Tutabalelayi Diambedi Malu Adi Matambe Mushinga
1 Ng’amue malu kayi a mushinga mukole adi ambuluisha bumuntu buimpe bua mu nyuma? Ku bungi bua malu aa kudi dilonga dia muntu pa nkayende, dibuela mu bisangilu, dinanukila mu disambila, ditantshilangana dilenga ne mudimu wa Buena-nkristo. Katuena mua kushala ne makanda mimpe a mu nyuma bituapanga kulama malu aa a mushinga pa muaba wa kumpala mu nsombelu wetu.
2 Kadi, bonso tudi tuluangana mvita bua kuepuka majinga a mubidi ne tudi tukengela mibelu ne manyoka. (Gal. 5:17) Katuena ne bua kuela meji nansha kakese ne: dilonda masanka a budisui didi mua kutuambuluisha. (Yel. 17:9) Nenku, bituajinga kulama mutshima wetu ne katuyi tupambuka, bidi ne mushinga bua tudikonkonone pa tshibidilu.—Nsu. 4:23; 2 Kol. 13:5.
3 Tukonkonone mutshima wetu: Bua nanku, tudi mua kudiela nkonko idi ilonda eyi ne muoyo umue: Ntu ne dijinga dikole dia kubala Dîyi dia Nzambi anyi? (1 Pet. 2:2) Ndiku mumanye mushinga wa dibuela mu bisangilu bionso bia mu tshisumbu anyi? (Eb. 10:24, 25) Ndi nnanukila mu disambila anyi? (Lomo 12:12) Ntu nkeba balunda badi ne nsombelu muimpe wa mu nyuma anyi? (Lomo 1:11, 12) Ndi ndienzeja bua kumanyisha lumu luimpe anyi? (1 Kol. 9:16) Bituandamuna ne: eyowa, ku nkonko eyi, mmuomumue ne: tudi ne dijinga dia kutabalela diambedi malu adi matambe mushinga.
4 Tukonkonone programe wetu wa dituku dionso: Bua kuenza malu mu diumvuangana ne dikonkonona dia majinga a mutshima wetu, bidi bitukengela kuteka malu a mushinga pa muaba wa kumpala mu mushindu utudi tutumika ne dîba dietu. Ebi bidi biumvuija ne: kudilamina tshikondo tshia kubala Bible pa tshibidilu ne tshibejibeji tshionso tshia Tshibumba tshia Nsentedi ne Réveillez-vous ! ne tshia kulongolola bisangilu. Bidi kabidi bikengela kulama tshikondo bua kuikala pamue ne dîku, bua dilonga peshi bua disambila popamue. Tuteke mikalu mu dîba dipitshisha ku ordinatere anyi mu ditangila televizion. Tuikale ne dipangadika dia kubuela mu bisangilu bionso bia tshisumbu ne dia kubiteka kumpala kua malu makuabu onso. Tudilongolole lumingu luonso bua kuyisha pamue ne dîku.
5 Kakuyi mpata nansha mikese, bituatabalela diambedi malu adi matambe mushinga mu nsombelu wetu, netupete disanka.