonga Bible pamue ne bantu bakuabu badi badiakaje bimpe. Tuyukidilangane nabu pa bidi biamba mu dibeji 127 dia mukanda wa Dimanya, tshikoso 18, pa bidi bitangila difesto didi bantu ne bua kusekelela tshidimu tshionso.
4 Tuanyishayi muanda eu, mutambe yonso mushinga wa mu 1997, pa kuikala bamanye tshishiki bionso bidi lufu lua Yezu luleja kutudi. Tuikalayiku mu dilolo edi dia 23 Luabanya muasekelelabu ne lulamatu Tshivulukilu kudi bena nkristo balelela ba pa buloba bujima.