Longa mua kumanya bana benu
1 Bible udi umvuija mulunda mulelela bu muntu udi ulamata mukuende bikole kupita muanabu, udi misangu yonso ne dinanga ne bulamatshi, ne wambuluisha mukuende padiye mu dikenga. (Nsu. 17:17; 18:24) Katuakupangila balunda ba nunku mu tshisumbu bituadienzeja bua kumanya bakuabu ne kubananga.—Yone 13:35.
2 Bikondo bilenga bia kumanyangana ne bana betu bitu bimueneka kumpala ne kunyima kua bisangilu. Bua tshinyi kubenga kufika kumpala kua dîba ne kushala katantshi panyima pabi bua kumona mua kudia malanda a bulunda ne a luya? Keba bana betu bashilashilangane bua kuyukila nabu, nansha bakulakaje bakadi bamonemone malu ne bansonga peshi aba badi kabayi bakula.
3 Tuadija mayuki: Kuedi bana benu anu muoyo wa mu lupitapita to. Udi mua kutuadija diyuki pa kulonda bualu kampanda bumona mu mudimu wa budimi, bualu budi bukoka ntema bua mu tshibejibeji tshipiatshipia, anyi kuakula bua tshisangilu tshia dituku adi. Udi mua kumanya malu a bungi a bana benu pa kuikala muteleji muimpe, udi mua kubakankamija bua balonde malu akadibu bamone ne bidibu balonga. Kuebeja patupu muntu mushindu wakafikaye ku dimanya Yehowa kudi mua kutumanyisha malu a bungi. Bamue bavua bamone malu adi akolesha ditabuja, eku bakuabu bikale bakama nsombelu mikole too ne lelu idi ba bungi kabayi mua kuelela meji. Dimanya malu onso aa nedituambuluishe, bu balunda balelela, bua kuikala ne muoyo wa luse ne kuandamuna ku majinga a bakuabu.
4 Didia bulunda ne bakuabu: Kunyima kua lufu lua muanende mutekete, biakakolela muanetu kampanda wa bakaji bua kuimba misambu ya Bukalenge idi itela dibiishibua ku lufu. Udi uvuluka ne: “Dimue edi, muanetu kampanda wa bakaji uvua musombe ku luseke lukuabu wakammona ndila muadi. Wakumbuka kuvuaye, kungela diboko, ne kuimba nanyi tshitupa tshia musambu tshivua tshishale. Ngakadiumvua mûle tente ne dinanga bua bana betu ne musangale mushindu utuvua mu bisangilu, pa kujingulula se: ke muaba udi diambuluisha dietu, ku Nzubu wa Bukalenge.” Tudi ne bua kudia bulunda ne bana betu pa kubasamba padibi bikengela ne kubakankamija dîba dionso.—Eb. 10:24, 25.
5 Bu mudi bulongolodi ebu bukulakaje buenda bututatshisha bikole, tuangatayi dipangadika dia kumanya bana betu bilenga. Dikankamijangana edi dilelela nedikale dibenesha bua bonso.—Lomo 1:11, 12.