Tuambuluishe Bantu Bakena Bapiluke Bua Kumvuabu
1 Ku diambuluisha dia mudimu wa dienza bayidi, tudi tulongesha bantu bakuabu tshidi Nzambi ubalomba. (Mat. 28:19, 20) Pa bualu ebu, madikolela a bungi mmenza pa buloba bujima kudi Bantemu bapite pa miliyo itanu. Dilubuluka ki nditshintshikila pa bungi bua mêba, mikanda mifila, peshi malonga a Bible matuadija nansha. Tudi tukumbaja tshipatshila tshietu padi bantu bumvua ne benza malu mu diumvuangana ne bidibu balonge.
2 Bua kubambuluisha mu nyuma, bidi bikengela ‘kumvuija bantu bakena bapiluke.’ (Mus. 119:130, NW) Bidi bilenga mutshima wabu ne bibasaka ku dienza bimpe anu padibu ‘bamanya bimpe.’ (Mat. 15:10) Bu mudi mudimu wetu udiunda ne ukola, tudi tujingulula bimpe dikengedibua dia kuakula ne kulongesha mu mushindu mupepele. Ke bua tshinyi Société mmupatule broshire wa Ntshinyi tshidi Nzambi utulomba? Udi ufila dilongesha dijima pa malongesha a nshindamenu a mu Bible. Malongesha mîpi, ngakuilu mupepele, ne dilongesha dipepele bua kumvua, ke tshidi tshivuija broshire eu mukumbanyine bua bantu ba bungi.
3 Mu Tshisanga ne mu Lumungulu, netumufile pa kusakidila pa bibejibeji. Patuadilongolola bua lumingu luetu lua buambi, tudi babedibue bua kudiakaja bua kufila bibejibeji mu Disambombo ne bua kutumika ne broshire mu matuku adi mashale a mu lumingu. Tumuleje kudi aba bakadi bitabe mikanda yetu mu matuku mapite. Tuvuluke ne: broshire udi mua kuikala ne dikuatshisha dinene bua dilongesha dia bana, dia bantu badi bakula muakulu muenyi ne aba badi ne lutatu lua kubala.
4 Tutuadije diyukila ne bantu mu mushindu mupepele: Patudi tuleja broshire wa Utulomba, tutangile mu dibeji 2 mudibu bumvuije ne: “mmuakaja bu mukanda wa dilonga nawu Bible.” Tukoke ntema pa tshikoso 3, dibeji 3, bua kuleja muntu bua tshinyi udi ukengela kulonga Bible. Tusonsole dijinga diende dia kumanya ku diambuluisha dia biena-bualu bia amue malongesha adi aleja malelela mapepele a mu Bible. Tumuleje ne: broshire eu udi uvuija dilonga dilenga ne tumuebeje bua tuetu kumuambuluisha.
5 Tulombole dilonga didi ditungunuka: Tshipatshila tshietu katshiena amu tshia kulombola malonga patupu, tudi kabidi tujinga kuenza bayidi baalua babingishi ba tshisumi ba ntendelelu mulelela. Broshire eu udi mua kujika mu mbingu mikese, ne dikonkonona edi didi ne bua kufikisha buludiludi ku dilonga dia mukanda wa Dimanya. (Tangila note kuinshi kua dibeji 31.) Anu ku ntuadijilu, tuambuluishe mulongi bua kusunguluja bulongolodi bua Yehowa. (Tangila Comment raisonner mabeji 273-4.) Tuakule ne dishindika pa mushinga wa bisangilu bia tshisumbu ne tumvuije ne: dibuelamu didi diambuluisha bua kumvua ku kakese ku kakese mushindu wa kutendelela Nzambi mu bukezuke.—Eb. 10:24, 25.
6 Bidi bilelela se: bituadifila tshishiki mu mudimu eu wa pa buawu mu Tshisanga ne mu Lumungulu, netupete disanka dia kuambuluisha bantu ba muoyo muimpe bua ‘kupetabu dijingulula dia mianda’ didi difikisha ku muoyo.—Nsu. 4:5.